Guutip asanninnera anaanap asanninnerani takuneqarsinnaavoq

“Arnap puigortarnerpaa qitornani milutsitani? Anaanap puigortarnerpaa erniarisani? Taakkuami puigussagaluarpataluunniit uanga illit puigussanngilakkit.” — ESAJA 49:15.

MEERAQ INOORLAAQ toqqissisimalluni nalerisimaarlunilu anaanamini miluppoq. Tassa isumassuineq asanninnerlu. “Qitornara tigoqqaarakku,” anaanaasoq Pamimik atilik oqarpoq, “inoorlaannguamut asanninnermik akisussaassusermillu killitsingaarpunga.”

Pissusissamisuuginnaraluartoq misissueqqissaartartut uppernarsisimavaat anaanaasup asanninnera meeqqap ineriartorneranut pingaaruteqarluinnartuusoq. Silarsuarmi Peqqissaanikkut Suliniaqatigiiffiup (WHO), Eqqarsartaatsikkut Peqqissuseq pillugu allaaserisaani allassimavoq: “Misissuinerup takutippaa naalungiarsuit imminiiginnarneqarsimasut aamma anaanaminnit avissaartinneqarsimasut nuannaarunnaartarlutillu nikallortartut, ilaatigut annilaangarujussuartarlutik.” Allaaserisami tassa allaatigineqarpoq meeqqat siusissukkut asaneqarlutillu soqutiginninnermik ersersitsivigineqarsimasut meeqqanut sumiginnagaasimasunut naleqqiullutik qaffasissumik silassorissuseqartartut.

Anaanaasup asanninnerata pingaaruteqassusianut tunngatillugu, USA-mi UCLA School of Medicine-mi psykiatriimi professoriusoq, Alan Schore oqarpoq: “Meeqqap inummut atassuteqaqqaarnera, tamatumani anaanaminut, inuunermini kingusinnerusukkut pingaarutilimmik misigissutsinik allanik atuisinnaalernissaanik ataavartumik piginnaassusissaanut sunnerneqaatigisarpaa.”

 Ajoraluartumik nikallorneq, napparsimaneq nanertisimanerluunniit pissutigalugit anaanaasup meeqqani sumiginnarsinnaavaa allaalluunniit ‘qitornani milutsitani puigorartarsinnaasarpaa’. (Esaja 49:15) Tamannali qaqutigoortumik pisarpoq. Anaanaasulli meeqqaminnut asannittussiaapput. Misissueqqissaartartut paasisimavaat ernisunnermi anaanaasoq hormoninik oxytocin-inik taaneqartartunik amerlanerusunik sanaartortartoq, ernisunnermi illissap eqikkarneranut kingusinnerusukkullu immuliornermut ineriartortitsilersussanik. Hormoni taanna, angutini arnanilu sanaartorneqartartoq, anaanaasumut asannittumik namminissarsiunngitsumillu pissuseqalersitsisartoq ilimagineqarpoq.

Asanninnermut suna pilerfiua?

Pinngoriartuaarnermik upperinninnermik siuarsaasut ilinniartitsissutigaat asanninneq namminissarsiunngitsoq nalaatsornerinnakkut pinngorsimasoq, soorlu anaanaasup meeqqallu akornanni, taannalu pissuseqatigiinnut iluaqutaammat ataavartuutinneqartoq. Assersuutigalugu nittartakkatigut aviisi Mothering Magazine allaaserisaqarpoq: “Qaratsatta ineriartoqqaalerfia, paarmortorujummit kingornussimasatta ilaat, misigissutsimik ineriartortitsisoq limbiske systemimik taaneqartarpoq. Qaratsap ilaa tamanna pissutaalluni anaanaasut meeraallu sakkortuumik ataqatigiilertarput.”

Misissueqqissaarnerup ersersippaa limbiske systemi misigissutsitsinnut ilumut sunniuteqartuusoq. Anaanaasulli meeqqaminut asanninnera paarmortorujuup qarasaanit nalaatsornikkut pilersimanera illit pissusissamisoorsoraajuk?

