“Guuti ilisarisimalerusuk­kuk­ku Jehovap Nalunaajaasui atuaq­qis­saaqatigiuak­kit.” Taama oqarfigitin­nera tupaal­laatigaara. Tamatuma nalaani Jehovap Nalunaajaasuisa atuaq­qis­saaqatigisaleq­qam­mer­paan­nga. Tupaal­lan­nerali paasinarsisik­kumal­lugu inuunera oqalut­tuarilaarlara.

 Il­loqarfim­mi Quezaltepequemi El Salvadorimiit­tumi inun­ngor­punga. Qatan­ngutigiit 15-iuvugut, uangalu akul­lequtaavunga. Angajoq­qaama un­neq­qaris­sooq­qul­lunga inatsisinul­lu naalat­tooq­qul­lunga perorsar­niarsaraan­nga. Aam­ma Leonardop Jehovap Nalunaajaasuisalu al­lat Biibili pil­lugu ilaan­nik­kut oqaluus­sif­figisar­paatigut. Perorsar­neqar­nerali soqutiginagu aalajangiinerlut­tuar­punga. 14-inik ukioqarlunga atuaqatik­ka peqatigalugit aalakoor­nar­tutor­talerlungalu ikiaroor­taler­punga. Atuaqatik­ka tul­leriiaarlutik atuarun­naar­talermata inupiluit peqatigisalerumal­lugit aam­ma uanga atuarun­naar­punga. Tarfiin­nar­tuuler­pugut, atuipilun­ner­pul­lu akis­saqar­tik­kumal­lugu inuit pin­ngitsaalil­lugit aningaasanik akiliisin­ngik­kutsigit til­lif­figisaler­pavut.

 Inupiluit ilaqut­tat­tut isigiler­pak­ka. Isumaqar­pungalu taak­ku ilumoorfigin­nif­figisus­saal­lugit. As­sersuutigalugu ilaan­ni inupiloqatima ikiaroorluni sanilera saas­sup­paa. Sanilima ikin­ngutiga susin­naajun­naarsip­paa politiinul­lu sianerluni. Ikin­ngutiga iperar­tin­niarsaralugu kamangaarlunga sanilima biilii anaalerum­mik anaaliler­pak­ka. Biilit igalaavi ilan­ngul­lugit aseror­terik­ka sanilima aseror­teriun­naaq­qul­lunga kimigiiserfigigaluar­paanga.

 18-inik ukioqarlunga inupiloqatik­kalu politiinut akiuup­pugut. Qaar­tar­toq nam­mineq sanaaq igeriutilerlugulu suli iperan­ngik­kiga qaar­poq – qanor­piaq pisoqar­nersoq naluara. Eq­qaamaan­nar­para as­saga qaar­toorfigitit­toq takugak­ku ilisimajun­naarlunga. Nap­parsim­mavim­mi ilisim­marama paasivara as­saga taler­perleq an­naasimal­lugu taler­perlermil­lu tusaasaarus­simal­lunga taler­perlik­kul­lu isigisaarutingajavis­simal­lunga.

 Ajoqusingaaraluarlunga nap­parsim­mavim­miik­kun­naarama inupiloqatik­ka ingerlaan­naq or­nip­pak­ka. Tamatuma kingunin­ngua politiit tigusaralunga par­naarup­paan­nga. Par­naarus­sivim­mi inupilun­nut suli qanin­neruler­punga. Ul­laak­korsiuutigaluta marihuanamik pujor­tar­tar­pugut in­nar­nis­sat­talu tungaanut ul­loq naal­lugu peqatigiit­tarluta.

 Par­naarus­saaq­qatil­lunga Leonardop pulaar­paanga. Oqaloqatigiin­nitsin­ni talin­ni taler­perlermi kakior­tin­nik­ka toor­nerit pingasut tik­kuariarlugit ima aperaaq: “Nalun­ngiliuk qanoq isumaqar­nersut?” Ima akivara: “Soorunami, tas­sa atoqatigiin­neq, ikiaroor­nar­tut aam­ma rock’n’roll.” Leonardo ima akerliliivoq: “Uanga ima isumaqar­tin­neruak­ka: Nap­parsim­mavik, par­naarus­sivik toqulu. Nap­parsim­mavim­meereer­putit maan­nalu par­naarus­saaq­qavutit. Suna tul­liut­toq nalun­ngilat.”

