„Nunap avannaani nunaqarfinnguami alliartorsimavunga,“ Dauda Sierra Leonemeersoq taama oqaluttuarpoq. „Ilaanni, nukappiaraagallarama, ilaquttakka ilaqutariillu allat narsaat pillugu isumaqatigiinngissuteqalerput. Tamarmik narsaat aalajangersimasoq namminneq piginerarpaat. Isumaqatigiinngissut aalajangiiffiginiarlugu angakkoq qaaqquaat. Taassuma angut alla tarrarsuummik tunivaa annoraaminermillu qaqortumik ulillugu. Erniinnaq angut ulinneqartoq sajulerpoq kiagulerlunilu. Tarrarsuummut isigaluni oqarpoq: ‘Angut utoqqaq saqqummersoq takusinnaavara! Qaqortumik atisaqarpoq. Angisuujullunilu utoqqaavoq, qeeqarluni peqingalaarlunilu pisulluni.’

Tassaana aataa takugaa! Taava eqqissiveeruppoq suaarlunilu: ‘Upperinngikkussinga nammineq takusinnaavarsi!’ Soorunami tamatta taamaaliornissarput saperparput! Angakkup imermik pilutanillu akuukkamik imalimmik angakkuakkamik angut serpartarlugu eqqissisarpaa.

Angut tarrarsuutilik aqqutigalugu ‘aataa’ oqarsimavoq narsaat ilaquttatta pigigaat. Aanaga oqarfigaa isumakuluuteqarani narsaammi suleqqullugu. Ilaqutariit allat aalajangerneq tamanna akueriinnarpaat. Isumaqatigiinngissullu aaqqinneqarpoq.“

 Misigisimasat taama ittut Afrikap kitaani nalinginnaapput. Tamaani, soorlu nunani allani aamma taamaattoq, inuit millionilippassuit upperaat inuit toqusut anersaat silarsuaannut ingerlaqqittartut, tassanngalu nunami inuusut isigisinnaasarlugit sunnersinnaasarlugillu. Tamannali ilumoorpa? Toqusut ilumut uumappat? Taamaanngippat, toqusimasunut anersaajusuusaartut kikkuuppat? Apeqqutit taakkua akissutaat ilisimassallugit pingaaruteqarluinnarpoq. Tassa inuuneq toqulu pineqarput.