ហេតុអ្វីប្រុសៗមិនចូលចិត្តខ្ញុំ?
ជំពូកទី២៧
ហេតុអ្វីប្រុសៗមិនចូលចិត្តខ្ញុំ?
គាត់ដឹងថាខ្ញុំមានប្រជាប្រិយភាព ដោយសារខ្ញុំប្រាប់គាត់ថាមានប្រុសជាច្រើនចោមរោមខ្ញុំ។ គាត់សើច ពេលខ្ញុំប្រាប់ថាមិត្តភក្តិខ្លះធ្វើអ្វីមិនចេះគិត។ គាត់ក៏ដឹងដែរថាខ្ញុំឆ្លាត ព្រោះពេលគាត់និយាយខុស ខ្ញុំកែគាត់ភ្លាមៗ។ ប៉ុន្តែ ពេលណាហ្ន៎បានគាត់សុំខ្ញុំធ្វើសង្សារ!
នាងស្អាត តែនាងដូចជាមិនសូវចេះគិតរាក់ជ្រៅ! ជួនកាល ខ្ញុំនិយាយរឿងអ្វីមួយមិនទាន់ចប់ផង នាងកែសម្ដីខ្ញុំភ្លាមៗ! ពេលឃើញនាងម្ដងៗ ខ្ញុំរកតែផ្លូវរត់ទេ។
ប្អូនឆ្ងល់ទេ ហេតុអ្វីបានជាប្រុសៗមិនចាប់អារម្មណ៍ប្អូន? មនុស្សស្រីជាច្រើនមានអារម្មណ៍បែបនេះ! ជាឧទាហរណ៍ យុវតីម្នាក់ឈ្មោះចូអេន មានសម្រស់ស្រស់ស្អាត ទាំងឆ្លាតទាំងប៉ិននិយាយ។ ប៉ុន្តែ នាងសារភាពថា៖ «ខ្ញុំមានអារម្មណ៍ថាប្រុសៗហាក់ដូចជាមិនចូលចិត្តខ្ញុំសោះ។ ខ្ញុំធ្លាប់ចូលចិត្តប្រុសពីរបីនាក់ ហើយពួកគេក៏ចាប់អារម្មណ៍ខ្ញុំមួយរយៈដែរ តែក្រោយមកក៏ឈប់និយាយរកខ្ញុំ!»។
តើប្រុសៗចូលចិត្តនារីបែបណា? ហើយតើអ្វីដែលនាំឲ្យនារីបាត់បង់ភាពទាក់ទាញ? តើធ្វើដូចម្ដេចដើម្បីបានមនុស្សប្រុសល្អ?
អ្វីដែលត្រូវធ្វើ
● ស្គាល់ចិត្តខ្លួនឯង។ ពេលឈានចូលដល់វ័យជំទង់ ប្អូនទំនងជាចាប់អារម្មណ៍មនុស្សភេទផ្ទុយខ្លាំងជាងមុន។ ប្អូនប្រហែលជាចាប់ចិត្តលើបុរសច្រើនជាងម្នាក់។ នោះជារឿងធម្មតា។ ប៉ុន្តែ បើប្អូនប្រគល់បេះដូងលឿនពេកដល់បុរសដំបូងដែលធ្វើឲ្យចិត្តប្អូនញាប់ញ័រ នោះអាចនាំឲ្យប៉ះពាល់ដល់ផ្លូវចិត្តនិងជំនឿរបស់ប្អូន។ ប្អូនត្រូវការពេលវេលាដើម្បីបណ្ដុះគុណសម្បត្តិផ្សេងៗដែលជួយប្អូន‹ឲ្យចេះគិតគូរ›អំពីរឿងសំខាន់ៗ និងសម្រេចគោលដៅផ្ទាល់ខ្លួនរបស់ប្អូន។—រ៉ូម ១២:២; កូរិនថូសទី១ ៧:៣៦; កូឡុស ៣:៩, ១០
ពិតណាស់ បុរសជាច្រើនចាប់អារម្មណ៍នារីដែលនៅក្មេងខ្ចីនិងគ្មានភាពជឿជាក់។ ប៉ុន្តែ ប្រុសៗបែបនេះចាប់អារម្មណ៍តែរូបកាយរបស់នាងប៉ុណ្ណោះ មិនខ្វល់ថានាងជាមនុស្សបែបណាឡើយ។ ផ្ទុយទៅវិញ បុរសចេះគិតពិចារណានឹងស្វែងរកនារីដែលមានចិត្តគំនិតល្អដើម្បីបង្គ្រប់នូវចំណុចខ្វះខាតរបស់ខ្លួន។—ម៉ាថាយ ១៩:៦
អ្វីដែលប្រុសៗនិយាយ៖ ប្អូនជេមរៀបរាប់ថា៖ «ខ្ញុំគិតថាមនុស្សស្រីដែលមានភាពទាក់ទាញ គឺជាមនុស្សស្រីដែលមានគំនិតផ្ទាល់ខ្លួន មានទំនុកចិត្ត និងធ្វើអ្វីដែលជាខ្លួនឯង»។
ប្អូនដារិនរៀបរាប់ថា៖ «ខ្ញុំចូលចិត្តមនុស្សស្រីស្មោះត្រង់ ចេះគោរព ហើយមិនតែងតែយល់ស្របតាមខ្ញុំគ្រប់រឿងនោះទេ។ ទោះជានាងស្អាតក៏ដោយ ខ្ញុំមិនសប្បាយចិត្តឡើយ បើនាងចេះតែហៃអើតាមខ្ញុំ»។
តើប្អូនគិតយ៉ាងណាចំពោះពាក្យសម្ដីរបស់យុវជនទាំងនោះ?