Nassuiaat alla eqqarsaatigeriaruk. Biibilimi ajoqersuutigineqarpoq inuit Guuti assilillugu pinngortitaasut, tassa pissusiata assinganik pissuseqarlutik. (1 Mosesi 1:27) Guutip pissusiini asanninneq pingaarnerpaavoq. “Asanninngitsup Guuti ilisimanngilaa,” apustili Johannesi allappoq. Sooq? “Guutimi tassaavoq asanninneq.” (1 Johannesi 4:8) Maluginiaruk versimi allassimanngimmat Guuti asanninneqartoq. Akerlianilli allassimammat Guuti tassaasoq asanninneq. Asanninnermut pilerfiuvoq.

Asanninneq Biibilimi ima allaatigineqarpoq: “Asanninneq kamagittartuuvoq, asanninneq saamasuuvoq, asanninneq sinngasarinngilaq; pingaakujuttarnanilu perroortarinngilaq. Kanngunartuliortarinngilaq, namminissarsiortarinngilaq; puffassartarinngilaq puttarsisaqartarnanilu. Iluaanneq nuannarisarinagu sallusuissut tipaatsuutigisarpaa. Tamatigut naammagittartuuvoq, tamatigut uppertarpoq, tamatigut neriuttarpoq, tamatigut ilalaartarpoq. Asanninneq soraanngisaannassaaq.” (1 Korinthimiut 13:4-8) Ilumoorpa pissuseq kusanartoq taanna nalaatsornerinnakkut pinngortuusoq?

Qanoq ilinnut sunniuteqarpa?

Immikkoortumi kingullermi asanninneq pillugu atuaravit asanninnermik taama ittumik takutitsivigineqarnissat kissaatigaajuk? Tamanna pissusissamisuuginnarpoq. Sooq? “Guutip eqqarlerimmatigut.” (Apustilit Suliaat 17:29) Asanninneq taamaattoq pissallugu tunniutissallugulu pinngortitaavugut. Qularutigissanngilarpullu Guutip asangaaraatigut. (Johannesi 3:16; 1 Petrusi 5:6, 7) Allassimaffiup allaaserisap aallaqqaataata tungaani issuarneqartup takutippaa anaanaasup meeqqaminut asanninneranit Guutip uagutsinnut asanninnera sakkortunerungaartuusoq ataavartuunerungaarlunilu!

Immaqali eqqarsarputit: ‘Guuti ilisimassuseqaruni, pissaaneqaruni asannittuullunilu, sooq naalliuutit nungutinngilai? Sooq meeqqat toqusarnerat, naqisimaneqarneq aqutsinerlunnerullu kingunerisaanik nunarsuup aseroriartornera akuerai?’ Apeqqutit taakku akissutissarsineqartariaqarput.

Agnostikerit qanorluunniit oqaraluarpata, apeqqutit taakku naammaginartumik akissutissaqartinneqarput. Nunani hundredelinni inuit millionillit Jehovap Nalunaajaasuinit ikiorneqarlutik Biibilip atuaqqissaarneratigut apeqqutit taakku akissutissarsisimavaat. Atuagassianik ukuninnga saqqummersitsisut aamma illit taamaalioqqullutit kajumissaarpaatsit. Oqaasiatigut pinngortitaasigullu Guutimik ilisarsiartorninni paasiartulissavat Guuti ilinnit ungasinngitsuusoq ilisimalernissaalu ajornakusoortuunngitsoq. Ilumut, paasilissagunarpat Guuti ‘tamatsinnit ungasinngikkaluaqisoq’. — Apustilit Suliaat 17:27.

[Qupp. 8-mi issuagaq]

Anaanaasup meeqqaminut asanninneranit Guutip uagutsinnut asanninnera ataavartuunerungaarpoq