មូលហេតុដែលគម្ពីរមានប្រយោជន៍នៅសម័យយើង
មូលហេតុដែលគម្ពីរមានប្រយោជន៍នៅសម័យយើង
«គ្រប់ទាំងបទគម្ពីរបានត្រូវសរសេរក្រោមការដឹកនាំរបស់ព្រះ ហើយមានប្រយោជន៍»។—ធីម៉ូថេទី២ ៣:១៦
តាំងពីសម័យបុរាណ គម្ពីរបានជំរុញទឹកចិត្តមនុស្សគ្រប់សាសន៍ឲ្យកែប្រែជីវិតបានល្អប្រសើរជាង។ បទគម្ពីរខាងលើនេះពន្យល់មូលហេតុដែលគម្ពីរមានឥទ្ធិពលយ៉ាងនោះ មូលហេតុនោះគឺប្រាជ្ញាដែលមានក្នុងគម្ពីរគឺមកពីព្រះ។ ទោះជាមនុស្សបានសរសេរគម្ពីរក៏ពិតមែន តែគម្ពីរបញ្ជាក់ឲ្យយើងដឹងគំនិតរបស់ព្រះ។ គម្ពីរពន្យល់ថា៖ «មនុស្សបាននិយាយអ្វីដែលមកពីព្រះ ដោយមានសកម្មពលបរិសុទ្ធដឹកនាំពួកគេ»។—ពេត្រុសទី២ ១:២១
យ៉ាងតិច ការណែនាំក្នុងគម្ពីរមានប្រយោជន៍ពីរយ៉ាង។ ទី១ គម្ពីរជួយឲ្យយើងយល់ត្រឹមត្រូវអំពីអ្វីដែលពិតជាធ្វើឲ្យយើងមានជីវិតប្រសើរជាង។ ទី២ គម្ពីរមានឥទ្ធិពលជំរុញទឹកចិត្តមនុស្សឲ្យកែប្រែអ្វីដែលចាំបាច់ ដើម្បីបានជីវិតប្រសើរជាង។ សូមឲ្យយើងពិនិត្យមើលចំណុចទាំងពីរនេះថែមទៀត។
គម្ពីរជួយឲ្យយល់ធ្លុះធ្លាយអំពីគោលដៅដែលមានប្រយោជន៍
ក្នុងគម្ពីរ ព្រះបានសន្យាថា៖ «ខ្ញុំនឹងជួយឲ្យអ្នកយល់ធ្លុះធ្លាយ ហើយណែនាំអ្នកឲ្យដឹងផ្លូវណាដែលអ្នកគួរដើរ។ ខ្ញុំនឹងឲ្យយោបល់ដល់អ្នក ហើយមើលអ្នកជាប់»។ (ទំនុកតម្កើង ៣២:៨, ព.ថ.) សូមកត់សម្គាល់ថា ព្រះមិនគ្រាន់តែឲ្យយោបល់ប៉ុណ្ណោះ តែក៏ជួយឲ្យយើងយល់ធ្លុះធ្លាយដែរ។ ការយល់ធ្លុះធ្លាយជាសមត្ថភាពយល់ការពិតអំពីរឿងណាមួយ។ ដូច្នេះការយល់ធ្លុះធ្លាយអំពីគោលដៅណាដែលពិតជាមានប្រយោជន៍ អាចការពារកុំឲ្យយើងបង្ខាតជីវិតដោយខំបំពេញគោលដៅដែលគ្មានប្រយោជន៍។
ជាឧទាហរណ៍ គោលដៅរបស់មនុស្សជាច្រើនគឺចង់ប្រមូលទ្រព្យសម្បត្ដិឬចង់បានឈ្មោះល្បី។ មានសៀវភៅជំនួយជាច្រើនដែលរៀបរាប់អំពីវិធីប្រើប្រាជ្ញា ដើម្បីជែងកាត់មុខអ្នកឯទៀតហើយឲ្យបានល្បីឈ្មោះឬទៅជាអ្នកមាន។ ផ្ទុយទៅវិញ គម្ពីរចែងថា៖ «ចិត្តច្រណែនដល់[ឬ«ការប្រកួតប្រជែង»]គ្នា . . . ជាការឥតមានទំនង ហើយជាអសារឥតការទទេ»។ «អ្នកណាដែលស្រឡាញ់ប្រាក់ នោះនឹងមិនស្កប់ចិត្តដោយប្រាក់ប៉ុណ្ណោះទេ»។ (សាស្ដា ៤:៤; ព.ថ.; ៥:១០) តើការណែនាំនោះមានប្រយោជន៍សម្រាប់យើងសព្វថ្ងៃទេ?
