Erfalasumik ataqqinninniarluni ilassinninneq. Jehovap Nalunaajaasuisa erfalasumik sikiffiginnilluniluunniit ilassinninneq — amerlanertigut inuiattut erinarsuummik erinarsuutigaluni — upperisarsiornikkut iliuutsitut isigaat, isumaqaramik erfalasumik ilassinninnikkut Guuti annatsitsisutut isigineqarani naalagaaffik tamatumaniluunniit naalakkersuisut annaassisuunerarneqartartut. (Es 43:11; 1 Kor 10:14; 1 Joh 5:21) Naalakkersuisut taakkua ilaat tassaavoq itsaq Babylonip kunngia Nebukadnesari. Kunngip pissarsuup taassuma qanoq ataqqinartigalunilu uppertiginerluni inunnut paasitinniarlugu inuusaliarujussuaq nappaqquaa. Innuttani peqquai nunagisamik ataqqinninniutitut ittumik nipilersortoqartillugu inuusaliarujussuaq pallorfigissagaat. Hebræerilli pingasut — Shadrakip, Meshakip Abed-Negollu — toqumik pillarneqarnissaminnik sioorasaarneqaraluarlutik inuusaliarujussuaq pallorfigiumanngilaat. — Danielimik allakkat, kapitali 3.

Oqaluttuarisaanermik allattartoq Carlton Hayes ima allappoq: “[Nalitsinni] erfalasoq tassaavoq inuiaassutsimik pingaartitsinermut tunngatillugu ilumoorfiginninnermut assersuutaasoq pingaarneq pallorfigineqartorlu pingaarnerpaaq. ... Erfalasumik tigummisup sanioqqukkaangatik angutit nasaartarput. Erfalasumik ataqqinninniutinik taalliortut taalliortarput meeqqallu erinarsortarlutik.” Hayesip allaatigaa ulluni aalajangersimasuni ‘illernartitaasuni’ inuiaassuseq pingaartinneqartartoq, assersuutigalugu USA-mi juulip sisamaat inuiattut ullorsiorfiuvoq. Aamma allappoq inuiaassusermik pingaartitsineq ‘inunnik iluartuutitaqarlunilu pingaarnerpaatitaqartoq’ aamma ‘naalaffeqartoq’, imaluunniit eqqaassutissiaqartoq. Brasiliami nalliuttorsiornermi sakkutooqarnermi qaffasissumik atorfilik ima oqarpoq: “Erfalasoq ataqqineqarlunilu guutisiorfigineqartarpoq ... soorlu nunavigisaq guutisiorfigineqartartoq.” Qinerlerfissiami pisoqqaanerusumi ima allassimasoqarpoq: “Erfalasoq sanningasutut illernartuuvoq.” — The Encyclopedia Americana.

 Qinerlerfissiami tamatumani nutaanerusumi allassimavoq inuiattut erinarsuutit “nunavigisamik pingaartitsisuusut amerlanertigullu Guutimut siulersoqqunernik inuiannillu naalakkersuisunillu illersueqqusinernik imaqartartut”. Taamaattumik Jehovap kiffaasa nalliuttorsiornerit nunavigisamik pingaartitsisut erfalasumik ilassinniffiusut inuiaassutsimillu erinarsuutinik erinarsorfiusut upperisarsiornikkut iliuuseqarfiusutut isumaqarfigigamikkit ingasaassinerarneqarsinnaanngillat. Soqutiginarpoq Jehovap Nalunaajaasuisa qitornaasa USA-mi atuarfinni erfalasumik ilassinnikkumasannginnerat nunavigisamillu ilumoorfiginninnermut uppernarsaajumasannginnerat pillugu atuakkami tuluttuumi ima allassimasoqarnera: “Ulluinnarni tamakkuninnga ileqqulersuuteqartarnerup upperisarsiornerunera eqqartuussiviit qullersaannit kiisami aalajangersarneqaqattaarpoq.” — The American Character.

Jehovap innuttai nalliuttorsiornernut Biibilimut naapertuutinngitsutut isigisaminnut peqataaneq ajoraluarlutik allat taamaaliorsinnaatitaanerannik ataqqinnilluinnarput. Aamma erfalasoq ilisarnaatitut ataqqivaat inatsisillu naapertorlugit naalakkersuisunngortinneqartut ‘naalakkersuisutut qullersaasutut’ ‘Guutimut kiffaasutut’ akueralugit. (Rom 13:1-4) Taamaattumik Jehovap Nalunaajaasuisa Biibilimi ‘kunnginik qullersaallutillu pisortaasunik tamanik qinnussisarnissamik’ kajumissaarut malittarpaat. Taamaaliortarpugulli ‘eqqissisimalluta inuusinnaajumalluta, tamatigut Guutimik mianerinnittuulluta assuarnaatsuujumallutalu’. — 1 Tim 2:2.

