សំណួរពីយុវវ័យ
តើបណ្ដាញសង្គមមានឥទ្ធិពលយ៉ាងណាមកលើខ្ញុំ?
តើឪពុកម្ដាយរបស់ប្អូនអនុញ្ញាតឲ្យប្អូនប្រើបណ្ដាញសង្គមឬទេ? បើអនុញ្ញាតមែន អត្ថបទនេះនឹងជួយប្អូននូវចំណុចសំខាន់បីយ៉ាង។
ក្នុងទំព័រនេះយើងនឹងពិចារណា
តើបណ្ដាញសង្គមប៉ះពាល់ពេលវេលាខ្ញុំប៉ុណ្ណាទៅ?
ការប្រើបណ្ដាញសង្គមគឺប្រៀបដូចជាការជិះសេះ តើប្អូនគ្រប់គ្រងវាឬវាគ្រប់គ្រងប្អូន?
ប្អូនស្រីចូអាណាបានរៀបរាប់ថា៖«ពេលខ្ញុំចាប់ផ្ដើមមើលបណ្ដាញសង្គម ខ្ញុំគិតថាខ្ញុំមើលតែមួយភ្លែតទេ តែភ្លេចខ្លួនខ្ញុំបានមើលអស់រាប់ម៉ោង! ការមើលបណ្ដាញសង្គមអាចធ្វើឲ្យញៀន ហើយខាតពេលវេលាទៀតផង»។
តើប្អូនដឹងទេ? បណ្ដាញសង្គមគឺនាំឲ្យញៀន ដោយសារវាបានត្រូវបង្កើតឡើងដើម្បីទាក់ទាញចិត្តមនុស្ស។ អ្នករៀបចំកម្មវិធីនោះដឹងថា ពេលគេហទំព័រណាមួយកាន់តែពេញនិយមមនុស្សនឹងចំណាយពេលមើលកាន់តែយូរ ហើយក្រុមហ៊ុនផ្សេងៗក៏ចំណាយលុយកាន់តែច្រើនដើម្បីផ្សាយពាណិជ្ជកម្មអំពីផលិតផលរបស់ពួកគេដែរ។
សូមសួរខ្លួនថា៖ ‹តើខ្ញុំច្រើនតែភ្លេចមើលម៉ោង ពេលអូសមើលបណ្ដាញសង្គមឬ? តើខ្ញុំអាចប្រើពេលវេលានោះសម្រាប់អ្វីដែលមានប្រយោជន៍ច្រើនជាងទេ?›។
អ្វីដែលប្អូនអាចធ្វើ។ កំណត់ពេលវេលាដែលប្អូននឹងចំណាយទៅលើបណ្ដាញសង្គម ហើយធ្វើតាមការកំណត់នោះ។
កំណត់ពេលវេលាដែលប្រើប្រាស់បណ្ដាញសង្គម
ប្អូនស្រីធីណាបានរៀបរាប់ថា៖«ខ្ញុំបានកំណត់ពេលវេលាលើកម្មវិធីខ្លះៗដែលខ្ញុំប្រើ បើលើសម៉ោងកំណត់យើងមិនអាចប្រើប្រាស់កម្មវិធីនោះទៀតទេ។ ក្រោយពីបានដាក់កម្រិតលើខ្លួនអស់មួយរយៈ ខ្ញុំចាប់ផ្ដើមមានតុល្យភាពច្រើនជាងទៅលើការប្រើប្រាស់បណ្ដាញសង្គម ហើយខ្ញុំមិនចំណាយពេលច្រើនពេកដូចពីមុន»។
គោលការណ៍គម្ពីរ៖ «[ចូរ]ប្រើគ្រប់ឱកាសឲ្យកើតប្រយោជន៍ច្រើនបំផុត»។—អេភេសូរ ៥:១៦
តើបណ្ដាញសង្គមប៉ះពាល់លើការគេងខ្ញុំយ៉ាងណាដែរ?
