1, 2. (a) Oqartussaassusilinnik ataqqinninnissamut tunngatillugu sooq ilungersortariaqartarpugut? (b) Apeqqutit suut sammissavavut?

MALUGINIARNIKUUIUK meeraaqqat iliuusererusunngilluinnakkaminnik iliuuseqaqquneqaraangamik amerlanertigut qanoq periartartut? Kiinaasigut takuneqarsinnaasarpoq assut sapernartitsisut. Anaanamik ataatamilluunniit oqaasii tusaasaraluarpaat, aamma naluneq ajoraluarpaat angajoqqaamik oqartussaassusiannik ataqqinnittussaallutik. Ilaannikkulli naalakkumanngiinnartarput. Ilungersornerat tamatta ilaannikkut misigisartakkatsinnik ersersitsilluarpoq.

² Oqartussaassusilinnik ataqqinninnissaq uagutsinnut ajornaatsuujuaannanngilaq. Illit ilinnut oqartussaassusilinnik ataqqinninnissat ilaannikkut sapernartittarpiuk? Taamaappat kisimiinngilatit. Piffissami oqartussaassusilinnik immaqa aatsaat taama ataqqinninngiffiutigisumi inuuvugut. Biibilimili allassimavoq uagutsinnut oqartussaassusilinnik ataqqinnissasugut. (Uss 24:21; aamma takuuk nutsigaq 1990-imeersoq) Aap, Guutip asanninneraniittuarumagutta taakkuninnga ataqqinnittariaqarpugut. Tamatumunngali tunngatillugu makkua apeqqutiginissaat pissusissamisoorpoq: Oqartussaassusilinnik ataqqinninnissaq uagutsinnut sooq taama sapernartartigaa? Sooq Jehovap taamatut piumaffigaatigut, aamma piumasaqaammik tamatuminnga maleruaanissamut suna iluaqutigisinnaavarput? Kiisalu, oqartussaassusilinnik ataqqinninnerput qanoq ililluta ersersissinnaavarput?

3, 4. Ajorti naammalluinnanngissuserlu qanoq atuutilerpat, aamma sooq oqartussaassusilinnik ataqqinninnissaq ajortiliunerput pissutigalugu sapernartittarparput?

³ Oqartussaassusilinnik ataqqinninnissatsinnik sapernartitsisarnitsinnut pissutaasut marluk sammilaariartigit. Pissutaasoq siulleq tassaavoq uagut naammalluinnanngitsuunerput; pissutaasut aappaat tassaavoq uagutsinnut oqartussaassusillit aamma naammalluinnanngitsuunerat. Inuit qangarsuarli, Adami Evalu naatsiivimmi Edenimi Guutip oqartussaassusianut pikitsitsimmatali, ajortilinngorlutillu naammalluinnanngitsunngorput. Tassa pikitsitsisoqarmat ajorti atuutilerpoq. Ulloq manna tikillugu tamatta inunnguuserisatsinnik pikitsitseqqajaasuusarpugut. — 1 Mos 2:15-17; 3:1-7; Tuss 51:7; Rom 5:12.

⁴ Inunnguuserisatsinnik ajortiliunerput pissutigalugu amerlanersavut makitasaariaannaasarlutillu anneruniariaannaasarput maniguunnerlu, pissuseq qaqutigoortoq, ineriartortikkumallugu maniguuttuarumallutillu ilungersortariaqartarlutik. Ukiorpassuarni Guutimut kiffartortuusimagaluaraanniluunniit namminiinnaq isumamik atuiumatussutsimut makitanermullu ilaannikkut nakkaannartoqartarsinnaavoq. Kora assersuutigeriartigu. Taassuma Jehovap innuttai misilinneqaraluaqisut aalajaalluni attavigiuarpai. Oqartussaassuseqarnerulerusupporli, taamaattumillu kannguttaalluni Mosesimut, taamanikkut nunarsuarmi anneruniajuinnerpaasumut, pikitsitsinermi siuttuuvoq. (4 Mos 12:3; 16:1-3) Aamma eqqarsaatigiuk kunngi Uzzija, makitasuunngorami Jehovap naalaffianut isertoq palasillu kisimik pisinnaatitaaffigisaannik illernartumik suliaqartoq. (2 Nal 26:16-21) Angutit taakkua pikitsitsinerat taakkununnga ajorluinnartumik kinguneqarpoq. Maligassiuinerlunneralli tamatsinnut mianersoqqussutaavoq. Makitassuseq oqartussaassusilinnik ataqqinninnissatsinnik  sapernartitsisarnitsinnut pissutaasartoq akiortariaqarparput.

