មូលហេតុដែលសួនច្បារអេដែនសំខាន់ចំលោកអ្នក
មូលហេតុដែលសួនច្បារអេដែនសំខាន់ចំពោះលោកអ្នក
ក្នុងការប្រឆាំងនឹងកំណត់ហេតុអំពីសួនច្បារអេដែន ពួកអ្នកប្រាជ្ញបានលើកឡើងចំណុចមួយដែលគួរឲ្យភ្ញាក់ផ្អើល ដែលថាគ្មានបទគម្ពីរឯទៀតដែលគាំទ្ររឿងនេះទេ។ ជាឧទាហរណ៍ សាស្ដ្រាចារ្យម្នាក់ខាងសាសនាឈ្មោះប៉ូល ម៉ូរីសបានសរសេរថា៖ «គ្មានបទគម្ពីរណាសោះដែលបានត្រូវសរសេរក្រោយមក ដែលទាក់ទងយ៉ាងចំៗនឹងរឿងសួនច្បារអេដែនឡើយ»។ «អ្នកប្រាជ្ញ»ឯទៀតប្រហែលជាឯកភាពនឹងការសន្និដ្ឋានរបស់គាត់ តែនេះគឺខុសស្រឡះពីហេតុការណ៍ពិតតែម្ដង។
តាមពិត មានខគម្ពីរជាច្រើនដែលទាក់ទងនឹងសួនច្បារអេដែន អាដាម អេវ៉ា និងសត្វពស់។ * ប៉ុន្តែកំហុសរបស់ពួកអ្នកប្រាជ្ញគឺតិចតួចណាស់បើប្រៀបធៀបទៅនឹងកំហុសដ៏ធំរបស់ពួកអ្នកដឹកនាំសាសនានិងពួកអ្នកដែលទិតៀនគម្ពីរ។ ពួកគេបានធ្វើឲ្យមនុស្សមិនជឿទៅលើកំណត់ហេតុអំពីសួនច្បារអេដែន ហើយដោយធ្វើដូច្នេះ តាមពិតពួកគេក៏ធ្វើឲ្យមនុស្សមិនជឿទៅលើគម្ពីរទាំងមូលដែរ។ តើដោយរបៀបណា?
ការយល់ដឹងអំពីអ្វីដែលបានកើតឡើងនៅសួនច្បារអេដែនគឺសំខាន់ចាំបាច់ដើម្បីយល់ដឹងព័ត៌មានឯទៀតក្នុងគម្ពីរ។ ជាឧទាហរណ៍ បណ្ដាំរបស់ព្រះបានត្រូវសរសេរដើម្បីជួយយើងឲ្យរកឃើញចម្លើយចំពោះសំណួរសំខាន់ៗបំផុតដែលមនុស្សធ្លាប់ឆ្ងល់។ ម្ដងហើយម្ដងទៀត ចម្លើយដែលមានក្នុងគម្ពីរចំពោះសំណួរទាំងនោះសុទ្ធតែទាក់ទិននឹងព្រឹត្ដិការណ៍ដែលបានកើតឡើងនៅសួនច្បារអេដែន។ សូមពិចារណានូវចំណុចខ្លះៗ។
● ហេតុអ្វីយើងចាស់និងស្លាប់? អាដាមនិងអេវ៉ានឹងត្រូវរស់ជារៀងរហូត បើពួកគេនៅតែបន្តចុះចូលចំពោះព្រះយេហូវ៉ា។ មានតែការបះបោរប៉ុណ្ណោះដែលធ្វើឲ្យពួកគេស្លាប់។ តាំងពីថ្ងៃដែលពួកគេបះបោរប្រឆាំងព្រះ នៅថ្ងៃនោះពួកគេចាប់ផ្ដើមស្លាប់។ (លោកុប្បត្តិ ២:១៦, ១៧; ៣:១៩) ពួកគេលែងមានភាពល្អឥតខ្ចោះទៀត ហើយអ្វីដែលពួកគេអាចឲ្យដល់កូនចៅមានតែភាពខុសឆ្គងនិងភាពមិនល្អឥតខ្ចោះតែប៉ុណ្ណោះ។ ហេតុនេះ គម្ពីរពន្យល់ថា៖ «ដូចភាពខុសឆ្គងបានចូលក្នុងពិភពលោកតាមរយៈបុរសតែម្នាក់ ហើយសេចក្ដីស្លាប់បានចូលតាមរយៈភាពខុសឆ្គង ដូច្នេះ សេចក្ដីស្លាប់បានឆ្លងរាលដាលដល់មនុស្សទាំងអស់ ពីព្រោះពួកគេទាំងអស់គ្នាជាអ្នកធ្វើខុស»។—រ៉ូម ៥:១២
