Hebræerisut oqaaseq nefesh grækerisullu oqaaseq psyche Biibilini amerlanerni tar­nermik nutser­neqar­tar­put. Hebræerisut oqaaseq ‘pin­ngor­titamik anersaar­tor­tumik’ isumaqar­poq grækerisullu oqaaseq ‘uumas­suseqar­tumik’ isumaqarluni. a Tar­neq tas­saan­ngilaq ilutsin­niit­toq toqup kingorna uumaan­nar­tar­toq, tas­saavorli pin­ngor­titaq tamarmiusoq. Maanna sam­mis­savar­put Biibilimi inuup tar­ninga inuup kinaas­susianut timaanullu tun­ngatin­neqar­tar­toq:

•   Biibili naaper­torlugu Jehovap Guutip inuk siul­leq, Adami, pin­ngor­titaa “tar­nin­ngor­poq uumas­suseqar­toq”. (Korinthimiunut 1. 15:45, Biibili 2000-mi naqitigaq) Adami tas­saalin­ngilaq tarnilik – tas­saaler­poq tar­neq uumassuseqartoq, imaluun­niit inuk.

Tarneq toqusuitsuua?

 Naamik, tar­neq toqusin­naavoq. Biibilimi allas­simaf­finni arlalinni allas­simavoq tar­neq toqusin­naasoq. Aajuku assersuutigineqarsin­naasut:

•   “Ilisimas­savaa ajor­tilim­mik tam­mar­tajaarfianit uter­titsisoq taas­suma tar­ninganik toqumit annatsitsisuum­mat ajor­ter­pas­suar­nillu matoorisuul­luni.” – Jaaku 5:20, Biibili 2000-mi naqitigaq.

•   Itsaq Israalimi ingasat­tumik ajor­tulior­tup ‘tar­naa Israiilik­kun­nit piiagaas­savoq’. (Mosesimik 2. 12:15, 19, tastamantitoĸaĸ 1961-imi naqitigaq) Tassa “toqun­neqas­saaq”. – Mosesimik 2. 31:14.

•   Biibilini nutsik­kani amerlasuuni ‘toqusimasumik’ ‘toqusul­luun­niit timaanik’ nutser­neqarsimasuni hebræerisut allagatoq­qani oqaaseq nefesh, imaluun­niit tar­neq, ator­neqar­poq. Tassa inuk toqugaangat tar­neq toqusar­poq. – Mosesimik 3. 21:11; Mosesimik 4. 6:6.

“Tarneq” ‘inuunermik’ isumaqarsinnaavoq

 Biibilimi aamma tar­neq inuunermik isumaqar­til­lugu ator­neqar­tar­poq. Assersuutigalugu hebræerisut oqaaseq ‘tar­neq’ (nefesh) oqaaserlu ‘inuus­suseq’ assigiim­mik isumaqar­til­lugit ator­neqar­put. (Jobi 33:22, tastamantitoĸaĸ 1961-imi naqitigaq) Tassa inuup tar­naa, imaluun­niit inuunera, navianar­torsiorsin­naal­lunilu toqusin­naavoq. – Mosesimik 2. 4:19; Eqqar­tuus­sisut 9:17; Filip­pimiut 2:30.

 Oqaatsip ‘tar­nerup’ taama ator­neqar­nera allas­simaf­finni ‘tar­nip anineranik’ allas­simasut paasinis­saan­nut iluaqutigaar­put. (Mosesimik 1. 35:18, tastamantitoĸaĸ 1961-imi naqitigaq) Inuup toqunera taama assersuutaasumik oqaatigineqar­tar­poq. Biibilit nutsik­kat ilaanni Mosesimik allak­kat siul­liit 35:18-imi allas­simavoq Rakeli ‘aner­ninger­toq’.

Tarnerup toqusuitsuuneranik upperisaq sumit aallaaveqartoq

 Kristumiuunerar­tut tar­nerup toqusuitsuuneranik upperisaat Biibilimik aal­laaveqar­nani grækerit isumaliutersuutitoqaan­nit aal­laaveqar­poq. Encyclopædia Britannica-mi allas­simavoq: “Biibilimi tar­neq eqqaaneqaraangat anersaar­tor­neq innersuus­sutigineqar­tar­poq, aamma tar­neq anersaajusoq timilu tigus­saasoq immik­koor­tin­neqar­neq ajor­put. Kristumiut timip tar­nillu avis­saar­tar­neran­nik upperisaat itsaq grækerinit aal­laaveqar­poq.”

 Guutip ilin­niar­titsis­sutimi inuit isumaliutersuutaan­nik, soorlu tar­nerup toqusuitsuuneranik upperin­nin­nermik, akulerus­suun­neqar­nerat akuerin­ngilaa. Biibilimi ima mianersoq­quneqar­pugut: “Isumaliutersuutinit tam­mar­titsiniutinillu tigusarineqaq­qunasi mianersoritsi, taak­kumi Kristusip ilin­niar­titsis­sutaanik tun­ngaveqar­natik inuit ileq­qutoqaan­nik, tun­ngaviusumik isigin­nit­taasian­nik, tun­ngaveqarmata.” – Kolos­simiut 2:8.