Ku Akwa Filipe 4:1-23
4 Kyenyiki jiphange jami ngamizolo kyavulu, ngala we ni ngunzu yavulu, enu mwala mu kusanguluka kwami, enu we mu kitundu kyami, enu akwetu kolokotenu mwa Ngana.
2 Ngitangela Evodya ni Sindike kwila akale ni kixinganeku kimoxi mwa Ngana.
3 N’eye we kuma u mukalakadi ni mukwetu* nga kubhingi kwila kolokota mu kukwatekesa o ahatu yâ akalakala kumoxi n’eme phala kuboka o njimbu yambote, kumoxi ni Kelemende, ni athu amukwa akalakala kumoxi n’eme, o majina mâ osoneke mu divulu dya mwenyu.
4 Sangulukenu jinga mwa Ngana. Ngi myambela dingi: Sangulukenu!
5 Londekesenu o kutetuluka kwenu ku athu oso, mukonda o Ngana wazukama.
6 Kanenu kukala ni hele ya kima kyoso-kyoso, maji mu ima yoso, kumoxi ni kusamba ni kudyonda, ni kusakidila bhingenu kwa Nzambi o ima yoso i mwamesena.
7 Bhenyobho, o kutululuka kwa Nzambi kusomboka o kitongolwelu kyoso, kwanda langa o mixima ni ilunji* yenu bhukaxi ka Kidistu Jezú.
8 Mu kusukaku jiphange jami, ima yoso ya kidi, yoso ya betakota, yoso yayuka, ni ima yoso yazele, ni ima yoso yawabha, ni yoso a itumbula kyambote, ni ima yoso yatokala, ni yoso ibhekela diximanu, sulukenu mu kuxinganeka o ima yoso yiyi.
9 Bhangenu o ima i mwadilongo kokwami, o ima i mwatambula ni yoso i mwevu kokwami ni ima i mwa ngimono kubhanga, o Nzambi ya paze wanda kala ni enu.
10 Kindala ngisanguluka kyavulu mwa Ngana, kuma mwa ngixinganeka dingi kyavulu, sumbala m’ukulu mwakexile kya mu ngixinganeka, maji kwa mi kambele ku kilondekesa.
11 Ki nga muzwela kiki, mukonda nga bhindamena ima, maji mu ithangana yoso ngadilongo o kusanguluka ni ima ingala nayu.
12 Ngadilongo kukala ni ima ya nzungule ni kukala ni ima yofele, mu ima yoso ni mu ithangana yoso ngadilongo o kwikuta ni kukala ni nzala, kukala ni ima ya nzungule ni kubhindama.
13 Mu ima yoso ngala ni nguzu, mukonda dya yó u ngibhana o kutena.
14 Mu kyenyiki, enu mwabhange kyambote mu ku ngi kwatekesa mu jiphaxi jami.
15 Maji enu mu akwa Filipe mwejiya we kwila, ki mwa zubhile kwívwa o njimbu yambote muveji ya dyanga kyoso ki ngatundu ku Masedonya, sé-ku kilunga kyaxikina o kikwatekesu kyami mba kya ngi kwatekesa, maji enu ngó.
16 Mukonda kyoso ki ngakexile mu Tesalónika enu mwatumikisa imbamba phala kulanga o ibhindamu yami, ki lumoxi ngó kana, maji luyadi.
17 Ki ngamusota kutambula maujitu, maji ngamesena kwila mwima ibundu yanda bandekesa o jimbote* jenu.
18 Maji yoso i nga bhindamena ngala nayu kyá, eme ngala dingi ni ima yavulu, kindala ngezala ni ima yavulu mukonda dya ima i mwa ngitumikisa bhukaxi ka Epafoloditu. O ima i mwa ngitumikisa, yedi kala sata inuha kyambote ya wabhela Nzambi.
19 Nzambi yami wanda mi kwatekesa mu ibhindamu yenu yoso ni jimbote jê joso bhukaxi ka Kidistu Jezú.
20 O fuma ikale ya Nzambi yetu, Tata yetu, katé ku hádya ni hádya. Kyene!*
21 Menekenenu o athu oso o’sole ala kumoxi ni Kidistu Jezú, o jiphange ala kumoxi n’eme a mimenekena.
22 Athu oso o’sole benge-benge yó atokala mu inzu ya Sézalu, a mimenekena.
23 O ngalasa ya Ngana yetu Jezú Kidistu ikale ni enu, kyoso ki muya ni kulondekesa o idifwa yambote.
Footnotes
^ Mba, “soko dyami; kamba dyami dya muxima.”
^ Mba, “ixinganeku.”
^ O jimbote jiji jilombolola jimbote mu nzumbi.
^ Mba, “Amen, mu dimi dya Ngeleku.”