● ហេតុអ្វីព្រះអនុញ្ញាតឲ្យមានអំពើទុច្ចរិត? ក្នុងសួនច្បារលោកុប្បត្តិ ៣:៣-៥) យ៉ាងនេះ វាបានធ្វើឲ្យមានការសង្ស័យទៅលើភាពត្រឹមត្រូវនៃសិទ្ធិគ្រប់គ្រងរបស់ព្រះ។ អាដាម និងអេវ៉ាសម្រេចចិត្តស្ដាប់តាមសាថាន ហើយបានបដិសេធចំពោះសិទ្ធិគ្រប់គ្រងរបស់ព្រះយេហូវ៉ា។ ដោយពួកគេធ្វើយ៉ាងនេះ នោះហាក់ដូចជាពួកគេអះអាងថា មនុស្សអាចជ្រើសរើសអ្វីដែលល្អនិងអ្វីដែលអាក្រក់ដោយខ្លួនឯង។ ដោយសារព្រះយេហូវ៉ាមានប្រាជ្ញា និងយុត្ដិធម៌ដែលល្អឥតខ្ចោះ លោកជ្រាបថាមានវិធីតែមួយគត់ដើម្បីឆ្លើយតបយ៉ាងត្រឹមត្រូវចំពោះការចោទប្រកាន់ទាំងនោះ ពោលគឺទុកពេលឲ្យមនុស្សមានឱកាសគ្រប់គ្រងដោយខ្លួនឯងតាមការសម្រេចចិត្តរបស់ពួកគេ។ អំពើទុច្ចរិតដែលបណ្ដាលមកពីការគ្រប់គ្រងរបស់មនុស្ស ដែលមួយផ្នែកមកពីសាថាន បានបញ្ជាក់បន្ដិចម្ដងៗនូវការពិតមួយ ដែលថាមនុស្សមិនអាចគ្រប់គ្រងខ្លួនឯងដោយគ្មានជំនួយពីព្រះបានឡើយ។—យេរេមា ១០:២៣
អេដែន សាថានបានចោទថាព្រះជាអ្នកកុហកដែលលាក់អ្វីដ៏ល្អពីមនុស្សជាតិ។ (● តើអ្វីជាគោលបំណងរបស់ព្រះសម្រាប់ផែនដី? ព្រះយេហូវ៉ាបានធ្វើឲ្យសួនច្បារអេដែនល្អស្រស់បំព្រង។ លោកបង្គាប់អាដាម និងអេវ៉ាឲ្យបង្កើតកូនឲ្យមានពេញផែនដី ហើយ«បង្ក្រាប»ឬថែរក្សាផែនដីទាំងមូលដើម្បីឲ្យមានសោភណភាពដូចសួនច្បារអេដែន។ (លោកុប្បត្តិ ១:២៨) ដូច្នេះ គោលបំណងរបស់ព្រះគឺឲ្យផែនដីក្លាយទៅជាសួនឧទ្យានមួយសម្រាប់មនុស្សល្អឥតខ្ចោះដែលជាកូនចៅរបស់អាដាមនិងអេវ៉ា។ ព័ត៌មានភាគច្រើនក្នុងគម្ពីរគឺរៀបរាប់អំពីវិធីដែលព្រះប្រើដើម្បីសម្រេចគោលបំណងដើមរបស់លោក។
● ហេតុអ្វីលោកយេស៊ូគ្រិស្តកើតមកជាមនុស្សនៅផែនដី? ការបះបោរប្រឆាំងនៅក្នុងសួនច្បារអេដែននាំឲ្យអាដាម អេវ៉ា និងកូនចៅរបស់ពួកគេទទួលការកាត់ទោសដល់ស្លាប់ ប៉ុន្តែដោយសេចក្ដីស្រឡាញ់ ព្រះបានផ្ដល់សេចក្ដីសង្ឃឹមដល់មនុស្សជាតិវិញ។ លោកបានចាត់បុត្ររបស់លោកឲ្យមកផែនដីដើម្បីផ្ដល់នូវអ្វីមួយដែលគម្ពីរហៅថា ថ្លៃលោះ។ (ម៉ាថាយ ២០:២៨) តើនេះមានន័យយ៉ាងណា? គម្ពីរហៅលោកយេស៊ូជា«អាដាមចុងក្រោយ»ដែលលោកបានសម្រេចនូវអ្វីដែលអាដាមមិនបានធ្វើ។ លោកយេស៊ូបានរក្សាភាពល្អឥតខ្ចោះរបស់លោកដោយនៅបន្តស្មោះត្រង់ចំពោះព្រះយេហូវ៉ា។ ក្រោយមក លោកស្ម័គ្រចិត្តផ្ដល់ជីវិតរបស់លោកជាគ្រឿងបូជា ឬថ្លៃលោះ។ ដោយធ្វើដូច្នេះ លោកផ្ដល់នូវវិធីមួយដែលឲ្យមនុស្សស្មោះត្រង់ទាំងអស់អាចទទួលការអភ័យទោសចំពោះអំពើខុសឆ្គង ហើយនៅទីបំផុតទទួលជីវិតដែលអាដាមនិងអេវ៉ាមានមុនពេលដែលពួកគេធ្វើខុស។ (កូរិនថូសទី១ ១៥:២២, ៤៥; យ៉ូហាន ៣:១៦) យ៉ាងនេះ លោកយេស៊ូបានធានាថាគោលបំណងរបស់ព្រះដើម្បីធ្វើឲ្យផែនដីក្លាយទៅជាសួនឧទ្យានដូចសួនអេដែន នឹងបានសម្រេចពិតប្រាកដមែន។ *
