អត្ថបទសិក្សា ៣៤
ការសម្របខ្លួនពេលមិនអាចបន្តបំពេញឯកសិទ្ធិ
«ព្រះមិនប្រព្រឹត្តដោយអយុត្ដិធម៌នោះទេ ដោយបំភ្លេចការដែលអ្នករាល់គ្នាបានធ្វើ និងសេចក្ដីស្រឡាញ់ដែលអ្នករាល់គ្នាបានបង្ហាញចំពោះនាមរបស់លោក»។—ហេ. ៦:១០
ចម្រៀងលេខ៣៨ លោកនឹងធ្វើឲ្យអ្នកខ្លាំងក្លា
សេចក្ដីសង្ខេប *
១-៣. តើមានមូលហេតុអ្វីខ្លះដែលអ្នកបម្រើពេញពេលប្រហែលជាត្រូវផ្លាស់ប្ដូរភារកិច្ច?
បងប្រុសរ៉ូបឺតនិងបងស្រីមេរីចូ រៀបរាប់ថា៖ «ក្រោយពីយើងបានបម្រើជាសាសនទូតអស់រយៈពេល២១ឆ្នាំ ឪពុកម្ដាយទាំងសងខាងរបស់យើងដែលមានវ័យចាស់បានឈឺ។ យើងចង់ថែរក្សាពួកគាត់។ ប៉ុន្តែ យើងនៅតែពិបាកចិត្តដែលត្រូវចាកចេញពីកន្លែងដែលយើងចាត់ទុកថាជាស្រុកកំណើតរបស់យើង»។
២ បងប្រុសវីល្លាមនិងបងស្រីធែរីនិយាយថា៖ «ពេលយើងដឹងថាយើងមិនអាចបន្តបំពេញកិច្ចបម្រើរបស់យើងទៀតដោយសារបញ្ហាសុខភាព យើងបានយំ។ ការបម្រើព្រះយេហូវ៉ានៅប្រទេសក្រៅដែលជាគោលបំណងក្នុងជីវិតរបស់យើងបានត្រូវបញ្ចប់»។
៣ បងប្រុសអាឡិកសីនិយាយថា៖ «ខ្ញុំបម្រើនៅការិយាល័យសាខាមួយ ហើយយើងដឹងរួចហើយថាពួកអ្នកប្រឆាំងចង់បិទការិយាល័យសាខានោះ។ ប៉ុន្តែពេលនោះបានកើតឡើង ហើយយើងត្រូវចាកចេញពីបេតអែល យើងនៅតែតក់ស្លុត»។
៤. តើយើងនឹងពិចារណាសំណួរអ្វីខ្លះក្នុងអត្ថបទនេះ?
៤ មួយវិញទៀត បងប្អូនជាច្រើនដែលបម្រើពេញពេល រួមទាំងសមាជិកបេតអែលបានទទួលភារកិច្ចថ្មី។ * នេះអាចជាអ្វីដែលពិបាកខ្លាំងណាស់សម្រាប់បងប្អូនដ៏ស្មោះត្រង់ទាំងនោះ ពេលពួកគេមិនអាចបំពេញឯកសិទ្ធិដែលខ្លួនពិតជាស្រឡាញ់។ តើអ្វីអាចជួយពួកគេឲ្យសម្របខ្លួនទៅតាមការផ្លាស់ប្ដូរនោះ? តើអ្នកអាចជួយពួកគេយ៉ាងដូចម្ដេច? ចម្លើយចំពោះសំណួរទាំងនេះនឹងជួយយើងទាំងអស់គ្នាឲ្យសម្របខ្លួនទៅតាមការផ្លាស់ប្ដូរក្នុងជីវិត។
របៀបសម្របខ្លួនទៅតាមការផ្លាស់ប្ដូរ
ហេតុអ្វីប្រហែលជាពិបាកឲ្យអ្នកបម្រើពេញពេលចាកចេញពីភារកិច្ចរបស់ខ្លួន? (សូមមើលវគ្គ៥) *
៥. តើការផ្លាស់ប្ដូរភារកិច្ចមានឥទ្ធិពលយ៉ាងណាមកលើយើង?