5. Inuit naammalluinnanngitsut oqartussaassutsiminnik qanoq atornerluisimappat?

⁵ Aamma inuit naammalluinnanngitsut pissaaneqarlutillu oqartussaassuseqartut oqartussaassusilinnik ataqqinninnginnerulertoqartarneranut pisuusarput. Taakkua ilarpassui naakkittaallutillu soqutigittaallutillu qunutitsisimapput. Inuiaat oqaluttuarisaanerat ataatsimut isigalugu pissaanermik atornerluineq pillugu oqaluttuaavoq. (Oqaluussisartup oqaasii 8:9 atuaruk). Assersuutigalugu Sauli Jehovamit kunnginngortinneqarami pitsaasuullunilu maniguuttuuvoq. Makitasuunngorporli sinngatuunngorlunilu angullu aalajaatsoq Daavi malersulerlugu. (1 Sam 9:20, 21; 10:20-22; 18:7-11) Kingusinnerusukkut Daavi Israelikkunnut kunngiusartut pitsaanerpaat ilagilerpaat, taassumattaarli pissaanini atornerluppaa Uriap Hittikkuusup nulia innaakkamiuk taassumalu uia pisuussuteqanngitsoq toqutaaniassammat sorsuffimmi sallerpaanngortillugu inissitsikkamiuk. (2 Sam 11:1-17) Aap, inuit naammalluinnanngitsuugamik pissaanermik atuilluarnissartik sapernartittarpaat. Pissaanillillu Jehovamik ataqqinninngikkaangata suli ajornerusarpoq. Politikeri nuimasoq tuluk paavit katuullit malersuisitserujussuarsimanerat allaatigereerlugu ima allappoq: “Pissaaneqarneq peqquserlulersitsisarpoq killeqanngitsumillu pissaaneqarneq peqquserlulluinnalersitsisarluni.” Tamakku tamaasa eqqarsaatigalugit ima aperisoqarsinnaavoq: Sooq oqartussaassusilinnik ataqqinnissaagut?

6, 7. (a) Jehovamik asanninnerput kajumississutigalugu susarpugut, aamma sooq? (b) Pitseriartuuneq qanoq paasisariaqarpa?

⁶ Oqartussaassusilinnik ataqqinninnissamut pissutissat pingaarnerpaat asanninnermik aallaaveqarput — Jehovamik,  tullermik allaallu immitsinnik asanninnermik. Jehova allanit tamanit asanerpaagatsigu taassuma uummataa nuannaartikkusupparput. (Ussatit 27:11; Markusi 12:29, 30 atuakkit). Nalunngilarput Edenimi pikitsitsisoqarmalli taassuma kisimi oqartussaanera, qilammut nunarsuarmullu naalakkersuisinnaatitaanera, apeqquserneqartartoq inuiaallu amerlanerpaartaat Saatanimik illersuilersimallutillu Jehovap naalakkersuineranik ajattuisartut. Uagut pilluarpugut Jehovap oqartussaassusianik tapersersuilersimagatta. Oqaatsit ataqqinnippalungaartut Saqqummersitat 4:11-mi allassimasut uummatitsigut killitsissutigaavut. Paasilluinnareerparput Jehova qilammi nunamilu naalagaasussaatitaasoq! Taassuma kisimi oqartussaaneranik tapersersuivugut tamannalu inooriaatsitsigut ersersittarlugu.

⁷ Taamatut ataqqinninnermut ilaavoq naalanneq, naalannerinnarli naammanngilaq. Kajumilluta Jehovamut naalattarpugut asagatsigu. Ilaannikkulli naalannissarput sapernartittorujussuusassavarput. Taamaattoqartillugu meeraaqqat aallaqqaataani eqqaaneqartut pisarnerattut pitseriartuuneq, imaluunniit naalakkumaneq, ilinniartariaqarparput. Eqqaamavarput Jiisusi unamminiarnartoqangaaraluaraangalluunniit Ataatami piumasaanut naalatsigitittartoq. Ataatani ima oqarfigaa: “Uanga piumasara pinnani illit piumasat pili.” — Luk 22:42.

