• UKIOQ INUUIA: 1941

• INUNNGORFIA: BENIN

• OQALUTTUASSARTAA: ARLALINNIK AAPPALIK JEHOVAMILLU NALUNAAJAASUNIK AKERLILERSUISOQ

INUUNINNI PEREERSUT:

Illoqarferujussuarmi Cotonoumi Beninimiittumi inunngorpunga. Katuullisut perorsar­neqarpunga, naalagiakulan­ngilangali. Taamanikkut inerteq­qutaanngimmat katuulerpassuit arlalinnik aappaqarput. Piffissallu ingerlanerani aappakka sisaman­ngorput.

1970-ikkunni pikitsitsisoqalermat isumaqaraluarpunga nunatsinnut iluaqutaassasoq. Pikitsitsineq tamakkiisumik tapersersorpara politik­kimullu akuliullunga. Pikitsitsisut nuannarin­ngilaat Jehovamik Nalunaajaasut politikkimut akuliunneq ajormata. Nalunaajaasunik malersuisut peqatigisarpakka. 1976-imi Jehovamik Nalunaajaasunit oqaluus­sisartut aallartitat nunatsinniit anisitaammata isumaqaraluarpunga uteqqin­ngisaan­nassasut.

BIIBILI QANOQ ALLANNGUS­SUTIGIGIGA:

1990-imi pikitsitsisoqarun­naarpoq. Tupaallaatigisannik Nalunaajaasut uterput. Eqqarsalerpunga immaqaana taakku Guutimit najorneqartut. Tamatuma nalaani allamik suliffit­taarpunga. Nalunaajaasullu suleqatitaamma upperisani pillugu oqaluttuuppaanga. Biibiliminiit takutippaa Jehova Guutiusoq asannittoq naapertuil­luartuusorlu. (Mosesimik 5. 32:4; Johannesimit 1. 4:8) Pissuserineqartussat ajunngitsut taakku nuannaraakka. Jehova pillugu suli paasisaqar­nerorusukkama Biibilimik misissueqatigineqarusunnera akueraara.

Ingerlaan­nangajak Nalunaajaasut ataatsimiin­nerannut najuuttalerpunga. Assigiin­ngisitsinatik ilumoortumik asaqatigiinnerat takullugu tupigusuutigeqaara. Peqatiginerujar­tortillugit malugivara Jiisusip ilinniar­titarigai ilumoortut. – Johannesi 13:35.

Paasivara Jehova kiffartorfigilis­sagukku ilagiit katuullit qimattariaqarlugit. Tamanna oqitsuin­naanngilaq, allammi qanoq eqqarsar­nissaat annilaangagaara. Sivisuumik iliuuseqan­ngeriarlunga Jehovap ikiuineratigut sapiillisaarlunga oqaluffimmiit aniartorpunga.

Allatigullu aamma allannguerujus­suartariaqarpunga. Biibilimik misissueq­qissaar­tarninnit paasivara Guutip arlalinnik aappaqarneq akuerin­ngikkaa. (Mosesimik 1. 2:18-24; Matiusi 19:4-6) Guutip aappara siulleq kisiat nuliattut akuerisinnaavaa. Pisortanullu taanna kisiat nuliaralugu nalunaarutigaara. Aappakkalu allat timikkut pisariaqar­titaannik amigaateqan­nginnissaat isumageriarlugit aappariun­naarpakka. Piffissallu ingerlanerani aapparinikuusakka marluk Jehovamik Nalunaajaasun­ngorput.

QANOQ ILUAQUTIGIGIGA:

Nuliara suli katuuliugaluarluni Nalunaajaasun­ngornera ataqqivaa. Marluulluta isumaqarpugut uiulluar­nerulertunga.

Isumaqar­tarsimagaluarpunga ajornar­torsiutit politikkikkut pitsanngorsar­neqarsinnaasut, iliuuserisimasagulli iluaqutaan­ngillat. Maanna takusin­naalerpara Guutip kunngeqarfia inuit ajornar­torsiutaannut aaqqiis­sutissatuaasoq. (Matiusi 6:9, 10) Jehovamut qujamasungaarpunga qanoq pillualivit­toqarsinnaasoq pillugu ilinniar­timmanga.

