1-3. (a) Inuppassuit sulinertik qanoq isumaqarfigaat? (b) Biibilimi sulinermut qanoq isiginnittaaseqarnissamut kajumissaarneqarpugut, apeqqutillu suut sammissavavut?

ULLUMIKKUT inuppassuit sulisarnertik nuannaarutigineq ajorpaat. Nalunaaquttap-akunnerpassuini nuannarinngisaminnik suliaqartariaqarnertik pissutigalugu ullut tamaasa suliartornissartik nakerineq ajorpaat. Taamatut isiginnittaaseqartut suliarisassaminnik soqutiginnilernissaminnut nuannaarutiginnilernissaminnullu suut kajumississutigisinnaavaat?

² Biibilimi suleruloornermut isumalluarnartumik isiginnittaaseqarnissatsinnut kajumissaarneqarpugut. Sulisarneq tamatumalu kinguneri tunissutitut allaatigineqarput. Salomo ima allappoq: “Inuit nerillutillu imersinnaammata suleruloornermillu inerititaat inuulluutigisinnaallugit tamannaavortaaq Guutip tunissutaa.” (Oqal 3:13) Jehovap uagutsinnik asannittup ajunnginnerpaamillu kissaassiuaannartup sulisarnerput tamatumalu kinguneri nuannaarutigissagivut kissaatigaa. Jehovap asanninneraniittuinnarumalluta taassuma sulisarnermut tunngatillugu isiginnittaasia najoqqutassiaalu naapertorlugit inuusariaqarpugut. — Oqaluussisartup oqaasii 2:24; 5:17 atuakkit.

³ Kapitalimi matumani apeqqutit sisamat uku sammissavavut: ‘Suleruloortarnerput’ qanoq nuannaarutigisinnaavarput? Kristumiut suut suliarinavianngilaat? Aningaasarsiorniarluni sulinermut anersaakkullu ittunik  sammisaqarnermut tunngatillugu qanoq oqimaaqatigiissaarisinnaavugut? Suliassarpullu pingaarnerpaaq suua? Apeqqutilli taakku akissutissarsitinnagit Jehovap aamma Jiisusip Kristusip sulinermut tunngatillugu maligassiuilluarnerpaajunerat sammeqqaariartigu.

4, 5. Jehovap suliumatuujunera Biibilimi qanoq erserpa?

⁴ Jehova suliumatuujunerpaavoq. Mosesimik allakkani siullerni 1:1-imi ima allassimavoq: “Pileqqaarneranni Guutip qilak nunalu pinngortippai.” Guutip nunarsuarmi pinngortitani naammassigamigit nalunaarpoq taakku “ajunngingaartut”. (1 Mos 1:31) Allatut oqaatigalugu nunarsuarmi pinngortitani tamaasa iluarilluinnarpai. Aap, Jehovap ‘Guutiusup pilluartup’ eqiasuilluni sulisarnini nuannaarutigingaarpaa. — 1 Tim 1:11.

⁵ Guuterput naammassisaqarluartartoq suliuaannarpoq. Guutip nunarsuarmik nunarsuarmiittunillu pinngortitsereernerata kingunerujussua Jiisusi ima oqarpoq: ‘Ataataga suliuarpoq.’ (Joh 5:17) Ataatap suut ulapputigisimavai? Qilammiit inuit siulersorlugillu isumassortuarpai. ‘Pinngortitamik nutaamik’ — kristumiunik anersaakkut kinguaassiarititaasunik Kristusimik naalakkersueqateqartussanik — pilersitsivoq. (2 Kor 5:17) Inunnut siunertani — imminik asannittut silarsuassami nutaami naassaanngitsumik inuulernissaat — naammassiumallugu suliuarpoq. (Rom 6:23) Jehovap sulinermi tamatuma kinguneri nalerisimaarutigingaarsimassavai. Inuit millionillit Guutip naalagaaffianik tusarliussaq upperilerlugu, Guutimit kajungilersinneqarlutik taassumalu asanninneraniittuinnarumallutik inooriaasertik allanngortissimavaat. — Joh 6:44.