8. (a) Jehovap oqartussaaneranut naalatsigitinneq amerlanertigut qanoq ersertarpa, Jehovalu tamatumunnga tunngatillugu qanoq misigisarpa? (b) Qanoq ililluta siunnersuutinik tusaaniallaqqinnerulerlutalu oqaaqqissaarutinik pigiliussillaqqinnerulersinnaavugut? (Takuuk “ Siunnersuutit tusaaniartarniakkit oqaaqqissaarutillu pigiliullugit”).

⁸ Soorunami Jehovap ullumikkut tamatta immikkut toqqaannartumik oqaluunneq ajorpaatigut, oqaatsinili sinniisinilu nunarsuarmiittut aqqutigalugit oqaluuttarpaatigut. Taamaattumik taassuma oqartussaaneranik ataqqinninnerput amerlanertigut ersertassaaq uagutsinnut  oqartussaassusilersimasaanik oqartussaassuseqaannarallartitaanilluunniit ataqqinninnitsigut. Taakkununnga pikitsitsigutta — assersuutigalugu taakkua Biibili tunngavigalugu siunnersuutaannik naqqiutaannillu akuerinnikkumanngikkutta — Jehova narrutsatsissavarput. Israelikkut Mosesi naammagittaalliorfigalugulu pikitsitsiffigigamikku Jehovap taakkua taamaaliornerat imminut pikitsitsinertut isigaa. — 4 Mos 14:26, 27.

9. Sooq tullitsinnik asanninnerput kajumississutigalugu oqartussaassusilinnik ataqqinnissaagut? Assersuuteqarit.

⁹ Aamma oqartussaassusilinnik ataqqinninnerput tullitsinnik asanninnitsinnit aallaaveqarpoq. Qanoq ililluni? Takorlooriaruk sakkutoorpassuarnut ilaasutit. Sakkutoorpassuit taakkua suliniutaat iluatsissappata — allaallu taakku tamarmik inuuinnassappata — sakkutuut tamarmik immikkut qullersarisatik tamaasa naalattariaqarlugillu ataqqisariaqarlugillu suleqatigisariaqarpaat. Qullersaqartarnermik aaqqissuussaq tamanna pikitsitsillutit ataqqinngikkukku sakkutooqatitit tamaasa navianartorsiortilersinnaavatit. Ilumoorpoq ullumikkut sakkutuut nunarsuarmiittut aseruisorujussuusartut. Jehovalli sakkutuui ajunngitsuinnarmik naammassisaqartarput. Guuti Biibilimi arlaleriaqaluni ‘Katersaarsuit Naalagaattut’ eqqartorneqarpoq. (1 Sam 1:3) Oqaaseq Hebræerisooq ‘katersaarsuarnik’ nutserneqartartoq aamma sakkutooqatigiittorpassuarnik nutserneqarsinnaavoq. Jehova pinngortitanut anersaajusunut pissaanilinnut assigiinngitsorpassuarnut ‘sakkutuujusunut’ naalagaavoq. Kiffani nunamiusut ilaannikkut sakkutuunut assersuuttarpai. (Ez 37:1-10; 2 Tim 2:3) Jehovap uagutsinnut oqartussaassusiligaanut pikitsitsigutta anersaakkut sakkutooqativut navianartorsiortileratarsinnaavavut, ilaa? Kristumiup utoqqaanertanut toqqakkanut pikitsitsinera ilagiinniittunut allanut ajoqutaasinnaavoq. (1 Kor 12:14, 25, 26)  Qitornaasullu pikitsitsinera ilaqutariinniittunut tamanut ajoqutaasinnaavoq. Tassa tullitsinnik asanninnitsinnik ersersitsisarpugut oqartussaassusilinnut suleqataajumanitsigut taakkuninngalu ataqqinnittuunitsigut.

10, 11. Aamma suna oqartussaassusilinnut naalannissamut kajumississutigisinnaavarput? Nassuiaruk.

