ISUMAQARPIT Jehovamut kiffartorneq sapernanngitsoq? — Ajoqersuisorsuaq oqanngilaq tamanna ajornaatsuujuaannassasoq. Toqunissaminut aqaguttoq ajoqersukkani ima oqarfigai: “Silarsuup uumissorpasi ilisimassavarsi ilissi siunissigulli uumissormanga.” — Johannesi 15:18.

Petrusi imminut tatigingaarluni oqarpoq nammineq Jiisusi tununnaviarnagu. Jiisusili akivoq unnuaq taanna Petrusip pingasoriarluni ilisarisimanngilluinnarnerassagaani. Taamatorluinnarlu pisoqarpoq! (Matthæusi 26:31-35, 69-75) Qanoq ililluni taamatut pisoqarsinnaagami? — Taama pisoqarpoq Petrusi annilaangalermat. Aamma apustilit allat annilaangalerput.

Nalunngiliuk sooq apustilit annilaangalernersut? — Tassa pingaarutilerujussuaq iliuuserinnginnamikku. Iliuuserineqarsinnaasup suunera paasigukku allat qanorluunniit oqaraluarpata iliuuseqaraluarpataluunniit Jehovamut kiffartornissannut tamanna iluaqutigissavat. Siullermilli oqaluusereqqilaassavarput Jiisusip unnummi tassani kingullermi apustilini ilagimmagit qanoq pisoqarsimanersoq.

Poorskisioqatigiipput. Tamanna nalliuttorsiorneruvoq immikkut ittumik nereqatigiinnertalik Guutip innuttaasa ukiumut ataasiarlutik nalliuttorsiutigisartagaat. Nalliuttorsiutigisarpaat taamani Egyptenimi inussiaataanermit aniguisitaanertik eqqaaniarlugu. Poorskisioreeramillu Jiisusip apustilini nereqatigeqqilaarpai, tamannalu immikkut illuinnartumut aallarniutaavoq. Kingusinnerusukkut kapitalimi tusassavat nerineq tamanna immikkut ittoq Jiisusimik  eqqaamanninnissamut qanoq iluaqutigisinnaaneripput. Nereqatigeereeramik Jiisusillu apustilit kajumissaareeramigit naatsiivimmukaqatigai Getsemanemut. Tassaniinneq nuannarisorujussuugamikku tassunnakulasarput.

Jiisusip naatsiivimmiitsillutik ilani qimaamilaarpai Ataataminut qinuniarluni. Aamma Petrusi, Jaaku Johannesilu Guutimut qinoqquai. Taakkuli sinilerput. Pingasoriarluni Jiisusip qimaamilaarpai kisimiilluni qinuniarluni, pingasoriarlunilu uterami takuai Petrusi ilaalu sinittut! (Matthæusi 26:36-47) Sooruna eqqumaannassasut Guutimullu qinullutik? — Tusassavat sooq.

Unnuk taanna siusinnerusukkut Judasi Iskariotip Jiisusi apustilillu ilagisimavai. Soorlu eqqaamagunarit Judasi tillittuujoreerpoq. Maannalu killuussisunngorpoq. Nalunngilaa Jiisusi apustilinilu Getsemanep naatsiiviata sua tungaani naapittartut. Taamaattumik anivoq sakkutuunillu aallerluni Jiisusi tigusariniassammassuk. Tikiummata Jiisusip aperai: “Kina ujarpisiuk?”

Sakkutuut akivaat: “Jiisusi.” Jiisusip annilaanganngivilluni akivai: “Uangaavunga.” Sakkutuut tupigusungaaramik Jiisusi taama qunusuitsigimmat tunuariarlutik nunamut niverput. Jiisusili nangippoq: ‘Uanga ujagarigussinga, taava ilakka uku qimagutitiinnarsigit.’ — Johannesi 18:1-9.

Taava sakkutuut Jiisusi tiguaat qilersorlugulu, apustilillu annilaangalerlutik qimaapput. Petrusilli Johannesillu paaserusuppaat qanoq pisoqassanersoq, taamaattumik ungasianiit malippaat. Naggataatigullu Jiisusi palasiunerup Kajfasip illuanukaanneqarpoq. Johannesip palasiuneq ilisarisimavaa, taamaammat kiffap arnap matumik paarsisup Johannesi Petrusilu kaajaluisamut isertippai.

Palaserpaaluit Jiisusimik eqqartuusseqataasussat Kajfasip illuanut takkutereersimapput. Jiisusi toqutaatikkusuppaat. Taamaattumik siullermik ilisimannittut salluliortippaat. Taava angutit ilaannut isattartippaat  tilluartillugulu. Taamatut pisoqarnerani Petrusi qanittuaniippoq.

