1, 2. Illit Jehovamik asanninnissamut suna kajumississutigaajuk?

ILLIT Jehova Guuti asaviuk? Jehovamut tunniulluinnareersimaguit qularnanngitsumik angissaatit — pissutissaqarluarlutit! Taassuminnga asanninnerput pissusissamisuuinnarpoq. Uagutsinnut asannittuliornera akillugu asavarput. Tamanna Biibilimi ima allaatigineqarpoq: “Uagut asannippugut taassuma [Jehovap] asaqqaarmatigut.” — 1 Joh 4:19.

² Jehova siulliulluni asannittuliorfiginnippoq. Taassuma nunarsuaq angerlarsimaffissatsitut alianaatsutut uagutsinnut tunniuppaa, aamma timikkut pisariaqartitavut isumagisarpai. (Matt 5:45) Suli pingaaruteqarneruvoq anersaakkut pisariaqartitatsinnik isumaginnittarnera. Oqaatsini, Biibili, uagutsinnut tunniussimavaa, aamma kajumissaarpaatigut imminut qinusaqqulluta qularutiginagu tusarnaassagaatigut anersaaminillu illernartumik tunisinermigut ikiussagaatigut. (Tuss 65:3; Luk 11:13) Tamanit pingaarnerpaamik, ernini asangaakkani utertitsisussatut nunarsuarmut aallartippaa ajortimit toqumillu aniguisitaasinnaaqqulluta. Jehovap ilumut asannittuliorfigingaarpaatigut! — Johannesi 3:16; Romamiut 5:8 atuakkit.

3. (a) Guutip asanninneraniittuinnarumalluta susariaqarpugut? (b) Apeqqut pingaarutilik suna eqqarsaatigisariaqarparput, tamatumunngalu akissut sumiippa?

³ Jehovap kissaatigaa asanninnini naassaanngitsumik  iluaqutigissagipput. Iluaqutigissagutsiguli uagut nammineq apeqqutaavugut. Guutip oqaasiani ima kajumissaaruteqarpoq: “Guutip asanninneraniittuinnaritsi” naassaanngitsumik inuunissamik neriuuteqarlusi. (Jud 21) Uiguummit ‘-ttuinnaritsi’-mit erserpoq Guutip asanninneraniittuinnarumalluta iliuuseqartariaqartugut. Asanninnera iliuuseqarnitsigut akisariaqarparput. Apeqqut pingaarutilik eqqarsaatigisariaqagarput tassaavoq: ‘Qanoq ilillunga Guutimik asanninnera ersersissinnaavara?’ Apeqqummut tamatumunnga akissut apustilip Johannesip oqaasiini isumassarsiarititaasuni ukunaniippoq: “[Guutimut] asanninneq tassaavoq inassutai maleruaratsigit,  inassutaalu artornartuunngillat.” (1 Joh 5:3) Oqaatsit taakku qanoq paasisariaqarnersut misissoriartigu, tassami Guuti qanoq asatigalutigu taassumunnga takutikkusupparput.

4, 5. Oqaluttuariuk Jehovamik asanninnerit uummatinni qanoq sorlaneqqaarnersoq.

⁴ ‘Guutimut asanninneq’ — apustilip Johannesip oqaatsit taakku allakkamigit suna eqqarsaatigaa? Tamatta immikkut Jehovamut misigissutsivut qamannga pisut pivai. Illit eqqaamaviuk taassumunnga asanninnerit uummatinni qanga sorlaneqqaarnersoq?

⁵ Jehova taassumalu siunertai pillugit sallusuissummik ilinnialeqqaarnerit uppissuseqalernerillu eqqarsaatigeriakkit. Paasivat ajortilittut inunngoraluarlutit taamaattumillu Jehovamut takornartaagaluartutit taassuma Kristusi aqqutigalugu naammalluinnassutsimik Adamip annaasaanik angusisinnaan­ngortikkaatit inuunermillu naassaanngitsumik kingornussisinnaan­ngortikkaatit. (Matt 20:28; Rom 5:12, 18) Paasilerpat Jehovap pilliutaa qanoq annertutigisoq ernini asangaakkani aallartikkamiuk illit iluaqutissannik toqusinnaa­niassammat. Tamanna qamuuna attorneqaatigaat, Guutilu asalerpat illit taamatut asanningaartu­liorfigimmatit. — 1 Johannesi 4:9, 10 atuakkit.