 Leonardop oqaasii an­nilaam­mis­sutigaak­ka. Ilumoor­pum­mi. Toqunis­sara qanil­lat­torusaar­para. Biibilimik atuaq­qis­saaqatiginiarlunga neqeroormat akuersivunga. Biibilimi ilik­kak­kak­ka kil­litsis­sutigalugit inuunera al­lan­ngor­tip­para. As­sersuutigalugu Biibilimi al­las­simavoq sun­niinerlut­tunik ilagisar­tagaqar­neq ajoqutaasoq. (1 Korinthimiut 15:33) Tas­sa siul­ler­tut al­lanik ikin­ngutis­sarsior­tariaqar­punga. Taamaat­tumik inupiluit ataatsimeeqatigisarun­naarlugit Jehovap Nalunaajaasuisa par­naarus­sivim­mi ataatsimiit­tar­nerinut najuut­taler­punga. Nalunaajaasut ataatsimiin­nerini taak­kunani par­naarus­saq Andrés, par­naarus­sivim­mi Jehovap Nalunaajaasuisa ilaat­tut kuisis­simasoq, ilisarisimaler­para. Ul­laak­korsioqatigiit­tarsin­naasugut oqar­poq. Tamatuma kingor­na ul­laak­kut marihuanamik pujor­tar­tarun­naarlunga Andrésilu ul­laat tamaasa al­las­simaf­fim­mik Biibilimeersumik eq­qar­tueqatigiit­taler­pugut.

 Al­lan­nguinera inupiloqatim­ma ingerlaan­naq malugigamik­ku taak­kua siut­tuisa ilaata oqaloqatigiumam­manga siooraam­meqaanga. Paasiguniuk suna siuner­tarineriga sus­saneraanga naluara, inupiluim­mi qiman­nis­saat ajor­nakusooqaaq. Ima oqar­poq: “Malugaar­put uagut ataatsimeeqatigis­saarluta Jehovap Nalunaajaasui ataatsimeeqatigisaleritit. Suniar­pit?” Oqalut­tuup­para Biibilimik atuaq­qis­saar­tar­nera ingerlatiin­nar­niarlugu inuuneralu al­lan­ngor­tin­niarlugu. Tupaal­laatigisan­nik oqarfigaanga Nalunaajaasun­ngor­nis­sara ilumut kis­saatigalugu takutit­tuaruk­ku ataq­qiumal­lunga. Taava ima oqar­poq: “Guuti ilisarisimalerusuk­kuk­ku Jehovap Nalunaajaasui atuaq­qis­saaqatigiuak­kit. Ajor­tulior­tarun­naas­sasutit naatsorsuutigaar­put. Pil­luarit. Aq­qutik­kut eq­qor­tuk­koor­putit. Nalunaajaasut ikiorluarsin­naavaatsit. USA-miik­kal­larama atuaq­qis­saaqatigisar­paan­nga, ilaqut­tamalu ilaat Nalunaajaasuup­put. Siooraqinak. Atuaq­qis­saar­nerit ingerlatiin­naruk.” Suli siooragaluarlunga nuan­naajal­laqaanga. Uum­matin­ni Jehova Guuti qutsavigaara. Tim­mis­satut tim­miaaraasivim­mit tingitin­neqar­tutut misigivunga Jiisusil­lu oqaasii uku paasil­lugit: ‘Sal­lusuis­sut ilisimalis­savarsi, sal­lusuis­sutsil­lu inus­siaajun­naarsis­savaasi.’ – Johan­nesi 8:32.

 Ikin­ngutitoq­qama ilaasa ikiaroor­nar­tunik neqeroorfiginik­kut misilit­tar­paan­nga. Nas­suerutigisariaqar­paralu ilaan­nik­kut nak­kaan­nar­tarlunga. Pif­fis­sal­li ingerlanerani ilungersorlunga qinujuareerlunga kiisami ileq­qupalaak­ka taamaatip­pak­ka. – Tus­siaat 51:12, 13.