• UKIOQ INUUIA: 1977

• INUNNGORFIA: BRASILIA

• OQALUTTUASSARTAA: PIINSISIORTUNI PALASI

INUUNINNI PEREERSUT:

Illoqarfiup Itup avataatungaani São Paulomiittumi peroriar­torpunga. Illoqarfiup ilaa tamanna pinerluf­fiungaartutut ilisimaneqarpoq.

Nakuuser­nikkaajul­lungalu inuunerlut­torujus­suuvunga ikiaroor­nartunillu tuniniaasarlunga. Piffissalli ingerlanerani paasilersimavara inuunera allanngor­tinngikkukku parnaarus­saanngikkuma inuunera annaassallugu. Taamaattumik inuunera allanngor­tippara, piinsisior­tunullu ilanngullunga. Piffissallu ingerlanerani taakkunani palasin­ngorlunga.

Taamani isumaqaavik­kaluarpunga palasitut inuit ikiorsin­naallugit. Illoqarfitsinni radiukkut upperisarsiorneq pillugu aallakaatitsisarpunga, ilisimaneqarlualerlungalu. Paasiar­tulerparali oqaluffeqarfiup ilaasortatik soqutigin­ngikkaat ingammillu Guutip ataqqinaaser­nissaanik soqutigisaqan­ngitsut. Misigivungalu aningaasan­nanniarneq kisiat siunertarigaat. Taamaattumik aalajangerpunga oqaluffimmiit tassannga aniniarlunga.

BIIBILI QANOQ ALLANNGUS­SUTIGIGIGA:

Jehovamik Nalunaajaasut Biibilimik misissueq­qissaaqatigisalerakkit paasilerpara upperisarsiortunit allanit allaanerungaartut. Ingammik marlunnik maluginiagaqarpunga. Siullertut: Jehovamik Nalunaajaasut Guutimik inoqatiminnillu asanninnertik eqqartuin­narnagu timitaler­tarpaat. Aappaattut: Politikkimut sorsunnernullu akuliunneq ajorput. (Esaja 2:4) Paasisakka taakkua marluk pissutigalugit upperisaq ilumoortoq – inuunermut naassaan­ngitsumut aqqut nerukitsoq – nassaaralugu qularutigin­ngilara. – Matiusi 7:13, 14.

Paasivara Guutimit iluarineqassaguma inuuninni allannguerujus­suartariaqarlunga. Ilaquttakka soqutiginerusariaqarpakka. Aamma maniguun­nerusariaqarpunga. Pisariaqartumik allannguinera oqitsuin­naanngilaq. Jehovalli ikiuineratigut iluatsippoq. Uanga allanngornera nuliama tupigusuutigaa. Uannit siulliulluni Biibilimik misissueq­qissaar­talerpoq. Uanga allanngornera malugigamiuk anersaakkut siumukaatigaa. Marluulluta Nalunaajaasun­ngorusulerpugut. Ullormi ataatsimi imermut morsutsitaavugut.

QANOQ ILUAQUTIGIGIGA:

Nuliaralu meeqqatsinnik pingasunik Jehovamik qanimut ikinnguteqar­nissaannik ikiuinerput nuannaarutigaarput. Ilaqutariittut pilluarpugut. Jehova qutsavigaara ilumoortumut Biibilimiittumut kajungilersis­simammanga. Taannami inuit inuunerannik allannguisitsisarpoq! Uangami uppernarsaataavunga.