6. Asanninneq ilumoortoq qanoq ersersinneqartarpa, Guutimillu asanninnerit sunissamut kajumississutigaajuk?

⁶ Piffissalli ingerlanerani Jehovamik asanninnerujartorputit. Asanninneq misigissusiinnaananilu oqaasiinnaanngilaq. Jehovamut ilumoortumik asanninneq tassaaginnanngilaq oqarluni taanna asallugu. Upperneq assigalugu asanninneq ilumoortoq tamatumunnga ilisarnaataasunik iliuuseqartitsisarpoq. (Jaak 2:26)  Asanninneq iliuutsinit asasamut nuannaarutaasunit ersertarpoq. Taamaattumik Ataatannik qilammiusumik, Jehovamik, asanninnerit uummatinni sorlanimmat taassumunnga nuannaarutaasumik inoorusulerputit. Illit Jehovap Nalunaajaasuisa ilaattut kuisimavit? Taamaappat Jehovamik asanningaarnerit kajumississutigalugu inuuninni pingaaruteqarnerpaamik aalajangersimavutit. Taassuma piumasaatut iliorniarlutit taassumunnga tunniulluinnarputit, tunniulluinnarsimanerillu kuisinnikkut ersersippat. (Romamiut 14:7, 8 atuakkit). Jehovamut pingaartorsiorluni neriorsuineq tamanna eqqortissagaanni apustilip Johannesip nangilluni eqqaasaa iliuuserisariaqarpoq.

7. Guutip inassutaasa ilaat suuppat, sunalu Guutip inassutaanik maleruaanermut ilaava?

⁷ Johannesi ima nassuiaavoq: “[Guutimut] asanninneq tassaavoq inassutai maleruaratsigit.” Guutip inassutai suuppat? Guuti oqaatsini, Biibili, aqqutigalugu aalajangersimasunik arlalinnik uagutsinnut peqqussuteqarpoq. Assersuutigalugu inerteqqutigai aalakoorneq, kinguaassiuutitigut inuunerlunneq, guutipilussiorneq, tillinneq sallunerlu. (1 Kor 5:11; 6:18; 10:14; Ef 4:28; Kol 3:9) Guutip inassutaanik maleruaanermut ilaavoq ileqqussatigut najoqqutassiat Biibilimiittut paasiuminartut naapertorlugit inuuneq.

8, 9. Biibilimi erseqqissumik inatsiseqanngikkaangat qanoq ililluta paasisinnaavarput suut Jehovap nuannarinerai? Assersuuteqarit.

⁸ Jehovali nuannaartikkumagutsigu uagutsinnut peqqussutaanut paatsuugassaanngitsunut naalannerinnaq naammanngilaq. Jehova kiffaanngissutsitsinnik killiliisunik inuunitsinni sunut tamanut tunngasunik inatsisiliunngilaq. Taamaattumik ulluinnarni nalaatarpassuaqarsinnaavugut Biibilimi toqqaannartumik siunnersuuteqarfigineqanngitsunik.  Taamaattoqartillugu qanoq ililluta paasisinnaavarput Jehovap suut nuannarinerai? Taanna qanoq isiginnittaaseqarnersoq Biibilimi erseqqippoq. Biibilimik atuaqqissaartarnitsigut paasisarparput suut Jehovap nuannarinerai suullu uumiginerai. (Tussiaat 97:10 atuaruk; Uss 6:16-19) Paasisarparput isiginnittaatsit iliuutsillu suut pingaartinnerai. Jehovap kinaassusia iliuuserisartagaalu pillugit paasisaqarnerujartortilluta taassuma eqqarsartaasia aalajangikkatsinnut ileqqutsinnullu sunniuteqarnerujartortissinnaavarput. Taamaammat qanoq iliornissarput pillugu Biibilimi erseqqissumik inatsiseqanngikkaluaraangalluunniit amerlanertigut paasisinnaasarparput “suna Naalakkap piumasarigaa”. — Ef 5:17.

