Kala Kyasoneka Nzwá 1:1-51
1 Kudimatekenu dyexile o Dyambu, o Dyambu dyakexile ni Nzambi, o Dyambu dyexile nzambi.
2 Kudimatekenu mwene wexile ni Nzambi.
3 Ima yoso yobhange bhukaxi ka mwene, sé-ku kima kyobhange sé mwene.
O kima kyeza
4 bhukaxi ka mwene, o mwenyu. O mwenyu wexile o mukengeji wa athu.
5 O mukengeji wa mu mwika mu kitombe, o kitombe-phe ki kyatena kujima o mukengeji.
6 Kwexile diyala a mu tumikisa kala mukunji wa Nzambi, dijina dyê Nzwá.
7 O diyala didi, wejile phala kubhana umbangi wa mukengeji, phala bhukaxi kê athu oso axikane.
8 Mwene ki mwéne wexile o mukengeji, maji wejile phala kubhana umbangi walungu ni mukengeji.
9 O mukengeji wakidi umwikina athu oso, weji kwiza mu ngongo.
10 Mwene wakexile mu ngongo, o ngongo-phe a ibhange bhukaxi ka mwene, maji o athu* mu ngongo ka mwijidile.
11 Mwene weza ku mundu wê, maji ene ka mu tambulula.
12 Maji yó oso a mu tambulula, mwene wa abhana o kutena kwa kukala an’a Nzambi, mukonda alondekesa kixikanu mu dijina dyê.
13 Ene ka avwala mu manyinga, né mu vondadi ya xitu mba ya athu, maji mu vondadi ya Nzambi.
14 Kyenyiki o Dyambu dya dibhange xitu, di dyatungu mw’axaxi k’etu, etu twamono o kubhenya kwê, kubhenya kala kwa mona umoxi-élele wa tat’ê. Mwene wezalele ni kidi ni ngalasa* ya Nzambi.
15 (Nzwá wabhana umbangi walungu ni mwene, wadikola wixi: “Yó mwéne nga mutange, ngixi: ‘O muthu wa mukwiza kudima dyami, wa ngi twamena, mukonda mwene wadyangele kyá kukala ku mwenyu, kyoso eme kiluwa a ngi vwala.’”)
16 Etu twene mu tambula nzungule ya henda yê, mukonda mwene wezala ni henda.
17 Kuma o Kijila a kibhele bhukaxi ka Mozé, maji o henda ni kidi, kyejila bhukaxi ka Jezú Kidistu.
18 Sé-ku muthu wa mwene kyá Nzambi, o nzambi imoxi-élele, wala ku mbandu ya Tata,* mwéne wa tu londekesa-Nê.
19 Yú wene o umbangi wabhana Nzwá, kyoso o Jijudé ku Jeluzaleme kya tumikisa o akunji ni Jilevita, phala ku mwibhwidisa, exi: “Éye nanyi?”
20 Mwene kaditunu ku atambwijila, maji wambe: “Eme, ki éme ngi Kidistu.”
21 Ene a mwibhwidisa: “Mu kiki-phe, éye nanyi? O kwila eye Elija?” Mwene wa atambwijila: “Kana!” Ene exi dingi: “Éye u Polofeta twene mu mu kinga?” Mwene wixi: “Kana!”
22 Ene anga a mu ibhwidisa: “Éye nanyi? Tutangele phala tutene kuzwela kima kwa yó a tu tumu. Ihi iwamba yalungu n’eye?”
23 Mwene wambe wixi: “Éme mwene o muthu, udikola mu mukáwu: ‘Yudikenu o njila phala Jihova,’ kala kyasoneka polofeta Izaya.”
24 O athu yá atokalele ku Jifalizewu.
25 Ene a mwibhwidisa dingi: “Mukonda dyahi wa mu batizala, se k’eye u Kidistu, né Elija, mba o Polofeta twene mu mukinga?”
26 Nzwá wa atambwijila: “Eme ngene mu batizala ni menya. Maji mw’axaxi kenu sayi muthu ki mwa mwijiya,
27 yó wa mukwiza kudima dyami. Eme ki ngi fwama ku mujituna o mikolo ya jihayi jê.”
28 Ima yiyi yabhiti mu Betanya ku sambwa dya Njolodá, kwéne Nzwá kwakexile mu batizala.
29 Mu kizuwa kyakayela, Nzwá wamono Jezú kwiza kwa mwene, yu wambe: “Talenu o Kambudi ka Nzambi, kakatula o kituxi mu ngongo!
