UMIARSUUP silataani inuit ileqqumissut inuujuarput. Suli ilimaginngilaat ulersuaqalernissaa. Immaqa illartalillaramilli aatsaat taama illartigipput. Illarunnaarasuarpulli.

Tassanngaannaq siallilerpoq. Sialuk qilammit kuuinnalivippoq, soorlu imeq qattamit kuineqartoq. Noa eqqortumik oqalussimavoq! Maannali umiarsuarmut ikisinnaajunnaareerput, Jehovap matu matoreermagu.

Nuna pukkitsoq erniinnaq imermit qarsunneqalerpoq. Imeq kuussuanngorpoq. Orpiit uppikaapput ujarassuillu assakaapput, ittuttorsuuvorlu. Inuit ersisorujussuupput. Nunamut qutsinnerusumut majorrapput. Ugguartorujussuanngorput Noa naalallugu umiarsuarmut matu matunngikkallarmat ikisimannginnamik! Inortuereerpulli.

Ulikkaluttuinnarpoq. Ullut 40-t unnuallu 40-t siallersorujussuujuarpoq. Kiisa qaqqat portunerit allaat ulugussaapput. Inuit uumasullu umiarsuarmiinngitsut tamarmik ajunaarput, soorlu Guuti oqarsimasoq. Umiarsuarmiittulli annapput.

Noa ernerilu pitsammik umiarsualiorsimapput. Erngup kivippaa, umiarsuarlu puttallarpoq. Taava siallerunnaarmat seqinnilerpoq. Kakkaak! Suna tamarmi imaannaavoq. Takusassatuaavoq umiarsuaq imaani puttasoq.

Inorujussuit peerupput. Inunnik ajoqusiisinnaajunnaarput. Tamarmik toqupput, anaanaat inuillu ajortut allat tamarmik ilanngullutik. Ataataammi?

Inorujussuit ataataat uatsitut inuiunngillat. Inngiliupput nunamut aqqarsimasut angutitut inuujumallutik. Ulersuarli nalliummat inuttut allatut toqunngillat. Inuit timaat atulersimasatik atorunnaarpaat, inngilitullu qilammut uterlutik. Guutilli inngiliisa ilaqutariissortaannut ilaaqqusaajunnaarput. Satanip inngiligilerpai. Biibilimi taagorneqarput inngilipilunnik.

Guuti anorlersitsilerpoq ulersuarlu appariartulerpoq. Qaammatit tallimat qaangiummata umiarsuaq qaqqap qaavanut tinuguppoq. Ullorpassuit ingerlapput umiarsuarmiittullu silammut qiviaraangamik qaqqat qaarpiaat takusinnaalerpaat. Imaq appariartuinnarpoq.

Taava Noap tulugaq umiarsuarmit tingitippaa. Timmisarpoq utertarlunili, iluamik miffissaqannginnami. Taamaaliortaqattaarpoq utertarlunilu, umiarsuarmut mittarluni.

Noap paaserusuleramiuk nuna panersimanersoq, tui umiarsuarmit tingitippaa. Tuili uterpoq miffissaminik nassaannginnami. Noap aappassaanik tingitippaa, uterporlu uuliaqutip pilutaa siggumminik kimmiarlugu. Taava Noap paasivaa imarsuaq nunami millisimasoq. Noap tui pingajussaanik tingitippaa, kiisamilu panertumik inissarsivoq.

Guutip Noa oqaluffigilerpaa. Oqarpoq: ’Umiarsuarmit aniit. Inoqutitit uumasullu tamaasa ilagalugit anigitsi.’ Umiarsuarmiissimapput ukioq ataaseq sinnilaarlugu. Nuannaarsimassaqaat ajoratik silamut aneqqikkamik!