៥ ទោះជាយើងបម្រើនៅបេតអែលឬជាអ្នកបម្រើពេញពេលខាងអ្វីផ្សេងទៀតក្ដី យើងមានសេចក្ដីស្រឡាញ់យ៉ាងខ្លាំងចំពោះមនុស្សនិងកន្លែងដែលយើងបំពេញកិច្ចបម្រើ។ ដូច្នេះ បើយើងត្រូវចាកចេញដោយសារមូលហេតុណាមួយ នោះអាចធ្វើឲ្យយើងឈឺចិត្ត។ យើងនឹកបងប្អូន ហើយយើងក៏បារម្ភអំពីពួកគេដែរ ជាពិសេសបើយើងត្រូវចាកចេញដោយសារការបៀតបៀន។ (ម៉ាថ. ១០:២៣; ២កូ. ១១:២៨, ២៩) ម្យ៉ាងទៀត ការផ្លាស់ប្ដូរភារកិច្ចឬសូម្បីតែការត្រឡប់ទៅប្រទេសកំណើតវិញ ក៏ជាអ្វីដែលពិបាកដោយសារយើងត្រូវសម្របខ្លួនទៅតាមវប្បធម៌ថ្មី។ បងប្រុសរ៉ូបឺតនិងបងមេរីចូនិយាយថា៖ «យើងលែងសូវស៊ាំនឹងវប្បធម៌របស់យើងទៀត ហើយសូម្បីតែយើងផ្សព្វផ្សាយដោយប្រើភាសាកំណើតរបស់ខ្លួន ក៏យើងមានអារម្មណ៍ថាយើងដូចជាជនបរទេស ទោះជាតាមការពិតយើងស្នាក់នៅប្រទេសកំណើតរបស់ខ្លួនក៏ដោយ»។ ពេលភារកិច្ចរបស់បងប្អូនខ្លះបានត្រូវផ្លាស់ប្ដូរ ភ្លាមៗពួកគេប្រហែលជាប្រឈមមុខនឹងបញ្ហាខាងលុយកាក់ដែលពួកគេមិនបានរំពឹងទុក។ ពួកគេប្រហែលជាខ្វល់ខ្វាយនិងធ្លាក់ទឹកចិត្ត។ តើអ្វីអាចជួយពួកគេ?
គឺសំខាន់ចាំបាច់ដែលយើងចូលទៅជិតព្រះយេហូវ៉ា ហើយទុកចិត្តលោក (សូមមើលវគ្គ៦-៧) *
៦. តើយើងអាចនៅជិតស្និទ្ធនឹងព្រះយេហូវ៉ាយ៉ាងដូចម្ដេច?
៦ ចូរនៅជិតស្និទ្ធនឹងព្រះយេហូវ៉ា។ (យ៉ា. ៤:៨) តើយើងអាចធ្វើដូច្នេះយ៉ាងដូចម្ដេច? គឺដោយទុកចិត្តលោកជា«ព្រះដែលស្ដាប់សេចក្ដីអធិស្ឋាន»។ (ទំនុក. ៦៥:២) ទំនុកតម្កើង ៦២:៨ចែងថា៖ «ចូរអ្នករាល់គ្នាប្លុងចិត្តនៅចំពោះទ្រង់»។ ព្រះយេហូវ៉ាអាច«ធ្វើហួសពីអ្វីៗទាំងអស់ដែលយើងសុំឬគិតឃើញ»។ (អេភ. ៣:២០) លោកមិនគ្រាន់តែផ្ដល់ឲ្យយើងនូវអ្វីដែលយើងអធិដ្ឋានសុំប៉ុណ្ណោះទេ តែលោកប្រហែលជាធ្វើអ្វីដែលយើងមិនបានរំពឹងទុកឬអ្វីដែលហួសពីការនឹកស្មាន ដើម្បីដោះស្រាយបញ្ហារបស់យើង។
៧. (ក) តើអ្វីនឹងជួយយើងឲ្យបន្តនៅជិតស្និទ្ធនឹងព្រះយេហូវ៉ា? (ខ) យោងទៅតាមហេប្រឺ ៦:១០-១២ តើយើងនឹងទទួលលទ្ធផលអ្វីពេលយើងនៅតែបម្រើព្រះយេហូវ៉ាយ៉ាងស្មោះត្រង់?