․․․․․
● ចេះគោរពអ្នកឯទៀត។ ធម្មតាមនុស្សស្រីចង់បានការស្រឡាញ់ ឯមនុស្សប្រុសចង់បានការគោរព។ វាមិនមែនជារឿងចៃដន្យទេ ព្រោះគម្ពីរប្រាប់ថាប្ដីត្រូវស្រឡាញ់ប្រពន្ធដូចខ្លួនឯង ហើយប្រពន្ធត្រូវគោរពប្ដី«យ៉ាងជ្រាលជ្រៅ»។ (អេភេសូរ ៥:៣៣) នេះពិតដូចអ្វីដែលគម្ពីរចែងមែន តាមការស្ទង់មតិមួយបានរកឃើញថា យុវជនជាង៦០ភាគរយនិយាយថា ការគោរពគឺសំខាន់ជាងការស្រឡាញ់។ រីឯ៧០ភាគរយនៃបុរសវ័យចំណាស់ ក៏យល់ស្របនឹងមតិនោះដែរ។
ការគោរពអ្នកឯទៀត មិនមានន័យថាមិនហ៊ានប្រាប់ពីទស្សនៈ ឬក៏អារម្មណ៍របស់ខ្លួនឡើយ។ (ដើមកំណើត ២១:១០-១២) ប៉ុន្តែ ពេលបញ្ចេញយោបល់ របៀបដែលប្អូននិយាយគឺសំខាន់ណាស់ ព្រោះនេះអាចទាក់ទាញបុរសឲ្យចូលមកជិត ឬរុញគាត់ឲ្យចេញទៅឆ្ងាយ។ បើប្អូនកែតម្រូវឬជំទាស់សម្ដីគាត់រហូត នោះអាចធ្វើឲ្យគាត់មានអារម្មណ៍ថាប្អូនមិនសូវគោរពគាត់។ ផ្ទុយទៅវិញ បើប្អូនស្ដាប់មតិរបស់គាត់ ហើយសរសើរចំណុចល្អដែលប្អូនបានឃើញ នោះគាត់ទំនងជាឲ្យតម្លៃនិងទទួលយកយោបល់របស់ប្អូន។ ជាការពិតណាស់ មនុស្សប្រុសដែលចេះគិតពិចារណាក៏កត់សម្គាល់ដែរថា តើប្អូនប្រព្រឹត្តចំពោះក្រុមគ្រួសារ ឬអ្នកឯទៀតដោយការគោរពឬយ៉ាងណា។
អ្វីដែលប្រុសៗនិយាយ៖ ប្អូនអេឌ្រានរៀបរាប់ថា៖ «ខ្ញុំគិតថា ការគោរពជាកត្តាសំខាន់បំផុតក្នុងដំណាក់កាលដំបូងនៃការចូលចិត្តគ្នា។ ក្រោយមក ស្នេហាអាចឈានទៅមុខទៀតបាន»។
ប្អូនម៉ាករៀបរាប់ថា៖ «ខ្ញុំគិតថា បើមនុស្សស្រីចេះគោរពខ្ញុំ នោះនាងអាចស្រឡាញ់ខ្ញុំពិតប្រាកដ»។
តើប្អូនគិតយ៉ាងណាចំពោះពាក្យសម្ដីរបស់យុវជនទាំងនោះ?