6, 7. Jiisusip suliumatuujunera oqaluttuariuk.

⁶ Jiisusi qangarsuarli suliumatuujuvoq. Nunarsuarmukannginnermini ‘qilanni nunamilu suut tamarmik’  pinngortinneqarmata Guutip ‘suliortuatut’ suliaqarpoq. (Kol 1:15-17; Uss 8:22-29, 31; 8:30, 1900) Nunarsuarmiikkallarami Jiisusi aamma suliumatuujuvoq. Inuusuttuaraalluni sanasutut ilinniartinneqarpoq; taamatullu ilisimaneqarpoq. * (Mark 6:3) Sanasutut sulisarneq ilungersunartuuvoq, piginnaanerillu assigiinngitsorpassuit pisariaqartinneqarput, ingammik taamani qisunnik sanaartorfeqanngimmat, illumi atortussaarniarfinnik niuertarfeqanngimmat innaallagiartortunillu sannateqanngimmat. Takorloorsinnaaviuk Jiisusi qisunnik pissarsiniariartortoq — immaqalu allaat nammineq orpinnik uppititsillunilu qisunnik assartuisoq? Takorloorsinnaaviuk Jiisusi illuliortoq — qaliap quassuttuui, illup matui allaallu pequtit sanagai? Qularnanngitsumik Jiisusip sulinermi naammassisaqarluarnerup nuannersortai nammineq misigai.

⁷ Jiisusi oqaluussinermini asseqanngilluinnartumik aallussilluarpoq. Ukiut pingasut affarlu suliaq pingaaruteqarluinnartoq tamanna ulapputigisimavaa. Inuit amerlanersaat oqaluussiffiginiarlugit ullaaralaakkut makiaarlunilu unnussuarmut ulapinnermigut piffissani atorluarpaa. (Luk 21:37, 38; Joh 3:2) “Jiisusi angalaarpoq illoqarfiit illoqarfeeqqallu aqqusaartorlugit oqaluussisarluni Guutillu naalagaaffianik iivangkiiliu tusarliuttarlugu.” (Luk 8:1) Jiisusi inunnut nutaarsiassamik nuannersumik oqaluussiniarluni aqqusinikkut pujoralaqisukkut kilometerit hundredilikkuutaat arlallit pisulluni angalavoq.

8, 9. Sooq Jiisusip sulinini nuannaarutigisinnaavaa?

⁸ Jiisusip oqaluussinermik suliaqarnini nuannaarutigaa? Ilaana! Jiisusip Naalagaaffimmik sallusuissutip naatsiiassartai siaruartereermagit narsaatit katersuiffigeriaannanngorpullusooq. Guutip piumasaatut iliornini nakussatsissutigingaaramiuk  Guutip suliareqqusaa naammassiniarlugu allaat nerinngitsoorumavoq. (Joh 4:31-38) Eqqarsaatigiuk Jiisusip nunarsuarmi kiffartornermi naangajalernerani nalerisimaangaarnera. Pissutissaqarluarlunimi Ataataminut ima oqarsinnaavoq: “Nunarsuarmi naalannarsisippagit suliassaq uannut suliareqqusat naammassigakku.” — Joh 17:4.

⁹ Jehova Jiisusilu suliamik nuannaarutiginninnermut tunngatillugu maligassiuilluarnerpaajupput. Jehovamik asanninnerput kajumississutigalugu ‘Guuti maligassarissavarput’. (Ef 5:1) Aamma Jiisusimik asanninnerput taassuma ‘tumaanik atuaanikkut malinnaanissatsinnut’ kajumississutigaarput. (1 Petr 2:21) Taamaattumik sulisarnerput qanoq nuannaarutigisinnaagipput maanna sammissavarput.

10, 11. Suna sulisarnitsinnut isumalluarnartumik isiginnittaaseqalissutigisinnaavarput?

