Allaaserisap matuma siuliani eqqaaneqartutut Jiisusip ‘oqaluussisarnini Guutillu naalagaaffianik iivangkiiliumik tusarliussisarnini’ pingaarnerpaatippaa. (Lukasi 8:1) Kilometerit hundredilippassuit pisulluni Israeli angalaarfigalugu inuit Guutip naalagaaffia pillugu ilinniartinniarlugit tamaviaartarpoq. Jiisusip kiffartornera iivangkiiliuni sisamani, Guutip naalagaaffianut hundredit sinnerlugit innersuussinertalinni, allaatigineqarpoq. Innersuussinerit taakkua amerlanersaat Jiisusip nammineq oqaaserai, Guutilli naalagaaffia pillugu taassuma oqaaserisimasaasa ilaminiinnarisimassavaat! — Johannesi 21:25.

Sooq Jiisusip nunamiikkallarami Guutip naalagaaffia taama pingaartitsigaa? Ilaatigut nalunnginnamiuk tamatumani naalakkersuisussatut Guutip toqqarsimagaani. (Esaja 9:5; Lukasi 22:28-30) Nammineq pissaaneqarnissani ataqqineqarnissanilu anguniagarinngilai. (Matthæusi 11:29; Markusi 10:17, 18) Guutip naalagaaffia pillugu oqaluussinini imminut iluaqutaatinnianngilaa. Naalagaaffiup tamatuma asasaminut — Ataataminut qilammiusumut ajoqersukkaminullu aalajaatsunut — iluaqutaajumaarnera pissutigalugu taamani maannakkullu Guutip naalagaaffia soqutigaa. *

Jiisusip Ataatani qilammiusoq asangaarpaa. (Ussatit 8:30; Johannesi 14:31) Ataatami pissusii iluarinartut, soorlu asanninnera, misiginneqatiginninnera naapertuilluarneralu, nuannarai. (5 Mosesi 32:4; Esaja 49:15; 1 Johannesi 4:8) Ataatami salluliuutigineqarnera — soorlu inuit naalliuutaannik soqutiginninnginneraaneq naalliutsitaanissaannillu piumasaqarneraaneq — uumigingaarsimassavaa. Ilaatigut tamanna pissutigalugu Jiisusip “Naalagaaffimmik iivangkiiliu” nalunaarutigerusungaarpaa — nalunngilaami piffissanngorpat Naalagaaffiup tamatuma Ataatani tusaamanerlugaajunnaarsissagaa. (Matthæusi 4:23; 6:9, 10) Qanoq?

Jehova Naalagaaffik aqqutigalugu inuit iluaqutigisassaannik allanngortitserujussuassaaq. Inuit aalajaatsut ‘qullii tamaasa isaannit allarterumaarpai’. Jehovap qullilinernut pissutaasut nungutissavai oqaatsit uku eqquutitinnerisigut: ‘Toqu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq.’ (Saqqummersitat 21:3, 4) Guutip Naalagaaffik aqqutigalugu inuit naalliuutaarutitissavai. *

 Tassa tupinnanngilaq Jiisusip Naalagaaffik pillugu inunnut oqaluttuarusungaarnera! Nalunngilaami Naalagaaffiup tamatuma qulaassagaa Ataatani qanoq pissaaneqartigisoq qanorlu misiginneqatiginnitsigisoq. (Jaaku 5:11) Aamma nalunngilaa asasami allat — inuit Guutimut aalajaatsut — Naalagaaffik iluaqutigissagaat.

Nunarsuarmukarnini sioqquterujussuarlugu Jiisusip Ataatani qilammeeqatigaa. Ataatap Erneq sunik tamanik — qilammik ulloriarpassualinnik galakserpassualinnillu nunarsuatsinnillu alutornartumik uumasorpassuarnillu tassaniittunik — pinngortitsisitsippaa. (Kolossemiut 1:15, 16) Jiisusilli tamakkunannga tamanit inuit nuannaarutigineruai. — Ussatit 8:31.

Jiisusip kiffartornermini inunnik asanninnini ilisarnaatigaa. Aallaqqaataaniilli erseqqissarpaa “nalunaarut nuannersoq” pisariaqartitsisunut tusarliutissallugu nunamut aallartitaalluni. (Lukasi 4:18) Jiisusilli inunnik ikiuinissani oqaluuseriinnanngilaa. Inunnut asanninnini ersersittuarpaa. Assersuutigalugu inuppassuit Jiisusi tusarnaarumallugu katersuuttut taassuma “nalligingaalerpai napparsimasortaallu ajorunnaarsillugit”. (Matthæusi 14:14) Angutip ilungersunartumik nappaatillip Jiisusip piumaguni ajorunnaarsissinnaagaani upperaa. Jiisusillu asanninneq kajumississutigalugu misiginneqatiginnilluni taanna ajorunnaarsiitigalugu ima oqarfigaa: “Piumavunga, mingukkunnaarit!” (Lukasi 5:12, 13) Jiisusip ikinngunni Maria qatanngutiminik Lazarusimik toqukkut annaasaminik aliasuutiginnittoq takugamiuk ‘assut ilungersuummerpoq’ aamma “qissaserpoq”. (Johannesi 11:32-36) Tupinnangaartuliorporlu Lazarusi ulluni sisamani toqungareersimasoq uummartillugu! — Johannesi 11:38-44.

