Ilagiinni ajunngitsumik isiginnittaaseqartuaritsi

“Naalakkap Jiisusi-Kristusip saammaannerata anersaarsi [isiginnittaasersi, NV] najorliuk!” — FILIPPIMIUT 4:23.

QANOQ ILILLUTA ILAGIIT AJUNNGITSUMIK ISIGINNITTAASEQARNISSAANNUT SUNNIUTEQAQATAASINNAAVUGUT . . .

qatanngutitsinnik peqateqartilluta?

oqaluussinermi aallussilluarnitsigut?

utoqqaanertat ingasattumik ajortuliortoqarsimaneranik ilisimatinnerisigut?

1. Sooq ilagiit Filippimiittut Thyatiramiittullu nersualaarneqarpat?

UKIUNI hundredelinni siullerni kristumiut Filippimiittut piitsuupput. Taamaakkaluartorli tukkortuupput qatanngutiminnullu asannittuliungaartarlutik. (Filippimiut 1:3-5, 9; 4:15, 16) Taamaattumik Paulusip taakku ima allaffigai: “Naalakkap Jiisusi-Kristusip saammaannerata anersaarsi [isiginnittaasersi, NV] najorliuk!” (Filippimiut 4:23) Kristumiut Thyatiramiittut taakkunatut isiginnittaaseqarmata Jiisusip Kristusip taakku ima oqarfigai: “Ilisimavakka suliatit asannissutsillu unneqqarissutsillu kiffartornerillu nikallujuissutsillu, suliavillu kingulliit siulliit akimorpaat.” — Saqqummersitat 2:19.

2. Isiginnittaaserput ilagiit isiginnittaasiannut qanoq sunniuteqartarpa?

² Ullumikkut Jehovap Nalunaajaasuisa ilagiivi tamarmik immikkut assigiinngitsunik isiginnittaaseqarput. Ilagiit ilaasa inussiarnersuunertik asannittuunertillu ilisimaneqaatigaat. Allat aallussilluaqalutik oqaluusseqataasarput piffissarlu tamaat kiffartortunik tapersersuisarlutik. Tamatta immikkut ajunngitsumik isiginnittaaseqarnissarput sulissutigisarutsigu, ilagiit ataasiussuseqartuarnissaannut anersaakkullu siumukarnissaannut ikiortassavavut. (1 Korinthimiut 1:10) Ajortumilli isiginnittaaseqarutta, tamanna ilagiinniittut ima sunnerneqaatigisinnaavaat Guutimut kiffartornerminni iliuuseqannginnerulerlutik, oqaluussinermik aallussilluarpiarunnaarlutik allaallu ingasattumik ajortuliortoqarneranik akuerinnittalerlutik. (1 Korinthimiut 5:1; Saqqummersitat 3:15, 16) Ilagiit illit najukkanniittut ataatsimut isigalugit qanoq isiginnittaaseqarpat? Illit qanoq ilillutit ilagiit ajunngitsumik isiginnittaaseqarnissaannut sunniuteqaqataasinnaavit?

ILAGIIT AJUNNGITSUMIK ISIGINNITTAASEQARNISSAANNUT SUNNIUTEQAQATAAGIT

3, 4. Qanoq ililluta ilagiinni Jehovamik unnersiutiginnissinnaavugut?

³ Daavip, tussiaasiortut ilaata, Jehova ima erinarsorfigaa:  “Qutsavigissavakkit katersorsimasorpassuarni, unnersiutigalutit inuppassuit akornanni.” (Tussiaat 35:18) Tussiaasiortup Guutimut kiffaaqatiminik peqateqartilluni Jehovamik unnersiutiginninnissani tunuarsimaarfiginngilaa. Sapaatit-akunneri tamaasa ilagiittut ataatsimiinnitsinni, soorlu Napasuliaq Alapernaarsuiffik-mik atuaqqissaaqatigiinnitsinni, aallussilluarnitsinnik uppernitsinnillu akissutitsigut ersersitsinissatsinnut periarfissaqarluartarpugut. Tamatta imminut ima aperisariaqarpugut: ‘Sapinngisara tamaat ataatsimiinnerni akiniartarpunga? Isumaqarluartunik akissuteqarumallunga piareersarluartarpunga? Ilaqutariinni ittuusutut meeqqakka ataatsimiinnerni akinissaannut piareersaqatigisarpakka taakkulu nammineq oqaatsitik atorlugit akinissaannut ilinniartittarlugit?’