ដើម្បីបង្ហាញថាការណែនាំក្នុងគម្ពីរមានប្រយោជន៍ប៉ុណ្ណា សូមពិចារណាអ្វីដែលបានកើតឡើងដល់បងប្រុសម្នាក់ឈ្មោះអាគីណូរី ដែលរស់នៅប្រទេសជប៉ុន។ អាគីណូរីបានឈ្នះគូប្រជែងទាំងអស់ ហើយបានសម្រេចគោលដៅរៀនចប់នៅសកលវិទ្យាល័យដែលនាំមុខគេ ហើយបានការងារធ្វើនៅក្រុមហ៊ុនល្បីល្បាញមួយ។ តាមមើលទៅ អ្វីៗទាំងអស់បានសម្រេចដូចបំណងរបស់គាត់មែន។ ក៏ប៉ុន្តែ សុភាសិត ១៤:៣០, ខ.ស.
ជោគជ័យក្នុងជីវិតរបស់គាត់មិនបានធ្វើឲ្យគាត់មានសុភមង្គលដូចគាត់បាននឹកស្មាននោះទេ។ ផ្ទុយទៅវិញ គាត់បានខូចសុខភាព ដោយសារតានតឹងចិត្តនិងអស់កម្លាំងល្ហិតល្ហៃ។ ពួកម៉ាកនៅកន្លែងធ្វើការជួយគាត់បានតិចតួចណាស់។ អាគីណូរីបានបាក់ទឹកចិត្តនិងក្លាយជាអ្នកប្រមឹក ហើយមានគំនិតចង់សម្លាប់ខ្លួន។ ក្រោយមក គាត់បានចាប់ផ្ដើមសិក្សាគម្ពីរជាមួយសាក្សីព្រះយេហូវ៉ា។ អ្វីដែលគាត់រៀនបានធ្វើឲ្យគាត់ផ្លាស់ប្ដូរគំនិតអំពីអ្វីដែលសំខាន់បំផុតក្នុងជីវិត។ មិនយូរក្រោយមក ជំងឺដែលមកពីភាពតានតឹងចិត្តចាប់ផ្ដើមបាត់ទៅ។ ជាជាងឲ្យអំណួតឬមហិច្ឆតាដឹកមុខ នោះអាគីណូរីឃើញដោយផ្ទាល់ភ្នែកនូវអ្វីដែលសុភាសិតក្នុងគម្ពីរចែងថា៖ «ចិត្តស្ងប់តែងតែធ្វើអោយមានសុខភាពល្អ»។—តើអ្នកគិតថាគោលដៅដែលមានប្រយោជន៍ច្រើនបំផុតក្នុងជីវិតគឺជាគោលដៅអ្វី? តើអ្វីពិតជានឹងធ្វើឲ្យអ្នកសប្បាយ? តើអ្នកចង់បានសុភមង្គលក្នុងអាពាហ៍ពិពាហ៍ ឬរៀបចំឲ្យកូនមានអនាគតល្អទេ? ឬក៏តើអ្នកចង់មានពួកម៉ាកច្រើនឬសប្បាយក្នុងជីវិត? គោលដៅទាំងអស់នេះពិតជាមានប្រយោជន៍មែន។ តាមពិត គម្ពីរលើកទឹកចិត្តយើងឲ្យមានគោលដៅទាំងនោះ តែគោលដៅទាំងនោះមិនមែនជាគោលដៅសំខាន់បំផុតក្នុងជីវិតយើងទេ។ ដោយមានការយល់ធ្លុះធ្លាយអំពីអ្វីដែលមានប្រយោជន៍ នោះគម្ពីរបញ្ជាក់តម្រូវការដ៏ចាំបាច់ដើម្បីឲ្យយើងពេញចិត្តនឹងជីវិត ដោយចែងថា៖ «ចូរកោតខ្លាចដល់ព្រះ ហើយកាន់តាមបញ្ញត្តទ្រង់ចុះ! ដ្បិតប៉ុណ្ណេះឯងជាកិច្ចទាំងមូលដែលមនុស្សត្រូវធ្វើ»។ (សាស្ដា ១២:១៣) ពេលយើងមិនធ្វើតាមបង្គាប់នេះ នោះយើងធុញទ្រាន់នឹងជីវិត ជួបរឿងខកចិត្ត ហើយជីវិតយើងក៏គ្មានន័យដែរ។ ម្យ៉ាងវិញទៀត គម្ពីរធានាយើងថា៖ «អ្នកណាដែលទុកចិត្តដល់ព្រះយេហូវ៉ា នោះសប្បាយហើយ»។—សុភាសិត ១៦:២០