Soorunami Jiisusip nalunngilaa taamani ikiuinini killeqartoq. Nalunngilaa ajorunnaarsitani tamarmik napparsimaleqqissasut toqusunillu makititani tamarmik toqoqqissasut. Aammali nalunngilaa Guutip naalagaaffiata ajornartorsiutit taamaattut ataavartumik aaqqissagai. Tamanna pissutigalugu tupinnartuliuinnarnani aallussilluarluni ‘Naalagaaffimmik iivangkiiliu oqaluussissutigisarpaa’. (Matthæusi 9:35) Tupinnartuliaami Guutip naalagaaffiata qanittukkut nunarsuarmi tamarmi naammassisassaanut ersiutaapput. Taamanikkussaq pillugu Biibilimi neriorsuutit malugikkit.

•  Peqqiilliortoqartarunnaassaaq.

  “Tappiitsut isaat uisitaassapput, tusilartut siutaat ammarneqassapput. Tusiattoq tuttorsuartut pissigarumaarpoq, oqajuitsuugaluaq qiimmattarluni appikkumaarpoq.” Aamma “innuttaasoq kinaluunniit oqassanngilaq: ‘Napparsimavunga!’” — Esaja 33:24; 35:5, 6.

• Toqusoqartarunnaassaaq.

  “Iluartut nuna kingornutissavaat najugaqassallutillu tassani naassaanngitsumik.” — Tussiaat 37:29.

  “Toqu nungutinneqassaaq piujunnaarsivillugu. Guutillu Naalakkap isit tamaasa qullingiarumaarpai.” — Esaja 25:8.

• Toqusut uummaqqissapput.

  ‘Ilivermiittut tamarmik taassuma nipaanik tusarumaarput ilivernillu aniumaarlutik.’ — Johannesi 5:28, 29.

  ‘Toqusut makikkumaarput.’ — Apustilit Suliaat 24:15.

• Kikkut tamarmik angerlarsimaffeqarlutillu suliffeqassapput.

  “Illuliorumaarput namminneq inigisassaminnik viinnequtinillu ikkussuillutik inerititaat nerisassaminnik. Illuliaat allanit inigineqassanngillat ikkussugaalluunniit allanit nerineqassanatik.” — Esaja 65:21, 22.

•  Sorsuttoqarunnaassaaq.

  “Nunarsuarmi tamarmi sorsunnerit soraarsikkumaarpai.” — Tussiaat 46:10.

  “Inuiaat panamik imminnut silugutissaassapput, sorsunnissamut sungiusarunnaassallutik.” — Esaja 2:4.

• Nerisassaaleqisoqarunnaassaaq.

  Guutip “naatsiiassat narsaatinnut siaruartikkatit siallerfigitikkumaarpai iffiassallu narsaatinni naasut kimittuunngortillugillu pikkunartunngortillugit”. — Esaja 30:23.

  “Karrit naammangaartut nunami naasimassapput, qaqqat qaanni aalataarumaarput.” — Tussiaat 72:16, 1990.

• Piitsoqarunnaassaaq.

  ‘Puiugaavissanngillat ajorsartut.’ — Tussiaat 9:19.

  “Annaatissavai piitsoq ikioqqulluni suaartartoq annikilliortitarlu ikiortissaaleqisoq. Nallittussavai sanngiitsut piitsullu, piitsullu inuunerat annaatissavaa.” — Tussiaat 72:12, 13.

Neriorsuutit tamakku atuarakkit paasiviuk sooq Guutip naalagaaffia Jiisusimut pingaaruteqangaartoq? Jiisusip nunamiikkallarami tusarusuttunut tamanut Guutip naalagaaffia oqaluttuarerusungaarpaa nalunnginnamiuk Naalagaaffik tamanna ullumikkut ajornartorsiutinik aliasuutaasunik tamanik nungutitsissasoq.

Guutip naalagaaffia pillugu neriorsuutit Biibilimeersut nuannerunartippigit? Taamaappat Naalagaaffik tamanna pillugu qanoq paasisaqarnerusinnaavit? Tamatumalu pilluaqqussutisiassartai iluaqutigiumaarlugit qanoq qulakkeersinnaaviuk? Allaaserisat ukua kingullersaanni apeqqutit taakku akineqassapput.