1, 2. Sooq pujorsiut atortorissaarutaava pingaarutilik, aamma nalunngeqatiginnissummut qanoq assersuunneqarsinnaava?

UMIARTORTUP umiarsuaq imarpissuarmi mallitigut aquppaa; angut asimi kilometererpassuit pisulluni angalavoq; timmisartortartoq nuissat qulaasigut timmisartorpoq. Inuit taakkua suna assigiissutigaat? Tamarmik pujorsiuteqanngitsuugunik — ingammik teknikkikkut allanik atortorissaaruteqanngitsuugunik — navianartorsiussagaluarput.

² Pujorsiut saviup kajungerisaanik avannamut tikkuaqqasumik tikkuutitaqartarpoq. Pujorsiut ajoquteqanngitsoq inuunermik annaassissutaasinnaavoq, ingammik tamatuma saniatigut nunap assinga eqqoqqissaartoq atoraanni. Pujorsiut ilaatigut assersuunneqarsinnaavoq Jehovap uagutsinnut tunissutigisaanut erlinnangaartumut, tassa nalunngeqatiginnissummut, imaluunniit tarnitta nalunngissusianut, uagutsinnik ilerasutsitsisinnaallunilu ilerasuuteqanngitsitsisinnaasumut. (Rom 13:5; Hebr 9:9; Jaak 1:17; 1 Petr 3:16) Nalunngeqatiginnissuteqanngitsuugutta nalornisooqqasassagaluarpugut. Nalunngeqatiginnissut eqqortumik atorutsigu inuunermi aqqutikkut eqqortukkoornissamut tassuunalu ingerlajuarnissatsinnut iluaqutigisinnaavarput. Nalunngeqatiginnissut suunersoq qanorlu sulisarnersoq misissoriartigu. Tamatuma kingorna pingasut uku sammissavavut: (1) Nalunngeqatiginnissut qanoq ilinniartinneqarsinnaasoq, (2) sooq allat nalunngeqatiginnissutaat innimigisariaqarivut, aamma (3) ilerasuuteqannginneq uagutsinnut qanoq iluaqutaanersoq.

3. Oqaaseq grækerisooq ilaatigut ‘nalunngeqatiginnissummik’ aamma ‘tarnip nalunngissusianik’ nutserneqartartoq toqqaannartumik nutserlugu qanoq isumaqarpa, oqaatsimilu tamatumani inuit pisinnaasaat immikkut ittoq suna pineqarpa?

³ Oqaaseq grækerisooq Biibilimi atorneqartoq ilaatigullu ‘nalunngeqatiginnissummik’ aamma ‘tarnip nalunngissusianik’ nutserneqartartoq marlunnit katitigaavoq, tassa syn (-qatigineq) aamma eiʹdēsis (ilisimasaq); oqaatsimilu pineqarpoq inuup imminut pilluni ilisimasaqarnera. Pinngortitat nunamiusut allat tamaasa assiginagit Guutip imminut naliliisinnaassuseqartippaatigut. Unikaallassinnaavugut imminut qimerloorsinnaallutalusooq, ileqqorissuunersugut nalilersinnaallugu. Nalunngeqatiginnissuterput eqqartuussisutut ilutsinniittutullusooq iliuutsitsinnik, isummatsinnik aalajangikkatsinnillu misissuisinnaavoq. Ajunngitsumik aalajangernissamut iluaqutigisinnaavarput, aamma ajortumik aalajangeqqunata uagutsinnik mianersoqqusisinnaavoq. Aalajangereerutta immaqa nalunngeqatiginnissutitta eqqortumik aalajangersimanerput pissutigalugu ilorrisimaalersissavaatigut imaluunniit kukkusumik aalajangernerput pissutigalugu erloqisissalluta.

4, 5. (a) Qanoq ililluta nalunngilarput Adami Evalu nalunngeqatiginnissuteqartut, Guutillu inatsisaanik sumiginnaanerat qanoq kinguneqarpa? (b) Angutit aalajaatsut marluk kristumiut sioqqullugit inuusut nalunngeqatiginnissutaat qanoq sulippat?

