Mukanda wa Dyanga ku Akwa Kolindu 12:1-31
12 Jiphange jami, nga mesena kwila, mwijiya kyambote o mauhete a tubhana o nzumbi ikôla.
2 Enu mwejiya kwila, kyoso ki mwa kambele kuxikana Ngana,* akexile mu mi funyisa ni ku mi nganala ku iteka ki itena kuzwela. Enu mwa kexile mu ikayela mu maukexilu oso.
3 Kyenyiki, ngi myambela kwila, sé-ku muthu wala ni nzumbi ya Nzambi uzwela kwila, “Jezú muthu wayibha!” O muthu wala ni nzumbi ikôla, mwéne ngó utena kuzwela kwila, “Jezú mwéne o Ngana!”
4 Kwene mauhete avulu, maji o nzumbi-phe yene imoxi.
5 Kwene we maukexilu avulu a kukwatekesa akwetu, maji o Ngana yene imoxi.
6 O nzumbi ikôla ikwatekesa o athu kubhanga ima* yavulu, maji kwene ngó Nzambi imoxi ubhanga o ima yoso yiyi bhukaxi ka athu enyá.
7 Maji o kikwatekesu kibhana o nzumbi ikôla ku athu phala o mbote ya akwâ, ki dimonekena.
8 Bhukaxi ka nzumbi ikôla, sayi yú utena kuzwela ni unjimu, o mukwá utena kuzwela ni kwijiya.
9 Bhukaxi ka nzumbi yenyiyi, sayi yú ukala ni kixikanu, o mukwá ukala ni kutena kwa kusaka o mauhaxi.
10 Sayi yú ukala ni kutena kwa kubhanga madiwanu, o mukwá, o kutena kwê kwa kuzwela kala polofeta, o mukwá o uhete wa kutongolola se o maka a mu tunda kwa Nzambi mba kana, o mukwá, o kuzwela madimi avulu, o mukwá hanji, o kutena kwa kulombolola o madimi.
11 O athu abhanga o ima yoso yiyi ni kikwatekesu kya nzumbi ikôla. O nzumbi yiyi yéne ibhana o mauhete yá ku muthu ni muthu kala kyandala o nzumbi.
12 Kyene we kimoxi, sumbala o mukutu wala ni idyandu yavulu, maji mukutu umoxi ngó. O idyandu we né mwene yavulu, maji yene yoso ibhanga mbandu ya mukutu umoxi, kyene we ni Kidistu.
13 Mukonda etu enyoso a tu batizala ni nzumbi imoxi ngó, phala tukale tu mukutu umoxi ngó, kikale tu Jijudé mba tu Jingeleku, tu abhika mba twala ni ufôlo, etu enyoso twa tambula nzumbi imoxi.
14 Mukonda o mukutu kiwala ngó ni kidyandu kimoxi, maji wala ni idyandu yavulu.
15 Se o kinama kyamba kwila, “kuma kingala ngi lukwaku, ki ngi bhange mbandu ya mukutu,” o kwila kiki kilombolola kuma, o kinama ki kyatokala ku mukutu?
16 Se o dítwi dizwela kwila, “kuma kingala ngi dyesu, ki ngi bhange mbandu ya mukutu,” o kwila kiki kilombolola kuma, o dítwi ki ditokala ku mukutu?
17 Se o mukutu woso wexile ngó dyesu, kyebhi kitweji kwívwa? Se o mukutu woso wexile ngó dítwi, kyebhi kitweji kwívwa o dizumba?
18 O kidi kyenyiki: Nzambi wate o idyandu yoso ya mukutu, kala kya mesenene mwene.
19 Se yene yoso yexile ngó kidyandu kimoxi, kyebhi kyeji kala o mukutu?
20 O idyandu yavulu, maji o mukutu umoxi ngó.
21 O dyesu ki ditena kwambela o lukwaku kwila, “ki nga kubhindamena.” O mútwe ki utena kwambela o inama kwila, “ki nga mi bhindamena.”
22 Kyenyiki, katé mwene o idyandu ya mukutu ya kambe nguzu, twa ibhindamena.
23 O idyandu ya mukutu wetu i tumona kwila yakambe valolo, etu tu ibhana dingi valolo ya dikota. Kyenyiki, o idyandu yakambe o valolo yene i tulanga dingi kyambote.
24 Maji o idyandu ya mukutu wetu yala dingi ni valolo, ki ibhindamena ku ilanga kyavulu. Mu kiki, Nzambi wabhange o mukutu mu ukexilu yú, mwene wabhana dingi kijingu ku idyandu ya kambe valolo,
25 phala o mukutu ki udiwanune, maji o idyandu yoso i dilange mudyâ.
26 Se kidyandu kimoxi kikata, o idyandu yoso ikata we. Se kidyandu kimoxi a kibhana kijingu, o idyandu yoso ya mukwá isanguluka-n’ê kumoxi.
27 Enu-phe mu mukutu wa Kidistu, kala muthu mudyenu, kidyandu kya mukutu yú.
28 Mu kilunga ima yoso Nzambi wa ite mu kididi kyê: Kya dyanga o jipoxolo, kya kayadi o jipolofeta, kya katatu o alongexi, mu kusuluka, ikalakalu ya madiwanu, o kutena* kwa kusaka mauhaxi, kukwatekesa yó a bhindama, uhete wa kutumina, ni kuzwela madimi avulu.
29 O kwila enyoso jipoxolo? O kwila enyoso jipolofeta? O kwila enyoso alongexi? O kwila enyoso abhanga ikalakalu ya madiwanu?
30 O kwila enyoso ala ni kutena kwa kusaka mauhaxi? O kwila enyoso azwela madimi avulu? O kwila enyoso ala ni kutena kwa kulombolola* mu madimi engi?
31 Kyenyiki, swinenu mu kusota mauhete a betakota. Maji nganda mi londekesa hanji o kima kya beta dingi kota, ima ya mukwá ndenge.
Footnotes
^ Mu Ngel.: “kyoso ki mwexile mu akwa jixi jengi.”
^ Mba, “ikalakalu.”
^ Mba, “uhete wa kusaka.”
^ Mba, “kulungulula.”
