PAULUS passimmigut kalunnilerneqarsimavoq sakkutuumillu Romamiumit paarineqarluni. Paulus Romami parnaarussaaqqavoq. Qanoq pineqarnissaminik Romamiut kaasariata aalajangiinissaa utaqqivaa. Parnaarussaatillunili pulaartoqaqqusaavoq.

Romamut tikinnerminit ullut pingasut kingornagut juutit pisortaasut ilaannut oqariartortitsivoq takusaqqulluni. Juuterpassuit Romami najugallit pulaarpaat. Paulusip Jesusimik Guutillu naalagaaffianik oqaluussiffigai. Ilaat uppertunngorput kristumiunngorlutillu, ilaalli upperumanngillat.

Aammattaaq Paulusip sakkutuut assigiinngitsut paarsisini oqaluussiffigisarpai. Ukiuni marlunni tassani parnaarussaatilluni Paulusip inuit oqaluussiffigisinnaasani tamaasa oqaluussiffigisarpai. Tamatuma kinguneranik allaat kaasarip inoqutaasa naalagaaffik pillugu nutaarsiassaq nuannersoq tusarpaat, ilaallu kristumiunngorput.

Nerrivimmili issiasoq kinaana? Illit eqqoriarsinnaaviuk? Aap, tassa Timoteus. Aamma Timoteus naalagaaffik pillugu oqaluussinini pissutigalugu parnaarussaasimavoq, maannali iperagaasimavoq. Tikiupporlu Paulus ikiorumallugu. Timoteusip suut allakkai nalunngiligit? Tusassavat.

Illoqarfiit Filippi aamma Efesus oqaluttuami 110-mi eqqartorneqartut eqqaamavigit? Illoqarfinni taakkunani Paulus ilagiinnik kristumiunik pilersitseqataavoq. Maanna parnaarussivimmiit Paulusip kristumiut taakku allaffigai. Allakkat taakku Biibilimiipput, taaguuteqarpullu Paulusip Evfisumiunut Filípimiunullu allagai. Maanna Paulusip Timoteus oqaluuppaa ikinngutitik kristumiuusut Filippimiittut qanoq allaffigissagai.

Filippimiut Paulus inussiarnerfigisarsimaqaat. Parnaarussivimmiitillugu tunissutinik nassippaat, taamaattumillu Paulusip qutsavigai. Tunissutinik aatsisoq Epafroʹditusimik ateqarpoq. Taannali napparsimalerpoq toqungajallunilu. Aaqqissimavorli angerlamullu aallarnissaminut piareerluni. Paulusip Timoteusillu allagaat Filippimut nassassavai.

Parnaarussivimmiitilluni Paulusip allakkat allat marluk Biibilimiittut allappai. Aappaat kristumiunut Kolosʹsæmiittunut. Allakkat taakku qanoq taaguuteqartut nalunngiligit? Paulusip Kulorsamiunut allagai. Aappaat inuttut allakkanik imaqarput, tassaasut ikinngutigilluakkaminut Fileʹmonimik atilimmut aamma Kolosʹsæmi najugalimmut allagai. Fileʹmonip kiffaa Oneʹsimus pillugu allaagaapput.

Oneʹsimus Fileʹmonimit qimaasimavoq Romamullu pilluni. Arlaatigut tusarpaa Paulus Romami parnaarussivimmiittoq. Takusarpaa, Paulusillu Oneʹsimus oqaluussiffigaa. Oneʹsimus erniinnaq kristumiunngorpoq. Oneʹsimusip qimaasimanini peqqissimissutigilerpaa. Taava Paulusip Fileʹmonimut allakkamini suna allaatigigaa ilimagisinnaaviuk?

Paulusip Fileʹmon qinnuigaa Oneʹsimus isumakkeerfigeqqullugu. ’Ilinnut utertippara,’ Paulus allappoq. ’Maannali kiffariinnanngilat. Aammattaaq kristumiuulluarpoq qatanngutaalluni.’ Oneʹsimus Kolosʹsæmut angerlarluni aallarami allakkat taakku marluk, Kulossæmiunut Filemonimullu, aappai. Takorloorsinnaavarput Fileʹmon qanoq nuannaartigisoq tusaramiuk kiffani kristumiunngorsimasoq.

Paulusip Filippimiut Fileʹmonilu allaffigigamigit nuannersumik tusarlerpai. ’Timoteus ilissinnut aallartinniarpara,’ Paulusip Filippimiut allaffigai. ’Ungasinngitsukkulli uanga nammineq tikeraassavassi.’ Fileʹmonilu allaffigaa: ’Inisimaffissannik piareersaagina.’

Paulus iperarneqarami qatanngutini angutit arnallu kristumiuusut illoqarfippassuarniittut tikeraarpai. Kingornagulli Paulus Romami parnaarussaaqqippoq. Nalunngilaa tamatumuuna toqunneqarumaarluni. Taamaattumik Timoteus allaffigaa ornipallaqqulluni. ’Guutimut aalajaassimavunga,’ Paulus allappoq, ’Guutillu akilerumaarpaanga.’ Paulusip toqunneqarnerata kingornagut ukiorpaalunnguit qaangiuttut Jerusalem piuneerussaaqqippoq, tamatumuuna Romamiunit.

Biibilimili oqaluttuaq nangippoq. Jehova Guutip apustili Johannes Biibilip atuagartaanik kingullernik allatsippaa, Saqqummersitat ilanngullugit. Siunissami pisussat tassani oqaluttuarineqarput. Pisussat paasiniariartigik.