⁴ Nakimanngitsumik uummateqarnerput, tassa eqqortumik iliornissamik aalajangiusimannittumik uummateqarnerput, ersersissinnaavarput ataatsimiinnerni erinarsortarnitsigut. Daavi ima allappoq: “Uummatiga nakimanaveerpoq, Guuti, uummatiga nakimanaveerpoq, erinarsorlungalu nipilersussaanga.” (Tussiaat 57:8) Ataatsimiinnitsinni erinarsuutigineqartartut iluaqutigalugit nakimanngitsumik uummateqarluta Jehovamut ‘erinarsorlutalu nipilersorsinnaavugut’. Erinarsuutit ilaat sungiusimalluanngikkutsigit immaqa unnummi ilaqutariittut anersaakkut ittunik sammisaqarfitsinni sungiusarsinnaavavut. Qanortoq aalajangiusimatigu ‘inuutilluta Jehovap erinarsorfiginissaa toqunngikkallartillutalu taassuma erinalimmik unnersiutiginissaa’. — Tussiaat 104:33.

5, 6. Qanoq ililluta allanut inoroorsaarsinnaallutalu tukkortuusinnaavugut, taamaannerpullu ilagiinnut qanoq sunniuteqartarpa?

⁵ Aamma qatanngutitsinnut inoroorsaartarnitsigut ilagiinnik asaqatigiinnerulersitseqataasinnaavugut. Paulusi hebræerinut allakkamini kapitalit kingullianni ima allappoq: “Qatanngutigiittut asaqatigiinnersi atattuinnartissiuk. Inoroorsaartarnissarsi puioqinasiuk.” (Hebræerit 13:1, 2) Ilaatigut inoroorsaartoqarsinnaavoq nakkutilliisumik angalasartumik nulianillu, imaluunniit piffissaq tamaat kiffartortunik ilagiinniittunik, neriartoqqusisarnikkut. Ilaannikkut aamma uillarnerit, ilaqutariit ataasiinnarmik pilersuisullit allalluunniit neriartoqqullugilluunniit atuaqqissaaqataaqqusarsinnaavavut.

⁶ Paulusip Timotheusi peqquaa allat kajumissaaqqullugit ‘ajunngitsulioqqullugit ajunngitsulianillu pisuussuteqaqqullugit, tukkusuujoqqullugit inoqatiminnullu tunniussisaqqullugit, katerseqqullugillu pisuussutinik siunissami  toqqaviusinnaasunik ajunngitsunik inuunivik pigilersinnaaniassammassuk’. (1 Timotheusi 6:17-19) Paulusip qatanngutini tukkusuujoqqullugit kajumissaarpai. Aningaasatigut artornarsioraluarlutaluunniit tukkortuusinnaavugut. Assersuutigalugu biileqaruit angalaarfissamukaleraangavit ataatsimiigialeraangavilluunniit allat ilaatittarsinnaavatit. Qatanngutillu taamatut ikiorneqartut qanoq ilillutik qujamasunnertik ersersissinnaavaat taamaalillutillu ilagiit ajunngitsumik isiginnittaaseqarnissaannut sunniuteqaqataallutik? Tapiissutigisinnaasatik naapertorlugit biilip orsussaanut aningaasartuutinut tapiissuteqartarsinnaapput. Aammattaaq qatanngutivut ilaginerusarutsigit pisariaqartinneqartutut asaneqartutullu misiginerulissapput. “Uppeqatitsinnut” ajunngitsulioraangatta aamma piffissarput pigisavullu taakkua ikiornissaannut atoriaannaagaangatsigit asaneruleraluttuinnartarpavut, ilagiinnilu isiginnittaatsimik ajunngitsumik ineriartortitseqataasarpugut. — Galatiamiut 6:10.

7. Allap oqaluttuaanik imminerminut tunngasunik allanut ingerlatitseqqiisannginneq ilagiinnut qanoq sunniuteqarluartarpa?

⁷ Ikinngutigiinneq tatigeqatigiinnerlu qatanngutigiinnik asaqatigiinnerulersitseqataasarportaaq. (Atuaruk Ussatit 18:24). Ikinngutigisatta imminerminut tunngasumik oqaluttuuppatigut ikinngutaalluassaagut oqaluttuarisai allanut ingerlateqqinngikkutsigit. Qatanngutip oqaluttuarisami allanut ingerlateqqinneqannginnissaat qularutiginagu ikinngutini uummammiugisaminik oqaluttuuppagu, taakku tatigeqatigiinnerulissapput taamaalillutillu suli asaqatigiinnerulissallutik. Ikinngutitut tatiginartuunitsigut qanortoq ilagiinni ilaqutariittullusooq asaqatigiinnermik siuarsaagisa. — Ussatit 20:19.