Qinerseqataaneq. Kristumiut ilumoortut allat qinersisinnaatitaanerat ataqqivaat. Qinersisoqaraangat akerliuniartanngillat, qinigaasunullu naalatsigitittarput. Politikkimulli tunngatillugu akuliunnaveersaarluinnartuupput. (Matt 22:21; 1 Petr 3:16) Kristumiu nunami qinersinissamik peqqussuteqarfiusumiittoq imaluunniit nunami qinersisitsivimmukarumanngitsunik iluarinninngiffioqisumiittoq qanoq iliussava? Shadraki, Meshaki Abed-Negolu allaat Durap qooruanukarmata kristumiu pissutsini tamatumunnga assingusuni ilerasuutiginngikkuniuk qinersisitsivimmukarniarluni aalajangersinnaavoq. Kalluunnaveersaartuujuartariaqarporli. Najoqqutassiat arfinillit uku eqqumaffigisariaqarpai:

1.   Jiisusip ajoqersugai ‘silarsuarmut ilaanngillat’. — Joh 15:19, NW.

2. Kristumiut Kristusimut taassumalu naalagaaffianut sinniisuupput. — Joh 18:36; 2 Kor 5:20.

3. Kristumiut ilagiit uppernikkut asaqatigiinnikkullu ataasiussuseqarput. — 1 Kor 1:10; Kol 3:14.

4. Qinersisut qinigaasup atorfimmini iliuuserisassai akisussaaqataaffigaat. — Maluginiakkit allassimaffiit uku qanoq ilinniarfigisinnaanerivut: Samuelimik allakkat siulliit 8:5, 10-18 aamma Timotheusimut allakkat siulliit 5:22.

5. Jehovap Israelikkut inummik kunngeqarumanerat imminik narruginninnertut isigaa. — 1 Sam 8:7.

6. Kristumiut Guutip naalagaaffia pillugu tusarliussaq politikkikkut qanorluunniit isumalinnut nakimaallutik oqaluussissutigiuartariaqarpaat. — Matt 24:14; 28:19, 20; Hebr 10:35.

Sakkutuujunissamut taarsiullugu sulisitaaneq. Nunat ilaanni sakkutuujujumanngitsut sakkutuujunissamut taarsiullugu piffissami aalajangersimasumi sulinissaat naalakkersuisunit piumasarineqartarpoq. Kristumiu taamatut piumaffigineqaruni aalajanginnginnermini Jehovamut qinusariaqarpoq immaqalu uppeqatiminik anersaakkut inersimalluartumik oqaloqateqarluni, tamatumalu kingorna nammineq aalajangertariaqarpoq nalunngeqatiginnissutini ilinniartinneqarsimasoq tunngavigalugu. — Uss 2:1-5; Fil 4:5, NW.

Guutip oqaasiani oqaaqqissaarneqarpugut ‘qullersaasunut pisortaasunullu naalatsigiteqqulluta, taakkununnga maleruuteqqulluta ajunngitsuliornernullu sunulluunniit piareersimaqqulluta, saamasooqqullutalu [ingasaassinianngitsooqqulluta, NW]’. (Tit 3:1, 2) Tamanna eqqarsaatigalugu imminut ima aperisinnaavugut: ‘Sakkutuujunissamut taarsiullugu sulisitaanissamut akuersiguma kalluunnaveersaartuujunnaassaanga? Upperisarsiornermut eqqunngitsumut peqataalissaanga?’ (Mika 4:3, 5; 2 Kor 6:16, 17) ‘Sulisitaanera pissutigalugu kristumiutut akisussaaffimma naammassinissaat ajornakusoortissavara imaluunniit allaat akisussaaffikka naammassisinnaassanngilakka?’ (Matt 28:19, 20; Ef 6:4; Hebr 10:24, 25) ‘Imaluunniit taamatut  sulisitaaguma anersaakkut sammisassanut periarfissaqarnerulersinnaavunga, immaqa piffissaq tamaat oqaluussisartunngorsinnaallunga?’ — Hebr 6:11, 12.

Kristumiu ilerasuuteqarnani parnaarussaanissaminut taarsiullugu sulisitaaniarluni aalajangerpat uppeqataasa tamanna ataqqisariaqarpaat. (Rom 14:10) Taamatulli sulisitaasinnaanngitsutut misigippat aamma tamanna ataqqisariaqarpaat. — 1 Kor 10:29; 2 Kor 1:24.