Silarsuup naalagaa isertortoq qulaarneqarpoq

JIISUSI ilaanni ima oqarpoq: “Silarsuup matuma naalagaanera ajattorneqassaaq.” Kingusinnerusukkut oqaatsini ilavai oqarluni ‘silarsuup naalagaanerata susinnaanngikkaani’ aamma “silarsuup matuma naalagaanera eqqartuunneqartoq”. (Johannesi 12:31; 14:30; 16:11) Jiisusip kinaana pigaa?

“Silarsuup matuma naalagaanera” pillugu Jiisusip oqaasii eqqarsaatigigaanni erseqqippoq Ataatani, Jehova Guuti, pinngikkaa. Taavami “silarsuup matuma naalagaanera” kinaava? ‘Ajattorneqassasoq’ qanoq paasisariaqarpa, qanorlu ‘eqqartuunneqarpa’?

“Silarsuup matuma naalagaanera” paasisoortippoq

Pinerlunniallaqqissup pissaanerminik usorsisimaarutiginnittarneratulli Diaavulup Jiisusi, Guutip ernera, usseramiuk usorsisimaarutiginnippoq. Saatanip silarsuarmi “naalagaaffiit tamaasa” Jiisusimut qimerloorteriarlugit ima neqeroorfigaa: “Pissaaneq tamanna tamaat alutornassuserlu ilinnut tunniukkumavakka, uannummi pigititaammata kimulluunniit piumasara malillugu tunniussinnaavakka. Taamaattumik pallorfigiumagumma tamakku tamaasa pigilersinnaavatit.” — Lukasi 4:5-7.

Inuit ilaasa oqarnerattut Diaavulu ajortumut assersuutaaginnarpat taava ussiiniarneq tamanna qanoq paasisariaqarpa? Jiisusi eqqarsaammik ajortumik immaqaluunniit kuisinnermi kingorna ilumini akiuuttoqarnerata kingunerisaanik usserneqarpa? Taamaappat sooq oqartoqarsinnaava ‘taassumani ajorteqanngitsoq’? (1 Johannesi 3:5) Diaavulup inunnut pissaaneqarnera Jiisusip miserratiginagu tamanna uppernarsarpaa Diaavulu ‘silarsuup matuma naalagaaneratut’ taallugu, aamma ‘toqutsisuunerarlugulu sallutuujunerarpaa’. — Johannesi 14:30; 8:44.

Jiisusip Diaavulumik taama oqaloqateqarnerata kingorna ukiut 70-ingajaat qaangiuttut apustilip Johannesip kristumiut eqqaasippai Diaavulu qanoq pissaaneqartiginersoq. Oqarpoq ‘silarsuaq tamarmi Ajortumut naalatsigitittoq’ aamma “silarsuarmik tamarmik tammartitsiniartoq”. (1 Johannesi 5:19; Saqqummersitat 12:9) Tassa erseqqippoq anersaaq ersinngitsoq ‘silarsuup matuma naalagaaneranik’ Biibilimi taaneqartoq. Inunnulli qanoq sunniuteqartigaa?

Silarsuup naalagaanera allanik oqartussaassusiliivoq

Apustilip Paulusip uppernerup sorsuutiginninnissaa pillugu kristumiut allaffigigamigit kikkut taakkununnga akeraanerpaajunersut erseqqissarpaa. Ima allappoq: “Sorsunnerput uinimmut aammullu sorsunnerunngilaq, piginnaatitaasunulli pissaanernullu taartumi matumani silarsuarmi naalagaasunut ajussutsillu anersaavinut pissaasunut qilaap ataaniittunut.” (Efesosimiut 6:12) Tassa inunnut, “uinimmut aammullu”, sorsunnerunani ‘ajussutsip anersaavinut pissaasunut’ sorsunneruvoq.

