Sooq inuuneq siunertaqanngitsutut misinnarpa?

QANOQ ililluni isumaqartoqarsinnaava inuuneq qaqugumulluunniit ‘naajajunnaarluni tarraannartut ikkunnaarumaartoq’, soorlu kunngip Salomop taama allaatigisimagaa? (Oqaluussisartup oqaasii 6:12) Guutip oqaasiani isumassarsiarititaasumi, Biibilimi — paasissutissanik tutsuiginarluinnartunik imalimmi — neriorsuutigineqarpoq inuuneq siunissami siunertaqarluarumaartoq. — 2 Timotheusi 3:16, 17.

Biibilimi allassimavoq Guuti nunarsuarmut aallaqqaammut qanoq siunertaqarsimanersoq. Aamma nassuiarneqarpoq silarsuarmi sooq taama naapertuilluanngissuseqartigalunilu naqisimannittoqartigalunilu naalliunnartoqartigisoq. Tamakkua paasinissaat sooq pingaaruteqarpa? Inuit inuunermik siunertaqanngilluinnartutut isiginninnerannut pissutaasorpiaq tassaammat Guutip nunarsuarmut inunnullu siunertaanik ilisimanninnginnerat — imaluunniit soqutiginninnginnerat.

Guutip nunarsuaq sumik siunertaqarfigaa?

Jehovap Guutip * nunarsuaq inuiaat angerlarsimaffissaattut paratiisiusutut — angutit arnallu naammalluinnartuullutik  siunertaqarluartumik nalerisimaarnartumillu naassaanngitsumut inuuffigisinnaasaattut — pinngortippaa. Ilumoortoq tunngaviusoq tamanna inuit amerlanersaannit upperineqartumut, Biibilimilli tunngaveqanngitsumut, akerliuvoq. Tassa inuit amerlanersaat isumaqarput Guutip nunarsuaq pinngortikkaa inunnik misiliiffissatut, paasiumallugu taakku anersaat silarsuaanni siunertaqarluarnerusumik inuusinnaatitaanersut. — Takuuk ungalusaq “Siunertaqarluartumik inuujumalluta nunarsuaq qimattariaqarparput?”

Guutip angut arnarlu pinngortippai imminik assililluni, nammineq pissusiminik nuannersunik ersersitsisinnaanngorlugit. (1 Mosesi 1:26, 27) Naammalluinnartuutillugit pinngortippai. Taakkua nalerisimaarnartumik siunertaqarluartumillu naassaanngitsumik inuunissamut pisariaqartitatik tamaasa pigaat. Tassa ‘amerliartortussaapput nunarsuaq tamakkerlugu imminnullu naalatsigitillugu’ nunarsuarlu tamaat Naatsiivittut Edenitut paratiisinngortillugu. — 1 Mosesi 1:28-31; 2:8, 9.

Susoqarami ingerlanerliortoqalerpa?

Erseqqippoq ajorluinnartumik pisoqarsimanera. Inuiaat ataatsimut isigalugit Guutip pissusiinik ersersitsinngillat. Aamma nunarsuaq paratiisiunngilluinnarpoq. Susoqarami? Inuit siulliit marluk, Adamip Evallu, piumasamittut iliorsinnaatitaanertik atornerluppaat. ‘Guutisut ilerusupput’ namminnerlu aalajangerusullugu suut ileqqussatigut ‘ajunngitsuullutillu ajortuussanersut’. Taamaalioramik Saatanip Diaavulup pineratut pikitsitsipput. — 1 Mosesi 3:1-6.

Ajussuseq Guutip pilersaarutaanut ilaava? Naamerluinnaq. Ajussuseqalerpoq Saatani — kingusinnerusukkullu Adami Evalu — Guutip naalagaassusianut pikitsitsimmata. Pikitsitsisoqarnerata kingunerisaanik inuit siulliit marluk angerlarsimaffitsik paratiisiusoq naammalluinnassusertillu annaavaat. Taamaalillutik ajorti toqulu atuutitilerpaat imminnuinnaanngitsoq, aammali kinguaaminnut — inuiannut tamanut. (1 Mosesi 3:17-19; Romamiut 5:12) Taamaattumik pissutsit inuunermik taama siunertaqanngitsigisutut misinnartitsisut ullumikkut atugaraavut.

