Naalakkersuisut peqquserluttuliortarnerat tassaavoq iluanaarniutigiinnarlugu oqartussaanerminnik atornerluinerat. Qangarsuarli taamatut atornerluisoqartarsimavoq. Assersuutigalugu Biibilimi inatsit naapertorlugu eqqartuussinerni akilersinnerluutit inerteqqutaapput, tamatumanngalu erserpoq taamaattoqartarsimasoq ukiut 3500-t sinnerlugit matuma siornali. (2 Mosesi 23:8) Soorunami peqquserluttuliorneq tassaaginnanngilaq akilersinnerluutinik tigusineq. Pisortani atorfillit peqquserluttuliortartut ilaannikkut tigussukartuusarput, pisinnaatitaaffiginagu imminut iluaqutissittarput aningaasanilluunniit tillittarlutik. Immaqa aamma atorfitsik ikinngutimik ilaquttamillu iluaqutigisaannik atornerluttarpaat.

Inuit peqatigiiffiini tamani peqquserluttuliortoqartarpoq, naalakkersuisunili nalinginnaanerpaajugunarpoq. Nalunaarsuiffik (Global Corruption Barometer 2013, Transparency Internationalimit saqqummersinneqartoq) naapertorlugu inuit nunarsuarmi sumi tamaniittut isumaqarput innuttaaqatigiinni peqquserluttuliornerpaat tallimat tassaasut politikkikkut partiit, politiit, pisortani atorfillit, inatsisiliortartut eqqartuussisullu. Nalunaarusiat uku tamatuminnga ersersitsipput:

• AFRIKA: 2013-imi Sydafrikami pisortani atorfillit 22.000-t missaat peqquserluttuliorlutik atorfimminnik atornerluisutut unnerluutigineqarput.

• AMERIKA: 2012-imi Brasiliami inuit 25-t politikkikkut tapersersortissarsiornerminni naalagaaffiup aningaasaataanik atornerluisimasutut eqqartuunneqarput. Taakkua ilagaat præsidentiusimasup atorfilittaasa pisortaat, angut nunami pissaaneqarnerpaap tullia.

• ASIA: Korea Kujallermi Seoulimi 1995-imi niuertarfissuaq uppimmat inuit 502-t toqupput. Paasinarsivorlu illoqarfimmi atorfillit betonngimik pitsaavallaanngitsumik atuisoqarsinnaanera isumannaallisaatinillu sumiginnaasoqarsinnaanera akilersillutik akuerisimagaat.

• EUROPA: “Ajornartorsiutip [peqquserluttuliornerup Europami] annertussusia uissuumminaqaaq,” EU-mi kommissæri Cecilia Malmström oqarpoq. Aamma oqarpoq “politikerit peqquserluttuliornernik nungusaaniarnerminni pimoorussivinngikkunartut”.

Naalakkersuisut peqquserluttuliortarnerisa ajornartorsiutaanera aaqqikkuminaappoq. Professori Susan Rose-Ackerman, peqquserluttuliornerup pinaveersaartinnissaanik ilisimasalik, allappoq tamanna aaqqilluinnarneqassappat “naalakkersuisut suleriaasii allanngorluinnartariaqartut”. Neriuutissaqarpasinngikkaluartoq Biibilimi ersersinneqarpoq allanngornersuaqarsinnaasoq allanngornersuaqarumaartorlu.