Malugikkit oqaatsit issuarneqartut uku: ‘Ajussutsip anersaavi pissaasut’. Ullutsinni Biibilimik nutsikkani amerlanerni oqaatsini taakkunani pineqanngillat ajussutsimut assersuutaaginnartut nassuiarneqarsinnaanngitsut, pineqarpulli pinngortitat anersaajusut ajortut pissaanilissuit. Assersuutigalugu Biibilimik nutsikkami kalaallisuunngortitami 1936-meersumi oqaatsit taakku ima nutserneqarsimapput: ‘Anersaat ajortut qilaap ataani’. Tassa Diaavulup inngilit pikitsitsiumatuut allat qilammi “inigisassaraluaminnik  qimatsisut” ikiortigalugit pissaanini atorpaa. — Judasi 6.

Biibilimi Danielip siulittuutaani ‘silarsuarmi naalagaasut’ taakku itsarli silarsuarmut qanoq aqutsisimanersut ersersinneqarpoq. Pruffiitip Danielip juuteqatini, Babylonimut aallarussaanerminnit Jerusalemimut 537-mi Kr.in.si. utertut, isumaalugingaaramigit sapaatit-akunnerini pingasuni qinnuppai. Inngili, Guutip pruffiitimik nakussatsitseqqullugu aallartitaa, sooq tikiukkumaataarnerluni oqaluttuarpoq. Ima oqarpoq: “Perserit naalagaaffiata naalagaanerata ullut 21-t akiorpaanga.” — Danieli 10:2, 13.

‘Perserit naalagaaffiata naalagaanera’ kinaava? Paasinarpoq inngilip Perserit kunngiat Kyrosi, Danielimik nunaqqataanillu iluarinnittoq, pinngikkaa. Aammami inuup kunngiusup anersaaq sapaatit-akunnerini pingasuni qanoq akiorsinnaavaa, uffa inngilip ataatsip unnuami ataasiinnarmi sorsuttartorsuit 185.000-it piuneerussinnaagai? (Esaja 37:36) Akeraasoq ‘Perserit naalagaaffiata naalagaaneranik’ taaneqartoq allaasinnaanngilaq Diaavulu sinnerlugu iliuuseqartoq, anersaapiluk Diaavulup Perserit naalagaaffianut naalagaatitaasoq. Oqaluttuap nanginnerani Guutip inngilia nalunaarpoq “Persiap naalagaanera” akioqqittariaqarlugu naalagaanerlu anersaapiluk alla, tassa “Grækerit nunaata naalagaanera”, aamma akiortariaqarlugu. — Danieli 10:20.

Tamakku qanoq paasissavavut? Paasiuminaanngillat — ‘silarsuarmi naalagaasut’ ersinngitsut, anersaapiluit Saatani Diaavulu siulersortigalugu silarsuarmik aqutsisut, ilumut piviusuupput. Taakkua ulloq manna tikillugu suna siunertaraat?

Silarsuup naalagaanerata kinaassusivini ersersippaa

Biibilip atuagartaani kingullermi, Saqqummersitani, apustilip Johannesip oqaluttuaraa Jiisusip, inngiliunertut Mikaelitut, Diaavulu anersaapiluillu qanoq ajugaaffigigai. Aamma Johannesip allaatigaa taakkua qilammiit igitaanerisa ajorluinnartumik kinguneqarnera. Ima allassimavoq: ‘Eqqanaq nuna Diaavulu ilissinnut aqqarmat kamattorsuulluni, piffissakissutsi nalunnginnamiuk.’ — Saqqummersitat 12:9, 12.

Diaavulup ‘kamattorsuunini’ qanoq ersersippaa? Pinerluttorpassuit neriuutaarutilersut naalagarsiortitsisinnaanngikkunik piuneerussiniartut assigalugit Diaavulup anersaapiluillu aalajangiusimavaat nunarsuaq inuillu piuneerussaaqatiginiarlugit. Diaavulup nalunnginnamiuk piffissakilluni atuinerujartortitsivoq innuttaaqatigiit aaqqissuussaaneranni pingaarnerit ilaat aqutani — tassa aningaasannanniarnerujussuaq — atorlugu nunarsuarmi pinngortitap pisuussutaanik ingasattumik atuinermik avatangiisinillu aseruinermik kinguneqartumik inuillu inuuinnarsinnaanerannik navianartorsiortitsisumik. — Saqqummersitat 11:18; 18:11-17.