¹⁰ Kristumiut ilumoortut namminneq aningaasarsiornissaat pissusissamisoorpoq. Sulisarnerput nuannaarutigerusupparput, nuannarinngisatsinnilli suliffeqarutta unamminiarnarsinnaavoq. Taavami sulisarnerput qanoq nuannaarutigilersinnaagatsigu?

¹¹ Isumalluarnartumik isiginnittaaseqalernitsigut. Imaassinnaavoq atukkavut allanngortissinnaanngikkivut, isiginnittaaserpulli allanngortissinnaavarput. Guutip sulinermut isiginnittaasianik eqqarsaatiginneqqissaarnerput sulisarnitsinnut isumalluarnartumik isiginnittaaseqalissutigisinnaavarput. Assersuutigalugu ilaqutariinni ittuuguit eqqarsaatigeriaruk sulisarnerit — qanorluunniit naammaginanngippasikkaluarpat — ilaquttannik pilersuissutigisinnaagit. Ilaquttannillu pilersuinerit Guutip isaani pingaaruteqangaarpoq. Biibilimi allassimavoq ilaquttaminik  ‘isumaginninngitsoq uppinngitsumit ajornerusoq’. (1 Tim 5:8) Eqqaamajuarukku sulisarnerit Guutimit akisussaaffilerneqarninnik eqqortitsissutigisinnaallugu sulisarnerit nuannaarutiginerussavat, immaqalu suleqativit misigisimanngisaannik nuannaarutissaqassaatit.

12. Sulisarnitsinni eqiasuillutalu unneqqarinnerput qanoq iluaqutigaarput?

¹² Eqiasuillutalu unneqqarinnitsigut. Eqiasuilluta sulinerput suliatsinnillu pikkorissartuarneq pilluaqquneqaatigisinnaavavut. Sulisut eqiasuitsut pikkorissullu sulisitsisuminnit pingaartinneqartarput. (Uss 12:24; 22:29) Kristumiuugatta ilumoortut unneqqarissuusariaqarpugut. Tillittassanngilagut — assersuutigalugu aningaasat, atortussat piffissarlu suliffimmut atorneqartariaqartut allamut atussanngilavut. (Ef 4:28) Kapitalip matuma siuliani sammeriikkatsitut unneqqarissuuneq imminut akilersinnaavoq. Sulisoq unneqqarissutut ilisimaneqartoq tatigineqarnerusarpoq. Eqiasuinnerpullu sulisitsisumit malugineqanngikkaluartoq ‘ilerasuutissaqannginnerput’ Guutimillu asasatsinnik nuannaartitsinerput nuannaarutigisinnaavavut. — Hebr 13:18; Kol 3:22-24.

13. Suliffitsinni pissuserissaarnerput qanoq kinguneqarsinnaava?

¹³ Pissuserissaarnikkut Guutimik naalannarsisitsisinnaanitsinnik eqqaamannittuarnitsigut. Suliffitsinni kristumiut pissuserissaarnissamut najoqqutassiaat qutsissut naapertorlugit inuugutta allat tamanna maluginianngitsoornavianngilaat. Tamannalu ‘Guutip annaassisitta ajoqersuutaanut pinnersaataalersitsisinnaavoq’. (Tit 2:9, 10) Aap, pissuserissaarnerput pissutigalugu inuit allat Guutimik pallorfiginneriaaserput alutorilersinnaavaallusooq immaqalu upperisarput misissorusulerlugu. Takorlooriaruk suliffinni pissuserissaarnerit pissutigalugu suleqativit ilaata sallusuissut soqutigilerpagu qanoq nuannertigissanersoq! Pingaaruteqarnerusorli una eqqarsaatigeriaruk: Pissuserissaarnerit Jehovamik  naalannarsisitsissallunilu Jehovap uummataanik nuannaartitsissaaq! — Ussatit 27:11; 1 Petrusi 2:12 atuakkit.