• UKIOQ INUUIA: 1957

• INUNNGORFIA: AUSTRALIA

• OQALUTTUASSARTAA: MEERAALLUNI ATUGARLIORSIMASOQ

INUUNINNI PEREERSUT:

Newcastlemi New South Walesimiittumi peroriar­torpunga. Meeqqat arfineq-marluuvugut uangalu angajul­lersaallunga. Angajoqqaakka marluullutik nakuuserajut­tuupput ataatagalu imerajut­tuulluni. Anaanama timikkut misigis­sutsikkullu ajortumik pisarpaanga. Meerapalaanerar­tuarpaanga, annilaangalis­sutigiuak­kannillu anniarfimmut pissasunga oqarfigiuar­tarlunga.

Anaanama timikkut ajoqusiisarnera pissutigalugu atuanngitsuukulavunga. Aqqanilinnik ukioqarlunga angajoq­qaanniit peersitaagama meeqqanut inissiivimmut inissin­neqarpunga. Kingusin­nerusukkullu mattuffeqarfimmi atuarfimmut pillunga. 14-inillu ukioqarlunga tassanngaanniit qimaavunga. Angajoq­qaannut uterusun­nginnama angerlarsimaf­feqanngitsutut aqqusinerni Kings Crossimi Sydneyp eqqaaniittumi inuulerpunga.

Aqqusiniinnarni inuugallarama ikiaroor­tarlungalu imertarpunga. Aamma pornografiit isiginnaar­tarlugillu atortit­tartutut inuuvunga. Unnuit ilaanni amiilaarujus­suarpunga. Natklubimik piginnittup inaaniitillunga angutit marluk isermata sinittarfim­mukaqquaanga. Tusaavakkalu angutit marluk taakku pisiareriarlunga umiarsuarmut Japanimukar­tussamut isertortumik ikiteriarlunga Japanimi imerniar­tarfimmi sulisun­ngortin­niarlunga oqaluttut. Uippallerlunga aneerasuar­tarfimmin­ngaannit pissippunga ikiortis­sarsiorlungalu.

Angut naapitara Sydneymi tikeraartoq susoqar­neranik oqaluttuuppara neriullunga aningaasanik tunissagaanga. Tuninanga iniminut qaaqquaanga uffarlungalu neriniassagama. Najuinnarparalu, ukiorlu ataaseq qaangiuttoq katippugut.

BIIBILI QANOQ ALLANNGUS­SUTIGIGIGA:

Jehovamik Nalunaajaasut Biibilimik misissueqatigisalerakkit misigis­sutsikkut aalassatsitaarujus­suarpunga. Paasigakku Saatani ajortunut pisuusoq kamappunga. Ilinniar­tinneqarsimavungami Guuti naalliuutinut pisuusoq. Anniarfimmik sioorasaarineq amiilaariuaan­narsimagakku oqilial­larujus­suarpunga paasigakku Guutip inuit anniarfimmi pillarneq ajorai.

Nalunaajaasut aalajangiinitik tamatigut Biibilimik tunngaveqar­tittaraat tupigusuutigaara. Upperisartik naapertorlugu inuupput. Ilakkuminar­tuunngilanga, aamma oqaatsikka iliuutsikkalu nuanniit­taraluartut asannittumik ataqqin­nittumillu pisarpaannga.

Ajornar­torsiutiginerpaasimavara naleqan­ngitsutut misigineq. Ukiut arlallit Nalunaajaasun­ngoreeraluarlunga suli imminut uumigisarpunga. Nalunngilara Jehova asallugu, isumaqarsimagaluarpungali uattut ittumik asannis­sinnaan­ngitsoq.

Aatsaalli ukiut 15-it morsutsitaanerma kingorna isumaga allanngorpoq. Jehovamik Nalunaajaasut ataatsimiit­tarfianni oqalugiartup Jaaku 1:23, 24-lu eqqartorpai. Versini taakkunani Guutip oqaasia tarrarsuummut assersuun­neqarpoq, tassa Biibilimi Jehovap qanoq isigineraatigut takusin­naavarput. Eqqarsaatigilerpara Jehovap uanga pillunga isiginnittaasia imminut isiginnit­taatsinnit allaanerunersoq. Aallaqqaammut isuma tamanna akuerin­ngikkaluarpara. Sulimi misigigama Jehovap asasinnaan­ngikkaanga.