 ⁴ Pileqqaarneranniilli inuit inunnguuseralugu nalunngeqatiginnissuteqarput. Adami Evalu nalunngeqatiginnissuteqarput. Tamanna ajortulioreeramik kanngusunnerannit erserpoq. (1 Mos 3:7, 8) Tamatumali nalaani ilerasunnerat iluaqutaanngilaq. Tassami Guutip inatsisaanik piaaralutik sumiginnaasimapput. Taamaaliornermikkut piaaralutik aalajangerput Jehovamut pikitsitsiniarlutik taamaalillutillu taassumunnga akeranngorniarlutik. Inuugamik naammalluinnartut nalunngilaat sunerlutik, Guutimullu utersinnaanngillat.

⁵ Adami Evalu assiginagit inuit naammalluinnanngitsorpassuit nalunngeqatiginnissutip nipaa tusarnaarsimavaat. Assersuutigalugu Jobi aalajaatsoq ima oqarsinnaasimavoq: “Iluassusera aalajangiusimavara iperassanagulu. Uummamma ullormik inuuffigisannik ataasiinnarmilluunniit ilerasuutissaqartinngilaanga.” * (Job 27:6) Jobi angutaavoq nalunngeqatiginnissutiminik malinnilluarniaqqissaartoq. Taamaattumik nalerisimaangaarluni oqarsinnaavoq nalunngeqatiginnissutimi ilerasuutissaqartinnanilu kanngusuutissaqartinngikkaani, aamma pisuusutut misigitinngikkaani. Maluginiarulli nalunngeqatiginnissut Daavimi qanoq sulisimanersoq. Ilaanni kunngimut Saulimut, Jehovap  kunnginngortitaanut, ataqqinninngitsuliorpoq, tamannali aatsaat ‘kingorna ilerasuutigilerpaa’. (1 Sam 24:6) Daavip taamatut ilerasungaarnini iluaqutigaa, siunissami ataqqinninngitsuliornaveersaarnissamut ilinniutigigamiuk.

6. Sumit erserpa nalunngeqatiginnissut inunnut tamanut tunissutaasoq?

⁶ Jehovap kiffai kisimik nalunngeqatiginnissummik tunissutisisimappat? Apustilip Paulusip allagai isumassarsiarititaasut uku maluginiariakkit: “[Guutimik] nalusut inatsisit piginagit inatsisit peqqussutaat malillugit ilioraangamik taava inatsiseqanngitsut taakku imminnut inatsisitut ipput. Takutippaat inatsisit suliareqqusaat uummatiminni allassimasut, tarningisami nalunngissusiat nalunaajaasuuvoq, eqqarsaataallu imminnut unnerluutigisarput illersortarlutilluunniit.” (Rom 2:14, 15) Jehovap inatsisai pillugit ilisimasaqanngilluinnaraluartulluunniit nalunngeqatiginnissutip nipaa taanna najoqqutassianik Biibilimiittunik malinninnissamut kajumississutigisinnaavaat.

7. Sooq nalunngeqatiginnissut ilaannikkut kukkusumik paasissutissiisinnaasarpa?

⁷ Nalunngeqatiginnissulli ilaannikkut kukkusumik paasissutissiisarsinnaavoq. Pujorsiut saviup kajungerisaata eqqaanut inissinneqarpat tikkuutaa tamatumannga sunnertissinnaavoq avannamut sammiunnaarluni. Pujorsiullu taama ittoq nunap assinganik eqqoqqissaartumik peqarnani atoraanni iluaqutaangaarnavianngilaq. Tamatumunnga assingusumik nalunngeqatiginnissutitta kukkusumut ingerlatissinnaavaatigut uummatitta namminissarsiorluni kissaatigisaanit sunnertissimangaatsiaruni. Nalunngeqatiginnissullu Guutip oqaasiani siunnersuutit tutsuiginartut atornagit malikkutsigu pingaarutillit ilarpassuinut tunngatillugu eqqortumik eqqunngitsumillu immikkoortitsisinnaanavianngilagut. Nalunngeqatiginnissuterput eqqortumik sulisinnaaqqullugu Jehovap anersaavanit illernartumit siulersortittariaqarpugut. Paulusi ima allappoq: ‘Tarnima nalunngissusiata  nalunaajaaqatigaanga anersaakkut illernartukkut.’ (Rom 9:1, 1936) Qanorli ililluta nalunngeqatiginnissutitta Jehovap anersaavanut illernartumut naapertuunnissaa qulakkeersinnaavarput? Tamanna qulakkeersinnaavarput nalunngeqatiginnissutitta ilinniartinneratigut.

