ជំពូកទី៩២
អ្នកជំងឺឃ្លង់ម្នាក់បង្ហាញការដឹងគុណ
-
លោកយេស៊ូបានធ្វើឲ្យអ្នកកើតជំងឺឃ្លង់១០នាក់ជាសះស្បើយ
គម្រោងការរបស់ពួកក្រុមប្រឹក្សាជាន់ខ្ពស់ក្នុងការសម្លាប់លោកយេស៊ូមិនបានជោគជ័យឡើយ ដោយសារលោកយេស៊ូបានចេញពីតំបន់នោះ ហើយធ្វើដំណើរឆ្ពោះទៅក្រុងអេប្រាអ៊ីមដែលនៅខាងជើងឆៀងខាងកើតក្រុងយេរូសាឡិម។ លោកស្នាក់នៅទីនោះជាមួយនឹងពួកអ្នកកាន់តាម នោះជាកន្លែងដែលនៅឆ្ងាយពីពួកសត្រូវរបស់លោក។ (យ៉ូហាន ១១:៥៤) ក៏ប៉ុន្តែ ពេលសម្រាប់ធ្វើបុណ្យរំលង នាឆ្នាំ៣៣ គ.ស. កាន់តែខិតចូលមកដល់ហើយ ដូច្នេះមិនយូរទៀតលោកនឹងចាប់ផ្ដើមធ្វើដំណើរម្ដងទៀត។ លើកនេះ លោកធ្វើដំណើរទៅទិសខាងជើងកាត់តាមស្រុកសាម៉ារី រួចឆ្ពោះទៅស្រុកកាលីឡេ។ នេះជាដំណើរទស្សនកិច្ចលើកចុងក្រោយរបស់លោកយេស៊ូក្នុងតំបន់នោះ មុននឹងលោកស្លាប់។
មិនយូរក្រោយពីលោកយេស៊ូចាប់ផ្ដើមធ្វើដំណើរពីភូមិមួយទៅភូមិមួយ លោកបានប្រទះឃើញបុរសកើតជំងឺឃ្លង់១០នាក់។ ក្នុងករណីខ្លះ ជំងឺនេះអាចធ្វើឲ្យអវយវៈនៃរូបកាយរលួយបន្ដិចម្ដងៗ ដូចជាម្រាមដៃ ម្រាមជើង និងត្រចៀកជាដើម។ (ជនគណនា ១២:១០-១២) នៅសម័យមុន ច្បាប់របស់ព្រះតម្រូវឲ្យអ្នកដែលកើតជំងឺឃ្លង់ស្រែកយ៉ាងខ្លាំងថា៖ «ខ្ញុំស្មោកគ្រោកៗ!» ហើយគាត់ក៏ត្រូវរស់នៅដាច់ដោយឡែកពីមនុស្សឯទៀតដែរ។—លេវីវិន័យ ១៣:៤៥, ៤៦
ហេតុនេះហើយបានជាមនុស្សឃ្លង់១០នាក់នោះឈរឆ្ងាយពីលោកយេស៊ូ។ ប៉ុន្តែ ពួកគេបន្លឺសំឡេងថា៖ «លោកគ្រូយេស៊ូ! សូមមេត្ដាជួយយើងផង!»។ ពេលលោកក្រឡេកទៅឃើញពួកគេ នោះក៏បង្គាប់ពួកគេថា៖ «ចូរទៅបង្ហាញខ្លួនឲ្យពួកសង្ឃឃើញ»។ (លូកា ១៧:១៣, ១៤) ការដែលលោកយេស៊ូធ្វើដូច្នេះ បង្ហាញថាលោកគោរពច្បាប់របស់ព្រះ ដែលផ្ដល់សិទ្ធិអំណាចឲ្យពួកសង្ឃក្នុងការប្រកាសថាអ្នកដែលកើតជំងឺឃ្លង់បានជាស្អាតពីជំងឺនេះហើយ។ រួចមក ពួកគេអាចរស់នៅក្នុងចំណោមមនុស្សដែលមានសុខភាពល្អឡើងវិញបាន។—លេវីវិន័យ ១៣:៩-១៧
បុរសឃ្លង់១០នាក់នោះមានទំនុកចិត្តលើលោកយេស៊ូដែលមានឫទ្ធានុភាពក្នុងការធ្វើអព្ភូតហេតុផ្សេងៗ។ ដូច្នេះ ពួកគេបានចេញទៅជួបពួកសង្ឃ សូម្បីតែពួកគេមិនទាន់ជានៅឡើយ។ កាលដែលពួកគេកំពុងធ្វើដំណើរ ពួកគេបានទទួលរង្វាន់ដោយសារពួកគេជឿលើលោកយេស៊ូ ពោលគឺពួកគេឃើញហើយមានអារម្មណ៍ថាពួកគេមានសុខភាពល្អឡើងវិញ!
