ហេតុអ្វីសាក្សីព្រះយេហូវ៉ាមិនចូលរួមពិធីបុណ្យជាតិ?
សាក្សីព្រះយេហូវ៉ាគោរពអំណាចរដ្ឋាភិបាល ហើយពួកគេក៏មិនមើលងាយនិមិត្តសញ្ញាជាតិដែរ។ យើងទទួលស្គាល់ការពិតថាអ្នកឯទៀតអាចសម្រេចចិត្តសច្ចាប្រណិធាន គោរពទង់ជាតិ ឬច្រៀងចម្រៀងជាតិ។
ប៉ុន្តែ សាក្សីព្រះយេហូវ៉ាសម្រេចចិត្តមិនចូលរួមពិធីទាំងនោះទេ ដោយសារយើងជឿថានោះគឺផ្ទុយពីសេចក្ដីបង្រៀនក្នុងគម្ពីរ។ យើងមានអំណរគុណណាស់ដែលអ្នកឯទៀតគោរពជំនឿរបស់យើងដូចយើងគោរពជំនឿរបស់ពួកគេ។
ក្នុងអត្ថបទនេះយើងនឹងពិចារណា
តើមានគោលការណ៍គម្ពីរអ្វីខ្លះដែលទាក់ទងនឹងពិធីបុណ្យជាតិ?
សេចក្ដីបង្រៀនសំខាន់ពីរទាក់ទងនឹងការសម្រេចចិត្តរបស់យើងមានដូចជា៖
មានតែព្រះប៉ុណ្ណោះដែលសមនឹងទទួលការគោរពប្រណិប័តន៍ពីយើង។ គម្ពីរចែងថា៖«គឺព្រះយេហូវ៉ាជាព្រះរបស់អ្នក ដែលអ្នកត្រូវគោរពប្រណិប័តន៍ ហើយគឺសម្រាប់តែលោកប៉ុណ្ណោះ ដែលអ្នកត្រូវបំពេញកិច្ចបម្រើពិសិដ្ឋ»។ (លូកា ៤:៨) សច្ចាប្រណិធាននិងចម្រៀងជាតិច្រើនតែរួមបញ្ចូលពាក្យសន្យារបស់បុគ្គលម្នាក់ថាគាត់នឹងគាំទ្រ ហើយស្រឡាញ់ប្រទេសរបស់ខ្លួនជាងអ្វីៗទាំងអស់។ ដូច្នេះ សាក្សីព្រះយេហូវ៉ាយល់ថាគឺជាការខុសបើពួកគេចូលរួមពិធីទាំងនោះ។
ស្រដៀងគ្នាដែរ សាក្សីព្រះយេហូវ៉ាក៏យល់ថាការគោរពទង់ជាតិគឺជាការគោរពប្រណិប័តន៍ឬគោរពបូជារូបព្រះ ដែលគម្ពីរបានហាមឃាត់។ (កូរិនថូសទី១ ១០:១៤) ប្រវត្តិវិទូខ្លះទទួលស្គាល់ថាទង់ជាតិគឺជានិមិត្តរូបសាសនា។ ប្រវត្តិវិទូម្នាក់ឈ្មោះចូសេហ្វ ហុនលៃ ហេស បានសរសេរថា៖«និមិត្តរូបសំខាន់របស់ជាតិសាសន៍ដែលគេគោរពបូជាគឺជាទង់ជាតិ»។ a អ្នកនិពន្ធម្នាក់ឈ្មោះដានីយ៉ែល ប្រាត ម៉ាណិច បានកត់សម្គាល់ឃើញថា៖«គ្រិស្តសាសនិកនៅសម័យដើមមិនព្រម . . . គោរពបូជាអធិរាជ[រ៉ូម]ទេ។ នេះក៏ប្រហាក់ប្រហែលនឹងគ្រិស្តសាសនិកម្នាក់នៅសព្វថ្ងៃនេះដែលមិនគោរពទង់ជាតិដែរ»។ b
ទោះជាសាក្សីព្រះយេហូវ៉ាមិនគោរពទង់ជាតិក្ដី តែយើងមិនដុត មិនបំផ្លាញ ឬប្រព្រឹត្តអ្វីដែលមើលងាយចំពោះទង់ជាតិឬនិមិត្តសញ្ញាឯទៀតរបស់ជាតិទេ។
ចំពោះព្រះមនុស្សទាំងអស់គឺស្មើគ្នា។ (សកម្មភាព ១០:៣៤, ៣៥) គម្ពីរចែងថាព្រះ«បានបង្កើតជនជាតិទាំងឡាយពីបុរសតែមួយ»។ (សកម្មភាព ១៧:២៦) ហេតុនេះហើយបានជាសាក្សីព្រះយេហូវ៉ាជឿថាគឺខុសដែលលើកតម្កើងជាតិសាសន៍ឬប្រជាជាតិណាមួយថាប្រសើរជាងគេ។ យើងបង្ហាញការគោរពចំពោះមនុស្សទាំងអស់ មិនថាពួកគេមកពីណាឬរស់នៅកន្លែងណាក្ដី។—ពេត្រុសទី១ ២:១៧
ចុះបើច្បាប់តម្រូវឲ្យយើងចូលរួមពិធីបុណ្យជាតិ?
