ILAQUTARIIT ukua ila amerlassusii! Tassa Jakob ernerilu aqqaneq- marluk. Paneqarportaaq. Qitornaasa ilaasa atii nalunngiligit? Ilinniariartigik.

Leap ernertaarai Ruben, Simeon, Levi Judalu. Rakel qitornartaannginnami aliasoqaaq. Taava kiffani arnaq Bilha Jakobimut tunniuppaa, Bilhalu marlunnik ernertaarpoq Danimik Naftalimillu atilinnik. Taava aamma Leap kiffani arnaq Zilpa Jakobimut tunniuppaa, Zilpallu Gad Aserilu ernertaarai. Lea suli marlunnik ernertaarpoq, tassa Isakar Zebulonilu.

Kiisami Rakel meerartaarportaaq. Josefimik atserpaa. Kingornagut Josef tusarfigisassavarput, pingaaruteqartorujussuanngussagami. Tassa Jakobip erneri aqqaniliusut Rakelip angutaani Labanimi najugaqartilluni ernertaarisai.

Jakob paneqarportaaq, ilaatali ataasiinnaap atia Biibilimi taaneqarpoq. Atia tassa Dina.

Taava Jakob aalajangerpoq Laban qimassallugu Kana’anillu nunaanut utissalluni. Qitornarpassuani savaaterpassuanilu nersutaaterpassuanilu katersorpai, ungasissorsuarmullu angalanertik aallartippaat.

Jakob inoqutaalu sivisungaatsiartumik Kana’anip nunaaneereermata, Rakel ernertaaqqippoq. Angalatillugit erninera pivoq. Rakel erninermini peruloqaaq, kiisalu toquvoq. Nukappiarannguarli erniaa ajunngilaq. Jakobip Benjaminimik atserpaa.

Jakobip ernerisa aqqaneq-marluusut atii eqqaamassavavut, inuiaqatigiit Israelikkut tamarmik taakku nagguigimmatigik. Jakobip ernerisa ilaat qulit Josefillu erneri marluk Naggueqatigiinnut Israelikkunnut aqqaneq-marluusunut atsiunneqarput. Nukappiaqqat taakku tamarmik inunngoreermata Isak suli ukiorpassuit inuuvoq, taamalu amerlatigisunik erngutaqarami pilluaatigisimassaqaa. Erngutaali arnaq Dina qanoq pisimanersoq tusariartigu.