Ullualuit qaangiummata allassimaffik inuuninnik allannguis­sutigisara atuarpara. Esaja 1:18-imi Jehova ima oqarpoq: “Qaallusi eqqartuuteqatigiitta, … ajortuliasi aappallaris­sakkatut aappalutsigigaluarunik aputitut qaqortigilissapput.” Soorlulusooq Jehovap ima oqarfigigaanga: ‘Vicky, qaallutit eqqartueqatigiitta. Ilisarisimavakkit, ajortuliatit ilisimavakka, aammali uummatit nalunngilara – asavakkit.’

Unnuaq taanna sininngitsoorpunga. Jehovap asagaanga suli qularisaraluarlugu Jiisusip utertitsis­sutitut pilliutaa eqqarsaatigisalerpara. Paasilerparalu Jehovap erinitsajuilluni utaqqillunga assigiin­ngitsorpas­suartigut asannit­tuliorfigisarsimagaanga. Taamaak­kaluartoq ima oqarsimavungalusooq: “Jehova, asanninninnut ajukkuppunga. Ernerpit pilliutaa ajortuliannut matussusiisussatut naammanngilaq.” Soorlulusooq utertitsis­sutitut Jiisusip pilliutaa itigartis­simagiga. Maannali utertitsis­sutitut pilliutip eqqarsaatigeq­qissaar­tarneratigut Jehovamit asaneqarnera misigisalerpara.

QANOQ ILUAQUTIGIGIGA:

Misigivunga minguillunga uumallunga siunertalimmillu inuuneqalerlunga. Aappariil­luarnerulerpugut misigisakkalu allanik ikiuinermut atorakkit nuannaarutigaara. Jehova qaninnerujar­tortuarlugu misigivunga.

• UKIOQ INUUIA: 1974

• INUNNGORFIA: RUSLANDI

• OQALUTTUASSARTAA: HEAVY-METALINIK NUANNARISALIK

INUUNINNI PEREERSUT:

Erinnior­torsuup tusaamasap Pyotr Ilich Tchaikovskyip inunngorfiani illoqarfimmi Votkinskimi inunngorpunga. Piitsuuvugut. Ataataga nuannersunik pissuserpas­suaqaraluarluni imerajuttuuvoq, taamaattumik ilaqutariittut angerlarsimaffipput najummatser­nartarpoq.

Atuarfimmi pikkorin­ngilanga, ukiullu ingerlaneranni imminut nikaginera sakkortusiartorpoq. Tunuarsimaar­tunngoriar­torlungalu allanik tatigin­nikkunnaarpunga. Atuarnera unamminiar­nartoqar­tippara. Assersuutigalugu atuarfimmi oqaaseqaq­quneqaraangama allaat tunngaviusut ilinniareersimasakka nassuiarsin­naasanngilakka, uffa piffissami allami nassuiarsin­naasaraluarlugit. 8. klassi naammas­sigakku karakteerinni ima allassimasoqarpoq: “Oqaatsit nalunngisai annikipput, eqqarsaatiminik oqaasin­nguisin­naanngilaq.” Allatat taakku nikallus­sutigingaarpakka, naleqan­ngitsutullu suli misiginerulerlunga. Inuunerma siunertaa eqqarsaatigisalerpara.

Inuusut­tuaraallunga imigassar­tortalerpunga. Aallaqqaammut iluarusuutigisarpara. Imerpal­laartaleramali ilerasut­talerpunga. Inuunera siunertaqarpasinngilaq. Nikalloralut­tuinnarpunga ilaannikkullu ullut arlallit angerlarsimaf­finniit anineq ajorlunga. Imminut toqunnissara eqqarsaatigisalerpara.