អ្នកជំនាញភាគច្រើននិយាយថាយុវវ័យត្រូវការគេងយ៉ាងហោចណាស់៨ម៉ោងក្នុង១ថ្ងៃ តែយុវវ័យជាច្រើនគេងកាន់តែតិចទៅៗ។ មូលហេតុមួយគឺដោយសារពួកគេប្រើបណ្ដាញសង្គមនៅពេលដែលត្រូវគេង។
ប្អូនស្រីម៉ារៀបានរៀបរាប់ថា៖«មុនចូលគេងខ្ញុំតែងតែមើលទូរស័ព្ទ ហើយខ្ញុំបានចំណាយពេលអស់រាប់ម៉ោងអូសទៅអូសមក។ នេះគឺជាទម្លាប់អាក្រក់ដែលខ្ញុំពិបាកផ្ដាច់ណាស់»។
តើប្អូនដឹងទេ? ការគេងមិនគ្រប់គ្រាន់អាចនាំឲ្យមានការខ្វល់ខ្វាយ និងតានតឹងចិត្ត។ យោងទៅតាមសម្ដីរបស់គ្រូពេទ្យខាងចិត្តសាស្ត្រ លោកស្រីជីន ត្វីងជី មូលហេតុធំបំផុតដែលមនុស្សមានអារម្មណ៍មិនល្អ និងមិនសប្បាយ គឺមកពីការគេងមិនគ្រប់គ្រាន់។ គាត់បន្ថែមថា បើគេងមិនគ្រប់គ្រាន់«អស់រយៈពេលយូរ» នោះអាចនាំឲ្យមាន«បញ្ហាសុខភាពផ្លូវចិត្តធ្ងន់ធ្ងរ»។ a
សូមសួរខ្លួនថា៖ ‹តើខ្ញុំគេងប៉ុន្មានម៉ោងក្នុងមួយថ្ងៃ?› ឬ‹តើខ្ញុំចេះតែអូសមើលបណ្ដាញសង្គម ពេលដែលខ្ញុំត្រូវសម្រាកនិងមុនចូលគេងទេ?›។
អ្វីដែលប្អូនអាចធ្វើ។ សូមទុកគ្រឿងអេឡិចត្រូនិកនៅឆ្ងាយពីក្បាលដំណេករបស់ប្អូន។ បើអាចធ្វើបាន សូមឈប់មើលគ្រឿងអេឡិចត្រូនិកពីរម៉ោងមុនចូលគេង។ បើប្អូនត្រូវដាក់ម៉ោងរោទ៍ដើម្បីដាស់ប្អូននៅពេលព្រឹក សូមប្រើអ្វីផ្សេងក្រៅពីទូរស័ព្ទដៃឬកុំព្យូទ័របន្ទះស្ដើង។
សូមផ្អាកប្រើគ្រឿងអេឡិចត្រូនិកក្នុងរយៈពេលល្មមមុនចូលគេង
ប្អូនយេរេមីបានរៀបរាប់ថា៖«ជួនកាលខ្ញុំមើលគ្រឿងអេឡិចត្រូនិកដល់យប់ជ្រៅ ប៉ុន្តែខ្ញុំខំព្យាយាមយកឈ្នះទម្លាប់នេះ។ ខ្ញុំចង់មានគំនិតចាស់ទុំជាង នេះមានន័យថាខ្ញុំត្រូវមានទំនួលខុសត្រូវច្រើនជាងដែរ។ ខ្ញុំត្រូវចូលគេងលឿនជាងដើម្បីខ្ញុំអាចផ្ចង់អារម្មណ៍បានល្អនៅថ្ងៃបន្ទាប់»។
គោលការណ៍គម្ពីរ៖ «[ចូរ]ពិចារណាឲ្យដឹងប្រាកដថាការអ្វីដែលសំខាន់ជាង»។—ភីលីព ១:១០
តើបណ្ដាញសង្គមប៉ះពាល់ផ្លូវចិត្តខ្ញុំយ៉ាងណា?
