Kala Kyasoneka Máluku 2:1-28
2 Mu kubhita izuwa, mwene wayi dingi mu Kafalanawú. Kyenyiki, o njimbu ya kwila mwene wakexile m’onzo, ya di mwange.
2 Anga athu avulu a bhongoloka. Mu inzo kimwexile dingi kididi, né mwene bhu mwelu, mwene anga umateka kwa longa o Mak’â Nzambi.
3 A mu bhekela haxi katenene kwenda, a mu ambata ku kiwana kya mala.
4 Maji, ene katenene ku mwambata bhwala Jezú mukonda dya mundu. Mu kiki, a katula o mateya kuthandu dya inzo, anga a kulumukisa o kipoya bhwa kexile o haxi, bhu kididi bhwa kexile Jezú.
5 Jezú kyamono o kixikanu kyâ, wambela o haxi, wixi: “Mon’ami, ituxi yé yóloloke.”
6 Amoxi ku jimesene ja kulonga o Kijila akexile bhenyobho, amateka kuxinganeka ku mixima yâ, exi:
7 “Mukonda dyahi o diyala didi wa mu zwela o ima yiyi? Mwene wa mu xongwena Nzambi. Nanyi utena kuloloka o ituxi? Ki Nzambi ngó?”
8 Maji mu kithangana kyenyókyo, Jezú mu kwijiya kwila, ene akexile mu xinganeka mu ukexilu yú, wa ebhwidisa, wixi: “Mukonda dyahi mwa mu xinganeka o ima yiyi ku mixima yenu?
9 Ihi ya bhonzo dingi? O kutangela o haxi kwila, ‘Ituxi yé yóloloke,’ inga o ku mu tangela kwila, ‘Balumuka, zangula o kipoya kyé, ni wende’?
10 Maji phala mu k’ijiye kwila, o Mon’a muthu wala ni ungana wa kuloloka o ituxi mu ngongo . . . ” mwene wambela o haxi, wixi:
11 “Nga kutumu: Balumuka, zangula o kipoya kyé, ndé kubhata dyé.”
12 Mwene anga ubalumuka, mu kithangana kyenyókyo uzangula o kipoya kyê, utunda bhu pholo dya ene oso. Mukonda dya kiki, ene oso adiwana kyavulu, ya aximana Nzambi, exi: “Kiluwa tu mona kima kala kiki.”
13 Lwa mukwá dingi, mwene wayi ku mbandu ya musanza wa kalunga, mundu woso wa mu bhongolokela, anga umateka kwa longa.
14 Kyakexile mu bhita, mwene wamono Levi mon’a Lufewu, waxikama bhu kididi kya kutambula o lubhaku, wa mwambela, wixi: “Kala u mukayedi wami.” Mwene wa balumuka, anga u mu kayela.
15 Mu kubhita ithangana, Jezú wakexile mudya* mu inzo ya Levi, kumoxi ni maxibulu mê, ni akwa kutambula lubhaku ni akwa ituxi, mukonda avulu mudyâ akexile mu mu kayela.
16 Maji o jimesene ja kulonga o Kijila ja Jifalizewu, kyamono kwila, mwene wakexile mudya kumoxi ni akwa kutambula o lubhaku ni akwa ituxi, ene ebhwidisa o maxibulu mê, exi: “Mukonda dyahi o Mesene yenu wa mudya kumoxi ni akwa kutambula o lubhaku ni akwa ituxi?”
17 Mu kwívwa o maka yá Jezú wa atangela, wixi: “O athu adisanze ka bhindamena musaki, maji yó akate. Eme ki ngeza mu kwixana o athu ayuka, maji o akwa ituxi.”
18 O maxibulu a Nzwá ni Jifalizewu akexile mu jejuwala.* O athu eza kwa Jezú anga a mu ibhwidisa, exi: “Mukonda dyahi o maxibulu a Nzwá ni maxibulu a Jifalizewu ene mu jejuwala, maji o maxibulu mé kene mu jejuwala?”
19 Jezú-phe, wa atambwijila: “O kwila o makamba a ngayala, a jejuwala kyoso ngayala kyakala nawu? Mu kithangana kyakala hanji ni ngayala katena kujejuwala.
20 Maji kwanda kwiza izuwa, o ngayala anda kwa katula nawu. Mu kizuwa kyenyókyo, kyene kyanda jejuwala.
21 Kana muthu uta kibanji* kya mulele wa ubhe mu kizwatu kyo ukulu. Se mwene ubhanga kiki, o kibanji* kya mulele wa ubhe kyanda sunga o kizwatu kyo ukulu, o kutanduka kwê anga kuvula dingi.
22 Kyene we kimoxi, kana muthu uta vinyu ya ubhe mu jimbinda* jokulu. Se muthu ubhanga kiki, o jimbinda jibudika, o vinyu idibota. Kyenyiki, o vinyu ya ubhe atokala ku ita mu jimbinda ja ubhe.”
23 Jezú ni maxibulu mê akexile mu bhita mu mábhya mu kizuwa kya Sábhalu. Kyoso kyayi ni kwenda, o maxibulu mê amateka kukatula o idima.*
24 Jifalizewu-phe, a mu ibhwidisa, exi: “Talesa! Mukonda dyahi ene a mu bhanga o kima katokala ku kibhanga mu kizuwa kya Sábhalu?”
25 Maji mwene wa atambwijila, wixi: “Kiluwa mutanga ya bhangele Davidi kyoso mwene ni yó akexile-nê kumoxi kyakexile ni nzala?
26 Mu izuwa ya mukunji wadikota Abiyatale, mwene wa bokonene mu inzo ya Nzambi. Anga udya o jimbolo ja sata, ki ji mu tokalele, maji ja tokalele ngó o akunji, yu wabhana we ku mayala akexile-nê kumoxi.”
27 Jezú anga wa atangela dingi: “Nzambi wabhange o Sábhalu mukonda dya muthu, maji kabhange o muthu mukonda dya Sábhalu.
28 Mu kiki, o Mon’a muthu, Ngana katé mwene ni ya kizuwa kya Sábhalu.”
Footnotes
^ Mba, “wa xikama ku meza.”
^ Mba, “kujila.”
^ Mba, “kibandeku.”
^ Mba, “kibandeku.”
^ O jimbinda jiji, akexile mu ji bhanga ni ibha ya yama.
^ Mu ukulu, o idima yiyi akexile mu bhanga na-yu jimbolo.