OQALUUSSINERMI AALLUSSILLUARTUUGIT

8. Jiisusip Laodikeamiut qanoq oqarfigai, aamma sooq?

⁸ Jiisusip ilagiit Laodikeamiittut ima oqarfigai: “Ilisimavakka suliatit, nilleratillu kissanngilatit. Nillertuugaluaruittoq kissartuullutilluunniit! Maannali akunnattuugavit nillertuunatit kissartuunatilluunniit qaninnit oriarumaarpakkit.” (Saqqummersitat 3:15, 16) Laodikeamiut kristumiutut oqaluussinermik aallussilluanngillat. Aallussilluannginnerat ilagiinni imminnut attaveqatigiinnerannut sunniuteqarsimagunarpoq. Taamaammat Jiisusip taakku asannittumik ima oqarfigai: “Asasakka tamaasa . . . anusinngorsartarpakka. Ilungersorit allamillu isumataarlutit!” — Saqqummersitat 3:19.

9. Oqaluussinermut isiginnittaaserput ilagiinnut qanoq sunniuteqartarpa?

⁹ Ilagiit ajunngitsumik isiginnittaaseqarnissaat kissaatigigutsigu oqaluussineq aallulluartariaqarparput, imaluunniit nuannarisariaqarparput. Ilageeqarneranut siunertaasut ilagaat ilageeqarfiusumi inunnik eqqortuliorusuttunik ujaasinissaq taakkualu sallusuissut pillugu ilinniartinnissaat. Taamaattumik Jiisusip pisimaneratut ajoqersuganngortitsiortornermik aallussilluartariaqarpugut. (Matthæusi 28:19, 20; Lukasi 4:43) Oqaluussineq  nuannarinerujartortillugu ‘Guutip suleqataatut’ ataasiussuseqarnerujartuinnassaagut. (1 Korinthimiut 3:9) Oqaluusseqatigisatta uppernerminnik illersuinerat takugaangatsigu anersaakkullu ittunik qanoq pingaartitsitiginerat paasigaangatsigu, taakku asanerulertarlugillu ataqqinerulertarpavut. Aamma oqaluusseqatigiinneq ilagiinni ataasiussuseqalernartarpoq. — Atuaruk Filippimiut 1:27.

10. Oqaluussillaqqinnerulerniarluta iliuuseqarnerput ilagiinniittunut qanoq sunniuteqartarpa?

¹⁰ Aamma oqaluussillaqqinnerulerniarluta iliuuseqarnerput allanut sunniuteqarluartarpoq. Inuit oqaluussinitsinni naapitavut soqutiginerullugillu taakkua uummataat killinniarlugit ilungersorutta oqaluussineq nuannarinerujartuinnassavarput. (Matthæusi 9:36, 37) Oqaluussinerlu nuannarisarutsigu oqaluusseqatitta aamma nuannarinerulersinnaavaa. Eqqaamajuk Jiisusip ajoqersukkani marlukkuutaartillugit oqaluussiartortikkai. (Lukasi 10:1) Ajoqersukkat tamanna qiimmassaatigiinnarnagulu ilinniarfigiinnanngilaat, aammali oqaluussinermik aallussilluarnerulissutigaat. Oqaluussisartunik aallussilluartunik oqaluusseqateqarneq ilumut nuannertaqaaq! Taakkua oqaluussinermik nuannarinninnerat oqaluusseqataajuarnissamut kajumississutigalugulu iluaqutigaarput. — Romamiut 1:12.

