តើការធ្វើជាមនុស្សល្អប៉ុណ្ណោះអាចធានាថាអ្នកនឹងមានអនាគតដ៏ល្អប្រសើរទេ?
អស់ជាច្រើនសតវត្សរ៍ មនុស្សជាច្រើនមានអារម្មណ៍ថាការធ្វើជាមនុស្សល្អ ហើយមានសីលធម៌ល្អ អាចជួយពួកគេឲ្យមានអនាគតល្អ។ ជាឧទាហរណ៍ មនុស្សដែលរស់នៅតំបន់អាស៊ីយល់ស្របនឹងទ្រឹស្ដីរបស់ទស្សនវិទូម្នាក់ឈ្មោះខុងជឺ (ឆ្នាំ៥៥១-៤៧៩មុនគ.ស.) ដែលបាននិយាយថា៖ «អ្វីដែលអ្នកមិនចង់ឲ្យអ្នកឯទៀតធ្វើមកលើខ្លួន កុំធ្វើទៅលើអ្នកឯទៀត»។
មនុស្សជាច្រើនព្យាយាមធ្វើល្អ
មនុស្សជាច្រើននៅតែជឿថាការប្រព្រឹត្តល្អ ជាគន្លឹះដែលនាំឲ្យពួកគេមានអនាគតល្អប្រសើរ។ ពួកគេព្យាយាមប្រព្រឹត្តដោយគោរព មានសុជីវធម៌ ស្គាល់តួនាទីរបស់ខ្លួនក្នុងសង្គម ហើយរក្សាមនសិការស្អាតស្អំ។ ស្ត្រីម្នាក់ឈ្មោះលីនដែលរស់នៅប្រទេសវៀតណាមបាននិយាយថា៖ «ខ្ញុំតែងតែជឿថា បើខ្ញុំប្រព្រឹត្តដោយស្មោះត្រង់ ទង្វើនោះនឹងឲ្យផលល្អមកខ្ញុំវិញ»។
អ្នកខ្លះព្យាយាមធ្វើល្អដោយសារជំនឿរបស់ពួកគេ។ បុរសម្នាក់ឈ្មោះស៊ូយុន ដែលរស់នៅប្រទេសតៃវ៉ាន់បាននិយាយថា៖ «តាំងពីក្មេងគេបង្រៀនខ្ញុំថា បើបុគ្គលម្នាក់ធ្វើល្អ គាត់នឹងសប្បាយជារៀងរហូតទោះជាគាត់ស្លាប់ក្ដី តែបើគាត់ធ្វើអាក្រក់ គាត់នឹងរងទុក្ខវេទនាវិញ»។
តើមានលទ្ធផលអ្វី?
ជាការត្រឹមត្រូវដែលការធ្វើអំពើល្អនាំឲ្យយើងទទួលប្រយោជន៍ជាច្រើន។ ប៉ុន្តែ មនុស្សជាច្រើនដែលព្យាយាមធ្វើអំពើល្អដោយស្មោះទៅកាន់អ្នកឯទៀត មិនតែងតែទទួលបានលទ្ធផលដូចអ្វីដែលពួកគេរំពឹងទុកនោះទេ។ ស្ត្រីម្នាក់ឈ្មោះស៊ូពីងដែលរស់នៅទីក្រុងហុងកុងបាននិយាយថា៖ «ខ្ញុំបានរៀនពីបទពិសោធន៍របស់ខ្លួនឯងថា ពួកអ្នកដែលធ្វើអំពើល្អ មិនតែងតែទទួលផលល្អត្រឡប់មកវិញនោះទេ។ ខ្ញុំព្យាយាមអស់ពីសមត្ថភាពដើម្បីថែរក្សាក្រុមគ្រួសារ ហើយធ្វើអំពើល្អ។ ប៉ុន្តែ អាពាហ៍ពិពាហ៍របស់ខ្ញុំបានបរាជ័យ ហើយប្ដីខ្ញុំបានចុះចោលខ្ញុំនិងកូនប្រុសរបស់ខ្ញុំ»។
មនុស្សជាច្រើនក៏ឃើញដែរថា សាសនាមិនតែងតែធ្វើឲ្យមនុស្សល្អនោះទេ។ អេតស៊ូកូដែលជាស្ត្រីម្នាក់រស់នៅប្រទេសជប៉ុនបានរៀបរាប់ថា៖ «ខ្ញុំបានចូលអង្គការសាសនាមួយ ហើយក្លាយជានាយកគ្រប់គ្រងនៃសកម្មភាពយុវជន។ ខ្ញុំពិតជាភ្ញាក់ផ្អើល ដែលឃើញមនុស្សមានសីលធម៌ធូររលុង ដណ្ដើមអំណាចគ្នា ហើយប្រើថវិការបស់សាសនាដោយមិនស្មោះត្រង់»។
«ខ្ញុំព្យាយាមអស់ពីសមត្ថភាពដើម្បីថែរក្សាក្រុមគ្រួសារ ហើយធ្វើអំពើល្អ។ ប៉ុន្តែ អាពាហ៍ពិពាហ៍របស់ខ្ញុំបានបរាជ័យ ហើយប្ដីខ្ញុំបានចុះចោលខ្ញុំនិងកូនប្រុសរបស់ខ្ញុំ»។—ស៊ូពីងពីទីក្រុងហុងកុង
មនុស្សខ្លះដែលមានជំនឿមុតមាំ ហើយព្យាយាមធ្វើល្អបានខកចិត្តពេលរឿងអាក្រក់កើតឡើងចំពោះពួកគេ។ នេះជាអារម្មណ៍របស់ស្ត្រីម្នាក់ពីប្រទេសវៀតណាមឈ្មោះវ៉ាន់។ គាត់និយាយថា៖ «ជារៀងរាល់ថ្ងៃខ្ញុំបានទិញផ្លែឈើ ផ្កា និងម្ហូប ហើយសែននៅលើអាសនៈរបស់ជីដូនជីតាខ្ញុំដោយសង្ឃឹមថា ខ្ញុំនឹងទទួលពរនៅថ្ងៃអនាគត។ ប៉ុន្តែ ទោះជាខ្ញុំបានធ្វើល្អ ហើយធ្វើតាមទំនៀមទម្លាប់សាសនាអស់ជាច្រើនឆ្នាំក៏ដោយ ប្ដីរបស់ខ្ញុំបានធ្លាក់ខ្លួនឈឺយ៉ាងធ្ងន់ធ្ងរ ហើយកូនស្រីរបស់ខ្ញុំដែលរៀននៅក្រៅប្រទេសបានស្លាប់ទាំងនៅវ័យក្មេង»។
បើការធ្វើជាមនុស្សល្អមិនអាចធានាថាយើងនឹងមានអនាគតល្អ តើអ្វីអាចធានាបាន? ដើម្បីឆ្លើយសំណួរនេះ យើងត្រូវការការណែនាំដែលគួរឲ្យទុកចិត្ត ដែលអាចផ្ដល់ចម្លើយចំពោះសំណួរដែលយើងមាន និងប្រាប់យើងអំពីរបៀបដែលយើងអាចមានអនាគតដ៏ល្អនោះ។ តើយើងអាចរកឃើញការណែនាំបែបនេះនៅឯណា?
លោកអ្នកក៏ប្រហែលជាចូលចិត្តដែរ
ភ្ញាក់
ការបង្រៀនកូនអំពីគោលការណ៍សីលធម៌
ការបង្រៀនកូនអំពីគោលការណ៍សីលធម៌អាចនាំឲ្យពួកគេមានអនាគតល្អ។