⁹ Assersuutigalugu filminik fjernsynimiluunniit aallakaatitanik peqqarniitsumik nakuusernermik kinguaassiuutitigulluunniit assuarnartuliornermik isiginnaagassartalinnik isiginnaannginnissaq pillugu Biibilimi toqqaannartumik peqqussuteqanngilaq. Tamakkuninngalu isiginnaannginnissaq pillugu peqqussuteqarnissaa pisariaqarpa? Jehova tamakkununnga qanoq isiginnittaaseqarnersoq nalunngereerparput. Jehova pillugu Biibilimi erseqqissumik ima allassimavoq: “[Nakuusernermik] nuannarisaqartoq uumigaa.” (Tuss 11:5) Aamma ima allassimasoqarpoq: “[Guutip] eqqartuukkumaarpai kinguaassiuutitigut inuunerluttut allasiortullu.” (Hebr 13:4) Oqaatsit isumassarsiarititaasut taakkua eqqarsaatiginerisigut Jehovap piumasaa suunersoq paasilluarsinnaavarput. Taamaattumik aliikkutassat iliuutsinik Guutitta uumigisaanik isiginnaagassartallit isiginnaartarniarnagit aalajangerpugut. Nalunngilarput ileqqussatigut minguttuussuseq silarsuup aliikkutassatut ajoqutaanngitsutut saqqummiuttagaa ingalassimagaangatsigu Jehova nuannaartartoq. *

10, 11. Sooq Jehovamut naalattuuniarluta aalajangerpugut, taannalu qanoq isiginnittaaseqarluta naalattarparput?

 ¹⁰ Guutip inassutaanik maleruaanitsinnut suna pissutaanerpaava? Sooq Guutip nuannarisaatut paaseriikkavut naapertorlugit ullut tamarluinnaasa inoorusuppugut? Pillarneqanngitsoornissaq Guutillu piumasaanik sumiginnaasut misigisartagaannik kingunipiloqannginnissaq pissutigiinnarlugit taamatut inoorusuppugut? (Gal 6:7) Naamik, taamatut inoorusuppugut Jehovamut naalanneq taassuminnga asanninnitsinnik ersersitsinissamut periarfissatut isigigatsigu. Soorlu meeraq ataataminit akuerineqarusuttorujussuusartoq, taamatuttaaq uagut Jehovamit akuerineqarusuppugut. (Tuss 5:13) Taanna Ataatagaarput, asavarpullu. Uagutsinnut nuannaarnarnerpaallunilu nalerisimaarnarnerpaavoq nalunnginnatsigu Jehovamut iluarinartumik inooriaaseqarluta. — Uss 12:2.

¹¹ Taamaattumik Jehova pinaaserata nangaanatalu, piumassuseqarlutali, naalattarparput. * Peqqussutit sorliit naalattassanerlugit sorliillu sumiginnartassanerlugit aalajangerneq ajorpugut, aamma imaanngilaq aatsaat piumalleraangatta sapernanngikkaangalluunniit naalattartugut. ‘Uummatitsigulli naalattuuvugut.’ (Rom 6:17) Tussiaasiortup ima allattup misigisimaneratut misigivugut: “Kajumissaatigaakka naalakkiutitit nuannarilluakkakka.” (Tuss 119:47) Aap, Jehovap naalannissaa nuannarisaqaarput. Miserratiginngilarput naalalluinnartariaqarlutigu naalalluinnarneqarnissanilu piumasarigaa. (5 Mos 13:1) Noa pillugu Biibilimi allassimasutut Jehovap uagut pilluta  oqarsinnaanissaa kissaatigaarput. Ataataanerpaaq aalajaatsoq, ukiorpassuarni naalattuunermigut Jehovamik asanninnerminik ersersitsisimasoq, taanna pillugu Biibilimi ima allassimasoqarpoq: “Noa Guutip peqqusineratorluinnaq iliorpoq.” — 1 Mos 6:22.

