Kuma twala ku dimatekenu dya muvu wa 2023, twamukingila ima yambote phal’etu, phala we o jindandu jetu. Mukonda dyahi tutena kudyelela kwila o ima kuhádya yandakala kyambote?

 Mu Bibidya mwala o njimbu yambote ya kwila, o maka utudibhana nawu kindala, kwakambe ngó bhofele andabhwa kyá. Mu kidi, o Bibidya “a isoneka phala ku tulonga, phala bhukaxi ka . . . kiswinisu kya Mikanda Ikôla, tukale ni kidyelelu.”—Loma 15:4.

•   Phala kudilonga dingi yalungu ni ikanenu ya Bibidya, tanga o milongi “Você pode acreditar num futuro melhor.”

 O Bibidya yamba kwila “o kidyelelu kitwala nakyu ku mwenyu wetu kyedi kala o kifikidilu kya naviyu.” (Jihebelewu 6:19) O kidyelelu kiki kitena kutukwatekesa kudibhana kyambote ni ibhidi itwala nayu kindala, kukala ni ibanzelu yambote ni kukala ni kusanguluka kwa kidi. Mu kifika:

•   Tala kyebhi o kidyelelu kya Bibidya kyakwatekesa diyala wexile mu dibhana ni maka a kunwa uhôlwa ni jidroga. Tala o vidyu Muenhu Uami ua Ngi Kumine.

•   Tala kyebhi o kidyelelu kya Bibidya kitukwatekesa kyoso kitufunda dikamba mba ndandu ya kazola. Tala o vidyu Kiximbakatesu Phala yó Wafundu Ndandu ya Kazola.

 Athu avulu akingila ima yambote, maji ala ni phata se o ima yiyi yandadikumbidila. Maji o ikanenu ya Bibidya yandadikumbidila mwene. Mukonda dyahi twala ni kidyelelu kiki? Mukonda o ikanenu ya Bibidya yatokala kwa Jihova Nzambi, a “yó kene mutanga makutu.” (Titu 1:2) Jihova ngó wala ni kutena kwa kukumbidila o ikanenu yoso yabhanga. Mwene utena kubhanga ‘yoso yala mu vondadi yê.’—Jisálamu 135:5, 6.

 Kyenyiki twamukwixana phala utene kukatula mbote ku ikanenu ya Bibidya. Eye utena kukolesa o kidyelelu kyé mu kutokwesa “o Mikanda Ikôla.” (Ikalakalu 17:11) Tala se kyebhi ki utena kubhanga kiki mu kudilonga o Bibidya n’etu, sé kufuta kima. Mateka o muvu wa 2023 ni kibanzelu kya kwila o ima ku hádya yandakala kyambote!