Jiisusimut apeqqut

Upperisarsiornermik soqutigisallit ilarpassui isumaqarput upperisarsiorneq politikkimut sunniuteqartariaqartoq. Upperisarsiorneq inuiaat ajornartorsiutaannik aaqqiiniarnermi pingaaruteqarsinnaasoraat. Allalli uppertut eqqortuliorusuttut misigisimapput upperisarsiorneq politikkilu immikkoortinneqartariaqartut. Politikkip upperisarsiornermut akuliunneqarsimanera illit qanoq isumaqarfigaajuk? Sunniuteqartaqisut taakku marluk imminnut akuliunneqartariaqarpat?

JIISUSI KRISTUSI tassaanerarneqarsimavoq ‘inuk upperisarsiornerup oqaluttuarisaanerani sunniuteqarnerpaaq’. Takorlooriaruk taanna ima aperisinnaallugu: Politikki upperisarsiornermut akuliunneqartussaava? Qanormita akissagaluarpa? Apeqqut tamanna Jiisusip nunarsuarmiitilluni oqaatsimigut iliuutsimigullu nammineq akivaa. Assersuutigalugu Jiisusi qaqqami oqaluutsimini ilisimaneqarluartumi najoqqutassiivoq ajoqersukkami inuiaqatigiinni qanoq sunniuteqarsinnaanerminnik paasinninnissaminnut iluaqutigisinnaasaannik. Oqaluutsimini tusaamaneqaqisumi sammisaasa ilaat qimerlooriartigit.

Allanut attaveqartariaqarput

Jiisusi nassuiaavoq ajoqersukkani silarsuarmut qanoq isiginnittaaseqassanersut. Ima oqarpoq: “Ilissi nunap tarajoraasi; tarajorli kimeeruppat sumik taratserneqaqqissava? Allamut atorsinnaajunnaartarpoq igitassaannanngorluni inunnullu tullaarisassanngorluni. Ilissi silarsuup qaamasoraasi. . . . Qaamasorsi qaamali inunnut, suliasi ajunngitsut taakkununnga takoqqullugit Ataatarsilu qilanniittoq unnersiutigeqqullugu.” (Matthæusi 5:13-16) Sooruna Jiisusip ajoqersukkani taratsumut qaamanermullu assersuukkai?

Jiisusi taamatut oqarami uku pivai, kristumiut inunnut ikittunnguanuinnaanngitsoq silarsuarmulli tamarmut taratsutullusooq issasut, aamma inunnut killilimmik amerlassusilinnuinnaanngitsoq Guutimilli ilumoorlutik ujarlersunut tamanut qaamasuussasut. Assersuutinik tamakkuninnga atuinermigut Jiisusip ersersippaa ajoqersukkani inuiaqatigiinnit immikkoorlutik inuussanngitsut. Sooq immikkoorlutik inuussanngillat?

Manna eqqarsaatigeriassagit: Taratsut nerisassanut akulerunneqanngikkunik sunniuteqarnavianngillat. Qulleq inimiitinneqanngikkuni inimik qaammarsaasinnaanngilaq. Taamaattumik Jiisusip ajoqersukkani avinngarusimasumut nooqqunikuunngisaannarpai mattoqqasunillu upperniaqatigiilioqqunikuunngisaannarlugit. Aamma silarsuarmiunit allanit tamanit avinngarusimasumi inooqqullugit uppeqatiginngisaminnulluunniit attaveqaqqunaveersaaqqullugit kajumissaarnikuunngilai. Soorlu taratsut nerisassanut akulerunneqartussaasut qullerlu inimut qaammarsarneqartussamut inissinneqartussaasoq, taamatuttaaq kristumiut inoqatimik inuunerannut sunniuteqarsinnaajumallutik taakkununnga attaveqartartussaapput.

“Silarsuarmut ilaanngillat”

Jiisusilli kiffami inoqatiminnut attaveqartarnissaat pillugu ajoqersuutaa kristumiut politikkimut isiginnittaaserisassaat pillugu pingaarutilimmik apeqqutissaqalersitsivoq. Sooq? Jiisusip toqussi sioqqutitsiarlugu ajoqersukkani Guutimut ima qinnuppai: “Qinnutinngilakka silarsuarmit peerseqqullugit, ajortorli pissutigalugu paareqqullugit. Silarsuarmut ilaanngillat, soorlu uanga silarsuarmut ilaanngitsunga.” (Johannesi 17:15, 16, NV) Taava kristumiut inuiaqatigiinnut inuuffigisaminnut akuujutigalutik qanoq ilillutik silarsuarmut ilaanaveersaarsinnaagamik? Tamanna paasiniarlugu apeqqutit allat marluk akissutissarsisariaqarpavut:

• Jiisusi politikkimut qanoq isiginnittaaseqarpa?

• Kristumiut ullumikkut qanoq isiginnittaaseqassappat?