Aamma inuit oqaluttuarisaanerisa aallaqqaataaniilli Diaavulup pissaaneqarusunnini politikkikkut upperisarsiornikkullu ersersittarsimavaa. Saqqummersitani politikkikkut pissaanillit nersutitut Diaavulumit ‘pissaanermik’ tunineqarsimasutut allaatigineqarput. Aamma politikkikkut upperisarsiornikkullu kannguttaalluni ataqatigiittoqarnera anersaakkut atoqatigiinnertut maajunnartutut allaatigineqarpoq. (Saqqummersitat 13:2; 17:1, 2) Aamma ukiut hundredelikkuutaat ingerlaneranni naqisimaneqarneq, inussiaataaneq, sorsunnerit naggueqatigiinngitsullu akersuunnerat pissutigalugit inuit millionillit toqusimasut eqqarsaatigikkit. Unneqqarilluni oqartoqarsinnaava pisimasut tupannartut amiilaarnartullu oqaluttuarisaanermik simertitsisimasutullusooq ittut inuit nalinginnaasumik pissusilersornerannut ilaasut? Imaannerunngila anersaat pissaanilissuit ajortut ersinngitsullu uukapaatitsinerigaat?

Nunarsuarmi siuttunik pissaanilinnillu aqutsisuusup kinaanera Biibilimi erseqqissumik ersersinneqarlunilu qulaarneqarpoq. Innuttaaqatigiit aaqqissuussaasut aqutsisumik ersinngitsup pissusii, isiginnittaasia naalagarsiortitsisinnaanngikkunilu piuneerutsitserusunnera ersersittarpaat — piaaralutik piaarinaatsoorlutilluunniit. Inuilli suli qanoq sivisutigisumik Diaavulup aqutsinerani naalliussappat?

Diaavulu piffissaarutiliivippoq

Ukiuni hundredelinni siullerni Jiisusip nunarsuarmi suliai nalunaarutiginnippullusooq qanittukkut  Diaavulu anersaapiluillu toqutaassasut. Jiisusip ajoqersukkami anersaapilunnik ersinngitsunik anisitsinerminnik oqaluttuummanni ima oqarfigai: “Saatani innaallannertut qilammit nakkartoq takuara.” (Lukasi 10:18) Taama oqarami Jiisusip qilammut utereeruni inngiliunertut Mikaelitut silarsuup naalagaanerata ajugaaffiginissaa qilanaaralugu ersersippaa. (Saqqummersitat 12:7-9) Siulittuutinik Biibilimeersunik misissueqqissaarnerup ersersippaa ajugaaneq tamanna 1914-imi tamatumaluunniit kingunitsianngua qilammi pisoq. *

Taamanimiilli Diaavulup nalunngilaa piuneerussaanissani qanillisoq. Naak ‘silarsuaq tamarmi Ajortumut naalatsigitikkaluartoq’ ullumikkut inuit millionillit taassumannga taassumalu imminnik aqutsiniarsuataarniarnerigaluanit tammartitaasimanngillat. Biibilimit uisitaasimapput kinaassusivianik pilersaarutaanillu takunnissinnaalersillugit. (2 Korinthimiut 2:11) Paulusip kristumioqatiminut oqaasiinit neriuuteqalersinneqarput: ‘Guutip eqqissisitsisup erniinnaq Saatani isikkassi ataanni sequmisissavaa.’ * — Romamiut 16:20.

Diaavulu piffissaarutiliivippoq! Kristusip asannittumik naalakkersuinerani inuit eqqortuliorusuttut nunarsuaq paratiisinngortissavaat. Nakuuserneq, uumissuineq piumatussuserlu naassaanngitsumik atuukkunnaassapput. Biibilimi allassimavoq ‘pereersut eqqaamaneerutissasut’. (Esaja 65:17) Silarsuup matuma naalagaaneranit ersinngitsumit tiguarsimaneqarunnaartunut tamanut qanoq oqiliallannartigissava!

[Quppernerup ataani ilanngussat]

[Qupp. 9-mi issuagaq]

Kristusip asannittumik naalakkersuinerani inuit nunarsuaq paratiisinngortissavaat