Sooq ajussuseq ingerlaannaq peerneqanngila?

Ilaat immaqa ima eqqarsarput: ‘Sooq Guutip ajussuseq ingerlaannaq piinngilaa, Saatani pikitsitsisullu allat piuneerutsillugit aallaqqaataaniillu aallartilluni?’ Tamanna silatusaarnerussagaluarpa? Naalakkersuisut pissaanillit oqartussaassutsiminnik unammilliisunik tamanik ingerlaannaq toqutaatitsisartut pillugit tusagaqartuuguit illit qanoq misigissagaluarpit? Iliuutsit tamakku inunnit naapertuilluarnermik nuannarisalinnit mamiagineqassannginnerpat, aamma naalakkersuisut ileqqussatigut oqartussaassusiannik ataqqinnikkunnaassutaassannginnerpat?

Guuti aalajangerpoq pikitsitsisut ingerlaannaq iliuuseqarfigineqassanngitsut. Silatusaarluni utaqqigallarpoq naalakkersueriaatsini pillugu akerleriissutit naatsiivimmi Edenimi pilersinneqartut ataasiaammik aalajangiiffigineqarsinnaaniassammata.

Ajussuseq tamarmi peerneqassaaq

Matuma eqqaamanissaa pingaaruteqarpoq: Guutip ajussutsip taamaallaat piffissami killilimmi atuukkallarnissaa akueraa. Akueraa nalunnginnamiuk akerleriissutit pingaarutillit naalakkersueriaatsiminik akerlilersuisut pilersitaat aalajangiiffigineqarniariarpata ajussutsip kingunipiluinik alianartunik aaqqiilluinnarsinnaalluni.

Guutip nunarsuarmut inuiannullu siunertani isumakkiinngilaa. Pruffiiti Esaja aqqutigalugu Jehovap uppernarsaavigaatigut nunarsuarmik pinngortitsisuulluni aamma nunarsuaq ‘soqanngitsussanngorlugu pinngortinnagu, kisianni najugaqarfissanngortillugu’. (Esaja 45:18)  Qanittuararsuakkut nunarsuaq aallaqqaammulli siunertarisimasamisut ilerseqqissavaa. Naalakkersueriaatsimi eqqortuunera aalajangersarluinnarneqareerpat piumasani pitikkumallugu ajussusermillu suujunnaarsitsiumalluni pissaanerminik angingaartumik atuinissaminut pisinnaatitaalluinnassaaq. (Esaja 55:10, 11) Jiisusip Kristusip Ataatarpuumi Guuti qinnuigaa iliuuseqaqqullugu. Ima qinunissamik ilinniartippaatigut: “Piumasat qilammisut nunamissaaq pili.” (Matthæusi 6:9, 10) Piumasaa nunami qanoq pissagami?

Guutip nunarsuarmut tunngatillugu piumasaa

Ilaatigut “iluartut nuna kingornutissavaat”. (Tussiaat 37:9-11, 29; Ussatit 2:21, 22) Jiisusip Kristusip “annaatissavai piitsoq ikioqqulluni suaartartoq annikilliortitarlu”. “Aniguisissavai qunutitaanermit nakuuserfigisaanermillu.” (Tussiaat 72:12-14) Sorsuttoqartarunnaassaaq; aamma toqu, qulliit, anniaatit naalliuutillu peerutissapput. (Tussiaat 46:10; Saqqummersitat 21:1-4) Inuit millionillit Guutip  ajussutsip atuunnissaanik akuerinnikkallarnerani toqusimasut maani nunarsuarmi inuunermut makititaassapput, taakkualu pilluaqqussutit taakku allallu nuannaarutigisinnaassavaat. — Johannesi 5:28, 29.

