“Ukiualuit matuma siorna annilaanganermik nappaatiga ima ingasatsigaaq soorlu ilunni inneq qamissin­naanani ikumajuartoq. Imminut toqunnissara eqqarsaatigiler­tarpara. Toqorusun­ngikkaluarpunga. Naalliunnera unitsik­kusuinnaraluarpara.” – Jonathan, 17.

 Inuusuttunik ilinniartunik 14.000-nik apersuinerit ersersippaat inuusuttut tallimaagaangata ataaseq qaammatit aqqaneq-marlunni kingullerni imminut toqunnissamik eqqarsaateqartartoq. a Illit inoorusus­suseerukkuit qanoq iliorsinnaavit?

•   Utaqqigit. Imminut neriorsorit misigis­sutsitit nuanniitsut tunngavigalugit periataapal­lanniarnak. Ajornar­torsiutitit qaanger­neqarsin­naarpasin­ngikkaluartut iliuuseqarfiginis­saannut siunnersuutinik atoriaan­naasunik iluaqutigisin­naasannik nassaas­saqarpoq.

 Immaqa misigaatit labyrintimiillutit ajornar­torsiutitillu aaqqinneqarsin­naanngitsut. Misigis­sutsilli tatiginar­tuaannan­ngillat. Ajornar­torsiutivit qaanger­nissaanut periarfis­saqarpoq. Eqqortumik ikiorser­neqaruit aaqqiis­sutissaq ilimagisannit ajornan­nginnerusinnaavoq.

•  Biibilimi najoqqutassiaq: “Assut sutigut tamatigut tatineqar­tarpugut, imaanngilarli soriarsin­naanngitsugut. Qanoq iliussanerluta nalorniler­tarpugut, imaanngilarli periarfis­saqanngil­luinnartugut.” – Korintimiunut 2. 4:8.

   Siunnersuut: Inoorusuk­kunnaarnermik eqqarsaat akioruminaatsikkukku ikiorneqar­nissannut periarfissanik misissuigit – imaassinnaavoq imminut toqunnissamik eqqarsaateqartunut sianerfis­saqartoq (hotline) nakorsiar­tarfimmiluunniit saaffis­saqartoq. Tamakku ikiuinis­saminnut ilinniarluarsimasunik sulisoqarput, ikiorusungaarpaatsillu.

•   Oqaloqateqarit. Ilinnik asannittunik inoqarpoq ikiuerusuttunik. Tassaasin­naapput ikinngutitit ilaquttatillu. Aatsaalli qanoq misigininnik oqaluttuukkukkit paasisaqarsin­naapput.

 Inuit ilaat isigisaqarluar­nerujumallutik isaruaqar­tariaqartarput. Ikinngutit “isaruarisinnaavat”. Ajornar­torsiutivit ersarissumik takusin­naalernissaanut ikiorsin­naavaatit inoorusus­suseqalerseq­qillutillu.

•  Biibilimi najoqqutassiaq: ‘Ikinngutaasoq erniusimavoq annikil­liornermi ikiortis­saalluni.’ – Ussatit 17:17.

   Siunnersuut: Oqaloqateqar­nialeruit immaqa ima aallartis­sinnaavutit: “Kingullertigut nuanniitsunik eqqarsaateqar­tarpunga. Oqaluttuukkukkit ajorissan­ngiliuk?” Imatulluunniit oqarsin­naavutit: “Ajornar­torsiuteqarpunga nammineerlunga qaangersin­naanngisannik. Ikiorsin­naavinga?”

•   Nakorsamut ikiortis­sarsiorit. Peqqiil­liorneq, soorlu annilaanganermik isumatsas­simangaar­nermillu nappaateqarneq, inoorusuk­kunnaarsitsisinnaavoq. Qujanar­tumilli tamakku iliuuseqarfigineqarsin­naapput.

 Soorlu nuallunneq nererusuk­kunnaarsitsisinnaasoq, taamatuttaaq nikallungarujus­suarneq inoorusuk­kunnaarsitsisinnaavoq. Taakkuli iliuuseqarfigineqarsin­naapput.

•  Biibilimi najoqqutassiaq: “Peqqissut pinnatik napparsimasulli nakorsamik pisariaqar­titsipput.” – Matiusi 9:12.

   Siunnersuut: Naammattumik sinittarit, timersortarit peqqinnar­tunillu nerilluartarit. Timikkut peqqissutsivit inuunermut isiginnit­taatsit sunnersinnaavaa.

•   Guutimut qinugit. Biibilimi allassimavoq Pinngor­titsiserput “uummatitsinnit annerullunilu sunik tamanik ilisimasaqartoq”. (Johannesimit 1. 3:20) Immaqa misilis­sinnaavat ullumi qinunikkut saaffigalugu. Atia, Jehova, atortaruk, uummammiutillu tamaasa saqqummiuttakkit.

 Nanertuutit ilaat ilinnut oqimaap­pallaarsin­naapput. Pinngor­titsisivit, Jehovap, ikiorusuppaatit.

•  Biibilimi najoqqutassiaq: ‘Qinunikkut kimigiiser­nikkullu Guutimut ikioqqusaritsi. Taava Guutip eqqissinerata inuit paasisin­naasaannit annerungaartup uummatersi isumarsilu paarissavai.’ – Filippimiut 4:6, 7.

   Siunnersuut: Ajornar­torsiutitit pillugit Jehova oqaluttuutereerukku minnerpaamik ataatsimik nuannersumik ullumikkut qujassutigerusutannik eqqarsaateqarit. (Kolossimiut 3:15) Qujamasunneq inuunermut isumalluartumik isiginnit­taaseqaler­nissannut iluaqutigisinnaavat.

 Inoorusus­suseerukkuit ikiortis­sarsior­tariaqarputit. Jonathan, allaaserisap aallartinnerani eqqaaneqartoq, taamaaliorsimavoq. Ima oqaluttuarpoq: “Angajoqqaakka oqaloqatigisaqat­taarpakka nakorsanullu ikiortis­sarsiorlunga. Maannakkullu pitsanngor­neroqaanga. Naak inuuneq oqitsuin­naajuaan­nanngik­kaluartoq imminut toqunnissamik eqqarsaateqar­tarunnaarpunga.”