សំបុត្រពីគណៈអភិបាល
ជូនចំពោះបងប្អូនដែលជាអ្នកស្រឡាញ់ព្រះយេហូវ៉ា:
លោកយេស៊ូបានមានប្រសាសន៍ថា៖ «អ្នករាល់គ្នានឹងស្គាល់សេចក្ដីពិត ហើយសេចក្ដីពិតនោះនឹងរំដោះអ្នករាល់គ្នាឲ្យមានសេរីភាព»។ (យ៉ូហាន ៨:៣២) ពាក្យទាំងនោះពិតជាគួរឲ្យលើកទឹកចិត្ដមែន! មនុស្សអាចស្គាល់សេចក្ដីពិតបាន ទោះជាពួកគេរស់នៅ«គ្រាចុងក្រោយបង្អស់»ដ៏សែនលំបាកនេះ ដែលពោរពេញទៅដោយសេចក្ដីបង្រៀនមិនពិតក៏ដោយ។ (ធីម៉ូថេទី២ ៣:១) តើអ្នកនៅចាំឬទេ ពេលដែលអ្នកទើបនឹងស្គាល់សេចក្ដីពិតដែលបានត្រូវពន្យល់ក្នុងបណ្ដាំរបស់ព្រះ? អ្នកច្បាស់ជារំភើបចិត្ដណាស់នៅពេលនោះ!
ពិតមែនតែការមានចំណេះត្រឹមត្រូវអំពីសេចក្ដីពិត និងការប្រាប់អ្នកឯទៀតជាទៀងទាត់អំពីសេចក្ដីពិតនោះគឺសំខាន់ ប៉ុន្ដែមានអ្វីមួយទៀតដែលសំខាន់ដែរ គឺយើងត្រូវប្រព្រឹត្ដសមស្របតាមសេចក្ដីពិត។ ដើម្បីធ្វើដូច្នេះ យើងត្រូវរក្សាខ្លួនជាមនុស្សដែលព្រះស្រឡាញ់។ តើនេះមានន័យដូចម្ដេច? ប្រសាសន៍របស់លោកយេស៊ូនៅរាត្រីមុននឹងលោកទទួលមរណភាពជួយបញ្ជាក់ចម្លើយចំពោះសំណួរនោះ។ លោកបានប្រាប់ពួកសាវ័កស្មោះត្រង់ថា៖ «ប្រសិនបើអ្នករាល់គ្នាប្រព្រឹត្ដតាមបង្គាប់របស់ខ្ញុំ អ្នករាល់គ្នានឹងរក្សាខ្លួនជាអ្នកដែលខ្ញុំស្រឡាញ់ ដូចខ្ញុំបានប្រព្រឹត្ដតាមបង្គាប់របស់បិតាដែលនៅស្ថានសួគ៌ ហើយក៏រក្សាខ្លួនជាអ្នកដែលលោកស្រឡាញ់ដែរ»។—យ៉ូហាន ១៥:១០
សូមកត់សម្គាល់ថា លោកយេស៊ូបានរក្សាខ្លួនជាមនុស្សដែលព្រះស្រឡាញ់ដោយធ្វើតាមបង្គាប់របស់បិតាលោក។ គឺដូចគ្នាដែរសម្រាប់យើងសព្វថ្ងៃនេះ។ ដើម្បីរក្សាខ្លួនជាមនុស្សដែលព្រះស្រឡាញ់ យើងត្រូវធ្វើតាមសេចក្ដីពិតក្នុងជីវិតប្រចាំថ្ងៃ។ នៅរាត្រីដដែលនោះ លោកយេស៊ូបានមានប្រសាសន៍ថា៖ «ប្រសិនបើអ្នករាល់គ្នាដឹងការទាំងនេះហើយ អ្នកនឹងមានសុភមង្គលបើធ្វើការទាំងនោះ»។—យ៉ូហាន ១៣:១៧
យើងពិតជាសង្ឃឹមថាសៀវភៅនេះនឹងជួយអ្នកបន្ដអនុវត្ដសេចក្ដីពិតក្នុងជីវិតរបស់អ្នក ហើយរក្សាខ្លួន«ជាមនុស្សដែលព្រះស្រឡាញ់ . . . ដើម្បីឲ្យបានជីវិតដែលគ្មានទីបញ្ចប់»។—យូដាស ២១
គណៈអភិបាលនៃសាក្សីព្រះយេហូវ៉ា
លោកអ្នកក៏ប្រហែលជាចូលចិត្តដែរ
សំណួរដែលមនុស្សជាច្រើនសួរអំពីសាក្សីព្រះយេហូវ៉ា
តើគណៈអភិបាលនៃសាក្សីព្រះយេហូវ៉ាជាអ្នកណា?
តើសមាជិកទាំងនោះជាមេដឹកនាំនៃអង្គការយើងឬទេ?