គោលបំណងរបស់ព្រះមិនពិបាកយល់ឬជាសេចក្ដីបង្រៀនដែលស្រពិចស្រពិលឡើយ តែជាគោលបំណងដែលមានពិតប្រាកដមែន។ សួនច្បារអេដែនធ្លាប់មាននៅផែនដីពិតមែន ហើយក៏ធ្លាប់មានសត្វនិងមនុស្សរស់នៅក្នុងនោះដែរ។ ដូចគ្នាដែរសេចក្ដីសន្យារបស់ព្រះចំពោះអនាគតនឹងក្លាយជាការពិតនៅពេលឆាប់ៗខាងមុខនេះ។ តើលោកអ្នកអាចរួមចំណែកក្នុងអនាគតនេះឬទេ? នេះអាស្រ័យទៅលើលោកអ្នក។ ព្រះចង់ឲ្យមនុស្សច្រើនបំផុតមានអនាគតនោះ សូម្បីតែពួកអ្នកដែលមិនប្រព្រឹត្តស្របតាមគោលបំណងលោកក៏ដោយ។—ធីម៉ូថេទី១ ២:៣, ៤
កាលដែលលោកយេស៊ូហៀបនឹងស្លាប់ លោកបាននិយាយជាមួយបុរសម្នាក់ដែលមិនបានធ្វើតាមគោលបំណងរបស់ព្រះ។ បុរសនោះជាឧក្រិដ្ឋជន ហើយគាត់ដឹងថាគាត់សមនឹងទទួលការប្រហារជីវិត។ ប៉ុន្តែគាត់បានរកការសម្រាលទុក្ខនិងសេចក្ដីសង្ឃឹមពីលោកយេស៊ូ។ តើលោកបានតបឆ្លើយយ៉ាងណា? លោកមានប្រសាសន៍ថា៖ «អ្នកនឹងនៅជាមួយនឹងខ្ញុំក្នុងសួនឧទ្យាន»។ (លូកា ២៣:៤៣) លោកយេស៊ូចង់ឲ្យបុរសដែលជាអតីតឧក្រិដ្ឋជននេះ ទទួលការប្រោសឲ្យរស់ឡើងវិញ ហើយមានឱកាសរស់នៅជារៀងរហូតក្នុងសួនឧទ្យានដូចសួនច្បារអេដែនដែរ។ ចុះលោកអ្នកវិញ តើលោកយេស៊ូចង់ឲ្យលោកអ្នកមានអនាគតដូច្នេះដែរឬទេ? លោកប្រាកដជាចង់មែន! បិតារបស់លោកក៏ចង់ដែរ! បើលោកអ្នកចង់មានអនាគតនេះ សូមព្យាយាមអស់ពីសមត្ថភាពដើម្បីរៀនអំពីព្រះដែលបានបង្កើតសួនច្បារអេដែននេះ។
[កំណត់សម្គាល់]
^ វគ្គ 3 ជាឧទាហរណ៍ សូមមើលលោកុប្បត្តិ ១៣:១០; ចោទិយកថា ៣២:៨; របាក្សត្រទី១ ១:១; អេសាយ ៥១:៣; អេសេគាល ២៨:១៣; ៣១:៨, ៩; លូកា ៣:៣៨; រ៉ូម ៥:១២-១៤; កូរិនថូសទី១ ១៥:២២, ៤៥; កូរិនថូសទី២ ១១:៣; ធីម៉ូថេទី១ ២:១៣, ១៤; យូដាស ១៤; ការបើកបង្ហាញ ១២:៩។
^ វគ្គ 8 ដើម្បីរៀនថែមទៀតអំពីថ្លៃលោះដែលជាគ្រឿងបូជារបស់គ្រិស្ត សូមមើលជំពូកទី៥នៃសៀវភៅតើព្រះគម្ពីរពិតជាបង្រៀនយ៉ាងណា?ដែលបានត្រូវបោះពុម្ពផ្សាយដោយសាក្សីព្រះយេហូវ៉ា។
[ប្រអប់/រូបភាពនៅទំព័រ១០]
ទំនាយមួយដែលទាក់ទងនឹងគម្ពីរទាំងមូល
«អញនឹងធ្វើឲ្យឯង[សត្វពស់] ហើយនឹងស្ត្រី គឺទាំងពូជឯងនឹងពូជនាងមានសេចក្ដីខ្មាំងនឹងគ្នា ពូជនាងនឹងកិន ក្បាលឯង ហើយឯងនឹងចឹកកែងជើងគេ»។—លោកុប្បត្តិ ៣:១៥
ទំនាយខាងលើនេះជាទំនាយដំបូងក្នុងគម្ពីរដែលព្រះបានទាយនៅសួនច្បារអេដែន។ តើស្ត្រី ពូជរបស់ស្ត្រី សត្វពស់ និងពូជរបស់សត្វពស់ ជានរណា? តើតួអង្គទាំងបួននេះមាន«សេចក្ដីខ្មាំង»នឹងគ្នាយ៉ាងដូចម្ដេច?