․․․․․
● ស្លៀកពាក់សមរម្យនិងរក្សាអនាម័យ។ របៀបដែលប្អូនស្លៀកពាក់និងសម្អិតសម្អាងខ្លួន បង្ហាញឲ្យឃើញចិត្តគំនិតនិងអត្តចរិតរបស់ប្អូនមុនដែលប្អូនចាប់ផ្ដើមនិយាយទៅទៀត។ អ្វីទាំងនោះហាក់ដូចជាបានប្រាប់ខ្លះហើយអំពីប្អូន។ បើប្អូនស្លៀកពាក់សមរម្យថ្លៃថ្នូរ នោះនឹងធ្វើឲ្យបុរសគិតល្អចំពោះប្អូន។ (ធីម៉ូថេទី១ ២:៩) ប៉ុន្តែ បើប្អូនស្លៀកពាក់របៀបបែកស្លុយ ឬលេចលើលេចក្រោម នោះងាយនឹងធ្វើឲ្យគេគិតមិនល្អចំពោះប្អូន!
អ្វីដែលប្រុសៗនិយាយ៖ ប្អូនអេឌ្រានរៀបរាប់ថា៖ «ការតុបតែងខ្លួនរបស់នារី ច្រើនតែបង្ហាញថានាងចូលចិត្តជីវិតបែបណា។ បើនាងស្លៀកពាក់រឹបរាងឬបញ្ចេញសាច់ច្រើន នោះមានន័យថា នាងចង់ទាក់ទាញចិត្តគេ»។
ប្អូនរ៉ាយអិនរៀបរាប់ថា៖ «ខ្ញុំចូលចិត្តនារីដែលចេះថែសក់ឲ្យស្អាត មានក្លិនក្រអូប និងនិយាយស្រទន់។ តាមពិតទៅ ខ្ញុំចូលចិត្តស្រីស្អាតម្នាក់ តែទាស់ត្រង់ថានាងខ្វះអនាម័យ ដូច្នេះខ្ញុំក៏ដកខ្លួនចេញ»។
ប្អូននីកូឡាសរៀបរាប់ថា៖ «មនុស្សស្រីដែលស្លៀកលេចលើលេចក្រោម ពិតជាទាក់ទាញភ្នែកមែន។ តែនោះមិនមែនជាប្រភេទស្រីដែលខ្ញុំចង់យកមកធ្វើជាសង្សារទេ»។
តើប្អូនគិតយ៉ាងណាចំពោះពាក្យសម្ដីរបស់យុវជនទាំងនោះ?
․․․․․
អ្វីដែលមិនត្រូវធ្វើ
● កុំចែចង់។ ពិតមែនថាស្ត្រីមានភាពទាក់ទាញចិត្តបុរស តែភាពទាក់ទាញនោះអាចប្រើទាំងក្នុងផ្លូវល្អនិងផ្លូវអាក្រក់។ (ដើមកំណើត ២៩:១៧, ១៨; សុភាសិត ៧:៦-២៣) បើប្អូនរាយមន្តស្នេហ៍ដាក់បុរសគ្រប់រូប នោះប្អូននឹងល្បីឈ្មោះថាស្រីញ៉ែមិនរើសមុខ។
អ្វីដែលប្រុសៗនិយាយ៖ ប្អូននីកូឡាសរៀបរាប់ថា៖ «គ្រាន់តែអង្គុយជិតស្រីស្អាត ហើយប៉ះស្មាគ្នា ក៏ធ្វើឲ្យចិត្តញាប់ញ័រដែរ។ ដូច្នេះ ខ្ញុំគិតថានារីដែលឧស្សាហ៍ប៉ះបុរសពេលនាងនិយាយជាមួយ នោះមានន័យថានាងកំពុងចែចង់ហើយ»។