៧ ដើម្បីបន្តនៅជិតស្និទ្ធនឹងព្រះយេហូវ៉ា ចូរអានគម្ពីរជារៀងរាល់ថ្ងៃនិងរំពឹងគិតអំពីអ្វីដែលយើងបានអាន។ បងប្រុសម្នាក់ដែលធ្លាប់បម្រើជាសាសនទូតនិយាយថា៖ «ពេលមានការផ្លាស់ប្ដូរចំពោះភារកិច្ចរបស់អ្នក សូមបន្តគោរពប្រណិប័តន៍ជាក្រុមគ្រួសារនិងរៀបចំសម្រាប់កិច្ចប្រជុំជារៀងរាល់សប្ដាហ៍ ដូចដែលអ្នកធ្លាប់ធ្វើពីមុន»។ ម្យ៉ាងទៀត សូមបន្តខំអស់ពីសមត្ថភាពក្នុងកិច្ចការផ្សព្វផ្សាយដំណឹងល្អនៅក្រុមជំនុំថ្មី។ ព្រះយេហូវ៉ានឹកចាំពួកអ្នកដែលនៅតែបម្រើលោកយ៉ាងស្មោះត្រង់ ទោះជាពួកគេមិនអាចធ្វើច្រើនដូចពីមុនក៏ដោយ។—សូមអាន ហេប្រឺ ៦:១០-១២
៨. តើយ៉ូហានទី១ ២:១៥-១៧អាចជួយអ្នកយ៉ាងដូចម្ដេចដើម្បីរក្សាជីវិតឲ្យសាមញ្ញ?
៨ ចូររក្សាជីវិតឲ្យសាមញ្ញ។ សូមកុំឲ្យការខ្វល់ខ្វាយរបស់ពិភពលោកសាថានបញ្ឈប់អ្នកពីការបម្រើព្រះយេហូវ៉ាឡើយ។ (ម៉ាថ. ១៣:២២) ចូរកុំធ្វើតាមការបង្ខិតបង្ខំដែលមកពីពិភពលោក ឬពីមិត្តភក្ដិនិងសាច់ញាតិដែលមានបំណងចិត្តល្អ ឲ្យស្វែងរកទ្រព្យសម្បត្ដិក្នុងរបៀបរបបពិភពលោករបស់សាថាន។ (សូមអាន យ៉ូហានទី១ ២:១៥-១៧) ចូរទុកចិត្តព្រះយេហូវ៉ាដែលសន្យាថាលោកនឹងជួយបំពេញសេចក្ដីត្រូវការរបស់យើងខាងជំនឿ ខាងផ្លូវចិត្ត និងខាងរូបកាយ«នៅពេលដែលយើងត្រូវការ»។—ហេ. ៤:១៦; ១៣:៥, ៦
៩. យោងទៅតាមសុភាសិត ២២:៣, ៧ ហេតុអ្វីការជៀសវាងពីការជំពាក់បំណុលគឺសំខាន់ចាំបាច់? តើអ្វីអាចជួយយើងឲ្យធ្វើការសម្រេចចិត្តដ៏ឈ្លាសវៃ?
៩ ចូរជៀសវាងពីការជំពាក់បំណុលដែលមិនចាំបាច់។ (សូមអាន សុភាសិត ២២:៣, ៧) ការរើទៅកន្លែងថ្មីអាចតម្រូវឲ្យយើងចំណាយលុយច្រើន ហើយស្រួលឲ្យយើងជំពាក់បំណុលគេ។ ដើម្បីកុំឲ្យជំពាក់បំណុលច្រើន សូមប្រុងប្រយ័ត្នពីការខ្ចីលុយដើម្បីទិញអ្វីដែលមិនត្រូវការ។ ប៉ុន្តែ ពេលយើងស្ថិតក្នុងកាលៈទេសៈដែលនាំឲ្យតានតឹងចិត្ត ដូចជាពេលយើងថែរក្សាបុគ្គលជាទីស្រឡាញ់ដែលឈឺជាដើម យើងប្រហែលជាពិបាកធ្វើការសម្រេចចិត្តឈ្លាសវៃអំពីការខ្ចីលុយ។ ក្នុងស្ថានភាពបែបនេះ សូមចាំថា‹សេចក្ដីអធិដ្ឋាននិងការអង្វរសុំ› អាចជួយអ្នកឲ្យធ្វើការសម្រេចចិត្តដ៏ឈ្លាសវៃ។ ព្រះយេហូវ៉ាអាចតបឆ្លើយសេចក្ដីអធិដ្ឋានរបស់អ្នកដោយជួយអ្នកឲ្យមានសេចក្ដីសុខសាន្តដែលនឹង«ការពារចិត្តនិងសមត្ថភាពរិះគិតរបស់អ្នក» និងជួយអ្នកឲ្យធ្វើការសម្រេចចិត្តដ៏ល្អបំផុត។—ភី. ៤:៦, ៧; ១ពេ. ៥:៧
១០. តើយើងអាចមានមិត្តភក្ដិថ្មីតាមរបៀបណា?