14-16. Suliffittaarnissamut tunngatillugu apeqqutit pingaarutillit suut eqqarsaatigeqqissaartariaqarpavut?

¹⁴ Suliffiit suut kristumiunit akuerineqarsinnaasut suullu akuerineqarsinnaanngitsut pillugit Biibilimi sukumiinerusumik ilitsersuuteqanngilaq. Imaanngilarli suliffik sunaluunniit suliffittaarisinnaagipput. Najoqqutassiat Biibilimeersut iluaqutigalugit Guutip iluarinngisaanik  suliffittaarnata suliffimmik assuarnaateqanngitsumik Guutimut nuannaarutaasumik toqqaasinnaavugut. (Uss 2:6) Suliffittaarnissamut tunngatillugu aalajaangiiniaraangatta apeqqutit pingaarutillit marluk eqqarsaatigeqqissaartariaqarpavut.

¹⁵ Suliffimmi suliarineqartartut Biibilimi assuarineqarpat? Guutip oqaasiani tillinneq, salluneq aamma guutipilunnik sananeq assuarineqarluinnarput. (2 Mos 20:4; ApS 15:29; Ef 4:28; Saqq 21:8) Soorunami taakku suliarinngilluinnassavavut. Jehova asagatsigu suliffik Jehovap inassutaanik unioqqutitsissutaasoq suliffittaarinavianngilarput. — 1 Johannesi 5:3 atuaruk.

¹⁶ Suliffeqarfimmi sulisarnikkut eqqunngitsuliornermik siuarsaallungaluunniit eqqunngitsuliornermut pisooqataassaanga? Assersuuteqariarta. Saaffiginnittarfimmi sulisarneq eqqunngitsuliornerunngilaq. Taavami kristumiu naartuersittarfiup saaffiginnittarfiani suliffittaarnissamut neqeroorfigineqaruni? Naartuersitseqataanngikkaluarluni saaffiginnittarfimmiup naartuersittarneq Guutip oqaasiani assuarineqartartoq tapersussannginnerpaa? (2 Mos 21:22-24; takuuk atuakkami matumani quppernerup ataani ilanngussaq qupp. 91-imiittoq). Jehova asagatsigu Biibilimi assuarineqartunut attuumassuteqarluinnartumik suliffeqarnavianngilagut.

17. (a) Suliffittaarnissamut tunngatillugu aalajangiiniaraangatta apeqqutit suut eqqarsaatigeqqissaartariaqarpavut? (Takuuk ungalusaq “ Suliffittaarisinnaavara?”). (b) Guutip iluarisaanik aalajangiiniarnitsinni nalunngeqatiginnissuterput qanoq iluaqutigisinnaavarput?

¹⁷ Apeqqutit marluusut immikkoortuni 15-imi 16-imilu eqqarsaatigeqqissaarnissaat suliffimmik toqqaaniarnissatsinni iluaqutigingaarsinnaavarput. Tamatumali saniatigut eqqarsaatigisassat allat eqqumaffigissavavut. * Inussiaq  aalajaallunilu silatooq suliffimmut tunngatillugu annikitsualunnut tamanut malittarisassiorsinnaanngilaq. Uagut nammineq naliliisinnaassuserput atortariaqarparput. Kapitali 2-mi sammeriikkatsitut najoqqutassiat Guutip oqaasianiittut ulluinnarni maleruarneqarsinnaanerannik atuaqqissaartarnitsigut nalunngeqatiginnissuterput ilinniartillugulu sungiusartariaqarparput. ‘Sungiusagaasumik paasinnissinnaassuseqarutta’ nalunngeqatiginnissuterput  iluaqutigalugu Guutip iluarisaanik aalajangiillutalu taassuma asanninneraniittuinnarsinnaavugut. — Hebr 5:14, NW.