វិធីដែលគម្ពីរជំរុញមនុស្សឲ្យកែខ្លួន
សាវ័កប៉ូលបានសរសេរថា៖ «បណ្ដាំរបស់ព្រះគឺមានជីវិតរស់នៅ ហើយមានឫទ្ធានុភាព»។ ដូចដាវដែលមានមុខពីរ គម្ពីរអាចមានឥទ្ធិពលទៅលើបំណងចិត្តនិងគំនិតដែលកប់យ៉ាងជ្រៅក្នុងដួងចិត្តរបស់មនុស្ស។ (ហេប្រឺ ៤:១២) គម្ពីរមានអានុភាពធ្វើឲ្យមនុស្សកែប្រែជីវិតរស់នៅ។ នេះគឺដោយសារគម្ពីរជួយពួកគាត់ឲ្យយល់ថាខ្លួនពិតជាមនុស្សប្រភេទណា ទោះជានោះខុសពីទស្សនៈដែលគាត់មានចំពោះខ្លួនឯងក៏ដោយ។ ក្រោយមក មនុស្សដែលមានចិត្តគំនិតត្រឹមត្រូវនឹងកត់សម្គាល់ថា ខ្លួនត្រូវធ្វើការកែប្រែជាចាំបាច់។ ជាឧទាហរណ៍ ស្តីអំពីអស់អ្នកនៅក្នុងក្រុមជំនុំពួកគ្រិស្តសាសនិកនាទីក្រុងកូរិនថូសពីបុរាណ ដែលធ្លាប់ជាចោរ អ្នកប្រមឹក និងអ្នកផិតក្បត់ជាដើម នោះប៉ូលបានសរសេរថា៖ «អ្នករាល់គ្នាខ្លះធ្លាប់ជាមនុស្សបែបនោះ។ តែអ្នករាល់គ្នាបានត្រូវលាងសម្អាត . . . ដោយសកម្មពលនៃព្រះរបស់យើង»។ (កូរិនថូសទី១ ៦:៩-១១) សកម្មពលបរិសុទ្ធរបស់ព្រះយេហូវ៉ានៅតែមានឫទ្ធានុភាពដូចនៅសម័យបុរាណ ហើយព្រះនៅតែប្រើសកម្មពលរបស់លោកសព្វថ្ងៃនេះ។ សកម្មពលនោះអាចជំរុញទឹកចិត្តមនុស្សឲ្យកែប្រែអ្វីដែលចាំបាច់។
នៅទ្វីបអឺរ៉ុប មានបុរសម្នាក់ឈ្មោះម៉ារីអូ ដែលធ្លាប់ជាមនុស្សឃោរឃៅ ហើយធ្លាប់ជក់និងលក់កញ្ឆា។ នៅថ្ងៃមួយ ពេលប៉ូលិសបានរឹបអូសកញ្ឆារបស់គាត់ នោះម៉ារីអូខឹងខ្លាំងដល់ម្ល៉េះដែលគាត់វាយប៉ូលិសនោះហើយបំផ្លាញឡានប៉ូលិសចោល។ បន្ថែមទៅទៀត ម៉ារីអូគ្មានការងារធ្វើ ហើយថែមទាំងជំពាក់បំណុលគេទៀត។ គាត់ទទួលស្គាល់ថា គាត់ខ្វះប្រាជ្ញា មិនអាចដោះស្រាយបញ្ហាទាំងនោះបានដោយខ្លួនឯងទេ ដូច្នេះគាត់ព្រមសិក្សាគម្ពីរ។ កាលដែលម៉ារីអូមានចំណេះអំពីព្រះកាន់តែច្រើនឡើង នោះគាត់ទៅជាមនុស្សស្អាតបាត ឈប់ជក់និងលក់កញ្ឆា ហើយឈប់ប្រើអំពើហិង្សា។ មនុស្សជាច្រើនដែលធ្លាប់ស្គាល់ម៉ារីអូនិងរបៀបដែលគាត់ប្រព្រឹត្តពីមុនបានភ្ញាក់ផ្អើលណាស់ ហើយនិយាយថា៖ «បងម៉ារីអូ! យើងមើលមិនស្គាល់បងសោះ!»។
