EDENIP naatsiiviata avataani Adam Evalu naalliuttaqaat. Inuussutissaqarniarlutik suleruluttarput. Orpiit paarnaqartartut pinnatik, kakillarnaqutit naasupiluillu kapinartullit avataanni naajorarput. Tamanna pivoq Adamip Evallu Guuti naalanngimmassuk ikinngutigiunnaarlugulu.

Aammattaarli Adam Evalu toqujartulerput. Eqqaamassavat Guutip oqarfigigai toqussasut orpik aalajangersimasoq neriffigigaluarunikku. Ullormi neriffimminni tassanerpiaq toqujartulerput. Guutimut naalannginnamik sianiissusiat!

Adamikkut qitornaat tamarmik inunngorput angajoqqaamik Edenip naatsiivianit Guutimit anisinneqarnerata kingornagut. Tamanna pissutigalugu meeqqattaaq utoqqalisussaapput toqusussaallutillu.

Jehova naalassimagaluarunikku Adam Evalu namminneq qitornatillu nunami naassaanngitsumik pilluarlutik inuusinnaasimassagaluarput. Utoqqalissanngikkaluarput, napparsimasassanatik toqussanatillu!

Guutip kissaatigaa inuit pilluarlutik naassaanngitsumik inuussasut, neriorsuivorlu qaquguluunniit taamaaliumaartut. Nuna tamarmi alianaatsunngorumaarpoq, inuillu tamarmik peqqissiumaarput. Nunamiittullu tamarmik inoqatitik tamaasa Guutilu ikinngutigilluarumaarpaat.

Evali Guutimut ikinngutaajunnaarpoq. Taamaattumik ernigaangami naalliuttarpoq. Anniartarpoq. Jehovamut naalannginnini pissutigalugu aliasuutissarpassuaqalersimassaaq, ilaa?

Adam Evalu amerlasuunik erneqalerput paneqalerlutillu. Ernertik angajulleq inunngormat, taanna Kainimik atserpaat. Nukaa Abelimik atserpaat. Taakku qanoq pippat? Nalunngiliuk?