8. (a) Nalunngeqatiginnissuterput uummatitsinnit qanoq sunnerneqarsinnaava, aamma aalajangiissagaangatta eqqarsaatigisariaqakkatta pingaarnersaat suua? (b) Sooq ilerasuutissaqanngissorineq naammattuaannanngila? (Takuuk quppernerup ataani ilanngussaq).

⁸ Nalunngeqatiginnissutit tunngavigalugu qanoq aalajangiisarpit? Ilaat aalajangiisannguatsiarput imminut qiviarnermikkut, paasiniarlugu suna eqqortuliornertut isiginerlugu. Taava imminut ima oqarfigisarput: ‘Una ilerasuutiginavianngilara.’ Uummatittali kissaatai kajumigisaalu uagutsinnut nalunngeqatiginnissutitsinnullu sunniuteqangaarsinnaapput. Biibilimi ima allassimavoq: “Tamanit annerusumik uummat tatigisassaanngitsuuvoq.” (Jer 17:9) Taamaattumik aalajangiissagaangatta eqqarsaatigisariaqakkatta pingaarnersaat tassaanngilaq uagut nammineq suna eqqortutut isigineripput. Eqqarsaatigisariaqakkatta pingaarnersaat tassaavoq Jehovap Guutip suut iluarinerai. *

9. Guutimik mianerinninneq qanoq paasisariaqarpa, nalunngeqatiginnissutitsinnullu qanoq sunniuteqarsinnaava?

⁹ Nalunngeqatiginnissutitsinnik ilinniartinneqarsimasumik tunngaveqarluartumik aalajangigaqarutta, aalajangigarput Guutimik mianerinninnitsinnut, nammineq  kissaatigisatsinnuunngitsoq, ersiutaassaaq. Nunami naalagaatitaq Nehemia aalajaatsoq tamatumunnga tunngatillugu maligassaalluarpoq. Taanna akileraarutinik akiligassanillu Jerusalemimi innuttaasunut akileeqqusisinnaatitaavoq, taamaaliunngilarli. Sooq? Jehovap innuttaanik naqisimanninnikkut taassumannga iluarisaajunnaarnissani kissaatiginngilluinnaramiuk. Ima oqarpoq: “[Uanga] taamaaliunngilanga Guuti mianerigakku.” (Neh 5:15) Pingaaruteqarluinnarpoq ilumoorluta Guutimik mianerinnittuunissarput, tassa Ataatatsinnit qilammiusumit iluarineqarunnaarumanata mianersoqqissaartarnissarput. Taamatut Guutimik mianerinninneq aalajangigassaqaraangatta taassuma oqaasianut siunnersortissarsiortarnissatsinnut kajumississutigisassavarput.

10, 11. Najoqqutassiat Biibilimiittut suut imigassartornermut tunngatillugu naleqquppat, taakkualu maleruarnissaannut Guutimit qanoq ililluta ikiorneqarsinnaavugut?

¹⁰ Imigassaq assersuutigeriartigu. Ilarpassuavut katerisimaartoqartillugu imigassartussanerlutik imigassartussannginnerlutilluunniit aalajangertariaqarput. Tamatumunnga tunngatillugu nalunngeqatiginnissuterput ilinniartinneqartariaqarpoq. Najoqqutassiat Biibilimiittut suut imigassamut tunngassuteqarpat? Ingasaassinani imigassartorneq Biibilimi assuarineqanngilaq. Jehova viinnimik tunissuteqarsimanini pillugu Biibilimi unnersiutigineqarpoq. (Tuss 104:14, 15) Ingasattumilli imigassartorneq erngunnerillu Biibilimi assuarineqarput. (Luk 21:34; 1 Petr 4:3) Aammattaaq aalakoorneq Biibilimi ajortuliatut ajortorujussuartut allatut, soorlu kinguaassiuutitigut inuunerlunnertut allasiornertullu, isigineqarpoq. * — 1 Kor 6:9, 10.