Aap, Jehova Saatanip ajoqusiinerata kingunipiluinik aaqqiiumaarpoq. Imalu aaqqiilluartigissaaq ‘erloqinartut siulliit [ullumikkut aliasuutaallutillu naalliuutaasartut tamarmik] puiugaassallutik’. (Esaja 65:16-19, 1900) Tamatuma pinissaa qularnanngilaq, Guutimi sallusinnaanngilaq. Taassuma neriorsuutai tamarmik eqquutissapput. Inuuneq ‘piunngitsuujunnaarlunilu anorimik tigusiniarsarinerujunnaassaaq’. (Oqaluussisartup oqaasii 2:17) Inuuneq ilumut siunertaqarlualissaaq!

Massakkummi? Biibilimik ajoqersuutigineqartunik ilisimanninnerit Guutillu nunarsuarmut qanoq siunertaqarneranik paasinninnerit illit inuuninnik massakkut siunertaqalersitsisinnaava? Allaaserisami tulliuttumi tamanna sammineqassaaq.

[Quppernerup ataani ilanngussaq]

[Qupp. 6-mi ungalusaq]

Siunertaqarluartumik inuujumalluta nunarsuaq qimattariaqarparput?

Ukiuni hundredelinni inuit Guutip nunarsuarmut qanoq siunertaqarneranik ilisimanninngitsut allat ilinniartittarsimavaat siunertaqarluartumik inuujumalluta nunarsuaq qimattariaqaripput.

Ilaat oqartarput tarnit ‘inuit timaannut isinnginnerminni qutsinnerusumi piusartut’. (New Dictionary of Theology) Allat oqartarput tarneq “qilammiitilluni ajortuliarisimasaminut pillaatitut inuup timaani mattussaaqqasartoq”. — Cyclopedia of Biblical, Theological, and Ecclesiastical Literature.

Isumaliutersortartut grækerit, soorlu Sokrates Platonilu, ima isumaliutersorput: Aatsaat tarneq inuup timaata pisinnaasaanit killilersorneqarunnaaruni “tarfiinnarluni inuunermit aniguisinnaavoq” “guutillu najorsinnaassallugit naassaanngitsumut”. — Faidon, 81, A.

Kingusinnerusukkut kristumiuunerartut siuttuisa isumaliutersortartut grækerit “tarnermik toqujuitsuusorinninnerat” ajoqersuutiminnut ilanngutitippaat. — Christianity — A Global History.

Paasinnittaatsit taakku sallusuissutinut tunngaviusunut Biibilimiittunut pingasunut sanilliuteriakkit:

1. Guutip siunertarinngilaa nunarsuup inunnik misiliigallartarfiunissaa paasiumallugu kikkut imminik qilammeeqateqarsinnaatitaanersut, siunertaraali inunnut naassaanngitsumik angerlarsimaffiunissaa. Adami Evalu Guutip inatsisaanut naalassimasuugunik maani nunarsuarmi paratiisiusumi suli inuusimassagaluarput. — 1 Mosesi 1:27, 28; Tussiaat 115:16.

2. Upperisarsioqatigiit amerlanersaanni ajoqersuutigineqarpoq inuk tarneqartoq — tigussaanngitsumik timimiittumik. Biibilimili ajoqersuutigineqartoq paasiuminarneruvoq. Inuk ‘tarniuvoq uumassuseqartoq’ ‘issumillu’ pinngortitaalluni. (1 Mosesi 2:7; 1 Korinthimiut 15:45) Tarneq, tassa inuk, toqujuitsutut Biibilimi allaatigineqarsimanngisaannarpoq. (Tussiaat 146:4; Oqaluussisartup oqaasii 9:5, 10) Tarneq siulleq, Adami, toquvoq issumullu pinngorfimminut uterluni. Piunngitsuussusermut uterpoq. — 1 Mosesi 2:17; 3:19.

3. Inuup siunissami inuusinnaanissaanut aalajangiisuusoq tassaanngilaq toqujuitsumik, timimik qimatsisartumik anersaallu silarsuaanni inuuinnartartumik tarneqarnissaa, tassaavorli Guutip toqusimasut nunarsuarmi paratiisiusumi inuunermut makititaanissaat pillugu neriorsuutaa. — Danieli 12:13; Johannesi 11:24-26; Apustilit Suliaat 24:15.