“Upperigukku Biibili tas­saasoq Guutip inun­nut oqaasia taava upperaat attaveqaqatigisaraatigut. … Upperisat inuunin­nut sutigut tamatigut sun­niuteqar­pat taava oqaatsit [Biibilimi] ator­neqar­tut ulluin­narsiutaasariaqar­put.” Taama Biibilimik ilisimatooq Alan S. Duthie atuak­kiamini Bible Translations and How to Choose Between Them-imi allap­poq.

Guutip oqaasianik pingaar­titsingaar­tut tamanna isumaqatigil­luin­nar­paat. Upperaat “Allak­kat Iller­nar­tut tamarmik Guutimit isumas­sarsiarititaal­lutillu ilin­niar­titsinermut, oqaaq­qis­saarinermut, naq­qiinermut naaper­tuil­luar­tumillu perorsaatis­siinermut” iluaqutaasut. (Timuutiusimut 2. 3:16) Biibili atuagaan­naan­ngilaq itsar­nisaq. ‘Uumal­lunilu pis­saaneqarami’ ulluin­narni inuunermi ajor­nar­torsiutinut aaq­qiis­sutis­saqar­poq. (Hebræerit 4:12) Atuagarli iller­nar­toq taanna inuin­nar­nit paasineqarlunilu maleruar­neqas­saguni oqaatsit ulluin­narsiutaasut atorlugit nutser­neqar­tariaqar­poq.

Taamaat­tumik Guutip oqaasianik pingaar­titsingaar­tut testamentitaap Biibili – Nunarsuup nutaanngornissaanik nutsikkap kalaal­lisut saq­qum­mer­nera nuan­naarutigingaar­paat. Saq­qum­mer­nera oktobarip 30-ianni 2021-mi Jehovap Nalunaajaasuinit nalunaarutigineqar­poq. Nutsigaq paasiuminarlunilu eqqoq­qis­saarmat Guutip tusarlius­saa paasiuminar­poq. Immaqali eqqarsaatigivat kik­kut nutsik­kamut immik­kuul­laris­sumut tamatumun­nga akisus­saanersut.

New World Translation of the Christian Greek Scriptures tulut­tut 1950-mi saq­qum­mersin­neqaq­qaar­poq. Taamani Watch Tower Bible and Tract Society-mit – Biibilinik naqiterisitsisarfim­mit nunani tamalaani Biibililersaarutinik ukior­pas­suarni saq­qum­mersitsisarsimasumit – saq­qum­mersin­neqar­poq. The Watchtower septembarip 15-iat 1950-imoor­tumi allas­simavoq: “Angutit nutserinermut ataatsimiititaliamut ilaasor­taasut oqar­put … kinaas­suser­tik iser­torusul­lugu, aamma erseq­qis­sar­paat kis­saatiginagu atitik inuunerminni toqunermil­luun­niit kingorna saq­qum­miun­neqas­sasut. Nutsik­kami siuner­tarineqar­poq Guutip ilumoor­tup uumas­suseqar­tullu atiata qutsis­sisin­neqar­nis­saa.”

Biibili tamarmi New World Translation of the Holy Scriptures atuak­katut ataatsitut 1961-imi saq­qum­mersin­neqar­poq. Nutserisut atii ulloq manna tikil­lugu iser­tuun­neqaraluar­tut eqqor­tumik pis­sutiginiagaqar­nerat tun­niusimal­luin­nar­nerallu qularutis­saan­ngilaq. Nutsik­kap 2013-imi saq­qum­mersin­neqar­tup siulequtaani allas­simavoq: “Biibilimi tusarlius­sap pingaaruteqar­nera nalun­ngin­natsigu nutar­terinitsinni Biibilip imarisaa ataq­qil­luin­nar­par­put. Tusarlius­sap eqqoq­qis­saar­tumik ingerlateq­qin­nis­saanut anner­tuumik akisus­saaf­feqar­ner­put eqqumaf­figaar­put. … Nutserinitsinni allas­simaq­qaarfin­nut aalajaan­nis­sar­put anguniagariin­nar­nagu aamma paasiuminar­tumik atuaruminar­tumillu nutserinis­sar­put anguniagaraar­put.”