១០ ចូររក្សាឲ្យមានទំនាក់ទំនងល្អ។ សូមប្រាប់មិត្តភក្ដិជិតស្និទ្ធ ជាពិសេសពួកអ្នកដែលធ្លាប់ជួបស្ថានភាពស្រដៀងនឹងអ្នក អំពីអារម្មណ៍និងបទពិសោធន៍ដែលអ្នកមាន។ ដោយធ្វើដូច្នេះ អ្នកអាចមានអារម្មណ៍ធូរស្រាលជាង។ (សាស្ដ. ៤:៩, ១០) មិត្តដែលអ្នកមានក្នុងកិច្ចបម្រើពីមុន នឹងនៅតែជាមិត្តភក្ដិរបស់អ្នក។ តែឥឡូវ ក្នុងភារកិច្ចថ្មី អ្នកត្រូវស្វែងរកមិត្តភក្ដិថ្មី។ តើអ្នកអាចរកមិត្តថ្មីតាមរបៀបណា? សូមចាំថាដើម្បីមានមិត្តភក្ដិ អ្នកត្រូវធ្វើជាមនុស្សរួសរាយរាក់ទាក់។ សូមប្រាប់អ្នកឯទៀតអំពីបទពិសោធន៍ល្អៗដែលអ្នកមានក្នុងកិច្ចបម្រើព្រះយេហូវ៉ា ដើម្បីឲ្យពួកគេឃើញថាអ្នកមានអំណរ។ ទោះជាបងប្អូនខ្លះក្នុងក្រុមជំនុំមិនយល់អំពីមូលហេតុដែលអ្នកស្រឡាញ់កិច្ចបម្រើពេញពេលក៏ដោយ បងប្អូនខ្លះទៀតប្រហែលជាចង់ដឹងថែមទៀត ហើយទៅជាមិត្តភក្ដិល្អរបស់អ្នក។ ប៉ុន្តែ សូមប្រុងប្រយ័ត្ន កុំនិយាយច្រើនពេកអំពីខ្លួនអ្នកឬអំពីអ្វីដែលអ្នកបានសម្រេចក្នុងកិច្ចបម្រើព្រះ ហើយកុំនិយាយច្រើនពេកអំពីអារម្មណ៍មិនល្អដែលអ្នកមាន។
១១. តើអ្នកអាចធ្វើអ្វីដើម្បីបន្តមានសុភមង្គលក្នុងចំណងអាពាហ៍ពិពាហ៍?
១១ បើអ្នកត្រូវចាកចេញពីឯកសិទ្ធិរបស់អ្នក ដោយសារគូរបស់អ្នកមានបញ្ហាសុខភាព សូមកុំបន្ទោសគាត់ឡើយ។ បើអ្នកផ្ទាល់មានបញ្ហាសុខភាពវិញ សូមកុំបន្ទោសខ្លួនថាអ្នកបានធ្វើឲ្យគូរបស់អ្នកខកចិត្ត។ សូមចាំថាអ្នកជា«សាច់ឈាមតែមួយ» ហើយអ្នកបានសន្យានៅចំពោះព្រះយេហូវ៉ាថាអ្នកនឹងថែរក្សាគ្នាទៅវិញទៅមក ទោះជាស្ថិតក្នុងកាលៈទេសៈណាក៏ដោយ។ (ម៉ាថ. ១៩:៥, ៦) បើអ្នកបានចាកចេញពីឯកសិទ្ធិដោយសារអ្នកមានផ្ទៃពោះដោយមិនបានព្រៀងទុក សូមធ្វើឲ្យប្រាកដថាកូនរបស់អ្នកដឹងថាគាត់គឺសំខាន់ជាងឯកសិទ្ធិដែលអ្នកធ្លាប់មាន។ សូមពង្រឹងទំនុកចិត្តកូនរបស់អ្នកថាអ្នកចាត់ទុកគាត់ជា«រង្វាន់»ដែលមកពីព្រះ។ (ទំនុក. ១២៧:៣-៥) ម្យ៉ាងទៀត សូមប្រាប់គាត់អំពីបទពិសោធន៍ល្អៗដែលអ្នកធ្លាប់មាន។ ដោយធ្វើដូច្នេះ អ្នកអាចជំរុញចិត្តកូនរបស់អ្នកឲ្យប្រើជីវិតរបស់គាត់ក្នុងកិច្ចបម្រើព្រះយេហូវ៉ាដែលនាំឲ្យមានអំណរ ដូចដែលអ្នកធ្លាប់ធ្វើដែរ។
របៀបដែលអ្នកឯទៀតអាចជួយ
១២. (ក) តើតាមរបៀបណាយើងអាចជួយបងប្អូនដែលបម្រើពេញពេលឲ្យបន្តបំពេញភារកិច្ច? (ខ) តើយើងអាចជួយពួកគេឲ្យសម្របខ្លួនទៅតាមស្ថានភាពថ្មីយ៉ាងដូចម្ដេច?