តាមការសិក្សាមួយបានរៀបរាប់ថា សិស្សវិទ្យាល័យស្រីស្ទើរតែពាក់កណ្ដាលបានត្រូវស្ទង់មតិឃើញថាពួកគេ«ច្រើនតែក្រៀមក្រំចិត្ត និងអស់សង្ឃឹម»។ មូលហេតុមួយដែលបណ្ដាលឲ្យពួកគេមានអារម្មណ៍ដូច្នេះគឺដោយសារតែការប្រើប្រាស់បណ្ដាញសង្គម។ លោកឡេនណឺត ស្សាកបាននិយាយថា៖«បើប្អូនចំណាយពេលកាន់តែច្រើនលើបណ្ដាញសង្គម ហើយប្រៀបធៀបខ្លួនប្អូនជាមួយអ្នកឯទៀត នោះប្អូនទំនងជាមានអារម្មណ៍ធ្លាក់ទឹកចិត្តកាន់តែច្រើនដែរ»។ b
ប្អូនស្រីហ្វីប៊ីបានរៀបរាប់ថា៖«គឺធម្មតាទេដែលយុវវ័យប្រៀបធៀបខ្លួននឹងអ្នកឯទៀត ហើយបណ្ដាញសង្គមកាន់តែស្រួលឲ្យពួកគេធ្វើបែបនេះ។ បើយើងមើលរូបថតដែលអ្នកឯទៀតបង្ហោះអស់រាប់ម៉ោង ហើយប្រៀបធៀបជីវិតរបស់ខ្លួននឹងអ្នកឯទៀត នោះធ្វើឲ្យយើងគិតថាជីវិតរបស់យើងមិនសប្បាយដូចគេដូចឯងទេ»។
តើប្អូនដឹងទេ? ទោះជាបណ្ដាញសង្គមអាចជួយយើងឲ្យទាក់ទងជាមួយមិត្តភក្ដិក៏ពិតមែន តែវាមិនអាចជំនួសមិត្តភាពដោយផ្ទាល់នោះឡើយ។ លោកនីកូឡាស ខាដឺរឺសបានសរសេរថា៖«គ្រឿងអេឡិចត្រូនិកមិនធ្វើឲ្យយើងមានទំនាក់ទំនងដែលសប្បាយជាមួយអ្នកឯទៀតទេ។ នេះមិនធ្វើឲ្យយើងស្កប់ចិត្តទេ ដោយសារមនុស្សត្រូវការមានទំនាក់ទំនងផ្ទាល់ជាមួយអ្នកឯទៀត»។ c
សូមសួរខ្លួនថា៖‹តើខ្ញុំមានអារម្មណ៍ឯកោក្រោយឃើញអ្វីដែលមិត្តរបស់ខ្ញុំធ្វើទេ?› ឬ‹ពេលឃើញជីវិតដ៏សប្បាយរបស់អ្នកឯទៀតនៅក្នុងបណ្ដាញសង្គម តើធ្វើឲ្យខ្ញុំមានអារម្មណ៍ថាជីវិតខ្ញុំគួរឲ្យធុញទ្រាន់ទេ?› ឬក៏‹តើខ្ញុំធ្លាក់ទឹកចិត្តទេ ពេលខ្ញុំបង្ហោះអ្វីមួយ តែមិនសូវមានគេចុច«ចូលចិត្ត»?›។
អ្វីដែលប្អូនអាចធ្វើ។ សូមព្យាយាមផ្ដាច់ខ្លួនពីបណ្ដាញសង្គមយ៉ាងហោចណាស់ពីរបីថ្ងៃ មួយសប្ដាហ៍ ឬរហូតដល់មួយខែ។ សូមចំណាយពេលជាមួយមិត្តភក្ដិដោយផ្ទាល់ឬតាមទូរស័ព្ទឲ្យបានច្រើនជាង នោះប្អូននឹងឃើញថាប្អូនមិនសូវតានតឹងចិត្ត ហើយសប្បាយចិត្តជាងពេលដែលប្អូនផ្ដាច់ខ្លួនពីបណ្ដាញសង្គម។
តើប្អូនអាចចំណាយពេលច្រើនជាងជាមួយមិត្តភក្តិដោយផ្ទាល់បានទេ?