 Par­naarus­saaq­qajun­naarama inup­pas­suit isumaqaraluar­put inooriaasitoqara uterfigis­sagiga. Uterfiginaguli par­naarus­siviliar­tar­punga tamatumuuna par­naarus­sat al­lat Biibili pil­lugu ilin­niar­tin­niarlugit. Kiisami ikin­ngutitoq­qama up­periler­paat al­lan­ngorsimasunga. Ajoraluar­tumil­li sior­natigut akerarisarsimasama up­perin­ngilaat.

 Ilaan­ni oqaluus­siar­tor­tunga inupilun­nit sior­natigut akerarisimasama ilaan­nit uan­nit toqutsiniar­tunit sak­kulisar­tunit oqaluus­seqatigalu unguneqar­pugut. Oqaluus­seqatima inus­siar­nerluni sapiil­lunilu nas­suiaap­pai inupiluit peqatigisarun­naarsimagik­ka. Uanga sapin­ngisan­nik eq­qis­sisimaniarsarivunga. Unatariarlunga eq­qamin­nul­lu or­niguteq­qeq­qunanga oqarfigeriarlunga sak­kumin­nik umerun­naar­paan­nga, qimagus­sin­naaler­pugul­lu. Biibili ilumut inuunin­nik al­lan­nguisitsisimavoq. Sior­natigut akiniaaniarsimas­sagaluar­punga. Maan­nali Thes­salonikamiunut al­lak­kat siuliit 5:15-imi al­las­simasoq una maleruar­para: “Ajor­toq ajor­toqataanik akiler­niaqinasiuk, noq­qaas­sutiginiarsiul­li akor­nas­sin­ni tamanul­lu ajun­ngitsulior­nis­saq.”

 Nalunaajaasun­ngoramali sapin­ngisan­nik eq­qor­tulior­niar­tuar­punga. Ilaan­nik­kul­li saper­nar­tar­poq. Jehoval­li Guutip ikiuineratigut, siun­nersuutit Biibilimeersut iluaqutiginerisigut ikin­ngutitaamalu tapersersuinerisigut iluatsip­punga. Inooriaasitoqara uterfigeq­qin­ngisaan­nas­savara. – 2 Petrusi 2:22.

 Sior­natigut nakuuser­tar­tuuvunga kamas­saqangaar­toq. Isumaqarluin­nar­pungalu ileq­qupalaak­ka taamaatis­siman­ngik­kuk­kit maan­na toqoreersimas­sagaluar­tunga. Paasisak­ka Biibilimeersut al­lan­nguis­sutigaak­ka. Ileq­qupalaak­ka taamaatip­pak­ka. Sior­natigut akerarisimasama eq­qis­seqatiginis­saat ilik­kar­para. (Lukasi 6:27) Maan­na ikin­nguteqar­punga pis­suseris­suunis­san­nik ikiuisunik. (Us­satit 13:20) Guuti ajor­tuliarisimasar­pas­suan­nik isumak­keerfigin­nik­kumasoq kif­far­torfigalugu pil­luarlunga siuner­taqar­tumil­lu inuuvunga. – Esaja 1:18.

 2006-imi kristumiunut oqaluus­sisar­tunut aap­paqan­ngitsunut im­mik­kut ilin­niarfim­mi ilin­niar­punga. Ukiualuit qaangiut­tut aap­par­taar­punga, maan­nak­kul­lu nuliaralu asanar­toq panip­put perorsar­par­put. Maan­na pif­fis­sama an­ner­tunersaani najoq­qutas­siat Biibilimeersut al­lanut ilin­niar­titsis­sutigisar­pak­ka. Aam­ma ilagiitsin­ni utoq­qaaner­taavunga, inuusut­tul­lu uanga kuk­kus­sutigisimasan­nik kuk­kus­suteqaq­qunagit ikior­niarsarivak­ka. Maan­na toqunis­sara qanil­lat­torusaarun­naarlugu Biibilimi Guutip neriorsuutigisimasaa inuuneq naas­saan­ngitsoq angujumal­lugu ilungersor­punga.