សត្វពស់
មេកំណាចសាថាន។—ការបើកបង្ហាញ ១២:៩
ស្ត្រី
អង្គការរបស់ព្រះយេហូវ៉ានៅស្ថានសួគ៌ដែលមានសុទ្ធតែបុគ្គលវិញ្ញាណ។ (កាឡាទី ៤:២៦, ២៧) អេសាយបានរៀបរាប់អំពី«ស្ត្រី»នេះ ដោយទាយថានាងនឹងបង្កើតប្រជាជាតិមួយនៅថ្ងៃអនាគតដែលមានក្ដីសង្ឃឹមទៅស្ថានសួគ៌។—អេសាយ ៥៤:១; ៦៦:៨
ពូជរបស់សត្វពស់
ពួកអ្នកដែលសម្រេចចិត្តធ្វើតាមបំណងប្រាថ្នារបស់សាថាន។—យ៉ូហាន ៨:៤៤
ពូជរបស់ស្ត្រី
ផ្នែកសំខាន់នៃពូជនេះគឺជាលោកយេស៊ូគ្រិស្តដែលបានកើតចេញពីអង្គការរបស់ព្រះយេហូវ៉ានៅស្ថានសួគ៌។ «ពូជ»នេះក៏រួមបញ្ចូលបងប្អូនរួមជំនឿរបស់គ្រិស្តដែលគ្រប់គ្រងជាមួយលោកនៅស្ថានសួគ៌។ ពួកគ្រិស្តសាសនិកទាំងនោះដែលព្រះបានរើសតាំង រួមគ្នាប្រៀបដូចជាប្រជាជាតិមួយ ពោលគឺ«អ៊ីស្រាអែលនៃព្រះ»។—កាឡាទី ៣:១៦, ២៩; ៦:១៦; លោកុប្បត្តិ ២២:១៨
ការចឹកកែងជើង
មេស្ស៊ីបានរងរបួសយ៉ាងឈឺចាប់ តែមិនមែនរហូតទេ។ សាថានមានជោគជ័យក្នុងការនាំឲ្យគេសម្លាប់លោកយេស៊ូនៅផែនដី តែលោកយេស៊ូបានត្រូវប្រោសឲ្យរស់ឡើងវិញ។
ការកិនក្បាល
ការវាយសាថានឲ្យស្លាប់។ លោកយេស៊ូនឹងធ្វើឲ្យសាថានលែងមានជារៀងរហូត។ មុនលោកធ្វើដូច្នេះ លោកនឹងបំបាត់ចោលនូវអំពើអាក្រក់ដែលសាថានបណ្ដាលឲ្យមានចាប់តាំងពីអ្វីៗដែលបានកើតឡើងក្នុងសួនច្បារអេដែនមកនោះ។—យ៉ូហានទី១ ៣:៨; ការបើកបង្ហាញ ២០:១០
ដើម្បីដឹងប្រធានបទសំខាន់ចម្បងក្នុងគម្ពីរ សូមមើលសៀវភៅស្តើង គម្ពីរបរិសុទ្ធ តើរៀបរាប់អំពីអ្វី? ដែលបានបោះពុម្ពផ្សាយដោយសាក្សីព្រះយេហូវ៉ា។
[រូបភាពនៅទំព័រ១១]
អាដាមនិងអេវ៉ាបានទទួលរងនូវផលវិបាកដែលមកពីអំពើខុសឆ្គង