Ulloq manna tikil­lugu Nunarsuup nutaanngornissaanik nutsigaq tamarmi ilaan­naaluun­niit oqaatsini 211-ni 243 mil­lionin­ngorlugu naqiter­neqar­poq. Tamatumin­nga atuar­tar­tor­pas­suit sunik paasisaqar­pat?

Jiisusip ilin­niar­titani ima qinusar­nis­saan­nik ilin­niar­tip­pai: “Ataatar­put qilam­miit­tutit, atit iller­nar­tin­neqarli.” (Matiusi 6:9) Biibilimi Guutip Jehovamik a ateqar­nera ersersin­neqar­poq, aterlu taanna 7.000-t mis­siliorlugit allas­simavoq. (Mosesimik 2. 3:15; Tussiaat 83:19) Jiisusip apustiliisa toqunerisa kingorna kristumiut ilagiivisa juutinit sun­ner­neqaramik kuk­kul­lutik Guutip atia ator­naveersaar­taler­paat. (Apustilit Suliaat 20:29, 30; Timuutiusimut 1. 4:1) Grækerisut Allak­kanik Iller­nar­tunik b allaq­qiisar­tut Guutip atia, Jehova, oqaatsinik Guutimik Naalak­kamillu isumalin­nik taarser­taler­paat.

Jehovap Nalunaajaasuisa Biibilimik nutserinermut ataatsimiititaliaata ateq Jehova Grækerisut Allak­kanut Iller­nar­tunut 237-riarlugu ilan­ngutiteq­qip­paat. Taamaalior­put isumar­tik tun­ngaviginagu misis­sueq­qis­saar­ner­tilli tun­ngavigalugu. Assersuutigalugu Luk­karsi 4:18-imi oqaatsit Esaja 61:1-imit issuagaap­put. Hebræerisut allagatoq­qani Esajap allagaani versimi tamatumani ateq Jehova allas­simavoq. Taamaat­tumik Nunarsuup nutaanngornissaanik nutsikkami Luk­karsi 4:18-imi allas­simavoq: “Jehovap piitsunut nutaarsias­sanik nuan­nersunik oqaluus­sisus­satut tanitarim­manga anersaavata qulangersimavaanga.”

Atuar­tar­tut taamaalil­lutik Jehova Guuti ernituanit, Jiisusimit Kristusimit, immik­koor­tis­sin­naaler­paat. Assersuutigalugu nutsigar­pas­suarni Mat­thæusi 22:44 ima allan­neqar­poq: “Naalagaq naalak­kan­nut oqar­poq.” (Biibili 2000-mi naqitigaq) Kinali kimut oqar­pa? Versimi tas­sani Tus­siaat 110:1-ip ilaa issuar­neqar­poq, hebræerisullu allagatoq­qani taak­kunani Guutip atia allas­simavoq. Taamaat­tumik Nunarsuup nutaanngornissaanik nutsikkami Matiusi 22:44 ima allan­neqar­poq: “Jehova Naalak­kan­nut oqar­poq.” Jehovap Guutip erneranit immik­koor­tin­niar­nera pisariusariaqan­ngilaq. (Makkorsi 13:32; Johannesi 8:17, 18; 14:28) Annaan­neqarumal­luta taakku marluk immik­koor­tis­sin­naasariaqar­pagut. Apustilit Suliaat 2:21-mi allas­simavoq: ‘Kinaluun­niit Jehovap aqqanik tatigin­nit­toq annaan­neqas­saaq.’