បុរសកើតឃ្លង់៩នាក់ដែលបានជាស្អាតបន្តដំណើរទៅមុខទៀត តែបុរសម្នាក់ទៀតមិនបានទៅទេ។ បុរសនោះជាជនជាតិសាម៉ារី គាត់ត្រឡប់មករកលោកយេស៊ូវិញ។ ហេតុអ្វី? ពីព្រោះបុរសនោះដឹងគុណយ៉ាងជ្រាលជ្រៅចំពោះលោកយេស៊ូសម្រាប់អ្វីដែលបានកើតឡើងចំពោះគាត់។ ពេលបុរសដែលធ្លាប់កើតឃ្លង់នេះបានឃើញថាខ្លួនគាត់បានជាស្អាត នោះគាត់«បន្លឺសំឡេងយ៉ាងខ្លាំងសរសើរតម្កើងព្រះ» ដោយជឿជាក់ថាគឺព្រះដែលបានធ្វើឲ្យគាត់មានសុខភាពល្អឡើងវិញ។ (លូកា ១៧:១៥) ពេលគាត់រកលោកយេស៊ូឃើញ គាត់ក៏លុតជង្គង់មុខលោក ហើយអរគុណលោក។
ពេលលោកយេស៊ូឃើញដូចនោះ លោកមានប្រសាសន៍ទៅអ្នកដែលនៅជាមួយនឹងលោកថា៖ «មានដប់នាក់ដែលបានត្រូវធ្វើឲ្យជាស្អាត មែនទេ? ចុះតើប្រាំបួននាក់ទៀតនៅឯណា? តើគ្មានអ្នកណាវិលមកវិញដើម្បីសរសើរតម្កើងព្រះក្រៅពីបុរសជនជាតិដទៃម្នាក់នេះទេឬ?»។ រួចលោកមានប្រសាសន៍ទៅបុរសសាម៉ារីនោះថា៖ «ចូរក្រោកឡើង ហើយអញ្ជើញទៅចុះ ជំនឿរបស់អ្នកបានធ្វើឲ្យអ្នកជាសះស្បើយ»។—លូកា ១៧:១៧-១៩
ការដែលលោកយេស៊ូធ្វើឲ្យបុរសកើតឃ្លង់១០នាក់នោះជាសះស្បើយ បង្ហាញថាលោកមានការគាំទ្រពីព្រះយេហូវ៉ា។ ឥឡូវ ម្នាក់ក្នុងចំណោម១០នាក់នោះមិនគ្រាន់តែបានជា ដោយសារជឿលើលោកយេស៊ូប៉ុណ្ណោះទេ តែគាត់ទំនងជាដើរតាមផ្លូវដែលនាំគាត់ឲ្យទទួលជីវិត។ ទោះជាយើងមិនបានរស់នៅគ្រាដែលព្រះបានប្រើលោកយេស៊ូឲ្យធ្វើការអស្ចារ្យដើម្បីធ្វើឲ្យជាសះស្បើយពីជំងឺផ្សេងៗក្ដី តែដោយមានជំនឿលើលោកយេស៊ូ យើងក៏អាចដើរតាមផ្លូវដែលនាំយើងឲ្យទទួលជីវិតដែរ ពោលគឺជីវិតដែលគ្មានទីបញ្ចប់។ តើយើងបង្ហាញថាយើងដឹងគុណព្រះនិងលោកយេស៊ូដូចបុរសជនជាតិសាម៉ារីនោះឬទេ?
