Harmagedoni pillugu ilumoortoq

“Anersaapiluuppummi. . . . Silarsuarmi tamarmi kunnginut aallarput . . . katersorumallugit . . . najukkamut hebræerisut Harmagedonimik taaneqartumut.” — SAQQUMMERSITAT 16:14, 16.

HARMAGEDONI najukkamut taaguutaavoq. Soormiuna oqaaseq “Harmagedoni” pisimasumut, assersuutigalugu sorsunnermut, atassuserneqarajuttartoq? Oqaaseq Harmagedoni qanorpiaq isumaqarpa?

Najukkamut Harmagedonimik taaneqartumut katersuupput

Oqaaseq hebræerisooq Har-Magedon isumaqarpoq “Megiddop Qaqqaa”. Qaqqaqarsimanngisaannarpoq taamatut taaguutilimmik, kisianni sumiiffeqarpoq Megiddomik taaguutilimmik. Megiddo itsaq Israelikkut najugaqarfigisaata avannaata kitaatungaaniissimavoq aqquserngit paarlaffiata pingaarutillip eqqaani. Tamaani pingaarutilinnik sorsuunnerpassuaqartarsimavoq. Taamaattumik taaguut Megiddo sorsunnermut assersuutitut atorneqartalersimavoq. *

Megiddomulli tunngatillugu pingaaruteqavissoq tassaanngilaq sorsuunnerit sorliit tassani pisimanersut, pineqartorli tassaavoq sooq sorsuuttoqarsimanersoq. Megiddo Jehovap Guutip Israelikkunnut tunniukkumallugu neriorsuutigisimasaaniippoq. (2 Mosesi 33:1; Josva 12:7, 21) Neriorsuisimavoq nuna tamanna saassussinianut  illersorniarlugu, neriorsuinermisullu iliorpoq. (5 Mosesi 6:18, 19) Assersuutigalugu kunngip Kana’anikkuusup Jabinip sakkutuuisalu naalagaata Siserap sakkutuuinut isaasunut Jehovap Israelikkut Megiddomi tupinnartuliornikkut illersorpai. — Eqqartuussisut 4:14-16.

Taamaattumik oqaaseq “Harmagedoni” assersuutaasumik pingaarutilerujussuuvoq. Tamatumanimi pissaanillit nukittuut marluk aporaannerat pineqarpoq.

Siulittuummi Saqqummersitaniittumi eqqartorneqarpoq siunissami qanittumi Saatanip inngilipiluisalu nunarsuarmi naalakkersuisut sakkutuuminnik katersuutsitsisissagaat, taakkumi Guuti akerlilersussavaat innuttaanik sulinerannillu aarlerinartorsiortitsinermikkut. Saassussinissaat inuit millionillit toqunerannik kinguneqassaaq Guutip saassussisut ajugaaffigippagit. — Saqqummersitat 19:11-18.

Sooq Guuti, Biibilimi ‘saammaasutut, naakkittartutut, kamajaatsutut ilumoornermillu peqangaartutut’ eqqartorneqartoq, inuit taama amerlatigisut toqunerannut pissutaassava? (Nehemia 9:17) Guutip iliuusii paasiniarlugit apeqqutit pingasut akissutisisariaqarpavut: (1) Kinaana sorsunnermik aallarniisuussasoq? (2) Sooq Guuti akuliutissava? (3) Sorsunneq tamanna nunarsuarmut nunarsuarmiunullu qanoq kinguneqassava?

1. KINAANA SORSUNNERMIK AALLARNIISUUSSASOQ?

Harmagedonimi sorsunneq tassaanngilaq Guutip saassussiumatulluni ajorniarnera. Akuliutissaaq inuit ajunngitsut suujunnaarsitsiniartunut illersorniarlugit. Sorsunnermi tassani ajorniartut tassaapput ‘silarsuarmi tamarmi kunngit’, tassa silarsuarmi aqutsisut. Sooruna saassussiniartut? Saatanip, inuusanik aqutsisartup pisarneratut, pisut aqussammagit naalagaaffiit sakkutooqarfiillu pisortaqarfiutaannik Jehovamik pallorfiginnittunut saassusserujussuartitsilluni. — Saqqummersitat 16:13, 14; 19:17, 18.