ប្អូនហូសេរៀបរាប់ថា៖ «ខ្ញុំគិតថាបើមនុស្សស្រីចេះតែយកដៃមកប៉ះមនុស្សប្រុស ឬដៀងភ្នែកមើលមនុស្សប្រុសគ្រប់រូបដែលដើរកាត់មុខនាង នោះនាងកំពុងចែចង់ហើយ។ ខ្ញុំមិនចូលចិត្តស្រីបែបនោះទេ»។
● កុំតោងស្អិតពេក។ ពេលបុរសនិងស្ត្រីរៀបការរួច គម្ពីរចែងថាពួកគេក្លាយជា«សាច់ឈាមតែមួយ»។ (ដើមកំណើត ២:២៤) ហេតុនេះ ក្រោយរៀបការ ប្ដីប្រពន្ធប្រហែលជាត្រូវលះបង់សេរីភាពជាច្រើនដែលពួកគេធ្លាប់មានពេលនៅលីវ ពីព្រោះពួកគេមានចំណងភ្ជាប់រវាងគ្នានឹងគ្នា។ (កូរិនថូសទី១ ៧:៣២-៣៤) ប៉ុន្តែ បើប្អូនកំពុងមើលចិត្តគ្នាជាមួយបុរសណាម្នាក់ ប្អូនគ្មានសិទ្ធិទាមទារឲ្យគាត់ធ្វើដូចគាត់ជាប្ដីប្អូនទេ ហើយគាត់ក៏គ្មានសិទ្ធិទាមទារឲ្យប្អូនធ្វើដូចប្អូនជាប្រពន្ធគាត់ដែរ។ a តាមពិតទៅ បើប្អូនទទួលស្គាល់ថាគាត់មានសិទ្ធិមានមិត្តភក្ដិផ្សេងទៀត នោះគាត់ប្រហែលជាចូលចិត្តប្អូនកាន់តែខ្លាំង។ បន្ទាប់មក ប្អូននឹងស្គាល់គាត់ច្បាស់ជាងពេលគាត់សេពគប់ជាមួយអ្នកឯទៀត។—សុភាសិត ២០:១១
អ្វីដែលប្រុសៗនិយាយ៖ ប្អូនដារិនរៀបរាប់ថា៖ «បើមនុស្សស្រីចេះតែសួរនាំខ្ញុំគ្រប់រឿង ហើយមិនរាប់អានអ្នកឯទៀតឬមិនខ្វល់អំពីអ្វីក្រៅពីខ្ញុំ នោះខ្ញុំគិតថានាងកំពុងតោងខ្ញុំស្អិតដូចតុកកែ»។
ប្អូនរ៉ាយអិនរៀបរាប់ថា៖ «បើមនុស្សស្រីដែលខ្ញុំទើបតែទាក់ទង ផ្ញើសារមកខ្ញុំឥតឈប់ ហើយចង់ដឹងថាខ្ញុំនៅជាមួយអ្នកណា ជាពិសេសឈ្មោះស្រីៗនៅក្នុងក្រុមដែលខ្ញុំទៅជាមួយ នោះខ្ញុំគិតថានាងកំពុងចាប់ខ្ញុំឲ្យជាប់»។
ប្អូនអេឌ្រានរៀបរាប់ថា៖ «បើមិត្តស្រីមិនទុកពេលឲ្យអ្នកដើរលេងជាមួយមិត្តភក្តិប្រុសៗ ហើយនាងខឹងរាល់ពេលដែលអ្នកមិនហៅនាងទៅជាមួយ នោះបង្ហាញថានាងជាស្រីដែលមិនគួរឲ្យចូលចិត្តឡើយ»។
តើប្អូនគិតយ៉ាងណាចំពោះពាក្យសម្ដីរបស់យុវជនទាំងនោះ?
