Mukanda Wadyanga wa Nzwá 2:1-29
2 Twana twami, nga mu mi sonekena o ima yiyi phala kimute kituxi. Maji se muta kituxi, twala ni mukwatekexi* wayuka bhu mbandu ya Tata, mwéne Jezú Kidistu.
2 Mukonda Jezú mwéne o sata yatokala* phala kukúla o ituxi yetu. Ko ituxi yetu ngó kana, maji ni ituxi ya athu oso.
3 Se tu kolokota mu kubelesela o itumu yê, twanda londekesa kwila, twa mwijiya.
4 Woso wamba kuma: “Eme nga mwijiya,” maji né kiki kabelesela o itumu yê, mwene mukwa makutu, mu kidi kale-mu.
5 Maji se muthu ubelesela o maka mê, ulondekesa kwila wazolo Nzambi. Mukonda dya kiki, twejiya kwila twala kumoxi ni mwene.
6 Woso wamba kwila wala kumoxi ni mwene, watokala kwenda kala kyendele Jezú.
7 Enu akwetu, ki nga mu mi sonekena kitumu kya ubhe, maji kitumu kyokulu kimwejiya kyá tundé kudimatekenu. O kitumu kiki kyokulu, éne o maka u mwevwile kyá.
8 Maji nga mu mi sonekena kitumu kya ubhe, o kitumu kya kumbidila Kidistu, enu wenu mwa mu kikumbidila. Mukonda o kitombe kya mubhita, o mukengeji wa kidi wa mumwika kyá.
9 Woso wamba kwila wala mu mukengeji, maji wazembe phang’yê, mwene wala hanji mu kitombe.
10 Woso wazolo phang’yê, wala mu mukengeji, mwene kalé ni kima ki mubhangesa kuta kituxi.*
11 Maji woso wazembe phang’yê, wala mu kitombe, mwene wa mukwendela mu kitombe, kejiya kwa muditela mukonda o kitombe kya mufwisa o mesu.
12 Twana twami, nga mu mi sonekena mukonda o ituxi yenu yóloloke mu dijina dya Jezú.
13 Enu mu jitata, nga mu mi sonekena mukonda mwejiya yó weneku kyá tundé kudimatekenu.* Enu mu minzangala, nga mu mi sonekena mukonda mwatolola o kadya-phemba.* Twana twami, nga mu mi sonekena mukonda mwejiya o Tata.
14 Enu mu jitata, nga mu mi sonekena, mukonda mwejiya yó wene kyá tundé kudimatekenu.* Enu mu minzangala, nga mu mi sonekena, mukonda mwaswina, muxikina mu mak’â Nzambi. Enu wenu mwatolola o kadya-phemba.*
15 Kanenu kuzola o mundu mba o ima yene ku mundu. Mukonda se muthu uzola o mundu, mwene kazolo o Tata.
16 Kuma o ima yoso yene ku mundu, o jihânji ja xitu, o lwimbi lwa mesu, ni jihânji ja kulondekesa o jimbote* jala naju o muthu, ima yoso yiyi ki yatundu kwa Tata, maji yatundu ku mundu.
17 O mundu wamubhita ni ima yoso yene-mu, maji woso ubhanga o vondadi ya Nzambi, mwéne o muthu wanda nangenena katé ku hádya ni hádya.
18 Twana twami, yiyi yene o ola ya sukina-ku, kala ki mwevu kwila o kidistu ya makutu wanda kwiza, kindala kwamoneka kyá jikidistu javulu ja makutu. Mukonda dya kiki twejiya kwila, o ola ya sukina-ku yenyiyi.
19 Sumbala ene atundu mwaxaxi ketu, maji ka tutokalele, mukonda se a tutokalele eji xala n’etu. Maji atuxisa phala kulondekesa kwila, ko athu oso a tutokala.
20 Enu a mi undu kwa yó Ukôla, enu enyoso o kidi mwa k’ijiya.
21 Eme ki nga mu mi sonekena, mukonda mwakambe kwijiya o kidi kana, maji mukonda o kidi mwakijiya, ni kwila sé-ku makutu ejila mu kidi.
22 Nanyi o mukwa makutu? Ki yó udituna kwila Jezú mwéne o Kidistu? O muthu ubhanga kiki, mwéne o kidistu ya makutu, mukonda mwene udituna o Tata ni Mona.
23 Muthu woso udituna o Mona, kala ni ukamba ni Tata. Maji woso uxikina o Mona, wala ni ukamba ni Tata.
24 Yoso i mwevu tundé kudimatekenu, yatokala inangenena moxi dyenu. Se o ima imwevu tundé kudimatekenu inangenena moxi dyenu, enu wenu mwanda nangenena kumoxi ni Mona ni Tata.
25 Mukonda dia kiki, mwene wa tukanena o mwenyu wakalelaku.
26 Nga mu mi sonekena mukonda dya yó amesena ku mi jimbidisa.
27 Kuma Nzambi wa mi undu ni nzumbi yê ikôla, enu mwala nayu, ki mwa bhindamena dingi muthu u milonga. O ku mi unda ni nzumbi ikôla, kwa kidi, ki kwa makutu kana, yene i milonga o ima yoso. Kyenyiki, kala kya milongo, kalenu kumoxi ni Nzambi.
28 Twana twami, kalenu kumoxi ni mwene, phala kyoso mwene kyanda moneka, tutene kuzwela ni kidi kyoso, phala ki tudisandule kwa mwene ni jisonyi, mu kithangana kya kutukuluka* kwê.
29 Se mwejiya kwila mwene wayuka, mwejiya we kuma woso ubhanga o ima yayuka, mwene mon’â Nzambi.
Footnotes
^ Mba, “muzokedi.”
^ Mba, “sata i zelesa o ituxi; sata ya ukamba.”
^ Mba, “kudibhukana.”
^ Kiki kilombolola ande dya Nzambi kubhanga o ima yéngi.
^ Mba, “Satanaji.”
^ Kiki kilombolola ande dya Nzambi kubhanga o ima yéngi.
^ Mba, “Satanaji.”
^ Mba, “kudizangeleka; kudinanza.”
^ Tala o Dilombolwelu.
