Katittut siulliit Jehovap a Guutip katititarai. Biibilimi allassimavoq Guutip arnaq siulleq pinngortereeramiuk ‘Adamimukaakkaa’. Adami pilluaammernermik ima oqarpoq: “Tassa saaneq saanerma ilaa uinillu uinimma ilaa.” (1 Mosesi 2:22, 23) Jehovap aappariit pilluarnissaat suli kissaatigaa. (Quppersakkami matumani oqaaseq “aappariit” atorneqaraangat angut arnarlu katissimasut pineqartarput).

Katerlaatut ajornartorsiuteqalernissarsi takorlooruminaatsissinnaavarsi. Aappariilli qanorluunniit asaqatigiitsigigaluarunik unamminiagassaqartarput. (1 Korinthimiut 7:28) Quppersakkami matumani siunnersuutit najoqqutassiallu Biibilimeersut maleruarnerisigut aappariittut ilaqutariittullu pillualersinnaavusi. — Tussiaat 19:9-12.

BIIBILIMI QANOQ ALLASSIMASOQARTOQ: Uiusoq ilaqutariinnut ittuuvoq. — Efesosimiut 5:23.

Uiuguit Jehovap piumasaraa nuliat asannittumik isumagilluartassagit. (1 Petrusi 3:7) Taanna ilinnut tulluartunngortillugu pinngortippaa kissaatigalugulu ataqqinnittumik asannittumillu pissuseqarfigissagit. (1 Mosesi 2:18) Nuliat ima asatigisariaqarpat taassuma soqutigisai illit soqutigisannit salliutikkumanerusarlugit. — Efesosimiut 5:25-29.

Nuliaaguit Jehovap piumasaraa uiit ataqqingaassagit akisussaaffimminillu eqqortitsinissaanik tapersersorlugu. (1 Korinthimiut 11:3; Efesosimiut 5:33) Aalajangiineranik tapersersortaruk kajumillutillu suleqatigalugu. (Kolossemiut 3:18) Taamaalioruit uivit Jehovallu isaanni pinnersuussaatit. — 1 Petrusi 3:1-6.

SIUNNERSUUTIT:

• Aappat aperiuk qanoq uiulluarnerulersinnaanersutit imaluunniit qanoq nuliaalluarnerulersinnaanersutit. Tusarnaarluaqqissaaruk pitsanngorsarniartuarlutillu

• Erinitsajuissuseqarit. Immissinnut qanoq pilluartissinnaanerlusi ilinniarnissaanut piffissaqartariaqarpusi

BIIBILIMI QANOQ ALLASSIMASOQARTOQ: Aappannut suna pitsaanerusoq eqqarsaatigisaruk. (Filippimiut 2:3, 4) Aappat naleqangaartutut pissusilersorfigisaruk eqqaamallugu Jehovap piumasarigaa kiffani ‘tamanut inussiarnersuussasut’. (2 Timotheusi 2:24) “Eqqarsariaqqaarnani oqaaserisat panatut kapisisarput, ilisimasulli oqaa katsorsaataasarpoq.” Taamaattumik oqaaseqarnialeraangavit eqqarsaqqaartarit. (Ussatit 12:18) Inussiarnersumik asannittumillu oqaluttarnissannut Jehovap anersaava iluaqutigisinnaavat. — Galatiamiut 5:22, 23; Kolossemiut 4:6.

SIUNNERSUUTIT:

• Pingaarutilimmik aappavit oqaloqatiginnginnerani Jehova qinnuigiuk eqqissisimanissannik isummereersimanallu tusarnaarluarnissannik ikioqqullutit

• Oqaasissatit aamma qanoq oqaatigissanerlugit eqqarsaatigilluakkit

BIIBILIMI QANOQ ALLASSIMASOQARTOQ: Aappallu katikkussi ‘uininngussaasi ataaseq’. (Matthæusi 19:5) Sulili marluuvusi immikkut kinaassusillit assigiinngitsunillu isumallit. Taamaattumik eqqarsaatikkut misigissutsikkullu ataasiussuseqarnissarsi ilinniartariaqarparsi. (Filippimiut 2:2) Aalajangigassaqartillusi isumaqatigiinnissarsi pingaartuuvoq. Biibilimi allassimavoq: “Isumasioqatigeereerluni pilersaarusiat iluatsittarput.” (Ussatit 20:18) Pingaarutilinnik aalajangigassaqartillusi najoqqutassianik Biibilimeersunik siulersortittaritsi. — Ussatit 8:32, 33.

SIUNNERSUUTIT:

• Ulluinnarsiutit kisiisa aappannut oqaloqatigiissutiginagit aamma misigissutsitit annittakkit

• Annertuunik iliuuseqannginninni aappat isumaqatiginiaqqaartaruk