“SUUT tamaasa, ussernartulli pinnagit, akiorsinnaavakka.” Inuit ussernartunut qanoq isiginnittaaseqarnerat — ussernartunik nuannarinninnerat — oqariartaatsimit tamatumannga ersersinneqarpoq. Allalli ussernartut akeqqatut isigigamikkit sapinngisartik tamaat akiortarpaat. Illit qanoq isumaqarpit? Ussernartut akiorusuppigit imaluunniit nakkaannarfigissavigit?

Soorunami ussernartut ilaannaat annertuunik ajornartorsiortitsisarput. Assersuutigalugu kaageeqqamik ataatsimik tiguseqqinnerit inuuninni ajoqutiginavianngilat. Ussernartunulli allanut nakkaannartarnerit — pingaartumik kinguaassiuutitigut inuunerlunnermut — ajortorujussuarmik kinguneqarsinnaavoq. Biibilimi ima mianersoqqussuteqarpoq: “Isumaatsutut iliorpoq allasiortoq, taamaaliortoq imminut aseruutissiuinnarpoq.” — Ussatit 6:32, 33.

Kinguaassiuutitigut inuunerlunnissamut ussernartorsiulissagaluarutta qanoq qisuariartariaqarpugut? Tamanna Biibilimi ima akineqarpoq: “[Guutip] piumasaa tassaavoq illernartitaassasusi kinguaassiuutitigut inuunerluttuunasi, tamassi immikkut nuliasilu inooqatigiissasusi illernartitaallusi ataqqeqatigiillusilu.” (1 Thessalonikamiut 4:3, 4) Nakkaannartannginnissat qanoq aalajangiusimajuarsinnaaviuk? Siunnersuutit pingasut iluaqutigisinnaasatit sammissavavut.

Tiingasulersaarutinik isiginnaartarnerit eqqunngitsumik iliuuseqarusulissutigissavat. Jiisusip isigisat pileritsaassinerullu attuumassuteqarnerat ima oqarluni uppernarsarpaa: “Kialuunniit arnamik pileritsaassilluni isigiuaannartup arnaq taanna uummammigut allasiorfigereerpaa.” (NW) Ingattarsertumik assersuusiaq iluaqutigalugu ima kajumissaarivoq: “Isivit talerpiup tammartippatit, peeruk igillugulu.” (Matthæusi 5:28, 29) Jiisusip sumik ilinniartinniarpaatigut? Ussernartut akiorniassagutsigit aalajangersimalluinnartariaqarpugut assillu atoqateqalerusutsitsisartut isiginnaarnaveersaaqqissaartarlugit.

 Assersuuteqariarta. Svejserissummit inngianartoq qaamasoq takugukku qanoq qisuarias­sagaluarpit? Nakkutiinnas­sagaluarpiuk? Soorunami naamik! Ingerlaannaq alassagaluarputit isitilluunniit illersorniarlugit assipallassa­galuarlugit. Taamatuttaaq assit, isiginnaagassiat inuilluunniit tiingasulersaartut takugukkit alapallakkasuartarit. Sunnertin­nginnissannut isummat illersoruk. Siornatigut tiingasuler­saarutinik isiginnaartarsimasoq, Juan, ima oqarpoq: “Arnamik pinnersumik takugaangama arlaleriarlunga qiviarusut­taraluarpara. Noqillungali allamut isiginiartarpunga imminullu oqarfigalunga: ‘Jehovamut qinugit! Massakkorpiaq qinunissat pisariaqartilluinnarpat!’ Qinoreeraangama isiginnaa­rusukkun­naartarpunga.” — Matthæusi 6:9, 13; 1 Korinthimiut 10:13.

Jobi aalajaatsoq eqqarsaatigiuk, taanna ima oqarpoq: “Isikka isumaqatigiissuteqarfigisimavakka niviarsiaq pileritsaallugu isigiumanagu.” (Jobi 31:1) Aamma illit taamatut aalajangiusimannilluarsinnaavit?

Ima misiliigit: Assit, isiginnaagassiat inuilluunniit tiingasulersaartut takugukkit alapallagit. Biibilimik allaqataasoq Guutimut ima oqartoq ilaaruk: “Isikka alartikkit sallunermit [naleqanngitsunit, NW].” — Tussiaat 119:37.

Naammalluinnanngitsuugatta ilaannikkut eqqunngitsunik kajungerisaqartarpugut. Biibilimi allassimavoq: “Kinaluunniit usserneqartarpoq nammineq pilerissutsiminit nassataritilluni kajumitsatsitaallunilu; pilerissutsillu ilumileraangami ajorti erniarisarpaa.” (Jaaku 1:14, 15) Pisup ajorneruleraluttuinnarnissaa qanoq pinngitsoortissinnaaviuk?

