QAAMMATIT marluk missiliorlugit Egyptenimit aallarnermik kingornagut Israelikkut Sinajip qaqqaa, aamma Horebimik taagorneqartoq, tikippaat. Tassani Jehovap Moses oqaluuppaa orpikkamit ikumasumit. Inuit tassani tammaarput najugaqarallarlutillu.

Inuit qaqqap ataani utaqqitillugit Moses qaqqamut majuarpoq. Qaqqap qaavani Jehovap Moses oqarfigaa Israelikkut imminut naalaqqugini immikkullu innuttariumagini. Moses qaqqamit aterami Israelikkut Jehovap oqaasiinik oqaluttuuppai. Inuillu oqarput Jehova naalakkumallugu, taassumunnga innuttaajumagamik.

Taava Jehova tupinnartumik iliuuseqarpoq. Qaqqap qaavanit pujortitsillunilu nipituumik kallersitsivoq. Inuillu oqaluffigai: ’Uanga tassa Jehova Guutit ilinnik Egyptenimit aniguisitsisoq.’ Taava inappai: ’Allanik guutisiussanngilatit uangaanngitsunik.’

Guutip Israelikkut aamma inatsisinik allanik qulingiluanik tunivai. Inuit annilaangasorujussuanngorput. Moses oqarfigaat: ’Illit oqaluffigissavatsigut, siooragatta Guutip oqaluffigippatigut toqoqinagatta.’

Kingorna Jehovap Moses oqarfigaa: ’Qaqqamut majuarit uannukarlutit, ujaqqanik allaffissianik marlunnik inatsisinik inunnut naalaqqusannik allaffigisannik tuniumaarpakkit.’ Taava Moses qaqqamut majuaqqippoq. Ullut unnuallu 40-t tassani uninngavoq.

Guuti inatsiserpassuaqarpoq innuttami maleruagassaannik. Mosesip inatsisit taakku allattorpai. Guutip aamma Moses ujaqqanik allaffissianik marlunnik tunivaa. Taakku Guutip nammineq allaffigai inatsisinik qulinik inunnut peqqussutigisaminik. Taakku taagorneqarput inatsisinik qulinik.

Inatsisit qulit inatsisaapput pingaartut. Aammali Guutip Israelikkunnut inatsisai amerlaqisut allat tamarmik pingaartuupput. Inatsisit ilagaat: ’Jehova Guutit asassavat uummatikkut iluunngarlutit, isumakkut iluunngarlutit, tarnikkut iluunngarlutit nukinnillu tamanik.’ Alla tassa: ’Tullit ilittut asassavat.’ Guutip ernera, Jesus Kristus, oqarsimavoq inatsisit Jehovap innuttaminut Israelikkunnut tunniussaasa taakku marluk pingaarnersarigaat. Kingusinnerusukkut Guutip ernera ajoqersuutaalu pillugit amerlasuut ilinniarumaarpavut.