Kala Kyasoneka Máluku 7:1-37
7 O Jifalizewu ni amoxi ku jimesene ja kulonga o Kijila atundu mu Jeluzaleme, a bhongolokela Jezú.
2 Ene a mona amoxi ku maxibulu mê a mudya ni maku axidi, mba sé kwa sukula.*
3 (Kuma o Jifalizewu ni Jijudé joso kene mudya sé kusukula o maku katé mu jiphuna, mu kukayela o ijila ya jikuku jâ.
4 Kyoso kyatunda bhu kitanda, kene mudya sé kudisukula. Sayi ijila ya mukwá ya tambula ene, ene mu ikayela, kala o batizu ya jikopho, ya masanga, ni ya jimbya ja kóbidi.)
5 O Jifalizewu jiji ni jimesene ja kulonga o Kijila, a mwibhwidisa, exi: “Mukonda dyahi o maxibulu mé kene mu belesela o ijila ya jikuku jetu, maji ene mudya ni maku axidi?”
6 Mwene wa a tambwijila, wixi: “Enu mu akwa mangonya! O polofeta Izaya wazwela o kidi kyalungu ni enu, kyoso kyambe: ‘O mundu yú u ngi bheza ni dikanu, maji o mixima yâ-phe, ya ngi kala dikanga.
7 Ene a ngi bheza mu kingoho, mukonda alonga o ijila ya athu kala itumu.’
8 Enu muxa o kitumu kya Nzambi, maji mu di kwatenena mu ijila ya athu.”
9 Mwene wa atangela dingi, wixi: “Enu mwene mu sota ndunge phala kubhukumukina o kitumu kya Nzambi, ni mu kayele o ijila yenu.
10 Mu kifika, Mozé wambe, wixi: ‘Xila tat’enu ni mam’enu,’ ni kwila, ‘Woso uxinga* tat’â mba many’â, atokala ku mu jibha.’
11 Maji mu zwela, mwixi: ‘Se muthu utangela tat’â mba many’â, wixi: “Yoso i ngala nayu yeji kukwatekesa, nga ibhakula* kwa Nzambi,”’
12 enu ki mu mwehela dingi kubhanga né ngó kima kimoxi kyeji kwatekesa tat’â mba many’â.
13 Kyenyiki, mu kamba kubhana valolo mu mak’â Nzambi ni ijila yenu i mwa bhana ku athu. Sayi hanji ima yavulu i mu bhanga, yadifu ni yiyi.”
14 Mwene wexana dingi o mundu, anga wa atangela, wixi: “Ivwenu enu enyoso, tongololenu yoso i nganda mi tangela.
15 Sé-ku kima kyala kukanga dya muthu, kyoso ki mu bokona, ki tena ku mu xidisa, maji o ima itunda moxi dya muthu, yéne i mu xidisa.”
16 ——
17 Kyoso kyatundu bhukaxi ka mundu, wabokona m’onzo, anga o maxibulu mê amateka ku mu ibhwidisa yalungu ni kifika.
18 Kyenyiki, mwene wa a ebhwidisa, wixi: “Enu mwakambe we ku kitendela kala ene? Ki mu kijiya kwila o kima kyala kukanga kibokona ku muthu, ki kitena ku mu xidisa?
19 Kuma kibokona mu mala, kana ku muxima, anga ki tundila bhoxi.” Mu kuzwela kiki, mwene walondekesa kwila makúdya oso, athu atena ku adya.
20 Mwene wambe dingi, wixi: “O kima kitunda moxi dya muthu, kyéne ki mu xidisa.
21 Mukonda mu mixima ya athu mwene mu tunda ixinganeku yayibha, maundumbu,* wiyi, ujibhangânga,
22 jiphánda, hânji ya kumesena ima yangene, usweya, ufumbe, uhabhu,* lwimbi, kulebhula, ukumbu, ni wôwa.
23 O ima yoso yiyi yayibha itunda moxi dya muthu, yéne i mu xidisa.
24 Jezú wabalumuka, anga uya mu jisanzala ja Tilu ni Sidónya. Mwenyomo wabokona m’onzo, mukonda ka mesenene kwila athu a k’ijiya kuma mwene wabhixila, maji né kiki o athu eza mu k’ijiya.
25 Mu kithangana kyenyókyo, sayi muhatu wakexile ni kamona ka muhatu wexile ni nzumbi yayibha, wevu yalungu ni Jezú yu wayi katé bhwa kexile mwene, anga u mu fukamena bhu inama.
26 O muhatu wexile mukwa Ngelexa, a mu vwala ku mwiji wa Silofenixa, mwene wakexile mu dyondela Jezú, phala kukaya o dimonyo kwa mon’ê.
27 Maji Jezú wa mu vutwila: “Ehela hanji o twana kudyanga kwikuta, mukonda ki kitokala kukatula o mbolo ya ana ni ku ibhana ku twana twa jimbwa.”
28 Maji o muhatu wa mu tambwijila, wixi: “Kyene Ngana, katé mwene o twana twa jimbwa twala moxi a meza, tudya o isesekenya i lawukisa o twana.”
29 Kyenyiki, Jezú wa mu tambwijila, wixi: “Mukonda dya kitambwijilu kyé, ndé kyá kubhata dyé, o dimonyo dya tundu kyá kwa mon’é.”
30 Kyenyiki, mwene wayi kubhata, yu wasange o kamona kazeka bhu hama, o dimonyo dya mu tundile kyá.
31 Kyoso Jezú kyatundu mu mbanza ya Tilu, wabhiti mu Sidónya, yu wayi ku Kalunga ka Ngalileya, bhukaxi ka jimbanza ja Dekapolo.*
32 Mwenyomo, a mu bhekela diyala dyexile muxilu, dyexile we ni kifidisu mu kuzwela. Athu anga a mu dyondela phala kuta o maku mê kuthandu dya diyala.
33 Jezú wa mu katula bhwa kexile o mundu, yu wa sondoloka n’ê. Anga uta o milembu mu mátwi a diyala, yu wate mathe, anga ubabata ku dimi dya diyala.
34 Kyoso kyakexile mu tala ku dyulu, wa hemena, yu wambe: “Efata,” kilombolola: “Xitunuka.”
35 Kyenyiki, o mátwi a diyala a xitunuka, o kifidisu ku dimi kyabatuka, mwene anga u mateka kuzwela kyambote.
36 Mwene-phe wa a tendelesa phala ka kitangele muthu, maji kyoso kyakexile mwa tendelesa dingi, o athu a swinine ni kufumanesa o kima kyabhiti.
37 O athu adiwana kyavulu, akexile mu zwela, exi: “Mwene ubhanga kyambote o ima yoso. U bhangesa katé mwene o maxilu kwívwa, o mabubu kuzwela!”
Footnotes
^ O Jifalizewu ni Jijudé ja ka mukwá, akexile mu sukula o maku, kala kya kexile mu tuma o ijila yâ.
^ Mba, “u xongwena.”
^ Mu Ngel.: “kolobá.”
^ Mu Ngeleku, pornei’a. Tala o Dilombolwelu.
^ Mu Ngeleku, asélgeia. Tala o Dilombolwelu.
^ Mba, “mbandu ya Dikwinyi dya Jimbanza.”
