Jehovap aappariit katinnermi neriorsuutiminnik eqqortitsinissaat piumasaraa. Inuit siulliit, Adami Evalu, katitereeramigit Jehova ima oqarpoq: “Angutip ... nuliani attavigissavaa, uiniulissappullu ataaseq.” Nunarsuarmiikkallarami Jiisusip Kristusip inassut tamanna issuareerlugu ima oqarpoq: “Guutimmi ataqatigiilersitai inuup avissaartissanngilai.” (1 Mos 2:24; Matt 19:3-6) Taamaattumik Jehovap Jiisusillu aappariinneq inuuneq naallugu atasussatut aatsaallu aappaasoq toquppat atuukkunnaartussatut isigaat. (1 Kor 7:39) Aappariinneq aaqqissuussaammat illernartoq pissutissaqarluarani avittoqartussaanngilaq. Aap, allaat Jehovap Biibilimut naapertuutinngitsumik ‘avinneq uumigaa’ (NW). — Mal 2:15, 16.

Biibili naapertorlugu avinnermut pissutaasinnaasoq suua? Jehovap allasiorneq kinguaassiuutitigullu assuarnartuliorneq uumigaa. (1 Mos 39:9; 2 Sam 11:26, 27; Tuss 51:6) Aap, kinguaassiuutitigut assuarnartuliorneq maajugingaaramiuk avinnissamut pissutaasutut isigaa. (Iliuutsit suut kinguaassiuutitigut assuarnartuliornerunersut kapitali 9-mi, immikkoortoq 7-imi allaatigineqarput). Jehovap aappaasoq allasiunngitsoq avinnginnissamut avinnissamulluunniit nammineq aalajangiisinnaatippaa. (Matt 19:9) Taamaattumik aappaasoq allasiunngitsoq avinniarluni aalajangerpat imaanngilaq taamatut aalajangernera Jehovap uumigigaa. Ilagiilli kristumiut avittoqarnissaanik kajumissaarinavianngillat. Pisimasuni aalajangersimasuni aappaasup allasiunngitsup aappani allasiorsimasoq najuinnarumasinnaavaa, ingammik taanna peqqissimivippat. Pissutsit atukkani qanoq ikkaluarpataluunniit Biibili naapertorlugu avissinnaatitaasup aappani avissanerlugu avissannginnerluguluunniit nammineq aalajangertussaavaa, aalajangikkamilu kinguneri naammagalugit atortariaqarpai. — Gal 6:5.

Pisuni ingasattuni aalajangersimasuni kristumiut ilaat aappartik kinguaassiuutitigut assuarnartuliorsimanngikkaluartoq averuserniarlugu avinniarluguluunniit aalajangersimapput.  Taama pisoqartillugu Biibilimi piumasaqaatigineqarpoq aapparminik qimatsisup ‘aappaqanngitsuujuassalluniluunniit’ aappani ‘isumaqatigalugu uterfigissagaa’. (1 Kor 7:11) Kristumiu taamatut atugaqaruni allamik aappartaaqqittussaanngilaq. (Matt 5:32) Pissutsit ingasattut kristumiut ilaasa averusernissaminnut pissutaasorisaat sammilaariartigit.

Ilaquttanik pilersuiumanngilluinnarneq. Imaassinnaavoq ilaqutariinni ittuusup ilaquttami pisariaqartilluinnagaannik pilersuisinnaagaluarluni pilersuiumanngilluinnarnera pissutigalugu inuussutissaaruttut. Biibilimi ima allassimavoq: “[Inoqutiminik] isumaginninngitsoq uppernerminik tunussisuuvoq uppinngitsumillu ajornerulluni.” (1 Tim 5:8) Uiusoq pissutsit allanngortinniarlugit iliuuseqarusunngilluinnarpat imaassinnaavoq nuliaasoq qitornani isumagiumallugit imminullu isumagiumalluni averuserniarluni aalajangertoq. Soorunami kristumiu uiusoq ilaquttaminik pilersuiumannginnerarneqarpat utoqqaanertat taamaattoqarnersoq misissorluartariaqarpaat. Uiusup ilaquttani isumagiumanngippagit taassuma ilagiinnut ilaajunnaarsitaaneranik kinguneqarsinnaavoq.

Persuttaasarneq. Imaassinnaavoq aappaasoq persuttaagajuttuusoq allaat aapparmi inuunera peqqissusialu navianartorsiortillugit. Persuttaanerarneqartoq kristumiuuppat ilagiinni utoqqaanertaasut taamaattoqarnersoq paasiniartariaqarpaat. Kamajassuseq nakuusernerlu ilagiinnut ilaajunnaarsitaanermik kinguneqarsinnaavoq. — Gal 5:19-21.

Anersaakkut peqqissutsimik ingasattumik navianartorsiortitsineq. Imaassinnaavoq aappaasup aappani Guutimik pallorfiginnikkunnaarsinniarsariuartaraa allaalluunniit arlaatigut Guutip peqqussutaanik unioqqutitsisinniarsariuartaraa. Taamatut pisoqartillugu aappaasup anersaakkut naviarnartorsiortup nalilertariaqarpaa ‘Guuti inunnit naalannerusinnaaqqullugu’ averusernissani periarfissatuaanersoq. — ApS 5:29.

Pissutsini ingasattuni sammineqareersuni tamani aappaasoq pisuussuteqanngitsoq averusernissamut aappaasulluunniit najuinnarnissaanut kimilluunniit kimigiiserfigineqassanngilaq. Utoqqaanertat ikinngutillu anersaakkut inersimalluartut  annertoqqusersuisinnaagaluarlutillu Biibilimik tunngavilinnit siunnersuisinnaagaluarlutik uiusup nuliaasullu attaveqarnerannut tunngatillugu annikitsualuit tamaasa ilisimasaqarfigisinnaanngilaat. Jehovap kisimi tamaasa ilisimasaqarfigisinnaavai. Soorunami kristumiu aappani inooqatigiunnaarniaannarlugu aappariittut ajornartorsiutitik ingasattajaarutigigunigit Guutimik taassumalu aappariinnermik aaqqissuussaanik ataqqinninnavianngilaq. Averusernissamut ajortumik pissutiginiagaqaraanni, qanorluunniit isertorniarsaritigigaluaraanni, tamanna Jehovap takusinnaavaa. Aap, “suut tamarmik isaanut uleersimallutillu saqqumipput. Taannaavorlu iliornivut pillugit akisussaaffigisassarput.” (Hebr 4:13) Kristumiulli eqqaaneqareersunik atugaqartup allamik aaqqiissutissaqarsorinagulu averusernissani aalajangiuppagu kialluunniit isornartorsiussanngilaa. Qanorluunniit aalajangeraluarutta tamatta “Guutip eqqartuussivianut sassartinneqassaagut”. — Rom 14:10-12.