ចំណេះដែលនាំឲ្យយើងចូលទៅជិតព្រះ
អ្នកបង្កើតរបស់យើងមិនគ្រាន់តែមានឫទ្ធានុភាពដ៏ខ្លាំងក្លាប៉ុណ្ណោះទេ តែលោកក៏មានគុណសម្បត្តិដែលគួរឲ្យទាក់ទាញផងដែរ។ លោកចង់ឲ្យយើងរៀនអំពីលោក ហើយក្លាយជាមិត្តសម្លាញ់របស់លោក។ (យ៉ូហាន ១៧:៣; យ៉ាកុប ៤:៨) នេះជាមូលហេតុដែលលោកបង្ហាញឲ្យយើងស្គាល់លក្ខណៈរបស់លោក។
អ្នកបង្កើតរបស់យើងមានឈ្មោះ
«សូមឲ្យមនុស្សទាំងឡាយដឹងថា លោកដែលមាននាមយេហូវ៉ា ជាព្រះតែមួយប៉ុណ្ណោះដែលខ្ពង់ខ្ពស់បំផុតលើផែនដីទាំងមូល»។—ចម្រៀងសរសើរព្រះ ៨៣:១៨
គម្ពីរបង្រៀនយើងថាព្រះយេហូវ៉ាជាព្រះពិតតែមួយ។ លោកជាអ្នកបង្កើតសកលលោក និងជីវិតទាំងឡាយ។ លោកសមនឹងទទួលការគោរពប្រណិប័តន៍ពីយើង។—ការបើកបង្ហាញ ៤:១១
ព្រះយេហូវ៉ាជាព្រះដែលប្រកបដោយសេចក្ដីស្រឡាញ់
«ព្រះគឺជាសេចក្ដីស្រឡាញ់»—យ៉ូហានទី១ ៤:៨
ព្រះយេហូវ៉ាប្រើគម្ពីរ និងអ្វីៗដែលលោកបានបង្កើត ដើម្បីបង្រៀនយើងអំពីគុណសម្បត្តិជាច្រើនរបស់លោក។ សេចក្ដីស្រឡាញ់គឺជាគុណសម្បត្តិដ៏សំខាន់បំផុតរបស់លោក។ អ្វីៗទាំងអស់ដែលលោកធ្វើ ផុសចេញពីសេចក្ដីស្រឡាញ់។ កាលដែលយើងរៀនកាន់តែច្រើនអំពីព្រះយេហូវ៉ា យើងកាន់តែស្រឡាញ់លោក។
ព្រះយេហូវ៉ាជាព្រះដែលអភ័យទោស
«លោកជាព្រះដែលបម្រុងតែនឹងអភ័យទោស»—នេហេមា ៩:១៧
ព្រះយេហូវ៉ាដឹងថាយើងមិនល្អឥតខ្ចោះ។ ដូច្នេះលោក«បម្រុងតែនឹងអភ័យទោស»ឲ្យយើង។ ពេលយើងអធិដ្ឋានប្រាប់លោកថា យើងសោកស្ដាយចំពោះអ្វីដែលយើងបានធ្វើ ហើយព្យាយាមឈប់ធ្វើអ្វីដែលអាក្រក់នោះទៀត លោកនឹងអភ័យទោសឲ្យយើង ហើយលោកនឹងមិនលើករឿងនោះឡើងម្ដងទៀត ដើម្បីដាក់ទោសយើងឡើយ។—ចម្រៀងសរសើរព្រះ ១០៣:១២, ១៣
ព្រះយេហូវ៉ាអញ្ជើញយើងឲ្យអធិដ្ឋានទៅលោក
«ព្រះយេហូវ៉ានៅជិតអស់អ្នកដែលហៅរកលោក . . . លោកឮពាក្យស្រែកអង្វរសុំរបស់ពួកគេ»—ចម្រៀងសរសើរព្រះ ១៤៥:១៨, ១៩
ព្រះយេហូវ៉ាមិនតម្រូវឲ្យយើងធ្វើពិធីពិសេស ឬប្រើវត្ថុតំណាងក្នុងការគោរពប្រណិប័តន៍លោកនោះទេ។ លោកស្ដាប់សេចក្ដីអធិដ្ឋានរបស់យើង ដូចឪពុកម្ដាយដែលប្រកបដោយសេចក្ដីស្រឡាញ់ស្ដាប់កូនៗជាទីស្រឡាញ់របស់ពួកគេ។