30 Yú mwene yó u nga mi tangela kwila: ‘O muthu wa mu kwiza kudima dyami, wa ngi twamena, mukonda mwene wadyangele kyá kukala ku mwenyu, kyoso eme kiluwa a ngi vwala.’
31 Eme wami ki nga mwijidile, maji kiki kyene kya ngi bhangesa kubatizala ni menya, phala athu oso mu Izalayele a mwijiye.”
32 Nzwá wabhana we o umbangi yú: “Nga mono o nzumbi kutuluka ku dyulu kala pomba, anga ikala kuthandu dyê.
33 Eme wami ki nga mwijidile, maji Yó wa ngi tumikisa phala kubatizala ni menya, wa ngi tangela, wixi: ‘O yó wanda mumona o nzumbi ikôla ku mu tulukila, ni kukala kuthandu dyê, muthu yú mwéne ubatizala ni nzumbi ikôla.’
34 Eme nga mono o ima yiyi, ngabhana umbangi wa kwila, yú mwéne o Mon’â Nzambi.”
35 Mu kizuwa kya mukwá dingi, Nzwá wakexile ni kiyadi kya maxibulu mê,
36 kyoso kyamono Jezú yu wenda, wambe: “Talenu o Kambudi ka Nzambi!”
37 O maxibulu ayadi kyevu o ima yiyi, akayela Jezú.
38 Jezú wasakuka, kyoso kyamono kwila a mu mukayela, wa ebhwidisa, wixi: “Ihi i mwa musota?” Ene a mu tambwijila: “Labi (ilombolola “Mesene”), kwebhi kwa kuzalela?”
39 Mwene wa ambela, wixi: “Zenu mutale.” Ene ayi, ya amono kwa kexile mwene, anga ananga-nê kizuwa kyenyókyo. Yexile o ola ya kakwinyi.*
40 Ku kiyadi kiki evu Nzwá kuzwela, anga akayela Jezú, muthu umoxi Mandele, phang’ya Ximá dya Phetele.
41 Mandele wadyanga kusanga phang’yê, Ximá, yu wa mwambela: “Twasange o Mexiya” (o dijina didi, dilombolola “Kidistu”).
42 Anga u mwambata kwa Jezú. Kyoso kya mumono, Jezú wa mwambela, wixi: “Eye u Ximá, mon’a Nzwá, anda kwixana Sefa” (o dijina didi dilombolola “Phetele”).
43 Mu kizuwa kyakayela, Jezú wamesenene kuya ku Ngalileya. Mwene wasange Filipe, yu wa mwambela, wixi: “Kala u mukayedi wami.”
44 Filipe wexile mukwa Betesayida, o mbanza mwa tundile Mandele ni Phetele.
45 Filipe wasange Natanayele, wa mwambela, wixi: “Twasange yó a musoneka kwa Mozé mu Kijila, ni ku Jipolofeta, exi: Jezú, mukwa Nazalé, mon’a Zuze.”
46 Maji Natanayele wa mwibhwidisa: “O kwila ku Nazalé kutena kutunda kima kyambote?” Filipe wa mu tambwijila: “Zá, utale.”
47 Jezú wamono Natanayele kwiza kokwê, yu wambe yalungu ni mwene: “Talenu! O diyala didi mukwa Izalayele wa kidi, mwene ki mukwa makutu.”
48 Natanayele wa mwibhwidisa: “Kyebhi ki wa ng’ijiya?” Jezú wa mu tambwijila: “Eme nga kumono ande dya Filipe ku kwixana, kyoso ki waxikamene bhoxi dya muxi wa mufiku.”
49 Natanayele wa mwambela, wixi: “Mesene,* éye u Mon’a Nzambi, u Sobha ya Izalayele!”
50 Jezú wa mwambela: “O kwila waxikina mukonda nga kutangela kuma, nga kumono bhoxi dya muxi wa mufiku? Eye wanda mona hanji ima ya makota, o yiyi ndenge.”
51 Mwene anga wa mwambela, wixi: “Ni kidi kyoso ngi myambela kwila: Mwanda mona o dyulu dya jikuka, ni jianju ja Nzambi kubanda ni kukulumuka kwa Mon’a muthu.”
Footnotes
^ Mu Ngel.: “o ngongo ki ya mwijidile.”
^ Mba, “favolo.”
^ Mba, “wala ku jihata ja Tata.” Kiki kilombolola kididi kya katunda.
^ Kiki kilombolola, 16 dya ola.
^ Mu Ngel.: “Labi.”
