NALUNNGISAQARPIT siulliuniartuaannartunik? — Immaqa allanik sakattaajuaannarpoq utaqqisuni siullinngorniarluni. Misiginikuuiuk? — Ajoqersuisorsuup malugai inersimasut issiaviit pitsaanerit ingiffiginiarlugit siulliuniartut. Tamannalu nuannarinngilaa. Maannalu oqaluttuutissavakkit qanoq pisoqarnersoq.

Biibilimi allassimavoq Jiisusi farisiiarip, juutit siulersortaasa pingaartut ilaata, angerlarsimaffianut neriartoqqusaasoq. Jiisusip takkukkami takuai pulaartut allat iseramik pitsaanerpaanik  issiavissarsiortut. Tamanna pissutigalugu pulaartunut oqaluttualerpoq. Oqaluttuaa tusarusuppiuk?

Jiisusi ima oqarpoq: ‘Katittunut qaaqqutikkuit nerrivimmi inissamut pitsaanerpaamut inisseqinak.’ Sooruna taama oqartoq? — Jiisusi nassuiaavoq immaqa akimanerusumik qaaqqusaasoqarsinnaasoq. Qanoq pisoqarsinnaanersoq assilissami takoriaruk. Qaaqqusisup ornillugu oqarfigissavaa: ‘Tunuanut inginniarit una angut tassunga ingissammat.’ Qanormita pulaartoq misigissava? — Kanngutsissaaq pulaartut tamarmik isigigaanni issiavimmut pitsaannginnerusumut nuutsitaagami.

Jiisusip takutinniarpaa pitsaanermut inissinniartarneq eqqunngitsuliornerusoq. Taamaattumik ima oqarpoq: ‘Katittunut qaaqqusaaguit inissamut tunorlerpaamut inissigit. Immaqa qaaqqusisup ornillutit ima oqarfigissavaatit: “Ikinngutiga, inissamut akimanermut inissigit.” Taava qaaqqusat isigineranni ataqqinarsisitaassaatit issiavimmut pitsaanerusumut nuutsitaallutit.’ — Lukasi 14:1, 7-11.

Jiisusip suna oqaatiginiaraa paasiviuk? — Tamanna erseqqissarniarlugu assersuusiorsinnaavugut. Takorlooriaruk bussimut ilaalerlutit. Bussi ulikkaangajaqqavoq. Taava tuaviinnaq issiavimmut inginniapallassavit utoqqaat nikorfaannartariaqalersillugit? — Isumaqarpit Jiisusip tamanna iluarissagaa? —

Immaqa inuit ilaat oqassapput qanoq ilioraluarutta Jiisusip soqutiginavianngikkaa. Aamma illit taama isumaqarpit? — Jiisusi farisiiarimut neriartoqqusaagami malugaa issiaviit suut pulaartut allat ingiffigineraat. Isumaqarpit aamma ullumikkut  qanoq iliornersugut malugisaraa? — Maanna Jiisusi qilammiippoq, taamaattumik malinnaanissaminut periarfissaqarluarpoq.

Siulliorusuttuaannartut pingaarnerorusuttuaannartullu ajornartorsiungaalersitsisinnaapput. Assortuuttoqalersinnaavoq kamaattoqalersinnaallunilu. Ilaatigut taama pisoqartarpoq meeqqat busseraangata. Bussi unippat matualu ammarniariartoq meeqqat tamaviaarlutik iserniarsarisarput. Tuaviinnaq igalaat eqqaannut inginniapallattarput. Qanorlu pisoqarsinnaava? — Issiaviit pilerngutilersinnaavaat.