១២ ក្រុមជំនុំនិងបងប្អូនជាច្រើនកំពុងជួយពួកអ្នកដែលបម្រើពេញពេល ឲ្យនៅតែអាចបំពេញឯកសិទ្ធិរបស់ពួកគេ។ បងប្អូនទាំងនោះធ្វើដូច្នេះ ដោយផ្ដល់ការលើកទឹកចិត្តដល់ពួកគេឲ្យបន្តក្នុងកិច្ចការដែលពួកគេកំពុងធ្វើ និងដោយផ្ដល់អ្វីៗដែលពួកគេត្រូវការទាំងខាងលុយកាក់ទាំងខាងសម្ភារ ឬដោយជួយមើលថែសមាជិកក្រុមគ្រួសាររបស់ពួកគេដែលរស់នៅស្រុកកំណើត។ (កាឡ. ៦:២) បើអ្នកបម្រើពេញពេលបានទទួលភារកិច្ចថ្មីឲ្យមកបម្រើក្នុងក្រុមជំនុំរបស់អ្នក សូមកុំគិតថាការផ្លាស់ប្ដូរទាំងនេះគឺដោយសារពួកគេមិនបានសម្រេចកិច្ចការយ៉ាងល្អ ឬបានទទួលការប្រៀនប្រដៅឡើយ។ * ផ្ទុយទៅវិញ សូមជួយពួកគេឲ្យសម្របខ្លួនទៅតាមស្ថានភាពថ្មី។ សូមស្វាគមន៍ពួកគេយ៉ាងកក់ក្ដៅ ហើយសរសើរពួកគេចំពោះកិច្ចការដែលពួកគេបានធ្វើ ទោះជាឥឡូវនេះពួកគេប្រហែលជាមិនអាចធ្វើច្រើន ដោយសារមានបញ្ហាសុខភាពក្ដី។ សូមចំណាយពេលជាមួយនឹងពួកគេដើម្បីស្គាល់ពួកគេ ហើយក្រេបយកចំណេះដឹងពីពួកគេ បទពិសោធន៍ និងការបង្ហាត់បង្រៀនជាច្រើនដែលពួកគេបានទទួល។
១៣. តើយើងអាចជួយបងប្អូនដែលបានផ្លាស់ប្ដូរភារកិច្ចតាមរបៀបណា?
១៣ នៅដើមដំបូង បងប្អូនដែលផ្លាស់ប្ដូរភារកិច្ច ប្រហែលជាត្រូវការឲ្យយើងជួយពួកគេរកផ្ទះ មធ្យោបាយធ្វើដំណើរ ការងារ និងអ្វីផ្សេងទៀត។ ពួកគេក៏ប្រហែលជាត្រូវដឹងព័ត៌មានថ្មីៗអំពីជីវិតប្រចាំថ្ងៃ ដូចជាការបង់ពន្ធនិងការធានារ៉ាប់រងជាដើម។ តែអ្វីដែលពួកគេត្រូវការខ្លាំងបំផុតគឺមិនមែនការអាណិតទេ គឺការយល់អារម្មណ៍របស់ពួកគេវិញ។ ពួកគេប្រហែលជាពិបាកប្រឈមមុខនឹងបញ្ហាសុខភាពរបស់ខ្លួនឬរបស់សាច់ញាតិ។ ពួកគេប្រហែលជាកើតទុក្ខដោយសារមនុស្សជាទីស្រឡាញ់បានស្លាប់។ * ម្យ៉ាងទៀត ទោះជាពួកគេមិនប្រាប់ក្ដី ពួកគេប្រហែលជាពិបាកចិត្តជាខ្លាំង ដោយសារពួកគេនឹកមិត្តភក្ដិនៅកន្លែងដែលពួកគេធ្លាប់បម្រើជាមួយគ្នា។ ពួកគេត្រូវការពេលដើម្បីយកឈ្នះអារម្មណ៍ទាំងនេះ ដែលអាចជាអារម្មណ៍ច្របូកច្របល់។
១៤. តើបងប្អូននៅក្រុមជំនុំបានជួយបងស្រីម្នាក់ឲ្យសម្របខ្លួនទៅតាមភារកិច្ចថ្មីយ៉ាងដូចម្ដេច?
