អេម៉ុស ៦:១-១៤
៦ «វេទនាហើយ! ពួកអ្នកដែលរស់នៅដោយគ្មានទុក្ខកង្វល់ក្នុងស៊ីយ៉ូនវេទនាហើយ! ពួកអ្នកដែលគិតថាខ្លួនមានសុវត្ថិភាពនៅភ្នំសាម៉ារី+គឺពួកបុរសជាមេដឹកនាំលើប្រជាជាតិកំពូលជាពួកអ្នកដែលពូជពង្សអ៊ីស្រាអែលយកជាទីពឹង។
២ ចូរឆ្លងទៅឯកាលនេ ហើយពិនិត្យមើលចុះ។
ចូរចេញពីទីនោះ ឆ្ពោះទៅក្រុងហាម៉ាតដ៏ធំ+ហើយចុះទៅក្រុងកាថរបស់ពួកភីលីស្ទីនទៅ។
តើរាជាណាចក្រទាំងនោះប្រសើរជាងរាជាណាចក្រ*របស់អ្នករាល់គ្នាឬ?
តើទឹកដីរបស់ពួកគេធំជាងទឹកដីរបស់អ្នករាល់គ្នាឬ?
៣ តើអ្នករាល់គ្នាលែងគិតដល់ថ្ងៃនៃសេចក្ដីវេទនា+ហើយបណ្ដាលឲ្យជនឃោរឃៅគ្រប់គ្រងនៅក្នុងស្រុកឬ?+
៤ ពួកគេដេកនៅលើគ្រែភ្លុក+ ហើយសន្ធឹងខ្លួននៅលើកៅអីវែង+ព្រមទាំងបរិភោគសាច់ចៀមឈ្មោលនិងសាច់គោធាត់ៗ*ទៀតផង។+
៥ ពួកគេដេញពិណបណ្ដើរតែងចម្រៀងបណ្ដើរ+ព្រមទាំងបង្កើតឧបករណ៍ភ្លេងថ្មីៗដូចដាវីឌដែរ។+
៦ ពួកគេផឹកស្រាទាំងគោមៗ+ ហើយលាបខ្លួនដោយប្រេងល្អបំផុត។
ប៉ុន្តែ ពួកគេមិនខ្វល់អំពីការវិនាសរបស់យ៉ូសែបឡើយ។+
៧ ដូច្នេះ ពួកគេនឹងត្រូវចាប់យកទៅធ្វើជាឈ្លើយមុនគេ។+
ពេលនោះ នឹងលែងមានការជប់លៀងសប្បាយឥតបើគិតទៀតហើយ។
៨ ព្រះយេហូវ៉ាជាព្រះនៃបណ្ដាកងទ័ពស្ថានសួគ៌ប្រកាសថា៖ ‹ព្រះយេហូវ៉ាជាម្ចាស់ដ៏ឧត្ដមបំផុតបានស្បថដោយនូវនាមលោកថា៖+
«ខ្ញុំស្អប់ខ្ពើមអំណួតរបស់យ៉ាកុបណាស់+ហើយខ្ញុំក៏ស្អប់ប៉មរឹងមាំរបស់គាត់ដែរ។+
ខ្ញុំនឹងប្រគល់ក្រុងនេះនិងអ្វីៗទាំងអស់នៅក្នុងក្រុងទៅក្នុងកណ្ដាប់ដៃពួកសត្រូវ។+
៩ «‹«ពេលនោះ ទោះជាមានមនុស្ស១០នាក់នៅសល់ក្នុងផ្ទះតែមួយក្ដី ក៏ពួកគេនឹងស្លាប់ដែរ។
១០ សាច់ញាតិម្នាក់នឹងចូលទៅយកសពពួកគេម្ដងមួយៗចេញមកដើម្បីដុតចោល គឺគាត់នឹងយកឆ្អឹងពួកគេចេញពីផ្ទះនោះ។ បន្ទាប់មក គាត់សួរអ្នកដែលនៅក្នុងបន្ទប់ក្នុងផ្ទះនោះថា៖ ‹តើមាននៅសល់អ្នកណាទៀតទេ?›។ អ្នកនោះក៏ឆ្លើយថា៖ ‹គ្មានទេ!›។ រួចមក គាត់និយាយថា៖ ‹ចូរស្ងៀមទៅ! ព្រោះនេះមិនមែនជាពេលឲ្យយើងនឹកដល់នាមព្រះយេហូវ៉ាទេ›»។
១១ ព្រោះនេះជាបង្គាប់របស់ព្រះយេហូវ៉ា+ហើយលោកនឹងបំផ្លាញផ្ទះធំឲ្យទៅជាគំនរបាក់បែកហើយបំផ្លាញផ្ទះតូចឲ្យទៅជាកម្ទេចថ្ម។+
១២ តើសេះនឹងរត់លើគែមភ្នំឬ? តើគេនឹងយកគោទៅភ្ជួរនៅទីនោះឬ?
ព្រោះអ្នករាល់គ្នាបានធ្វើឲ្យយុត្តិធម៌ទៅជាដើមពុលហើយធ្វើឲ្យផលនៃសេចក្ដីសុចរិតទៅជាដើមល្វីង*វិញ។+
១៣ អ្នករាល់គ្នាអរសប្បាយនឹងអ្វីដែលឥតប្រយោជន៍ហើយអ្នករាល់គ្នានិយាយថា៖ «តើយើងមិនមានអំណាចខ្លាំងក្លាដោយសារតែកម្លាំងខ្លួនយើងទេឬ?»។+
១៤ ហេតុនេះ ឱពូជពង្សអ៊ីស្រាអែលអើយ! ខ្ញុំនឹងនាំប្រជាជាតិមួយមកទាស់នឹងអ្នករាល់គ្នា›។+ នេះជាសេចក្ដីប្រកាសរបស់ព្រះយេហូវ៉ាជាព្រះនៃបណ្ដាកងទ័ពស្ថានសួគ៌។
‹ពួកគេនឹងជិះជាន់សង្កត់សង្កិនអ្នករាល់គ្នា ចាប់ពីលេបូហាម៉ាត*+រហូតដល់ជ្រលងអារ៉ាបា›»។
កំណត់សម្គាល់
^ តាមមើលទៅនេះសំដៅលើរាជាណាចក្រយូដានិងរាជាណាចក្រអ៊ីស្រាអែល
^ ឬ«គោស្ទាវ»
^ ឬ«សេចក្ដីជូរល្វីង»
^ ឬ«ច្រកចូលហាម៉ាត»