¹⁰ Aamma oqartussaassusilinnik ataqqinnittarpugut uagut nammineq iluaqutigisaratsigu. Jehovap oqartussaassusilinnik ataqqinnittooqqugaangamitigut taamaaliornerup iluaqutissartaa amerlanertigut eqqaasarpaa. Assersuutigalugu meeqqat angajoqqaaminnut naalattaqquai inuummersorniassammata pilluarlutillu inuuniassammata. (5 Mos 5:16; Ef 6:2, 3) Utoqqaanertanik ilagiinniittunik ataqqinnittooqquaatigut ataqqinngikkutsigit anersaakkut ajoqutigissagatsigu. (Hebr 13:7, 17) Aamma silarsuarmi oqartussaasunut naalaqquaatigut tamanna illersuutigissagatsigu. — Rom 13:4.

 ¹¹ Oqartussaassusilinnik ataqqinnittuusariaqarnitsinnut pissutaasut ilisimagutsigit oqartussaassusillit ataqqiuminartinnerussavavut, ilaa? Pingaarutilinnut pingasunut tunngatillugu oqartussaassusilinnik qanoq ataqqinnissinnaasugut sammeriartigu.

12. Jehovap uiusoq sumik oqartussaassusilerpaa, taannalu akisussaaffimminik qanoq eqqortitsisinnaava?

¹² Jehova ilaqutariittut aaqqissuussaanermik pilersitsisimavoq. Taanna aaqqissuulluagaanermut Guutiugami ilaqutariinni siulersuinermik aaqqissuussamik atuutilersitsivoq ilaqutariittut ingerlalluartoqarsinnaanissaa siunertaralugu. (1 Kor 14:33) Uiusoq ilaqutariinni ittuusussatut oqartussaassusilerpaa. Uiusoq ‘niaqquminik’, Kristusimik Jiisusimik, ataqqinnittuussaaq taassuma ilagiinnut oqartussaassutsiminik atueriaasianik ilaarsinermigut. (Ef 5:23) Taamaattumik uiusup ittuusutut akisussaaffini sumiginnarnagu sapiilluni pitsaanerpaamik eqqortittariaqarpaa. Aamma naalagaaniartuunanilu naakkittaatsuussanngilaq, asannittuusariaqarporli ingasaassinianngitsuusariaqarlunilu inussiarnersuusariaqarlunilu. Eqqaamajuarpaa oqartussaanini killeqartoq — Jehova imminit oqartussaassuseqarnerujuaannartoq.

13. Nuliaasup ilaqutariinni suliassani Jehovamut nuannaarutaasumik qanoq naammassisinnaavaa?

 ¹³ Nuliaasoq uiusumut ikiortaasussanngortinneqarsimavoq taassumunnga naammaataasussatut. Taannattaaq ilaqutariinni oqartussaassusilerneqarsimavoq, Biibilimimi eqqartorneqarput ‘anaanaasup ajoqersuussutai’. (Uss 1:8) Oqartussaassuseqarpoq, uiusorli taassumannga oqartussaassuseqarneruvoq. Nuliaasoq kristumiu uimi oqartussaassusianik ataqqinnittarpoq taanna ilaqutariinni ittuusutut suliassaminik suliaqarnerani ikiortarlugu. Uini nikassarneq ajorpaa, nammineq piumasaminik iliortinniarsarineq ajorlugu inissisimaffianilluunniit inangerniarneq ajorlugu. Suleqatigisarpaali tapersersortarlugulu. Uimi aalajangigaanut isumaqataanngikkuni taassumunnga naalatsigitiitigaluni isummani ataqqinnippaluttumik  oqaatigisinnaavaa. Uini uppeqatiginngikkuniuk unamminiagaqartarsinnaavoq, pitseriartuunerali uiata Jehovamik ujaasilernissaminut kajumississutigisinnaavaa. — 1 Petrusi 3:1 atuaruk.

14. Meeqqat qanoq ilillutik angajoqqaaminnut Jehovamullu nuannaarutaasinnaappat?

¹⁴ Meeqqat ataataminnut anaanaminnullu naalakkaangamik Jehovap uummataanik nuannaartitsisarput, aammattaaq angajoqqaaminnut nuannaarutaallutillu ataqqinaataasarput. (Uss 10:1) Meeqqat ataataminni anaanaminniluunniit peroriartortut naalannissaq pillugu najoqqutassiamik tamatuminngattaaq maleruaassapput. Aamma eqqaamassavaat ataatartik anaanartilluunniit kisimiimmat tapersersortariaqarlugulu suleqatigisariaqarlugu. Ilaqutariinniittut tamarmik Jehovap imminnut suliassiissutaanik naammassinnittarunik ilaqutariittut eqqissineq pilluarnerlu nuannaarutigisassavaat. Aammattaaq Jehovamut, ilaqutariittut aaqqissuussaanermik pilersitsisumut, ataqqinaataassapput.