១៤ ទម្រាំដល់ពេលនោះ ជំនួយដែលអ្នកផ្ដល់ឲ្យ និងគំរូរបស់អ្នក អាចជួយពួកគេឲ្យចេះសម្របខ្លួននឹងកាលៈទេសៈថ្មី។ បងស្រីម្នាក់ដែលធ្លាប់បម្រើនៅប្រទេសក្រៅអស់ជាច្រើនឆ្នាំ និយាយថា៖ «ពីមុន ខ្ញុំធ្លាប់បង្រៀនសិស្សគម្ពីរជារៀងរាល់ថ្ងៃ តែពេលភារកិច្ចខ្ញុំបានផ្លាស់ប្ដូរ ខ្ញុំមិនសូវមានឱកាសបង្ហាញវីដេអូឬអានបទគម្ពីរក្នុងកិច្ចបម្រើផ្សាយទេ។ ប៉ុន្តែបងប្អូននៅក្រុមជំនុំថ្មីរបស់ខ្ញុំ បានអញ្ជើញខ្ញុំទៅការត្រឡប់ទៅជួបនិងបង្រៀនសិស្សគម្ពីរជាមួយនឹងពួកគេ។ ពេលខ្ញុំឃើញបងប្អូនដែលមានចិត្តខ្នះខ្នែងនិងចិត្តក្លាហានបង្រៀនសិស្សគម្ពីរដែលរីកចម្រើន នោះធ្វើឲ្យខ្ញុំកាន់តែមានទស្សនៈត្រឹមត្រូវ។ ខ្ញុំក៏បានរៀនអំពីរបៀបចាប់ផ្ដើមការសន្ទនាក្នុងតំបន់ផ្សាយថ្មីដែរ។ អ្វីទាំងអស់នេះបានជួយខ្ញុំឲ្យមានអំណរឡើងវិញ»។
ចូរបន្តខំប្រឹងអស់ពីសមត្ថភាព!
សូមស្វែងរកវិធីដើម្បីបង្កើនកិច្ចបម្រើផ្សាយនៅតំបន់ផ្សាយរបស់អ្នក (សូមមើលវគ្គ១៥-១៦) *
១៥. តើតាមរបៀបណាអ្នកអាចមានលទ្ធផលល្អក្នុងការបំពេញឯកសិទ្ធិថ្មី?
១៥ អ្នកអាចមានលទ្ធផលល្អក្នុងការបំពេញឯកសិទ្ធិថ្មី។ សូមកុំគិតថាការផ្លាស់ប្ដូរនោះគឺដោយសារអ្នកមិនបានសម្រេចកិច្ចការយ៉ាងល្អ ឬថាអ្នកមិនសូវមានតម្លៃដូចពីមុនឡើយ។ សូមគិតអំពីរបៀបផ្សេងៗដែលព្រះយេហូវ៉ាកំពុងជួយអ្នកនៅឥឡូវនេះ ហើយសូមបន្តផ្សព្វផ្សាយ។ សូមយកតម្រាប់គ្រិស្តសាសនិកដ៏ស្មោះត្រង់នៅសតវត្សរ៍ទី១។ ទោះជាពួកគេនៅកន្លែងណាក៏ដោយ ពួកគេ«បានធ្វើដំណើរពីកន្លែងមួយទៅកន្លែងមួយក្នុងស្រុក ដោយប្រកាសដំណឹងល្អអំពីបណ្ដាំរបស់ព្រះ»។ (សកម្ម. ៨:១, ៤) បើអ្នកបន្តផ្សព្វផ្សាយ នោះអ្នកអាចទទួលលទ្ធផលល្អ។ ជាឧទាហរណ៍ អ្នកត្រួសត្រាយដែលបានត្រូវគេបណ្ដេញពីប្រទេសមួយ បានរើទៅប្រទេសជិតខាងដែលមានសេចក្ដីត្រូវការច្រើនចំពោះភាសាដែលពួកគេចេះផងដែរ។ ក្នុងអំឡុងតែប៉ុន្មានខែប៉ុណ្ណោះ ចាប់ផ្ដើមមានក្រុមថ្មីៗនៅទីនោះ ហើយក្រុមទាំងនោះបានរីកចម្រើនយ៉ាងលឿន។
១៦. តើតាមរបៀបណាអ្នកអាចមានអំណរក្នុងភារកិច្ចថ្មី?
