MAANI qanoq pisoqartoq takusinnaaviuk? Angutit tassaapput Israelimi sakkutuut. Angutit pullutik imerput. Angut sanianni nikorfasoq tassaavoq eqqartuussisoq Gideon. Imernerminni inissisimanerat misissorpaa.

Angutit imernerminni inissisimaneri assigiinngitsut malugikkit. Ilaat pullutik imerput. Ataaserli assamminik qalooraalluni imerpoq eqqamini pisunik alapernaasiitigaluni. Tamanna pingaartorujussuuvoq, Jehovap Gideon oqarfigimmagu angutit imertillutik alapernaasertut kisiisa qineqqullugit. Sinneri angerlaqqusaapput. Suna pissutaasoq paasiniariartigu.

Israelikkut ajornartorsioqqilersimapput Jehova naalannginnamikku. Midjanikkunnit naalagaaffigineqalersimapput ajortumillu pineqarlutik. Taava Israelikkut Jehova torlulaffigaat ikioqqullutik, Jehovallu tusaavai.

Jehovap Gideon oqarfigaa sakkutuunik katersueqqullugu, taava Gideonip sakkutuut 32.000-it katersorpai. Sakkutuulli Israelikkut akeraat 135.000-iupput. Jehovalli Gideon oqarfigaa: ’Sakkutuutit amerlavallaarput.’ Sooq Jehova taama oqarpa?

Tassa Israelikkut ajugaagunik isumaqaratarsinnaammata ikiorneqarnatik ajugaallutik. Immaqa isumaqassapput Jehovap ikiuinera atorfissaqartinnagu. Taava Jehovap Gideon oqarfigaa: ’Angutit annilaangasut tamaasa angerlaqqukkit.’ Gideon taamaaliormat sakkutuuisa ilaat 22.000-it angerlarput. Sakkutuui 10.000-iinnanngorput sakkutuunut 135.000-inut sorsuttussat.

Aammali Jehova oqarpoq: ’Suli amerlavallaarput.’ Taava Gideon peqquaa angutit kuummit uumannga imeqqullugit pullutillu imertut tamaasa angerlarteqqullugit. ’Angutit 300-t imertillutik alapernaasertut atorlugit ajugaatikkumaarpakkit,’ Jehova neriorsuivoq.

Gideonip sakkutuuni 300-t pingasunngorlugit avippai. Angutit tamaasa immikkut qarlortaammik qummuattamillu ikumatitamik imalimmik tunivai. Unnuap qeqqata missaani sakkutuut akeqqat tammaarfiat avatangerpaat. Taava ataatsikkut tamarmik qarlortaassuatik supiutigalugit qummuattatik sequmippaat suaarlutillu: ’Jehova pillugu, Gideonilu pillugu!’ Sakkutuut akeqqat iteramik paatsiveerupput annilaartorujussuullutillu. Isumaqarput sakkutoorparujussuarnit saassunneqalerlutik. Tamarmik qimarrapput, Israelikkullu ajugaapput.