¹¹ Najoqqutassiat tamakku iluaqutigalugit kristumiup nalunngeqatiginnissutaa ilinniartinneqarlunilu malussarissarneqartarpoq.  Taamaammat katerisimaartoqartillugu imigassartussanerluta aalajangissagaangatta imminut soorlu ima aperisinnaavugut: ‘Katerisimaarneq qanoq ittoq aaqqissuunneqarpa? Ingasaassisoqalersoqaratarsinnaava naggataatigut erngunninnguulluni? Uanga imigassaq qanoq isigaara? Imigassaguttarpunga? Pinngitsoorsinnaanngilara? Ajornartorsiutikka puiorniarlugit qimarratiginiarlugilluunniit imigassartortarpunga? Imigassartorpallaannginnissannut naammattumik imminut naalakkersinnaavunga?’ Najoqqutassiat Biibilimiittut tamakkununngalu tunngatillugu apeqqutaalersut eqqarsaatigitillugit Jehova qinnuigisariaqarparput siulersoqqulluta. (Tussiaat 139:23, 24 atuakkit). Taamaaliornitsigut Jehovamut ersersittarparput anersaaq illernartoq aqqutigalugu taassumannga siulersorneqarusulluta. Aamma nalunngeqatiginnissuterput ilinniartittarparput Guutip najoqqutassiaanut naapertuuttunngortillugu. Aalajangigassaqaraangattali aamma alla eqqarsaatigisariaqarparput.

12, 13. Kristumiut tamarmik immikkut nalunngeqatiginnissutaasa assigiinngittarnerannut suut pissutaasinnaappat, assigiinngissutillu tamakku qanoq periarfigissavavut?

¹² Ilaannikkut immaqa tupaallaatigineqartarpoq kristumiut tamarmik immikkut nalunngeqatiginnissutaasa qanoq assigiinngitsiginerat. Immaqa iliuuseq ileqqorluunniit aalajangersimasoq arlaata mamianartuutitaa allap ajorinngilaa. Assersuutigalugu ilaasa ikinngutigiiullutik unnussiuaaqatigiinnerminni viinnisulaarnissartik nuannarisaraat allat nuannarisanngilaat. Kristumiut taama assigiinngitsigisunik isiginnittaaseqarnerannut suna pissutaava, aamma tamanna aalajangigassatsinnut qanoq sunniuteqartariaqarpa?

¹³ Assigiinngitsunik isumaqarnerput arlalinnik pissuteqarpoq. Pissutaasut ilagaat tunuliaquttavut. Biibilimi ima allassimavoq: ‘Tamarmik immikkut uummatimik naalliuutaat  nalunngilaat.’ (1 Kng 8:38, 39, NW) Taamaattumik ilaat siornatigut akiortariaqarsimasaminnik — immaqa nakkaannartoorfigisartakkaminnik — sanngiissuteqarput, tamannalu eqqumaffigilluinnarpaat. Assersuutigalugu imigassamik ajornartorsiuteqarsimasup nalunngeqatiginnissutaa imigassamut tunngatillugu amerlanertigut immikkut malussarittarpoq. Inuup taassumatut ittup pulaarunisit immaqa pissutissaqarluarluni nalunngeqatiginnissutini imigassartornissamut qujaannarnissamut kajumississutigissavaa. Tamanna ajuallaatigissaviuk? Imigassartoqqullugu kimigiiserfigissaviuk? Naamik. Qujaannarneranut pissutaasut — pisumi tamatumani immaqa oqaatigerusunngisai — nalunngikkukkit nalugaluarukkilluunniit qatanngutigiittut asaqatigiinneq taassuma innimiginissaanut kajumississutigissavat.

14, 15. Sumut tunngatillugu kristumiut siulliit nalunngeqatiginnissutaat assigiinngitsuuppat, Paulusillu suna unnersuussutigaa?

¹⁴ Apustilip Paulusip maluginiarpaa nalimini kristumiut nalunngeqatiginnissutaat assigiinngitsorujussuusut. Taamanikkut kristumiut ilaasa nerisassanik guutipilunnut pilliutigineqarsimasunik nerinissaq assut nangaanartoqartippaat. (1 Kor 10:25) Paulusip nerisassat niueriartortarfimmi kingusinnerusukkut nioqqutigineqartartut tamakkua nerinissaat ilerasunnartoqartinngilaa. Taassuma guutipiluit suutinngilai; taakku nerisassanik Jehovap pilersitaanik — taamaattumillu pigisaanik — piginnissinnaanngisaannarput. Paulusilli allat tamatumunnga allatut isiginnittaaseqarnerat eqqumaffigaa. Ilaat immaqa kristumiunngunnginnerminni guutipilussiornermut peqataangaartarsimapput. Taamaattumik guutipilussiornermut minnerpaamilluunniit tunngassuteqartut tamaasa maajugaat. Paulusi qanoq siunnersuiva?