សាក្សីព្រះយេហូវ៉ាមិនប្រឆាំងរដ្ឋាភិបាលទេ។ យើងជឿថារដ្ឋាភិបាលជាផ្នែកមួយនៃ«ការរៀបចំរបស់ព្រះ» ហើយលោកអនុញ្ញាតឲ្យមានការរៀបចំនេះ។ (រ៉ូម ១៣:១-៧) ម្ល៉ោះហើយ យើងក៏ជឿថាគ្រិស្តសាសនិកគួរស្ដាប់បង្គាប់ពួកអាជ្ញាធរដែរ។—លូកា ២០:២៥
ចុះបើច្បាប់តម្រូវឲ្យអ្នកធ្វើអ្វីដែលព្រះមិនពេញចិត្ត? ក្នុងករណីខ្លះ បើអាចធ្វើបានយើងស្នើសុំរដ្ឋាភិបាលឲ្យកែតម្រូវច្បាប់នោះ។ c ប៉ុន្តែ បើមិនអាចកែតម្រូវទេ សាក្សីព្រះយេហូវ៉ាសម្រេចចិត្ត«ស្ដាប់បង្គាប់ព្រះជាអ្នកគ្រប់គ្រង ជាជាងមនុស្ស»។—សកម្មភាព ៥:២៩
តើសាក្សីព្រះយេហូវ៉ាគាំទ្ររឿងសង្គមឬរឿងនយោបាយទេ?
អត់ទេ។ សាក្សីព្រះយេហូវ៉ាមិនគាំទ្រខាងណាទេ មិនថារឿងសង្គមឬរឿងនយោបាយក្ដី។ ទោះជាយើងមិនធ្វើសច្ចាប្រណិធាន គោរពទង់ជាតិ ឬច្រៀងចម្រៀងជាតិក៏ដោយ នេះមិនមែនន័យថាយើងជាសកម្មជននយោបាយទេ។ ផ្ទុយទៅវិញ យើងធ្វើតាមជំនឿដែលមានមូលដ្ឋានក្នុងគម្ពីរអំពីរឿងទាំងនោះ។
a សៀវភៅEssays on Nationalism ទំព័រ១០៧-១០៨។
b សៀវភៅThe Way of the Gladiator ទំព័រ២១២។
c ជាឧទាហរណ៍ សូមមើលអត្ថបទដែលមានចំណងជើងថា«ការកាន់ជំហរមុតមាំនិងសមត្ថភាពវិនិច្ឆ័យ អនុម័តដោយតុលាកំពូលកាលពី៧៥ឆ្នាំមុន»។
លោកអ្នកក៏ប្រហែលជាចូលចិត្តដែរ
សំណួរដែលមនុស្សជាច្រើនសួរអំពីសាក្សីព្រះយេហូវ៉ា
ហេតុអ្វីសាក្សីព្រះយេហូវ៉ារក្សាអព្យាក្រឹតភាពក្នុងរឿងនយោបាយ?
តើពួកគេរំខានដល់សន្ដិសុខជាតិឬទេ?
សេចក្ដីបង្រៀនសំខាន់ៗក្នុងគម្ពីរ
តើព្រះពេញចិត្តនឹងការគោរពប្រណិប័តន៍ទាំងអស់ឬទេ?
មនុស្សជាច្រើនគិតថាសាសនាណាក៏ដូចសាសនាណាដែរ។