១៦ «សេចក្ដីអំណររបស់ព្រះយេហូវ៉ាជាកំឡាំងនៃអ្នករាល់គ្នា»។ (នេហ. ៨:១០) ប្រភពនៃអំណររបស់យើងគួរតែមកពីព្រះយេហូវ៉ា មិនមែនមកពីឯកសិទ្ធិរបស់យើងនោះទេ ទោះជាយើងស្រឡាញ់ភារកិច្ចនោះខ្លាំងយ៉ាងណាក៏ដោយ។ ដូច្នេះ សូមបន្តដើរជាមួយនឹងព្រះយេហូវ៉ា ដោយពឹងផ្អែកលើលោកដើម្បីមានប្រាជ្ញា ទទួលការណែនាំ និងជំនួយ។ សូមចាំថាអ្នកស្រឡាញ់ភារកិច្ចដែលអ្នកធ្លាប់មានពីមុន ដោយសារអ្នកខំអស់ពីចិត្តដើម្បីជួយមនុស្សនៅទីនោះ។ សូមខំអស់ពីចិត្តក្នុងការបំពេញភារកិច្ចថ្មីដែលអ្នកមាន ហើយសូមកត់សម្គាល់អំពីរបៀបដែលព្រះយេហូវ៉ាជួយអ្នកឲ្យស្រឡាញ់ភារកិច្ចថ្មីនេះដែរ។—សាស្ដ. ៧:១០
១៧. តើយើងត្រូវចាំចំណុចអ្វីស្តីអំពីឯកសិទ្ធិដែលយើងមាននៅឥឡូវនេះ?
១៧ យើងត្រូវចាំថាកិច្ចបម្រើរបស់យើងចំពោះព្រះយេហូវ៉ាគឺមានជារៀងរហូត តែឯកសិទ្ធិដែលយើងមាននៅឥឡូវនេះគឺបណ្ដោះអាសន្ន។ នៅក្នុងពិភពលោកថ្មី យើងទាំងអស់គ្នាប្រហែលជានឹងផ្លាស់ប្ដូរឯកសិទ្ធិ។ បងប្រុសអាឡិកសីដែលបានត្រូវរៀបរាប់នៅដើមអត្ថបទ ជឿជាក់ថាបទពិសោធន៍ដែលគាត់មាននៅឥឡូវនេះ ជួយគាត់ឲ្យត្រៀមខ្លួនសម្រាប់ការផ្លាស់ប្ដូរនៅថ្ងៃអនាគត។ បងអាឡិកសីនិយាយថា៖ «ខ្ញុំបានដឹងថាព្រះយេហូវ៉ាជាបុគ្គលពិត ហើយថាពិភពលោកថ្មីនឹងមានពិតប្រាកដមែន តែមើលទៅទាំងពីរនោះដូចជានៅឆ្ងាយបន្ដិចសម្រាប់ខ្ញុំ។ ប៉ុន្តែឥឡូវ ខ្ញុំមានអារម្មណ៍ជិតស្និទ្ធជាមួយនឹងព្រះយេហូវ៉ា ហើយថាពិភពលោកថ្មីគឺជិតមកដល់ហើយ»។ (សកម្ម. ២:២៥) ទោះជាយើងមានឯកសិទ្ធិណាក៏ដោយ សូមឲ្យយើងបន្តដើរជាមួយនឹងព្រះយេហូវ៉ា។ លោកនឹងមិនចាកចេញពីយើងឡើយ តែលោកនឹងជួយយើងឲ្យមានអំណរពេលយើងធ្វើអ្វីដែលយើងអាចធ្វើបានក្នុងកិច្ចបម្រើលោក ទោះជាយើងបម្រើនៅកន្លែងណាក៏ដោយ។—អេ. ៤១:១៣
ចម្រៀងលេខ៩០ ចូរលើកទឹកចិត្តគ្នាទៅវិញទៅមក