តើអ្វីជំរុញទឹកចិត្តបុគ្គលដូចជាអាគីណូរីនិងម៉ារីអូឲ្យកែខ្លួនហើយមានសុភមង្គលក្នុងជីវិត? យ៉ាងច្បាស់ណាស់ គឺចំណេះអំពីព្រះដែលពួកគាត់បានទទួលពីការសិក្សាគម្ពីរដែលបានជំរុញទឹកចិត្តពួកគាត់ឲ្យកែខ្លួន។ មានតែព្រះទេដែលអាចឲ្យការណែនាំដែលយើងត្រូវការដើម្បីទទួលជោគជ័យក្នុងជីវិតឥឡូវនេះ ហើយមានសេចក្ដីសង្ឃឹមទទួលជីវិតដែលគ្មានទីបញ្ចប់នៅអនាគត។ តាមរយៈគម្ពីរ ព្រះយេហូវ៉ាមានប្រសាសន៍មកយើង ដូចបិតានិយាយទៅកូន ពេលលោកណែនាំថា៖ «ចូរស្ដាប់ កូនអើយ! ហើយទទួលពាក្យរបស់អញចុះ នោះឆ្នាំនៃអាយុឯងនឹងបានយឺនយូរ . . . កាលណាឯងដើរទៅ នោះជំហានឯងនឹងមិនទើសទាល់ ហើយកាលណាឯងរត់ នោះឯងនឹងមិនចំពប់ឡើយ។ ចូរតោងជាប់តាមសេចក្ដីដំបូន្មានកុំលែងឲ្យសោះ ត្រូវឲ្យរក្សាទុក ដ្បិតសេចក្ដីនោះជាជីវិតរបស់ឯង»។ (សុភាសិត ៤:១០-១៣) យោបល់នោះបំផុសទឹកចិត្តយើងឲ្យស្វែងរកការណែនាំពីព្រះដែលជាអ្នកបង្កើតយើង។ ច្បាស់ជាគ្មានយោបល់ណាដែលមានប្រយោជន៍ជាងយោបល់នោះឡើយ មែនទេ?
[រូបភាពនៅទំព័រ៧]
ការណែនាំដែលមានប្រយោជន៍នៅសម័យយើង
គម្ពីរមានសេចក្ដីណែនាំដែលស្រួលយល់ស្រួលធ្វើតាម ហើយមានតម្លៃសម្រាប់ដឹកនាំយើងក្នុងគ្រប់ទិដ្ឋភាពនៃជីវិតនៅសម័យយើងនេះ។ សូមមើលឧទាហរណ៍ខ្លះៗដូចតទៅ:
• វិធីបង្កើតឲ្យមានទំនាក់ទំនងល្អជាមួយអ្នកដទៃ
«អ្នកចង់ឲ្យមនុស្សប្រព្រឹត្តយ៉ាងណាចំពោះអ្នក អ្នកក៏ត្រូវប្រព្រឹត្តយ៉ាងនោះចំពោះពួកគេដែរ»។—ម៉ាថាយ ៧:១២
«អ្នកណាដែលកាន់ចរិយាជាអ្នកតូចជាងគេក្នុងចំណោមអ្នករាល់គ្នា អ្នកនោះគឺអ្នកធំ»។—លូកា ៩:៤៨
«ចូរមានទម្លាប់ទទួលអ្នកឯទៀតដោយរាក់ទាក់»។—រ៉ូម ១២:១៣
• វិធីបោះបង់ចោលទម្លាប់អាក្រក់
«អ្នកណាដែលដើរជាមួយនឹងមនុស្សប្រាជ្ញ នោះនឹងមានប្រាជ្ញាដែរ តែអ្នកណាដែលភប់ប្រសព្វនឹងមនុស្សល្ងីល្ងើ នោះនឹងត្រូវខូចបង់វិញ»។—សុភាសិត ១៣:២០
«កុំឲ្យនៅកណ្ដាលពួកអ្នកប្រមឹកស្រា»។—សុភាសិត ២៣:២០
«កុំឲ្យចងជាមិត្រនឹងមនុស្សណាដែលអាសាខឹងឡើយ»។—សុភាសិត ២២:២៤
• វិធីធ្វើឲ្យចំណងអាពាហ៍ពិពាហ៍ស្ថិតស្ថេរ
«ចូរអ្នករាល់គ្នាម្នាក់ៗស្រឡាញ់ប្រពន្ធរបស់ខ្លួន ដូចស្រឡាញ់ខ្លួនអ្នក ឯប្រពន្ធត្រូវគោរពប្ដីយ៉ាងជ្រាលជ្រៅ»។—អេភេសូរ ៥:៣៣
«ចូរបំពាក់ខ្លួនដោយសេចក្ដីមេត្ដាករុណាដ៏ជ្រាលជ្រៅបំផុត សេចក្ដីសប្បុរស ចិត្តរាបទាប ចិត្តស្លូតបូត និងចិត្តធ្ងន់។ ចូរទ្រាំទ្រគ្នាទៅវិញទៅមក ហើយអភ័យទោសឲ្យគ្នាទៅវិញទៅមកដោយគ្មានល័ក្ខខ័ណ្ឌ»។—កូឡុស ៣:១២, ១៣