20-nik ukioqarlunga heavy-metal nuannarisarilerpara. Tusarnaaraangakkit nukissaqalersutut misigisarpunga – tusarnaaqatis­sarsior­talerpungalu. Nujakkaarsuan­ngorpunga siutikkullu piercingilersorlunga nipilersor­tartutullu nuannarisattut atisalersor­talerlunga. Piffissap ingerlanerani naakkit­taatsun­ngorpunga kamajasuun­ngorlungalu ilaquttannullu assortuisalerlunga.

Isumaqaraluarpunga heavy-metalinik tusarnaarneq pillualis­sutigis­sallugu, akerlianilli pisoqarpoq. Inuttut allanngorluin­narpunga. Nipilersortartut nuannarisakka pillugit nuanniitsunik tusagaqaraangama pakatsisarpunga.

Imminut toqunnissara eqqarsaatigeq­qittalerpara, tamatumuuna pimoorus­sillunga. Anaanaga uannit asanningaartoq uangalu pillunga iliuuseqangaarsimasoq aliasutsik­kusunnginnakku inoorusun­ngikkaluarlunga imminut toqussin­naanngilanga. Misigis­sutsikkut artornaqaaq.

Eqqarsaatikka allamut saatsik­kusullugit russit atuakkiaataat atuartalerpakka. Oqaluttuat ilaanni oqaluffimmi kiffartortoq sapiitsoq oqaluttuarineqarpoq. Tassanngaannaq Guuti inoqatikkalu pillugit iliuuseqarusulerpunga. Taamaan­ngisaan­narsimallunga uummammiukka Guutimut aniatilerpakka. Inuunera qanoq siunertaqalersin­naanersoq paaserusullugu Guutimut qinuvunga. Qinutillunga tupinnaan­nartumik oqilial­lappunga. Tupinnar­nerusumilli pisoqarpoq. Akunnerit marluk qaangiutiinnartut Jehovamik Nalunaajaasut kasuttorput Biibilimillu misissueqateqar­nissamik neqeroorfigalunga. Tassaasoraara qinnutinnut akissut. Inuuneq pilluarnartoq nutaaq ulloq taanna uannut aallartippoq.

BIIBILI QANOQ ALLANNGUS­SUTIGIGIGA:

Sapernar­tikkaluarlugu pigisakka heavy-metalimut tunngasut tamaasa igippakka. Tusaqqoor­tuarpakkali. Tamakkuninnga nipilersorfiusut sanioqquk­kaangakkit inuunerisimasara eqqarsaatigisarpara. Taamaattunik nipilersorfiusut qanillinaveersaar­talerpakka, eqqaamasakkami tamakkua nuanniitsut maannakkut ilinniakkannut nuannersunut akuutik­kusunngilakka. Siornatigut pisimasut eqqarsaatigeq­qajaaleraangakkit qamannga pisumit Guutimut qinusarpunga. Tamanna iluaqutigalugu ‘Guutip eqqissinera inuit paasisin­naasaannit annerungaartoq’ misigisarpara. – Filippimiut 4:7.

Biibilimik misissueq­qissaarninni paasivara kristumiut upperisartik allanut oqaluttuarisar­tussaagaat. (Matiusi 28:19, 20) Isumaqaavippunga uanga taamaaliorsin­naananga. Nalunngilarali inuit allat ilumoortut Biibilimeersut taakku aamma pisariaqar­tikkaat. Tamakkumi nammineq pillualis­sutigingaarpakka qamuunalu eqqissis­sutigalugit. Annilaangasaraluarlunga ilikkakkakka allanut oqaluttuarisalerpakka. Biibili pillugu allanut oqaluttuaraangama tupaallaatigisannik imminut tatigineruler­tarpunga. Aamma upperisartaara upperineruler­tarpara.

QANOQ ILUAQUTIGIGIGA:

Maanna nuliaralu pilluarluta inuuvugut. Nuannaarutigisannik inuit arlallit, ilaatigut anaanaga najagalu, Biibilimik ilinniar­neranni ikiorsimavakka. Guutimut kiffaanera allanillu Guuti pillugu ilinniar­titsinera inuuninnik siunertaqalivitsitsivoq.