^ វគ្គ 5 ជួនកាល បងប្អូនដែលបម្រើពេញពេលប្រហែលជាមិនអាចបន្តបំពេញឯកសិទ្ធិ ឬពួកគេប្រហែលជាទទួលភារកិច្ចថ្មី។ ក្នុងអត្ថបទនេះ យើងនឹងពិចារណាអំពីការពិបាកដែលពួកគេជួបប្រទះ ហើយអំពីអ្វីដែលអាចជួយពួកគេឲ្យសម្របខ្លួនទៅតាមស្ថានភាពថ្មី។ យើងក៏នឹងពិចារណាអំពីអ្វីដែលអ្នកឯទៀតអាចធ្វើដើម្បីលើកទឹកចិត្តនិងជួយពួកគេ ព្រមទាំងគោលការណ៍ដែលអាចជួយយើងទាំងអស់គ្នាពេលប្រឈមមុខនឹងការផ្លាស់ប្ដូរ។
^ វគ្គ 4 ស្រដៀងគ្នាដែរ ពេលបងប្រុសៗជាច្រើនដែលមានភារកិច្ចក្នុងអង្គការរបស់ព្រះ ដល់អាយុដែលបានត្រូវកំណត់ ពួកគេបានប្រគល់ភារកិច្ចរបស់ខ្លួនឲ្យបងប្អូនប្រុសវ័យក្មេងជាង។ សូមមើលអត្ថបទដែលមានចំណងជើងថា «ចូររក្សាសេចក្ដីសុខសាន្តក្នុងចិត្ត ទោះជាស្ថានភាពរបស់អ្នកផ្លាស់ប្ដូរ»ក្នុងទស្សនាវដ្ដីប៉មយាម ខែតុលា ឆ្នាំ២០១៨។
^ វគ្គ 12 ពួកអ្នកចាស់ទុំក្នុងក្រុមជំនុំដែលពួកគេធ្លាប់បម្រើ គួរតែសរសេរសំបុត្រណែនាំឲ្យស្គាល់ទៅក្រុមជំនុំថ្មីរបស់ពួកគេឲ្យបានលឿនបំផុត ដើម្បីកុំឲ្យពន្យារពេលក្នុងការបន្តបម្រើជាអ្នកត្រួសត្រាយពេញពេល ជាអ្នកចាស់ទុំ ឬជាជំនួយការខាងកិច្ចបម្រើ។
^ វគ្គ 13 សូមមើលទស្សនាវដ្ដីភ្ញាក់រឭក! លេខ៣ ឆ្នាំ២០១៨ ដែលមានចំណងជើងថា «ជំនួយសម្រាប់អ្នកដែលកើតទុក្ខ»។
^ វគ្គ 57 ការពណ៌នាអំពីរូបភាព: ប្ដីប្រពន្ធមួយគូដែលត្រូវឈប់បម្រើជាសាសនទូតនៅប្រទេសក្រៅ លាបងប្អូនដែលនៅក្រុមជំនុំរបស់ពួកគេទាំងទឹកភ្នែក។
^ វគ្គ 59 ការពណ៌នាអំពីរូបភាព: ពេលនៅប្រទេសកំណើតរបស់ពួកគេ ប្ដីប្រពន្ធនោះបន្តអធិដ្ឋានឥតឈប់ទៅព្រះយេហូវ៉ាដើម្បីជួយពួកគេឲ្យយកឈ្នះការពិបាកដែលពួកគេមាន។
^ វគ្គ 61 ការពណ៌នាអំពីរូបភាព: ដោយមានជំនួយពីព្រះយេហូវ៉ា ប្ដីប្រពន្ធនោះបានចាប់ផ្ដើមបម្រើពេញពេលម្ដងទៀត។ ពួកគេប្រើភាសាដែលពួកគេធ្លាប់រៀនកាលដែលពួកគេបម្រើជាសាសនទូត ដើម្បីផ្សាយដំណឹងល្អដល់ជនអន្ដោប្រវេសន៍ដែលរស់នៅតំបន់ផ្សាយនៃក្រុមជំនុំថ្មីរបស់ពួកគេ។