• វិធីជួយកូន
«ចូរបង្ហាត់កូនក្មេងឲ្យប្រព្រឹត្តតាមផ្លូវដែលគួរប្រព្រឹត្ត នោះវានឹងមិនលះបង់ពីផ្លូវនោះដរាបដល់ចាស់»។—សុភាសិត ២២:៦
«ចំណែកអ្នករាល់គ្នាដែលជាឪពុក កុំធ្វើឲ្យកូនខឹង តែចូរអប់រំកូនទៅតាមការប្រៀនប្រដៅរបស់ព្រះយេហូវ៉ា ហើយបណ្ដុះឲ្យកូនមានគំនិតដូចលោក»។—អេភេសូរ ៦:៤
• វិធីបង្ការជម្លោះ
«ពាក្យតបឆ្លើយដោយស្រទន់ នោះរមែងរំងាប់សេចក្ដីក្រោធទៅ តែពាក្យគំរោះគំរើយ នោះបណ្ដាលឲ្យមានសេចក្ដីកំហឹងវិញ»។—សុភាសិត ១៥:១
«ក្នុងការលើកកិត្ដិយសគ្នាទៅវិញទៅមក ចូរលើកកិត្ដិយសគេមុន»។—រ៉ូម ១២:១០
ពេលណាខ្ចីប្រាក់ ឬឲ្យគេខ្ចីប្រាក់ ឬក៏រកស៊ីជាមួយអ្នកដទៃ សូម្បីតែអ្នកនោះជាមិត្តភក្ដិក៏ដោយ យើងអាចបង្ការជម្លោះដោយធ្វើកិច្ចសន្យាជាមួយគ្នាទុកជាមុន។ ដូចយេរេមាជាអ្នកបម្រើរបស់ព្រះយេហូវ៉ាបានសរសេរថា៖ «[ខ្ញុំ]ធ្វើសំបុត្រ ហើយបិទត្រា រួចហៅស្មរបន្ទាល់[ឬសាក្សី]មក ហើយថ្លឹងប្រាក់ក្នុងជញ្ជីងប្រគល់ដល់គាត់»។—យេរេមា ៣២:១០
• វិធីធ្វើជាមនុស្សដែលតែងតែគិតពីអ្វីដែលលើកទឹកចិត្ត
«អ្វីៗដែលពិត . . . ដែលគួរឲ្យស្រឡាញ់ . . . ដែលមានកេរ្ដិ៍ឈ្មោះល្អ អ្វីដែលប្រកបដោយគុណធម៌ និងអ្វីដែលគួរឲ្យសរសើរ ចូរបន្តពិចារណាអ្វីៗទាំងនោះ»។—ភីលីព ៤:៨
គម្ពីររៀបរាប់ថាការគិតតែពីអ្វីដែលធ្វើឲ្យធ្លាក់ទឹកចិត្តគឺមិនល្អទេ ហើយក៏ផ្ដន្ទាទោសអ្នកដែល«ចេះតែត្អូញត្អែរ រអ៊ូរទាំអំពីជីវភាពរបស់ខ្លួន»។ គម្ពីរចែងថា៖ «ចូរអរសប្បាយនឹងសេចក្ដីសង្ឃឹម»។—យូដាស ៤, ១៦; រ៉ូម ១២:១២
ការអនុវត្តតាមសេចក្ដីណែនាំល្អៗទាំងនេះ មិនគ្រាន់តែជួយឲ្យយើងមានភាពសុខសាន្តនិងចិត្តស្កប់ឥឡូវប៉ុណ្ណោះទេ តែក៏ជួយឲ្យយើងធ្វើតាមអ្វីដែលព្រះតម្រូវពីយើង ហើយទទួលពរពីលោកផងដែរ។ គម្ពីរចែងថា៖ «ពួកអ្នកសុចរិតនឹងបានស្រុកទុកជាមរដក ហើយនឹងនៅក្នុងស្រុកនោះជានិច្ច»។—ទំនុកតម្កើង ៣៧:២៩
[រូបភាពនៅទំព័រ៥]
អាគីណូរី កាលដែលធ្វើការក្រុមហ៊ុន (ខាងឆ្វេង) ហើយអាគីណូរីសព្វថ្ងៃជាមួយភរិយាកំពុងផ្សព្វផ្សាយ យ៉ាងរីករាយនូវសេចក្ដីពិតពីគម្ពីរ