ប្អូនស្រីព្រីអាណាបានរៀបរាប់ថា៖«ពេលខ្ញុំប្រើបណ្ដាញសង្គម ខ្ញុំឃើញថាខ្ញុំផ្ដោតអារម្មណ៍ទៅលើអ្វីដែលអ្នកឯទៀតធ្វើច្រើនពេក។ ប៉ុន្តែក្រោយពីខ្ញុំលុបគណនីរបស់ខ្ញុំ ខ្ញុំមានអារម្មណ៍ថាដូចជាដកអម្រែកចេញពីស្មា ហើយខ្ញុំមានពេលធ្វើអ្វីដែលមានប្រយោជន៍ច្រើនជាង»។
គោលការណ៍គម្ពីរ៖ «ចូរឲ្យម្នាក់ៗពិនិត្យមើលការប្រព្រឹត្តរបស់ខ្លួន រួចគ្រប់គ្នានឹងមានហេតុត្រេកអរអំពីខ្លួនផ្ទាល់ ដោយមិនប្រៀបធៀបខ្លួននឹងអ្នកឯទៀត»។—កាឡាទី ៦:៤
លោកអ្នកក៏ប្រហែលជាចូលចិត្តដែរ
គំនូរជីវចលលើក្ដារខៀន
ចូរប្រើអ៊ីនធឺណិតដោយឈ្លាសវៃ
ពេលអ្នកភ្ជាប់ជាមួយនឹងមិត្តភក្ដិ សូមប្រើដោយរីករាយនិងប្រុងប្រយ័ត្នជានិច្ច។
សំណួរពីយុវវ័យ
តើការល្បីតាមអនឡាញសំខាន់យ៉ាងណា?
មនុស្សខ្លះបានប្រថុយជីវិតដើម្បីទទួលបានចំនួនអ្នកតាមដាននិងចំនួនអ្នកចូលចិត្តច្រើន។ តើនេះសមឲ្យប្អូនប្រថុយគ្រោះថ្នាក់ដើម្បីបានល្បីតាមអនឡាញឬទេ?
សំណួរពីយុវវ័យ
តើខ្ញុំគួរធ្វើយ៉ាងណាបើឪពុកម្ដាយមិនអនុញ្ញាតឲ្យខ្ញុំប្រើប្រាស់បណ្ដាញសង្គម?
តាមមើលទៅមនុស្សគ្រប់គ្នាសុទ្ធតែប្រើបណ្ដាញសង្គម។ ប៉ុន្តែតើនោះជាការពិតមែនទេ? តើប្អូនអាចធ្វើយ៉ាងណាបើឪពុកម្ដាយមិនអនុញ្ញាតឲ្យប្អូនប្រើប្រាស់វា?
ទស្សនៈពីមនុស្សស្រករប្អូន
ទស្សនៈរបស់ប្អូនៗយុវវ័យអំពីទូរស័ព្ទដៃ
ចំពោះយុវវ័យជាច្រើនទូរស័ព្ទដៃជាឧបករណ៍ដ៏ចាំបាច់សម្រាប់ភ្ជាប់ទំនាក់ទំនងដែលពួកគេខ្វះមិនបាន។ តើការមានទូរស័ព្ទដៃមានគុណប្រយោជន៍និងគុណវិបត្ដិអ្វីខ្លះ?
សំណួរពីយុវវ័យ
តើខ្ញុំគួរដឹងអ្វីខ្លះអំពីការផ្ញើសារ?
ការផ្ញើសារអាចបំផ្លាញចំណងមិត្តភាព និងកេរ្ដិ៍ឈ្មោះរបស់ប្អូន។ សូមរកមើលថា តើនេះអាចកើតឡើងតាមរបៀបណា។