NAAMMAGITTAALLIOQINAK AAMMA INGASATTUMIK AJORTULIORTOQARNERANIK ISERTUEQINAK

11. Mosesip nalaani Israelikkut ilaat qanoq isiginnittaaseqarpat, tamannalu pissutigalugu suppat?

¹¹ Israelikkut Inatsisit tunngavigalugit Jehovamit angerfigeqatigineqarnerminnit sapaatip-akunnialui qaangiutiinnartut naammagittaalliulerput. Tamatuma kingunerisaanik Jehovamut taassumalu sinniisuinut, Mosesimut Aronimullu, pikitsitsipput. (2 Mosesi 16:1, 2) Israelikkut Egyptenimit anisut ilaat ikittuinnaat inuuinnarput nunamullu neriorsuutigisamut iserlutik. Allaat Mosesi nunamut tamatumunnga isernissaminut akuerisaanngilaq Israelikkut naammagittaalliormata iliuutsini pissutigalugit. (5 Mosesi 32:48-52) Ullumikkut ajortumik isiginnittaaseqarnaveersaarumalluta susinnaavugut?

12. Qanoq ililluta naammagittaallioqqajaalernaveersaarsinnaavugut?

¹² Naammagittaallioqqajaanaveersaartariaqarpugut. Tamatumunnga tunngatillugu maniguunneq oqartussaassusilinnillu ataqqinninneq iluaqutigissavavut. Aamma pitsaassaaq eqqarsaatigisassallugu kikkut ilagisarnerlutigit. Najoqqutassianut Biibilimiittunut naapertuutinngitsunik aliikkutaqartarutta imaluunniit suleqatit atuaqatilluunniit najoqqutassianik taakkuninnga maleruaanngitsut ilagivallaartarutsigit, tamanna kingunipiloqassaaq. Silatusaassaagut naammagittaallioqqajaasartunik siulersorneqarumanngitsunillu ilaqartarnerput killeqartikkutsigu. — Ussatit 13:20.

13. Naammagittaalliortuaraanni Jehovamut attaveqarnermut ajoqutaasunik sunik allanik ileqqoqaleriartuaartoqarsinnaava?

¹³ Ilagiinniittut ilaat naammagittaalliortuarunik Jehovamut attaveqarnerminnut ajoqutaasunik suli allanik ileqqoqaleriartuaarsinnaapput. Assersuutigalugu naammagittaalliorneq ilagiinnik eqqissiunnaartitsisinnaallunilu ataasiussuseqarunnaarsitsisinnaavoq. Uppeqatinik naammagittaalliutiginninneq naammagittaalliutigineqartunut naalliuutaaginnarani aammali oqaatissuaatiginnittoqalerneranik asissoqatigiittoqalerneranillu kinguneqarsinnaavoq. (3 Mosesi 19:16; 1 Korinthimiut 5:11) Ilagiinni kristumiuni siullerni naammagittaallioqqajaasartut ilaasa ‘naalagaasut asiginnarpaat naalannartullu mitallugit’. (Judasi 8, 16, 1936) Qatanngutinik ilagiinni akisussaaffilinnik taamatut naammagittaalliorfiginnittoqartarnera Guutip iluarinngilluinnarpaa.

14, 15. (a) Ingasattumik ajortuliortoqarneranik sumiginnaaneq ilagiinnut qanoq sunniuteqarsinnaava? (b) Qatanngutip ingasattumik ajortuliorsimanerminik isertuinera paasigutsigu susariaqarpugut?

¹⁴ Taavami paasigukku qatanngutit ilaata ingasattumik ajortuliorsimanini — soorlu imigassartorpallaarsimanini, pornografiimik isiginnaarsimanini kinguaassiuutitigulluunniit inuunerlulluni inuunini — isertoraa? (Efesosimiut  5:11, 12) Ingasattumik ajortuliortoqarnera sianiginngitsuusaarutsigu Jehovap anersaani ilagiinnit peersinnaavaa, tamannalu ilagiinni saqitsaattoqalerneranik kinguneqarsinnaavoq. (Galatiamiut 5:19-23) Soorlu kristumiut Korinthimiittut ‘seernarsaatitoqqamik piiaasariaqartut’, taamatuttaaq ullumikkut ilagiit ataatsimut isigalugit ajunngitsumik isiginnittaaseqassappata ajortumik sunnerneqaqqunagit illersorneqartariaqarput. (1 Korinthimiut 5:7) Illit ilagiinni eqqissinermik siuarsaaqataajumallutit susinnaavit?