Grækerisut allagatoq­qat sapin­ngisamik eqqoq­qis­saar­tumik, paasiuminar­tumik ulluin­nar­nilu oqalut­tar­nitsitut nutser­neqar­put. Nunarsuup nutaanngornissaanik nutsikkami kalaal­lisut oqaatsit isumaat apeq­qutaatil­lugit nutser­neqarsimap­put. Assersuutitut eqqaaneqarsin­naap­put naalagaaf­fim­mik allan­neqar­tarsimasoq kun­ngeqarfim­mik allan­neqar­talermat, ajoqersugaq ilin­niar­titamik, kuisin­neq imermut morsutsitaanermik, naalaf­fik guutisiorfim­mik aamma sal­lusuis­sut ilumoor­tumik. Grækerisut oqaaseq kosmos silarsuarmik nutser­neqar­tarsimasoq allas­simaf­fiit ataqatigiin­nerisa isumaat apeq­qutaatil­lugu inun­nik, inun­nik ajor­tunik, nunarsuarmik allanil­luun­niit nutser­neqar­tar­poq. Atit ilaat, assersuutigalugu Matiusi Timuutiusilu, atuaruminarsarlugit allan­neqar­put. Aamma oqaatsit naanerat (qas­seersiutaasut kinaas­susersiutillu pingajuan­nik pigin­nit­torsiutil­lit) -vut ator­nagu -gut ator­neqar­tar­poq. Atuaruminarsaaneq paasiuminarsaanerlu aalajangiiner­nut taak­kunun­nga tun­ngaviup­put.

Atuar­tar­tut qularin­ngis­sin­naavaat Biibili – Nunarsuup nutaanngornissaanik nutsigaq tulut­tut saq­qum­mersitatulli eqqoq­qis­saarlunilu paasiuminar­tigisoq?

Ilaana. Nutserineq Jehovap Nalunaajaasuisa Siulersuisoqatigiivinit nak­kutigineqaq­qis­saarmat tamanna qularin­ngis­sin­naavaat. Aalajanger­neqar­poq nutserisoqatigiit Biibilimik nutseris­sasut. (Ussatit 11:14) Taamaat­tumik nunani tamalaani nutserisoqatigiit suleqatigiit­tar­put. Nutserisoqatigiit pisariaqar­titaat matus­suser­niarlugit, apeq­qutaat akisar­niarlugit aamma oqaatsit assigiin­ngitsut atorlugit Nunarsuup nutaanngornissaanik nutsikkat ataqatigiis­sar­niarlugit Jehovap Nalunaajaasuisa qul­lersaqarfianni nutserisunik ikiuisar­toqarfik (Translation Services) pilersin­neqar­poq. Tamatuma saniatigut Biibilimik nutserisut ikior­niarlugit qarasaasiak­kut programmi Watchtower Translation System ineriar­tor­tin­neqar­poq. Taamatut­taaq program­mimi nutserinermi ator­neqar­tar­tumi hebræerisut grækerisullu oqaatsit qanoq tulut­tuun­ngor­tin­neqarsimanersut allas­simasar­put, taman­nalu assigiim­mik isumalim­mik nutserinis­samut iluaqutaavoq. Taamaak­kaluar­torli soorunami nutserineq imaan­naan­ngitsuuvoq. Nunarsuup nutaanngornissaanik nutsikkap tulut­tut saq­qum­mersitatulli eqqoq­qis­saarlunilu paasiuminar­tiginis­saanik anguniak­kap eqqor­tin­nis­saanut qarasaasiak­kut iluaqutis­sat Biibilimik nutserisunit iluaqutigineqangaar­put.

Kajumis­saar­patsigit Biibili – Nunarsuup nutaanngornissaanik nutsigaq misis­soq­qis­saaq­qul­lugu. Inter­netik­kut app-ik­kul­luun­niit JW Library-kkut atuarsin­naavat, aamma Jehovap Nalunaajaasuisa ilagiivisa attaviginerisigut naqitan­ngorlugu pis­sarsiarisin­naavat. Aamma iluaqutis­sat arlal­lit nuan­naarutigisin­naavatit. Assersuutigalugu imarisaasa eqik­kar­nerat iluaqutigalugu Biibilimi atuak­kani suut sam­mineqar­nersut takupal­las­sin­naal­lugulu versit nas­saaripal­las­sin­naavatit. Pingaar­ner­tulli, Guutip oqaasiata ulluin­narni oqalut­tar­nitsitut eqqoq­qis­saar­tumik nutser­neqarsimanera qularinagu Biibili atuarsin­naavat.

Nassuiaatit: Biibilimi oqaatsit ator­neqar­tut hundredil­lit naatsumik nas­suiar­neqar­nerat tas­sani atuar­neqarsin­naap­put