Aap, siulliuniartoqartuaannarpat eqqissiviilliungaarnermik tamanna kinguneqarsinnaavoq. Allaat Jiisusip ajoqersugaasa ilaat siulliorusuttuaannaramik pingaarnerorusuttuaannaramillu ajornartorsiuteqaleraluarput. Soorlu atuakkami matumani kapitali 6-imi oqaluttuarineqartoq kina arlartik annerunersoq isumaqatigiinngissutigaat. Jiisusimi qanoq iliorpa?  — Naveerpai. Kingornali taannarpiaq pillugu assortuuteqqilerput. Maanna tusassavat tamanna qanoq aallartinnersoq.

Jiisusi apustilinilu kingullerpaamik Jerusalemiliarput. Allanik ilaqarput, Jiisusillu Guutip naalagaaffia pillugu oqaluuteqqammerpai. Ingerlanerminni Jaakup Johannesillu Guutip naalagaaffiani Jiisusip kunngitut naalakkersueqatigilernissaa eqqarsaatigaat. Allaat anaanartik, Salome, tamanna pillugu oqaloqatigisimavaat. (Matthæusi 27:56; Markusi 15:40) Maanna Jerusalemiliartillutik Salomep Jiisusi ornippaa; pallorfigaa qinnuigilerlugulu.

Jiisusi ima aperivoq: ‘Sumik qinnuiginiaramma?’ Ima akivoq: ‘Naalagaaffiinuna pilersikkukku ernikka marluk saninnut ivertissinnaaneritit, aappaa talerpippit tungaanut aappaa saamippit tungaanut?’ Apustilit allat qulit tusaavaat Jaakup Johannesillu anaanaminnut  Jiisusi taama qinnuigitikkaat. Tamannamita qanoq isumaqarfigaat? —

Jaaku Johannesilu kamaatingaalerpaat. Taamaattumik Jiisusip tamaasa ajoqersulerpai. Siullermik oqaluttuuppai silap matuma naalagaasa atorfikkaajuneq pissaaneqarnerlu nuannarigaat. Allat tamaasa oqarnermissut iliorterusuppaat. Jiisusilli ajoqersugai taamaassanngillat. Naamik, ima oqarpoq: ‘Akornassinni nuimanerujumasoq ilissinnut inussiaataassaaq.’ — Matthæusi 20:20-28.

Eqqarsaatigilaariaruk! Inussiaq sulerisarnersoq nalunngiliuk? — Allat sullittarpai. Naatsorsuutigineq ajorpaa allanit sullinneqarnissani. Pitsaanerpaamut inissinngisaannarpoq, pingaannginnerpaamulli. Nikanartutut pissusilersortarpoq, akimaniartutuunngitsoq. Jiisusi oqarpoq siulliorusukkutta allanut taamaattassasugut.

Uagutsinnut tamanna qanoq isumaqarpa? — Isumaqarpit inussiap naalakkanilu assortuussutigissagaat kia inissaq pitsaaneq inissiffigissaneraa? Imaluunniit kina nereqqaassanersoq oqallisigissagaat? Qanoq isumaqarpit? — Jiisusi oqarpoq inussiap naalakkani siulliutittuaannassagaa. — Lukasi 17:7-10.

Siulliuniarnissamummi taarsiullugu qanoq iliussagatta? — Allat kiffartuuttassavavut. Tamanna isumaqarpoq allat immitsinnit annerutissagivut. Allat siulliutittassavavut. Eqqaamavigit taamaaliorniaraanni suut iliuuserineqarsinnaanersut? — Qupperneq 40-mut 41-mullu qupperiarit takoqqillugillu allanut qanoq iliortoqarsinnaaneranik siunnersuutit. Taamaaliornikkut allat siulliutissavatit.

Ajoqersuisorsuup allat siulliuttarpai. Tamanna takutippaa allat kiffartuunnerisigut. Kingullerpaamik apustilini unnussioqatigigamigit allaat seeqqummerluni isigaat asappai. Allanut ikiuinissatsinnut piareersimagutta takutissavarput allat siulliukkivut. Taamaalilluta Ajoqersuisorsuaq Ataataalu, Jehova, nuannaartissavavut.