18. Sooq anersaakkut oqimaaqatigiissaariuarnissaq ajornaatsuujuaannanngila?

¹⁸ ‘Ullussani kingullerni makkunani atugarliungaarfiusuni’ anersaakkut oqimaaqatigiissaariuarnissarput ajornaatsuujuaannanngilaq. (2 Tim 3:1) Suliffittaarniarneq suliffiullu suliffigiuarnissaa sapernarsinnaavoq. Kristumiuugatta ilumoortut ilaquttavut pilersorniarlugit eqiasuilluta sulisarnissatta pingaaruteqangaarnera nalunngilarput. Mianersunngikkuttali suliffitsinni ulapputeqarneq, qaffassarniarnissamut tatineqarneq aamma silarsuarmi pigisanik pingaartitsivallaarneq sunnerteqqajaassutigisinnaasarput  anersaakkut anguniagassatsinnut akornutaasinnaapput. (1 Tim 6:9, 10) ‘Suut pingaaruteqanerusut qulakkeernerisigut’ qanoq oqimaaqatigiissaariuarsinnaasugut sammeriartigu. — Fil 1:10, NW.

19. Sooq Jehova tatigilluinnartariaqarparput, taamatullu tatiginnikkutta sunavianngilagut?

¹⁹ Jehova tatigilluinnaruk. (Ussatit 3:5, 6 atuakkit). Jehovap asammatigut ‘isumassormatigullu’ taanna tatigilluinnartariaqarparput, ilaa? (1 Petr 5:7) Pisariaqartitavut uagutsinnit nalunnginneruai ikiuisinnaassuseqarlunilu. (Tuss 37:25) Taamaattumik eqqaasitsissutaa una eqqumaffigisariaqarparput: “Aningaaserituussutsissi qanoq inuunissarsi aalajangissanngilaa, pigisasili naammagisigit. Guutimi nammineq oqarpoq: ‘Iperassanngilakkit imminiiginnassanallu.’” (Hebr 13:5) Piffissaq tamaat kiffartortorpassuit Guutip pisariaqartitanik matussusiisinnaanera uppernarsarsinnaavaat. Jehovap uagutsinnik isumassuiumaarnera qularutiginngilluinnarutsigu ilaquttatsinnik pilersuisinnaanerput isumakuluutigivallaarnavianngilarput. (Matt 6:25-32) Aningaasarsiorumalluta sulisarnerput anersaakkut sammisaqarnissatsinnik, assersuutigalugu nutaarsiassaq nuannersoq pillugu oqaluussisarnitsinnik ataatsimiigiartarnitsinnillu, sumiginnaassutiginavianngilarput. — Matt 24:14; Hebr 10:24, 25.

20. ‘Isit siumuinnaq sammisinnissaat’ qanoq paasisariaqarpa, qanorlu taamaaliorsinnaavit?

²⁰ Guutip piumasaatut iliornissat pingaarnerutiguk. (Ussatit 4:25 atuaruk). ‘Isivut siumuinnaq sammisissagutsigit’ pilimanianngitsumik inooriaaseqartariaqarpugut. Kristumiup Guutip piumasaatut iliornissaq pingaarnerutittarpaa. Akissarsiaqarluarnartumik suliffittaarnissarput inuulluataarnartumilluunniit inooriaaseqalernissarput anguniarsuataarnavianngilavut. Aamma nioqqutissat pitsaanerpaat nutaanerpaallu ussassaarisartunit  pinngitsoorsinnaannginneraanerannit tiguartinnavianngilagut. Guutip piumasaatut iliornissat qanoq pingaarnerutissinnaagakku? Pisariaqanngitsunik nanertuutaasunik akiitsugaqarnaveersaartarit. Allamut saasaateqarumanak piffissartornartunik ingasattumillu pisarissersuutaasunik pigisaqalernaveersaarit. Biibilimi ‘nerisassaqarnermik atisassaqarnermillu naammaginninnissamut’ kajumissaarut maliguk. (1 Tim 6:8) Sapinngisat tamaat inooriaatsinnik pisariillisaagit.