¹⁵ Soorlu eqqaaneqareersoq, inuup allanut oqaqqunata uagutsinnut oqaluttuarisaasa allanut ingerlateqqinnginnissaat pingaaruteqarpoq, ingammik uummammiugisaminik tatigaluta oqaluttuussimappatigut. Allat oqaatigeqqunngisaannik allanut ingerlatitseqqiineq eqqunngitsuliornerullunilu misigittaatsuliorneruvoq! Aappaatigulli ingasattumik ajortuliortoqarsimappat utoqqaanertat ilagiinniittut tamanna pillugu ilisimatinneqartariaqarput. Taakkuami Biibili naapertorlugu akisussaaffigaat pissutsinik iliuuseqarfiginninnissartik. (Atuaruk 3 Mosesi 5:1, 1990). * Taamaammat nalunngikkutsigu qatanngut ingasattumik ajortuliorsimasoq, taanna utoqqaanertanut saaffiginneqqullugu ikiortissarsioqqullugulu kajumissaartariaqarparput. (Jaaku 5:13-15) Utoqqaanertanulli saaffiginninniaasaarpallaarpat uagut utoqqaanertat saaffigisariaqarpavut.

16. Ingasattumik ajortuliortoqarsimaneranik utoqqaanertanut oqaluttuarnerput ilagiinnut qanoq illersuutaassava?

¹⁶ Ilagiit toqqissisimanartuusariaqarput, uagullu ilagiinnik illersueqataasariaqarpugut ingasattumik ajortuliortoqarsimaneranik utoqqaanertat oqaluttuuttarnerisigut. Utoqqaanertat ajortuliorsimasoq ajortuliami qanoq ingasatsigineranik paasinninnissaanut, allamik isumataarnissaanut naqqinneqarnerminillu akuerinninnissaanut ikiorpassuk ilagiinni anersaaq navianartorsiortinneqarunnaassaaq. Taavami ajortuliorsimasoq allamik isumataanngippat utoqqaanertallu asannittumik ikiuiniarnerannik sumiginnaappat? Taava ilagiinnit ilaajunnaarsitaassaaq. Taamaalilluni ajortumik sunniuteqartoq akunnitsinnit peerneqassaaq ilagiinnilu anersaaq illersorneqassalluni. (Atuaruk 1 Korinthimiut 5:11). Aap, ingasattumik ajortuliortoqarsimaneranik ilisimannikkutta utoqqaanertat tamanna pillugu ilisimatinnissaat taakkualu ilitsersuussutaannik malinninnissarput tamatta akisussaaffigaarput. Qatanngutitsinnut iluaqutaanerpaasumik iliuuseqarta ilagiillu illersorlugit.

“ANERSAAKKUT ATAASIUSSUSEQ” AALAJANGIUSIMASIUK

17, 18. ‘Anersaakkut ataasiussusermik aalajangiusimanninnissamut’ suna iluaqutigissavarput?

¹⁷ Ilagiit kristumiut siulliit apustilit ajoqersuutaannik aalajangiusimanninnertik ataasiussuseqartuarnissaminnut iluaqutigaat. (Apustilit Suliaat 2:42) Utoqqaanertat ilitsersuussutaat Allakkanik Illernartunik tunngaveqartut pingaartippaat. Ullumikkuttaaq utoqqaanertat inussiap aalajaallunilu silatuup siulersuineranik malinnikkamik ilagiinniittut tamarmik ataasiussuseqartuarnissaminnut kajumissaarneqartarlutillu ikiorneqartarput. (1 Korinthimiut 1:10) Jehovap peqatigiissortaasa Biibili tunngavigalugu maleruaqqusaannik maleruaagaangatta utoqqaanertallu ilitsersuussutaannik malinnikkaangatta ‘eqqissineq ataqatigiissutigalugu anersaakkut ataasiussusermik ilungersorluta aalajangiusimanninnerput’ ersersittarparput. — Efesosimiut 4:3.

¹⁸ Taamaattumik ilagiit ajunngitsumik isiginnittaaseqartuaqqullugit sapinngisarput tamaat iliuuseqarta. Taamaaliorutta qularutiginngilluinnassavarput “Naalakkap Jiisusi-Kristusip saammaannerata” isiginnittaaserput najorumaaraa. — Filippimiut 4:23.

[Quppernerup ataani ilanngussaq]

[Atuaqqissaarnermi apeqqutit]

[Qupp. 24-mi assiliartaq]

Isumaqarluartumik akinissannut piareersarluartarnikkut ajunngitsumik isiginnittaaseqarnissamik siuarsaaqataasarpit?

[Qupp. 25-mi assiliartaq]

Ajunngitsumik isiginnittaaseqarnissamik siuarsaaqataagit erinarsuutitsinnik sungiusarluartarnikkut