12. Naalannerput Jehovap qaqugukkut nuannaarutigingaartarpaa?

¹² Kajumilluta naalakkaangatsinni Jehova qanoq misigisarpa? Oqaasiani allassimavoq ‘uummataa nuannaartittaripput’. (Uss 27:11) Uagut naalannerput qilammi nunamilu kisimi oqartussaalluni Naalagaasup ilumut nuannaarutigisinnaavaa? Aap — pissutissaqarluarluni! Jehovap piumasatsitut iliorsinnaanngortilluta pinngortippaatigut. Taamaammat nammineq aalajangernissamut kiffaanngissuseqarpugut; naalanniarlugu naalanniarnaguluunniit aalajangersinnaavugut. (5 Mos 30:15, 16, 19, 20) Kajumilluta uummammillu pisumik Ataatatsinnik qilammiusumik, Jehovamik, asanninnerput pissutigalugu taanna naalanniarlugu aalajangeraangatta taassumunnga nuannaarutaangaartarpugut. (Uss 11:20) Aamma taamaaliornitsigut inooriaaseq pitsaanerpaaq toqqartarparput.

13, 14. Sooq oqartoqarsinnaava Guutip ‘inassutai artornartuunngitsut’, aamma tamanna qanoq assersuusiarineqarsinnaava?

¹³ Apustilip Johannesip Jehovap piumasaqaatai eqqarsaatigalugit ima uppernarsaavigaatigut: ‘Inassutai artornartuunngillat.’ Grækerit oqaasiat Johannesip allagaani siullerni 5:3-mi ‘artornartumik’ nutserneqarsimasoq toqqaannartumik nutserlugu ‘oqimaatsumik’ isumaqarpoq. *  Nutsikkami allami imaappoq: “Inassutai nanertuutaanngillat.” (Seidelin) Jehovap piumasaqaatai ingasattajaartuunatillu nanertuutaanngillat. Taassuma inatsisaanut naalannissaq inunnut naammalluinnanngitsunut ajornanngilaq.

¹⁴ Tamanna ima assersuusiarineqarsinnaavoq: Ikinngutigilluakkavit ilaata nuunniartup ikioqqulluni qinnuigaatit. Assartugassanik karserpassuaqarpoq. Ilaat inummit ataatsimit kivinneqariaannaapput, ilaalli oqimaangaaramik inunnit marlunnit kivinneqartariaqarput. Ikinngutivit karsit nuutassatit toqqartorpai. Karsit ilinnut oqimaappallaartut nalunagu, taakkorpiaat kiveqqullugit qinnuigissavaatit? Naamik. Kisivit taakkuninnga kivitsiniarsaralutit ajoqusernissat kissaatiginngilaa. Aamma Guutitta asannittup inassutinik ‘paasiuminaatsunik [maleruaruminaappallaartunik, NW]’ maleruaaqqulluta qinnuiginngilaatigut. (5 Mos 30:11-14) Ersugassanik oqimaatsunik taama ittunik ersukkeqqunavianngilaatigut. Jehovap pisinnaasatta killeqarnerat nalunngilaa, “nalunngilaami pinngortitaasugut, eqqaamavaa pujualaasugut”. — Tuss 103:14.