Tassanngaannaq Petrusi kiffamit arnamit Johannesimik imminerminillu mappiussisumit ilisariteriataarpoq. Arnaq ima oqarpoq: “Illittaaq Jiisusi Galilæamioq ilagaat.” Petrusili oqarpoq nammineq Jiisusi ilisarisimanngilluinnarlugu. Kinguninnguagut arnap allap Petrusi ilisaraa oqarlunilu: “Uuma Jiisusi Nazaretimioq ilagaa.” Petrusi misiaqqippoq. Taava tassaniittut ilaasa Petrusi ornippaat oqarlutillu: “Ilumut, aamma illit taakkua ilagaatsit.” Pingajussaanik Petrusi misiarpoq imalu oqarluni: “Inuk taanna ilisarisimanngilara.” Petrusi allaat uppernarsaavoq ilumoornerarluni, taava Jiisusip Petrusi qiviarpaa. — Matthæusi 26:57-75; Lukasi 22:54-62; Johannesi 18:15-27.

Sooq Petrusi sallua? — Tassa annilaangagami. Sooq? Sapiinnerulerniarluni qanoq iliorsimassagaluarpa? Eqqarsaatigeriaruk. Jiisusimaa qanoq iliorsimava sapiinnerulerniarluni? — Guutimut qinuvoq, Guutillu ikiorpaa sapiitsooqqullugu. Eqqaamajullu Jiisusip pingasoriarluni Petrusi eqqumaqqullugu oqarfigigaa. Petrusili qanoq iliorpa? —

 Sinilertuaannarpoq. Guutimut qinusimanngilaq, eqqumasimananilu. Taamaattumik Jiisusi tigusaammat pakasarneqarpoq. Kingusinnerusukkullu Jiisusi eqqartuunneqarmat patittarneqarluni toqunniarlugulu pilersaarusiormata Petrusi annilaangalerpoq. Uffa Jiisusip nalunaaquttap akunnialunngui tamatuma siorna apustilini oqarfigigai qanoq pineqarnissartik naatsorsuutigissagaat. Qanoq pineqassappat? — Silarsuarmit uumissorneqarnissartik naatsorsuutigisariaqarpaat, soorlu Jiisusi nammineq uumissorneqarsimasoq.

Sumimmitaava Petrusip misigisaanut assingusumik misigisaqarsinnaavugut? — Takorlooriartigu atuarfimmiittutit  atuaqativillu ilaasa inuuissiorneq ajortut imaluunniit juullisiorneq ajortut ajortumik eqqartoraat. Immaqa tikkuarlutit ima aperaatit: “Aamma illit inuuissiorneq ajorpit?” imaluunniit: “Aamma illit juullisiorneq ajorpit?” Taava qanoq iliussavit? Ilumoortumik oqarnissat sapissaviuk? — Sallunissannut Petrusitut ussernartorsiussavit? —

Petrusi Jiisusip miserratiginerata kingorna aliatsangaarpoq. Eqqarsaatigileramiuk qanoq iliorsimanini anivoq qiangaalerlunilu. Peqqissimivoq isumataarlunilu. (Lukasi 22:32) Eqqarsaatigeriartigu Petrusitut annilaangatigilinnginnissamut suna iluaqutigisinnaanerlutigu? — Eqqaamakkit Petrusip puiugai, tassa Jehovamut qinuneq eqqumanissarlu. Ajoqersuisorsuarmut ajoqersugaarusukkutta taava qanoq iliortariaqarpugut? Illit qanoq isumaqarpit? —

Qularnanngilluinnarpoq Jehovap ikiuinissaanik qinnuiginissaa pisariaqartikkipput. Jiisusi Jehovamut qinummat Jehovap qanoq ikiorpaa? — Jiisusi nakussatsinniarlugu inngilimik aallartitsivoq. (Lukasi 22:43) Guutip inngiliisa aamma uagut ikiorsinnaavaatigut? — Biibilimi ima allassimavoq: “[Jehovap] inngilia taassuminnga mianerinnittut eqqaanni inississaaq, aniguisissavaalu.” (Tussiaat 34:8) Guutimilli ikiorneqarnissamik qinuneq naammanngilaq. Aamma qanoq iliussagatta? — Jiisusip ajoqersukkani aamma oqarfigai eqqumassasut mianersorlutillu. Qanoq ililluta mianersorsinnaagatta? —

Naalagaaffilersaarfimmi ataatsimiinnerni oqaatigineqartut tusarnaarluaqqissaartariaqarpavut, Biibilimilu atuakkavut eqqumaffigalugit. Aamma Jehovamut qinunissarput puigunngisaannartariaqarparput. Qinnuigisinnaavarput kiffartorfiginissaanut ikioqqulluta. Taamaaliorutta annilaangalissagaluarutta ikiussavaatigut. Taava nuannaarluta oqaluussinissamut periarfissavut atorlugit allat Ajoqersuisorsuarmik Ataataanillu oqaluttuutissavavut.