15. (a) Jehovap oqartussaassusianik ataqqinninnerput ilagiinni kristumiuni qanoq ersersissinnaavarput? (b) Najoqqutassiat siulersortitsinnut naalannissamut iluaqutigisinnaasavut suuppat? (Takuuk “ Siulersortisi naalassigit”).

¹⁵ Jehovap ernini ilagiinnut kristumiunut naalakkersuisuusussatut toqqarsimavaa. (Kol 1:13) Jiisusillu ‘inussiaatini aalajaallunilu silatooq’ (NW) Guutip innuttaasa nunarsuarmiittut anersaakkut pisariaqartitaannik matussusiisussanngortippaa. (Matt 24:45-47) Ullumikkut inussiaq taanna tassaavoq Jehovap Nalunaajaasuisa Siulersuisoqatigiivi. Ilagiit kristumiut siulliit pisarsimanerattut, ullumikkut utoqqaanertat siulersuisoqatigiinnit ilitsersorneqartarlutillu siunnersorneqartarput, allakkatigut siulersuisoqatigiilluunniit sinniisorisaat, soorlu nakkutilliisut  angalasartut, aqqutigalugit. Taamaammat tamatta immikkut utoqqaanertat oqartussaassusiannik ataqqinnikkaangatta Jehova naalattarparput. — 1 Thessalonikamiut 5:12; Hebræerit 13:17 atuakkit.

16. Utoqqaanertat anersaamit illernartumit toqqagaanerat qanoq paasisariaqarpa?

¹⁶ Utoqqaanertat ilagiinnilu kiffartortut naammalluinnanngitsuupput. Kukkusarput, soorlu uagut kukkusartugut. Taamaakkaluartorli utoqqaanertat Biibilimi tassaanerarneqarput ‘inuit tunissutaasut’, tunissutigineqartut ilagiit anersaakkut nukittujuarnissaannut ikiorniassagamikkit. (Ef 4:8, NW) Utoqqaanertat anersaamit illernartumit toqqagaapput. (ApS 20:28) Qanoq ilillutik? Ima paasillugu piumasaqaatinik Guutip oqaasiani, anersaamit illernartumit isumassarsiarititaasumi, allaatigineqartunik eqqortitsisariaqartut. (1 Tim 3:1-7, 12; Tit 1:5-9) Aammattaaq utoqqaanertat qatanngutip angutip piukkunnassusianik naliliisartut Jehovap anersaavata illernartup siulersuinissaa qamannga pisumik qinnutigisarpaat.

17. Arnat kristumiut qaqugukkut nasartaateqarlutilluunniit nasaqartariaqarpat?

¹⁷ Utoqqaanertanik ilagiinniluunniit kiffartortunik ilagiitsinniittunik periarfissaqanngitsoqarsinnaavoq suliassap nalinginnaasumik utoqqaanertanut ilagiinniluunniit kiffartortunut suliassiissutigineqartartup, assersuutigalugu katersuutsitsinissap, isumaginissaanut. Taama pisoqartillugu qatanngutit angutit kuisimasut allat immaqa taartaasinnaassapput. Tamanna ajornarpat qatanngutit arnat piumasaqaatinik eqqortitsisut tamakkuninnga isumaginnissinnaapput. Qatanngulli arnaq qatanngutip angutip kuisimasup nalinginnaasumik suliarisartagaanik suliaqassaguni nasartaateqartariaqarpoq nasaqarluniluunniit. *  (1 Kor 11:3-10) Piumasaqaat tamanna arnanut nikanarsaataanani periarfissiissutaavoq Jehovap siulersuinermut aaqqissuussaanik ataqqinninnermik ilaqutariinni ilagiinnilu ersersitsinissamut.

18, 19. (a) Najoqqutassiat Romamiunut allakkani 13:1-7-imiittut illit qanoq nassuiassavigit? (b) Silarsuarmi oqartussaasut qanoq ataqqisarpavut?