15. Sooq qularutiginngilluinnarsinnaavarput Jehovap inassutai uagutsinnut iluaqutaanerpaasut?

¹⁵ Jehovap inassutai artornanngilluinnarput; uagutsinnut iluaqutaanerpaapput. (Esaja 48:17 atuaruk). Taamaattumik Mosesip itsaq Israelikkut ima oqarfigisinnaasimavai: “Naalakkap peqquaatigut ileqqoreqqusat tamakku tamaasa maleruaqqullugit mianeriuaqqullunilu nammineq iluaqutissatsinnik, inuuginnartikkumagamisigut, soorlu ulloq manna tikillugu taama pisimagaatigut.” (5 Mos 6:24) Uaguttaaq qularutiginngilluinnarsinnaavarput Jehovap uagutsinnut iluaqutaanerpaasussaq — naassaanngitsumik pilluarnissarput — eqqarsaatigalugu  inatsisiminik tunisaraatigut. Qanoq allatut issinnaagami? Jehova Guuti killeqanngitsumik ilisimassuseqarpoq. (Rom 11:33) Taamaattumik uagutsinnut suut iluaqutaanerpaanersut nalunngilaa. Aamma Jehova asannilluinnartuuvoq. (1 Joh 4:8) Asanninneq, taassuma pissusiisa pingaarnersaat, oqaasiinut iliuusiinullu tamanut sunniuteqartarpoq. Aamma asanninneq taassuma kiffaminut inassutaanut tamanut tunngaviuvoq.

16. Sooq silarsuaq ajortunngorsimasoq sunniutipiloqaraluartoq namminerlu naammalluinnanngitsuugaluarluta Guutimut naalattuusinnaavugut?

¹⁶ Imaanngilarli Guutimut naalattuunissaq ajornaatsuujuaannartoq. Silarsuup matuma ileqqussatigut ajortunngorsimasup, ‘Ajortumut naalatsigitittup [Ajortup pissaaneqarfigisaata, NW]’, sunniutai akiortariaqarpavut. (1 Joh 5:19) Aamma nammineq naammalluinnanngissuserput akiortariaqarparput, tamannami pissutigalugu Guutip inatsisaanik unioqqutitseqqajaasarpugut. (Rom 7:21-25) Guutimilli asanninnerput akiuunnermi tamatumani ajugaanissamut iluaqutigisinnaavarput. Taassuma inuit naalattuunermikkut asanninnerminnik ersersitserusuttut pilluaqqusarpai. Anersaani illernartoq “naalatsiminut” tunniuttarpaa. (ApS 5:32) Aamma anersaaq taanna uagutsinni ajunngitsunik inerititaqartitsisarpoq — tassa pissuserineqartussanik kusanartunik naalattuulluni inuunissamut iluaqutigisinnaasatsinnik. — Gal 5:22, 23.

17, 18. (a) Atuakkami matumani suut misissussavavut, suullu eqqaamajuartariaqarpavut? (b) Kapitalimi tulliuttumi suna sammineqassava?

¹⁷ Atuagaq manna iluaqutigalugu Jehovap najoqqutassiaasa ilaat — ilaatigut ileqqussanut tunngasut — misissussavavut, taassumalu piumasaanut tunngatillugu Biibilimi aamma qanoq allassimasoqarnersoq misissussavarput.  Misissuitilluta pingaarutillit arlallit eqqaamajuartariaqarpavut. Eqqaamassavarput Jehovap inatsisiminut najoqqutassiaminullu naalannissatsinnut pinngitsaalineq ajoraatigut; kissaatigaa kajumilluta qamanngalu pisumik naalassagitsinni. Puiussanngilarput Jehovap inooqqugaatigut uagutsinnut maannangaaq iluaqutaangaartumik aamma naassaanngitsumik inuulernitsinnik kinguneqarsinnaasumik. Aammattaaq uummatikkut iluunngarluta naalannerput Jehovamik qanoq asannitsiginitsinnik ersersitsinissamut periarfissatut immikkut ittutut isigitigu.

¹⁸ Eqqortumik eqqunngitsumillu immikkoortitsinissamut iluaqutissatut Jehovap asannilluni nalunngeqatiginnissutilersimavaatigut. Nalunngeqatiginnissuterpulli siunnersortitut tutsuiginartuussaguni ilinniartinneqartariaqarpoq. Tamanna kapitalimi tulliuttumi sammineqassaaq.