Mukanda wa Dyanga ku Akwa Kolindu 6:1-20
6 Se eye wala ni maka ni phangyé, mukonda dyahi uya mu inzo ya kufundisa phala kubatula o maka bhu pholo ya athu katumaka o ijila ya Nzambi? Mukonda dyahi kuye bhu pholo ya athu atumaka o ijila ya Nzambi?*
2 Ki mwejiya kwila o athu a Nzambi* anda fundisa o mundu yú? Se enu mwanda fundisa o mundu, o kwila ki mutena kubatula o maka ofele?
3 Enu ki mwejiya kwila twanda fundisa jianju? Mu kiki, mukonda dyahi kimutena kufundisa o maka a mundu yú?
4 Se enu mwala ni maka a mundu yú phala kwabatula, mukonda dyahi mwa ambata ku athu katokala mu kilunga phala kwabatula?
5 Ngi mitangela o ima yiyi phala ku mikwatesa jisonyi. O kwila mwaxaxi kenu kimwala muthu wala ni unjimu phala kufundisa o jiphange jê?
6 Maji né kiki, phange wambata phang’yê mu inzo ya kufundisa ni ku mutatela bhu pholo ya athu katumaka Nzambi!
7 Kyoso ki mu dyambata mu inzo ya kufundisa, mwa mu dikwatesa jisonyi. Kikota kwehela ku mibhanga kyayibha? Kikota kwehela o muthu n’a kale ni ima yenu?
8 Maji-phe, enu mwa mubhanga ima yayibha ni kunyana o jiphange jenu!
9 Enu ki mwejiya kwila oso abhanga o ima yayibha kanda lundula o Utuminu wa Nzambi? Kanenu kudinganala. O akwa kubhanga o undumbu, abhezi a iteka, akwa jiphánda, mala ala ni jihânji ja kubhanga undumbu* ni mala ni akwâ, ni mala ene muzeka ni mala ni akwâ,
10 o miyi, akwa lwimbi, o jihôlwa, akwa kuxinga akwâ,* ni akwa kunyana, enyoso yá kanda lundula o Utuminu wa Nzambi.
11 M’ukulu amoxi mudyenu, kyene kyakexile. Maji bhukaxi ka nzumbi yê, Nzambi wa misukula, wa mizelesa, wa mimono kala mu athu ayuka mu dijina dya Ngana Jezú Kidistu.
12 Eme ngala ni ufôlo wa kubhanga o ima yoso, maji ima yoso-phe ki ibhekela mbote. Ngala ni ufôlo wa kubhanga o ima yoso, maji kinganda kwehela kima kyoso-kyoso ku ngitumina kala ngi mubhika.
13 O kudya a kubhange phala o dikutu, o dikutu adibhange phala o kudya. Maji o ima iyadi yiyi, Nzambi wanda ibhwisa. O mukutu ka ubhange phala kubhanga nawu undumbu,* maji a ubhange phala o kikalakalu kya Ngana, o Ngana-phe, mwéne wavu o mukutu.
14 Maji Nzambi wa fukununa o Ngana, mu kutena kwê, wanda tu fukununa we mw’alunga.
15 Kimwejiya kwila o mikutu yenu yatokala kwa Kidistu? O kwila kifwama kukatula o idyandu yatokala kwa Kidistu ni ku ibunda kumoxi ni kidyanzunga? Kana, kikyene!
16 Kimwejiya kwila o muthu udibunda ni kidyanzunga udibhanga mukutu umoxi ni mwene? Mukonda Nzambi wambe, wixi: “Kiyadi kyâ, anda kala xitu imoxi ngó.”
17 Kyenyiki, woso wala kumoxi ni Ngana, ukala ni kibanzelu kimoxi ni mwene.*
18 Lengenu o undumbu! Kituxi kyoso kita o muthu, ukita kukanga dya mukutu wê, maji woso ubhanga undumbu* wamuta kituxi ku mukutu wê.
19 Enu ki mwejiya kwila o mikutu yenu, tembulu ya nzumbi ikôla yala momwenu, o nzumbi ya mibhana Nzambi? Enu wenu ki mwa ditokala, kana!
20 Mukonda Nzambi wa misumbu ni kima kyala ni valolo yadikota. Kyenyiki, mu ximanenu ni mikutu yenu.
Footnotes
^ Mu Ngel.: “athu akôla.”
^ Mu Ngel.: “athu akôla.”
^ Tala o Dilombolwelu.
^ Mba, “kukwama akwâ ni izwelu yâ.”
^ Mu Ngeleku, por·nei′a. Tala o Dilombolwelu.
^ Mba, “u kala nê nzumbi imoxi.”
^ Mu Ngeleku, por·nei′a. Tala o Dilombolwelu.