¹⁵ Ima oqarpoq: “Uagut sanngisuujusugut pisussaavugut sanngiitsut sanngiissutaat ersussallugit imminuinnaq eqqarsaatiginata. Kristusiluunniimmi imminut eqqarsaatiginngilaq.” (Rom 15:1, 3) Tunngavilersuutigisaa tassaavoq Missiarsip pisimaneratut qatanngutivut immitsinninngarnit innimiginerusariaqarivut.  Allassimaffimmi allami Paulusi allappoq neqitunngilluinnarumanerulluni qatanngutip asasami tammartinnissaaninngarnit, tassami Kristusip ‘sava’ taannattaaq pillugu inuunini pilliutigaa. — 1 Korinthimiut 8:13; 10:23, 24, 31-33 atuakkit.

16. Sooq killeqarnerutitsisumik nalunngeqatiginnissutillit allaanerusumik nalunngeqatiginnissutilinnik eqqartuussinaveersaartariaqarpat?

¹⁶ Paarlattuanilli killeqarnerutitsisumik nalunngeqatiginnissutillit allanik isornartorsiuissanngillat, kikkut tamarmik nalunngeqatiginnissut tunngavigalugu aalajangigassanut namminneq isiginnittaatsimittut isiginnittaaseqarnissaat piumasaralugu. (Romamiut 14:10 atuaruk). Nalunngeqatiginnissut allat pinnagit, imminulli  siunnersorlunilu eqqartuunnissamut atorneqartussaavoq. Eqqaamakkit Jiisusip oqaasii uku: “Eqqartuusseqinasi eqqartuunneqaqqunasi.” (Matt 7:1) Ilagiinniittut tamarmik nalunngeqatiginnissut tunngavigalugu aalajangigassat pissutigalugit avissaartuutsitserusunngillat, asanninnermilli ataasiussusermillu siuarsaanissartik aamma aserorsaataanatik ineriartornartuunissartik kissaatigaat. — Rom 14:19.

17. Ullumikkut inuppassuit qanoq ittumik nalunngeqatiginnissuteqarpat?

¹⁷ Apustili Petrusi ima allappoq: ‘Ilerasuutissaqar­naveersaaritsi.’ (1 Petr 3:16, 1936) Nalunngeqa­tiginnissut Jehovap  Guutip isaani minguitsoq tunissutisiaavoq nalissaqanngitsoq. Ullumikkut inuppassuit minguitsumik nalunngeqatigin­nissuteqan­ngillat. Paulusip eqqaavaa inoqartoq ‘nalunngeqatiginnissutimikkut saviminermik uutarlugit nalunaaqutser­neqarsimasutut ittunik’. (1 Tim 4:2, NW) Uinik saviminermik uutarlugu nalunaaqutser­neqarsimasoq qileroqarlunilu malussarlersimasarpoq. Inuppassuit nalunngeqatigin­nissutaat ima ‘qileroqalersima­tigalunilu’ malussarler­simatigigami mianersoqqusisarun­naarsimavoq, akerliliisarun­naarluni pisuusutulluunniit misigititsisa­runnaarluni. Ullumikkut inuppassuit kanngusutta­runnaarlutillu ilerasuttarun­naarnertik nuannaaru­tigiinnar­tarpasippaat.

18, 19. (a) Pisuusutut misigineq qanoq iluaqutigisinnaavarput? (b) Ajortuliarisimasavut peqqissimissutigeriikkavut pillugit nalunngeqatiginnissutitta assuariuarpatigut qanoq iliorsinnaavugut?

¹⁸ Pisuusutut misigilertoqartarneranut pissutaasartoq tassaavoq nalunngeqatiginnissutip ajortumik iliornitsinnik paasititsiniarsarisarnera. Misigissutsit tamakku pissutigalugit ajortuliortoq allamik isumataaruni — ajortuliani qanorluunniit ajortigigaluarpata — isumakkeerfigineqarsinnaavoq. Assersuutigalugu kunngi Daavi ajortuliorujussuarpoq, isumakkeerfigineqarporli pingaartumik ilumoorluni peqqissiminini pissutigalugu. Daavip iliuuserisimasaminik ajortunik uumiginninnini Jehovallu inatsisaanut maannamiit naalannissaminik aalajangiusimanninnini Jehovap ‘ajunngitsuullunilu isumakkeerfiginnikkumasarnerata’ nammineq misiginissaanut periarfissaqalissutigaa. (Tuss 51:3-21; 86:5) Taavami allamik isumataareerluni isumakkeerfigineqareerlunilu assut kanngusullunilu assut pisuusutut misigiuaraanni?