¹⁸ Kristumiut ilumoortut najoqqutassiat Romamiunut allakkani 13:1-7-imiittut maleruaqqissaarpaat. (Atuakkit). Versit taakku atuaraanni paasineqarsinnaavoq ‘naalakkersuisut qullersaasut’ eqqartorneqartut tassaasut silarsuarmi oqartussaasut. Silarsuarmi oqartussaasut taakku Jehovamit atatinneqarallartillutik pingaarutilinnik suliaqartarput; ilaatigut inuiaqatigiinni torersumik aaqqissugaasumillu ingerlasoqarnissaa isumagisarpaat pisariaqartunillu kiffartuussisarlutik. Oqartussaasunik taakkuninnga ataqqinnissinnaavugut inatsisinik maleruaanitsigut. Akileraarutissavut tamaasa akilertarpavut, immersugassat oqartussaasut uagutsinnut immersoqqusaat peqqissaarluta immersortarpavut, inatsisillu uagutsinnut, ilaquttatsinnut, suliffitsinnut pigisatsinnullu tunngasut tamaasa maleruartarpavut. Silarsuarmili oqartussaasut Guutimut naalanngeqquppatigut taakkununnga naalatsigitikkumanavianngilagut. Naalanngeqqussagaluarpatigut itsaq apustilit iliorsimaneratut ima akissaagut: “Guuti inunnit naalattariaqarneruvoq.” — ApS 5:28, 29; takuuk ungalusaq “ Kikkut oqartussaanerannut naalatsigitittussaavunga?”

¹⁹ Aamma silarsuarmi oqartussaasunik ataqqinnittarpugut pissuserissaarnitsigut. Ilaannikkut immaqa oqartussaasut oqaloqatigisarpavut. Apustilip Paulusip naalakkersuisut soorlu kunngi Herodesi Agrippa naalagaatitarlu  Festusi oqaluuppai. Angutit taakkua inooriaasiat isornartorujussuugaluartoq Paulusip ataqqinnittumik saaffigai. (ApS 26:2, 25) Oqartussaasoq oqaloqatigisarput naalakkersuisuugaluarpat pissaanilik illoqarfitsinniluunniit politiiugaluarpat Paulusip maligassiaa malittariaqarparput. Meeqqat inuusuttullu kristumiut ilinniartitsisunik atuarfimmilu sulisunik allanik aamma taamatut ataqqinnittuuniartarput. Soorunami upperisatsinnut akuersaartuinnaanngitsut aammali uagutsinnut akeqqersimaartut ataqqisarpavut. Aap, ilagiit kristumiut avataanniittut ataqqinnittuunerput takusinnaasariaqarpaat. — Romamiut 12:17, 18 atuakkit; 1 Petr 3:15, 16.

20, 21. Oqartussaassusilinnik eqqortumik ataqqinninnerput qanoq iluaqutigisinnaavarput?

²⁰ Allanik ataqqinninnissamut tunuarsimaassanngilagut. Apustili Petrusi ima allappoq: “Kikkuugaluartulluunniit ataqqisigit.” (1 Petr 2:17) Inuup malugisinnaagaangamiuk ilumoorluta ataqqigitsinni tamanna killinneqaatigingaartarpaa. Ataqqinninnermi ullumikkut qaqutigoorneruleraluttuinnarpoq. Taamaammat ilaatigut ataqqinnittuunitsigut Jiisusip peqqussutaa una malillugu iliorsinnaavugut: “Qaamasorsi qaamali inunnut, suliasi ajunngitsut taakkununnga takoqqullugit Ataatarsilu qilanniittoq unnersiutigeqqullugu.” — Matt 5:16.

²¹ Silarsuarmi taartumi matumani inuit eqqortuliorusuttut anersaakkut qaamaneq kajungerilertarpaat. Ilaquttatsinnik, ilagiinniittunik inunnillu ilagiit kristumiut avataanniittunik ataqqinnittuunerput allat qaamanermi uagutsinnik saqeqateqarusulissutigisinnaavaat. Nuanneq, ilaa? Taamatulluunniilli pisoqanngikkaluarpat manna qularnanngilaq: Allanik ataqqinninnerput Jehovap Guutip nuannaarutigisarpaa, aamma taassuma asanninneraniittuarnissamut iluaqutigisarparput. Akissarsiassamit tamatumannga pitsaanerusumik akissarsisoqarsinnaanerpa?