Nunat ilaanni killilersugaanngitsumik oqaaseqarsinnaanerup upperisarsiornikkullu kiffaanngissuseqarnerup pingaartinneqarnerujussuat eqqarsaatigalugu immaqa upperiuminaatsinneqarsinnaavoq naalagaaffiit naalakkersuisullu upperisarsioqatigiinnut akeqqersimaalerumaartut allaallu upperisarsioqatigiinnik nungutitsiniarumaartut. Saassussinerilli taamaattut 1900-kkunni pisarsimapput sulilu pisarlutik. * Taamaattorli saassussisarsimanerit Harmagedonimilu pisussat minnerpaamik  marlunnik pingaarutilinnik assigiinngissuteqarput. Siullermik, saassussineq silarsuaq tamakkerlugu pissaaq. Aappassaanik, Jehovap Guutip akisilluni saassussinera tamanna siornatigut iliuuserisimasaanik tamanik akimuissaaq. (Jeremia 25:32, 33) Sorsunnissaq tamanna ‘Guutip Ajugaqanngitsup ullussarsuani sorsunnissamik’ Biibilimi taagorneqarpoq.

2. SOOQ GUUTI AKULIUTISSAVA?

Jehovap pallorfiginnitsini ilinniartittarpai eqqissinermik nuannarinnittuunissaannik allaallu qinngarsortiminnik asannittuunissaannik. (Mika 4:1-3; Matthæusi 5:43, 44; 26:52) Taamaattumik peqqarniitsumik saassussisoqarpat taakkua imminnut illersorniarlutik sakkulersussanngillat. Taakku suujunnaarsinneqassagaluarput Guutip innuttani annaanniarlugit akuliutinngitsuuppat. Taamaattuminguna Jehovap Guutip aqqa, tusaamaneqarnera, pineqartoq. Saassussisut Jehovap innuttaanik suujunnaarsitsiniarnerigaluat iluatsissagaluarpat isummertoqassagaluarpoq Jehova asannittuunngitsoq, naapertuilluartuunngitsoq soriarsinnaanngitsorlu. Taamaattoqarsinnaanngilluinnarpoq. — Tussiaat 37:28, 29.

Kialuunniit suujunnaarsinneqarnissaa Guutip kissaatiginnginnamiuk iliuuseqarnissani mianersoqqussutigereerpaa. (2 Petrusi 3:9) Oqaluttuat Biibilimiittut aqqutigalugit kikkulluunniit eqqaasippai itsaq innuttani aarlerinartorsiortinneqaleraangata akuliuttarsimalluni. (2 Kunngit 19:35) Biibilimi aamma mianersoqqussutigineqarpoq Saatani inuillu taassumannga aqunneqartut Guutip innuttaanik saassussippata Jehova akuliuteqqikkumaartoq innuttaminillu aarlerinartorsiortitsisunut pissaanini atorumaaraa. Aap, Guutip oqaasiani qangarsuarli siulittuutigineqarpoq Jehovap inuit ajortut piiassagai. (Ussatit 2:21, 22; 2 Thessalonikamiut 1:6-9) Taamatut pisoqarpat saassussisut qularutigissanngilaat akiuuffigisartik tassaasoq Guuti ajugaqanngitsoq. — Ezekieli 38:21-23.

3. SORSUNNEQ TAMANNA QANOQ KINGUNEQASSAVA?

Harmagedonimi sorsunnermi inuit millionillit annaanneqassapput. Taava nunarsuarmi eqqissineqalissaaq. — Saqqummersitat 21:3, 4.

Saqqummersitani oqaluttuarineqarpoq ‘amerlangaartut’ amerlassusaat ilisimaneqanngitsut akiuunnermi tamatumani aniguiumaartut. (Saqqummersitat 7:9, 14) Taakku Jehovamit siulersorneqarlutik nunarsuarmik paratiisinngortitseqataajumaarput, taassuma aallaqqaammut kissaataatut.

Nalunngilarput Guutip innuttaanut qaqugu taamatut saassussisoqassasoq?

[Quppernerup ataani ilanngussat]

[Qupp. 6-mi assiliartaq]

Itsaq Jehovap innuttani illersorpai

[Qupp. 7-mi assiliartaq]

Harmagedonimi sorsunnermi Jehovap innuttani illersoqqissavai