Eqqaamassavat eqqarsaatipilunnut qanoq qisuariassanerlutit illit kisivit aalajanger­sinnaagakku. Eqqarsaatit taamaattut akiorlugit eqqarsaatinnit piikkit. Kinguaassiuutitigut inuunerlunnermut tunngasunik takorluuina­veersaartarit. Angut Troyimik atilik, internetikkut tiingasulersaarutinik isiginnaarta­runnaarsimasoq, ima oqarpoq: “Isumalluarnartunik eqqarsaateqar­tarnikkut eqqunngitsunik eqqarsaateqan­nginnissara tamaviaaru­tigisarpara. Tamanna oqitsuinnaanngilaq. Qasseeriarlunga nakkaannartarpunga. Piffissalli ingerlanerani eqqarsaatikka  aqussinnaale­riartorpakka.” Arnaq Elsamik atilik, inuusuttuaraalluni kinguaassiuutitigut inuunerlunnissamut ussernartorsiortarsimasoq, ima oqarpoq: “Ulapittuaannarnikkut Jehovamullu qinujuartarnikkut eqqarsaatit eqqunngitsut piviusunngortinnaveersaartarpakka.”

Ima misiliigit: Kinguaassiuutitigut inuunerlunnermut tunngasunik eqqarsaateqaqqajaaleraangavit Jehovamut qinupallattarit. “Suut ilumoortut tamaasa, suut assuarnaatsut, suut iluartut, suut minguitsut, suut asanartut, suut ajunngitsumik oqaatigineqarsinnaasut, tassa suut ajunngitsut nersornartullu” eqqarsaatigisarnerisigut eqqarsaatit eqqunngitsut akiukkit. — Filippimiut 4:8.

Eqqarsaatit eqqunngitsut piviusunngortinnissaannut periarfissaqalerneq ajornartorsiortitsileriaannaasarpoq. (Ussatit 7:6-23) Ussernartumut tunniutiinnarumanak qanoq iliorsinnaavit?

Biibilimi ima silatusaartumik kajumissaa­ruteqarpoq: “Silatuup perlussaq takusinnaasarpaa qimarnguffissar­siortarlunilu, misilittagakitsorli ingerlaqqittarpoq tamannalu ajunaarutigisarlugu.” (Ussatit 22:3) Taamaattumik suut samminerlugit mianersuutigiuk. Ajornartor­siulissutigi­sinnaasatit eqqarsaatigisakkit ingalassimaniar­tarlugillu. (Ussatit 7:25) Angut Filipemik atilik tiingasulersaarutinik isiginnaartarun­naarsimasoq ima oqarpoq: “Qarasaasiara inimut ilaquttama tamarmik takusinnaasaannut inissippara tiingasulersaarutinillu nuisitsinaveer­saartartumik programmilerlugu. Aatsaallu allanik isersimasoqartillugu internetertarpunga”. Taamattuttaaq Troy, siusinnerusukkut eqqaaneqartoq, ima oqarpoq: “Filmit atoqateqarusu­lersitsisartut isiginnaarneq ajorpakka inuillu atoqatigiinneq pillugu kannguttaatsumik oqaluttartut ilaginaveersaartarlugit. Imminut ussernartorsiortinnissara kissaatiginngilara.”

Ima misiliigit: Unneqqarillutit sanngiiffitit nassuerutigikkit qanorlu ussernartorsiornaveersaarsinnaanerlutit eqqarsaatigeqqissaarlugu. — Matthæusi 6:13.

Taavami ilungersungaaraluarlutit nakkaannartooruit? Nikalloqinak tunniutiinnaqinallu. Biibilimi ima allassimavoq: “Iluartoq arfineq-marloriarluni orlusinnaasaraluarpoq nikueqqittarlunili.” (Ussatit 24:16) Aap, Ataatatta qilammiusup ‘nikueqqinnissatsinnut’ kajumissaarpaatigut. Taassuma asannilluni ikiuerusunnera ilassissaviuk? Qinunikkut taassumunnga saaffiginnittarnerit qatsutinngisaannaruk. Taassuma oqaasiata atuaqqissaartarneratigut uppernerit nakussatsiguk. Kristumiut ataatsimiittarnerinut najuuttarnikkut ussernartunik akiuinissat aalajangiusimajuaruk. Guutip ilinnik ‘nakussatsitsiumalluni ikiuiumallunilu’ neriorsuinera tatigilluinnaruk. — Esaja 41:10.

Cody, allaaserisap aallaqqaataani eqqaaneqartoq, ima oqarpoq: “Tiingasulersaarutinik isiginnaartarunnaarniarnera imaannaasimanngilaq. Arlaleriarlunga nakkaannartarpunga, Guutilli ikiuineratigut naggataatigut tamanna ileqqoriunnaarpara.” Dylan, siusinnerusukkut eqqaaneqartoq, ima oqarpoq: “Suleqatiga innaateriaannaagaluarpara. Aalajaappungali itigartillugulu. Ilerasuuteqannginneq nalerisimaarnaqaaq. Pingaarnerusutullu Jehovap tulluusimaarutigigaanga nalunngilara.”

Aalajaallutit ussernartunut akiuuttarnerpit Guutimut tulluusimaarutaanissaa qularissanngilat! — Ussatit 27:11.