¹⁹ Ilaannikkut nalunngeqatiginnissut ingasattumik assuarinnissinnaavoq ajortuliorsimasoq pisuusutut misigitillugu, taamatut misiginera qangalili iluaqutaareeraluartoq.  Tamatuminnga misigisaqarutta uummaterput imminut avoqqaarisartoq qularunnaarsittariaqarparput Jehova inuit uummataannit — misigissusiinit — annerusoq. Taassuma asanninnera isumakkeerfiginninneralu upperalugillu akuerisariaqarpavut, soorluttaaq allat taamaaliornissaannut kajumissaartarivut. (1 Johannesi 3:19, 20 atuakkit). Ilerasuutissaqannginneq ullutsinni qaqutigoortumik qamuuna eqqississutaasarlunilu nuannaarutaangaartarpoq. Inuppassuit ingasattumik ajortuliorsimasut tamatuma oqiliallaataanera misigisimavaat maannalu ilerasuuteqaratik Jehovamut kiffartorsinnaallutik. — 1 Kor 6:11.

20, 21. (a) Atuakkap matuma saqqummersinneqarneranut suna siunertaava? (b) Kristumiutut sutigut kiffaanngissuseqarpugut, qanorli atortussaavarput?

²⁰ Atuagaq manna Saatanip aaqqissuussinerata ulluini kingullerni eqqissiviilliorfiusuni taamatut qamannga pisumik nuannaarnissannut ilerasuutissaqarnaveersaarnissannullu iluaqutissattut naatsorsuussaavoq. Soorunami inatsisit najoqqutassiallu Biibilimiittut ulluinnarni pisartunut tunngatillugu eqqarsaatigisariaqarlugillu atortariaqakkatit tamarmik atuakkami matumani sammineqarsinnaanngillat. Aamma atuakkami matumani nalunngeqatiginnissut tunngavigalugu aalajangigassanut tunngatillugu suna eqqortuunersoq sunalu eqqunngitsuunersoq pillugit erseqqissunik malittarisassiaqanngilaq. Atuakkamik matuminnga saqqummersitsinermut siunertaavoq illit inuuninni Jehovap oqaasianik qanoq atuisinnaanerlutit paasiniaanikkut nalunngeqatiginnissutinnik ilinniartitsillutillu malussarissaanissamut atuakkamik matuminnga iluaqutiginninnissat. Mosesip inatsisaani inatsisinik allanneqarsimasunik maleruaanissaq kajumissaarutigineqarpoq, ‘Kristusilli inatsisaani’ kajumissaarneqarpugut najoqqutassianit nalunngeqatiginnissutitsinnillu siulersorteqqulluta. (Gal 6:2) Jehovap taamaalilluni kristumiut kiffaanngissuseqartingaarpai. Taassumali oqaasiani eqqaasinneqarpugut kiffaanngissuserput  ‘iluaatsuliornermut isertuiniutissatut’ atunngisaannassagipput. (1 Petr 2:16) Kiffaanngissuserput Jehovamik asanninnitsinnik ersersitsinissamut periarfissaqarlualissutigaarput.

²¹ Illit qinunikkut eqqarsaatigisarukku najoqqutassiat Biibilimiittut inuuninni qanoq ilillutit pitsaanerpaamik atorsinnaanerlugit, tamatumalu kingorna aalajangiussatit naapertorlugit ilioruit, allanngoriartorneq inuuinnarnissamut pingaarutilik Jehova pillugu ilinnialeravit aallartittoq ingerlatiinnassavat. Paasinnissinnaassutsit sungiusassavat atortarneratigut. Taamaalillutit ‘ajunngitsumik ajortumillu immikkoortitsisinnaalissaatit’. (Hebr 5:14) Nalunngeqatiginnissut Biibili tunngavigalugu ilinniartinneqarsimasoq inuuninni ullut tamarluinnaasa iluaqutigissavat. Pujorsiutitut aqqutikkut eqqortukkut siulersortigissavat Ataatannullu qilammiusumut nuannaarutaasunik aalajangiisarnissannut iluaqutigissallugu. Taamaalillutit qulakkeersinnaavat Guutip asanninneraniittuinnarnissat.