․․․․․
ចេះឲ្យតម្លៃខ្លួន
ប្អូនទំនងជាស្គាល់មនុស្សស្រីខ្លះដែលសុខចិត្តធ្វើមួយ ដើម្បីឲ្យមនុស្សប្រុសចាប់អារម្មណ៍។ មនុស្សស្រីខ្លះទៀតមិនខ្វល់ពីតម្លៃរបស់ខ្លួនទេ ដោយសារចង់មានសង្សារឬចង់បានប្ដី។ ក៏ប៉ុន្តែ សូមកុំភ្លេចគោលការណ៍ក្នុងគម្ពីរដែលថា‹មនុស្សទទួលផលតាមអ្វីដែលគេសាបព្រោះ›។ (កាឡាទី ៦:៧-៩) បើប្អូនមិនឲ្យតម្លៃខ្លួននិងខ្នាតតម្រាដែលប្អូនកំពុងព្យាយាមធ្វើតាម នោះប្អូនទំនងជាទាក់ទាញបានតែបុរសដែលមិនឲ្យតម្លៃប្អូន។
សូមចាំដែរថា មិនមែនបុរសគ្រប់រូបនឹងចូលចិត្តប្អូនទេ តែនោះអាចជារឿងល្អមួយ! ពីព្រោះបើប្អូនបន្តព្យាយាមថែសម្រស់ខាងក្រៅនិងខាងក្នុងចិត្ត នោះប្អូននឹង«មានតម្លៃថ្លៃណាស់ចំពោះព្រះ»។ មិនត្រឹមតែប៉ុណ្ណោះ ប្អូននឹងរកបានបុរសដែលស័ក្តិសមនឹងប្អូនបំផុត។—ពេត្រុសទី១ ៣:៤
បើប្អូនជាប្រុស ប្អូនប្រហែលជាឆ្ងល់ថា‹ហេតុអ្វីស្រីៗមិនចូលចិត្តខ្ញុំ?›។
[កំណត់សម្គាល់]
a ពិតណាស់ ក្រោយពីភ្ជាប់ពាក្យរួច ពួកគេមានទំនួលខុសត្រូវច្រើនជាងចំពោះគ្នា។
បទគម្ពីរសំខាន់
«រូបឆោមឆាយអាចជាការបោកបញ្ឆោត ហើយសម្រស់មិននៅគង់វង្សរហូតទេ តែស្ត្រីដែលកោតខ្លាចព្រះយេហូវ៉ានឹងទទួលបានការសរសើរ»។—សុភាសិត ៣១:៣០
យោបល់
កុំផាត់មុខក្រាស់ពេក ឬធ្វើខ្លួនហួសហេតុ! ព្រោះនេះអាចនាំឲ្យអ្នកឯទៀតគិតមិនល្អចំពោះប្អូន។ ពួកគេអាចគិតថាប្អូនឈ្លក់វង្វេងនឹងខ្លួនឯង ឬចង់បានចំណាប់អារម្មណ៍យ៉ាងខ្លាំង។
តើប្អូនដឹងទេ . . . ?
បើប្អូនទាមទារចំណាប់អារម្មណ៍ហួសហេតុពេក នោះអាចបំផ្លាញទំនាក់ទំនងរវាងប្អូននិងគាត់។
គម្រោងអនុវត្ត!
ខ្ញុំចង់កែលម្អលក្ខណៈខ្លះរបស់ខ្ញុំដូចជា ․․․․․
អ្វីដែលខ្ញុំចង់សួរឪពុកម្ដាយរបស់ខ្ញុំអំពីរឿងនេះគឺ ․․․․․
តើប្អូនគិតយ៉ាងណា?
● តើប្អូនអាចបង្ហាញយ៉ាងដូចម្ដេចថាប្អូនចេះទទួលយកគំនិតនិងអារម្មណ៍របស់មនុស្សប្រុស?
● តើប្អូនអាចបង្ហាញយ៉ាងណាថាប្អូនចេះឲ្យតម្លៃខ្លួន?
[ឃ្លាអក្សរធំនៅទំព័រ១៩០]
«ប្អូនដេមៀន ប្រាប់ថា៖ ‹និយាយតាមត្រង់ ដំបូងខ្ញុំមើលសិនថានាងស្អាតឬមិនស្អាត។ តែក្រោយមកបើនាងគ្មានគោលដៅជាក់លាក់ក្នុងជីវិតទេ ទោះជានាងស្អាតក៏ខ្ញុំលែងចាប់អារម្មណ៍ដែរ។ ផ្ទុយទៅវិញ បើនាងមានគោលដៅច្បាស់លាស់ ជាពិសេសបន្ទាប់ពីនាងបានសម្រេចគោលដៅខ្លះ នោះនាងកាន់តែមានភាពទាក់ទាញចំពោះខ្ញុំ›»
[រូបភាពនៅទំព័រ១៩១]
សេចក្ដីស្រឡាញ់និងការគោរពប្រៀបដូចជាកង់មុខនិងកង់ក្រោយ គឺមិនអាចខ្វះកង់មួយណាបានឡើយ
លោកអ្នកក៏ប្រហែលជាចូលចិត្តដែរ
ក្មេងជំទង់និងយុវវ័យ
សំណួរពីយុវវ័យ
សំណួរទូទៅពីយុវវ័យ មានដូចជារឿងខាងផ្លូវភេទ មិត្តភក្ដិ ឪពុកម្ដាយ សាលារៀន និងរឿងផ្សេងទៀត។