21. Sooq pingaarnersiuisariaqarpugut, inuunitsinnilu suna salliuttariaqarparput?

²¹ Anersaakkut anguniagaqarit, taakkulu anguniarlugit iliuuseqarit. Inuunitsinni angusinnaasavut killeqarmata pingaarnersiuisariaqarpugut. Taamaaliunngikkutta pingaaruteqannginnerusut piffissaajaatigilersoorsinnaavavut pingaaruteqarnerusullu piffissaqarfigiunnaarlugit. Inuunitsinni suna pingaarnerpaatittariaqarparput? Silarsuarmi inuppassuit aningaasarsiorluarnartumik atorfeqarniarlutik qaffasinnerusumik ilinniagaqarnissartik pingaarnerpaatittarpaat. Jiisusilli ajoqersukkani ‘Guutip naalagaaffianik ujaaseqqaaqqullugit’ kajumissaarpai. (Matt 6:33) Aap, kristumiuugatta ilumoortut inuunitsinni Guutip naalagaaffia siulliullugu noqqaassutigisarparput. Inooriaatsitsigut — aalajangiisarnitsigut, anguniakkatsigut sammisartakkatsigullu — ersertariaqarpoq Guutip piumasaa taassumalu naalagaaffianut attuumassuteqartut silarsuarmi angusaqarluarnissamit pigisatigullu kissaateqarnermit pingaarnerutikkivut.

22, 23. (a) Suliassaq pingaarnerpaaq suna kristumiunut ilumoortunut suliassiissutigineqarpa, qanorlu ersersissinnaavarput suliassaq tamanna pingaartillutigu? (Takuuk “ Aalajangernera nuannaarutigalugulu nalerisimaarutigaara”). (b) Aningaasarsiorniarlutit sulisarninnut tunngatillugu suna aalajangiusimaviuk?

²² Nalunnginnatsigu naggatissap naggataatungaani  inuulluta kristumiunut ilumoortunut suliassiissutigineqartoq pingaarnerpaaq — oqaluussineq ajoqersuganngortitsiortornerlu — pingaarnerpaatipparput. (Matt 24:14; 28:19, 20) Jiisusi maligassiuiserput assigalugu suliamut tamatumunnga inuunermik annaassiniaqataanermut ulapputeqarumavugut. Qanoq ersersissinnaagatsigu suliaq tamanna pingaartillutigu? Guutip innuttaasa amerlanersaat uummatikkut iluunngarlutik oqaluussisartutut kiffartorput. Allat atukkaminnik allannguisimapput pioneritut ajoqersuiartortitatulluunniit kiffartorumallutik. Angajoqqaarpassuit anersaakkut anguniagaqarnerup pingaaruteqassusia paasilluaramikku qitornatik piffissaq tamaat kiffartortunngornissaannut kajumissaarsimavaat. Oqaluussisartut aallussilluartut oqaluussinermi suleqataanertik nuannaarutigaat? Ilumut, nuannaarutigingaarpaat! Jehovamut uummatikkut iluunngarluni kiffartorneq nuannaarnermik, nalerisimaarnermik pilluaqquneqangaarnermillu kinguneqartuaannarpoq. — Ussatit 10:22, 1900, atuaruk. *

²³ Ilarpassuavut ilaquttatik pilersorniarlugit ullut tamaasa nalunaaquttap-akunnerpassui sulisariaqartarput. Eqqaamajuk sulisarnitta nuannaarutiginissaa Jehovap kissaatigigaa. Isiginnittaaserput pissusilersornerpullu Jehovap isiginnittaasianut najoqqutassiaanullu naapertuuttunngortikkutsigit sulisarnerput nalerisimaarutigisinnaavarput. Suliassattali pingaarnerpaap — Guutip naalagaaffianik nutaarsiassamik nuannersumik oqaluussinerup — aningaasarsiorniarluta sulisarnitsinnit akornusersorneqannginnissaa aalajangiusimatigu. Oqaluussinermik salliutitsinitsigut ersersittarparput Jehova asallutigu, taamaaliornitsigullu Jehovap asanninneraniittuinnarsinnaavugut.