Anersaat piviupput! Anersaat silarsuaanni takussaanngitsumi ajunngitsunik ajortunillu anersaaqarpoq. Tamakku tassaappat inuit nunami inuusimallutillu toqusimasut?

Naamik. Inuppasuit upperigaluarpaat inuk toqugaangat inuunera anersaat silarsuaannut ingerlaqqittartoq, kisianni taamaanngilaq. Qanoq ililluta tamanna nalunngilarput? Biibilimi taama allassimasoqarmat. Biibili tassaavoq atuagaq ilumoortumik imalik Guutimit ilumoortutuamit, Jehovamik atilimmit, pisoq. Jehovap inuit pinngortissimavai; nalunngilaa toqugaangata qanoq pisoqartartoq. — Tussiaat 83:19; 2 Timûtiuse 3:16.

Biibilimi allassimavoq Guuti Adamimik ‘inuliortoq issumit’. (1 Moses 2:7) Guutip taanna paratiisimi, Edenip naatsiiviani, inississimavaa. Adam Jehovap inatsisaa naalassimagaluaruniuk toqusimanavianngikkaluarpoq; ullumikkut suli nunarsuatsinni inuussagaluarpoq. Piaaralunili Guutip inatsisaa unioqqutimmagu, Guutip ima oqarfigaa: ‘Issumut utissaatit, tassannga pigavit. Issumimmi pivutit, issunngussaatillu.’ — 1 Moses 3:19.

Tamanna qanoq paasisariaqarpa? Adam Jehovamit issumit pinngortinneqanngikkallarami sumiippa? Piusimanngilaq. Qilammi anersaatut inunngorsimanngitsutut inuusimanngilaq. Piusimanngivippoq. Taamaattumik Jehova oqarmat Adam ‘issumut utissasoq’ isumaqarpoq Adam toqussasoq. Anersaat silarsuaannut ingerlaqqissimanngilaq. Adam toqugami inuujunnaarluni  piujunnaarpoq. Toqu tassa inuuneqanngissuseq imaluunniit piunngissuseq.

Toqusimasummi allat? Taakkuttaaq piujunnaarsimappat? Biibili ima akissutissaqarpoq:

• „Tamarmik [inuit nersutillu] assigiimmik ornigassaqarput, issumit pinngoramik issunngorumaarput.“ — Nalunaajaasup oqaasii 3:20.

• „Toqungasulli sunnguamilluunniit ilisimasaqanngillat.“ — Nalunaajaasup oqaasii 9:5.

• „Asanninnerigaluat uumissuinerigaluallu sinnganerigaluallu qangarsuarli piujunnaareersimapput.“ — Nalunaajaasup oqaasii 9:6.

• ‘Toqusut inaanni ornikkanni suliassaqanngilaq, pilersaarusiorfissaqaraniluunniit, ilisimasassanillu ilisimassummilluunniit pissarsiassaqarani.’ — Nalunaajaasup oqaasii 9:10.

• „Anerningerunik kingumut issunngussapput, pilersaarutaallu  ulloq taanna maangaannassapput.“ — Tussiaat 146:4.

Allassimaffiit taakku akueriuminaatsippigit? Taamaappat manna eqqarsaatigiuk: Ilaqutariippassuarni ittuusoq aningaasarsiortarpoq inoqutini pilersorniarlugit. Taanna toquppat ilaqutai amerlanertigut ajornartorsiuteqalissapput. Ilaannikkullu nulia meeraalu allaat nerisassarsiutissaqassanngillat. Immaqa angutip akeraasa naakkittaatsuliorfigissavaat. Imminut apereriarit: ‘Angut taanna anersaat silarsuaanni uumaguni, sooq ilaquttani pilersortuaannassanngilai? Sooq ilaquttani inunnut ajortunut illersorniassanngilai?’ Tassa allassimaffiit ilumoortuummata. Angut taanna inuujunnaarsimavoq, iliuuseqarsinnaajunnaarlunilu. — Tussiaat 115:17.

Tamanna isumaqarpa toqungasut inuuleqqinngisaannassasut? Naamik. Kingusinnerusukkut makinnissaq eqqartussavarput. Imali isumaqarpoq inuit toqusimasut qanoq-iliornitit nalugaat. Takusinnaangilaatsit, tusaasinnaanatit oqaluffigisinnaanatilluunniit. Ersissutigisariaqanngilatit. Ikiorsinnaanallu ajoqusersinnaanngilaatsit. — Nalunaajaasup oqaasii 9:4; Jesaja 26:14.